47. ČLANKO PROUČIBASE
Ma mukh ništa te cidel tut ando Jehova
Me upro tute uzdajina man, Jehova (PS. 31:14)
ĐILI 122 Oven zorale!
SOSTAR KA VAĆERA a
1. Sar đanaja so o Jehova mangela te ova paše oleja?
O JEHOVA vićini amen te ova paše oleja (Jak. 4:8). Ov mangela te ovel amaro Devel, Dad hem Amal. Uzo odova, ov odgovorini ko amare molitve hem pomožini amen ked isi amen pharipa. Prekali pi organizacija, sikavi amen hem štitini amen. Ama, so valjani te ćera te šaj te ova paše e Jehovaja?
2. Sar šaj te ova paše e Jehovaja?
2 Ked molinaja amen e Jehovase, čitinaja oleso Lafi hem hor razmislinaja odolestar so čitinđam, amen ovaja paše e Jehovaja. Tegani, amaro mangipe premalo leste ovela sa pobaro hem pana pobuter ceninaja le. Odova podstaknini amen te šuna le hem te hvalina le sose ov odova zaslužini (Otkr. 4:11). So pobuter upoznajinaja e Jehova, isi amen pana pobaro poverenje upro leste hem upri olesi organizacija.
3. Sar o Beng mangela te ćhivel amen te cida amen ando Jehova hem so ka pomožini amenđe niked te na cida amen ando Jehova hem andi olesi organizacija? (Psalam 31:13, 14)
3 O Beng mangela te cidel amen ando Jehova, pogotovo ked isi amen pharipa. Sar ćerela odova? Ov mangela hari pohari te ćhivel amen te našala amaro poverenje upro Jehova hem olesi organizacija. Ama, amen šaj te zaštitina amen ando Satanase zamke. Ked tani amari vera zorali hem isi amen baro poverenje upro Jehova, amen na ka cida amen olestar hem andi olesi organizacija. (Čitin Psalam 31:13, 14.)
4. Sostar ka vaćera ko akava članko?
4 Ko akava članko ka vaćera ando trin buća sebepi kola šaj te našala amaro poverenje upro Jehova hem upri olesi organizacija. Sar odola buća šaj te ciden amen ando Jehova? So šaj te ćera te suprotstavina amen e Satanase?
KED ISI AMEN PROBLEMIJA
5. Sar šaj o problemija te utičinen ko odova te našala amaro poverenje upro Jehova hem upri olesi organizacija?
5 Sare podijekh puti isi amen problemija. Nekase protivinena pe olengi porodica, a avera našalđe pi buti. Sar šaj akala problemija te ćhiven amen te našala amaro poverenje upri Jehovasi organizacija hem te cida amen olestar? Ked amare problemija but vreme trajinena, odova šaj but te obeshrabrini amen. O Satana koristini baš asavke prilike te ćhivel amen te mislina so o Jehova na mangela amen. Ov mangela te ćhivel amen te mislina so o Jehova hem olesi organizacija tane kriva aso odova so desini pe amenđe. Diso slično desinđa pe disave Izraelcenđe ko Egipat. Ko početko, on verujinđe so o Jehova ćhivđa e Mojsije hem e Arone te oslobodini len ando ropstvo (Izl. 4:29-31). Ama, kasnije, ked o faraon ćerđa olengo životi te ovel pana popharo, on krivinđe e Mojsije hem e Arone aso pe problemija hem phenđe: „O faraon hem olese sluge zamrzinđe amen sebepi tumaro. Dinđen len o mač ko vasta te mudaren amen“ (Izl. 5:19-21). On krivinđe e Devlese verna slugen aso pe problemija. Ako ka ovel tut disavo problemi kova but vreme trajini, so šaj te pomožini tuće te na našale to poverenje upro Jehova hem upri olesi organizacija?
6. So sikljovaja ando prorok Avakum ked isi amen problemija? (Avakum 3:17-19)
6 Phrav e Jehovase to vilo ki molitva hem rode lestar te pomožini tut. O prorok Avakum hine le but problemija. Jekh puti, ov pućlja pe da li o Jehova brinini pe olestar. Tegani, ov phravđa e Jehovase po vilo ki molitva hem phenđa: „Jehova, đi ked ka rodav pomoć, a tu te na šune man?... Sose dozvolineja o manuša te maltretirinen jekh jekhe?“ (Avak. 1:2, 3). O Jehova odgovorinđa ki olesi molitva (Avak. 2:2, 3). O Avakum hor razmislinđa sar o Jehova pomožinđa pe narodose hem palo odova palem hine radosno. Ov uverinđa pe so o Jehova brinini pe olestar hem so ka pomožini le ko bilo kova pharipe. (Čitin Avakum 3:17-19.) So sikljovaja olestar? Ked isi amen problemija, valjani te molina amen e Jehovase hem te vaćera lese sar osetinaja amen. Valjani te roda lestar te pomožini amen. Ako ađahar ćeraja, o Jehova ka del amen snaga koja valjani amenđe te istrajina. Ked ka dikha sar o Jehova pomožini amen, amari vera ka ovel pana pobari.
7. So phenđa e Širlijaće jekh andi olaki familija hem so pomožinđa laće te na našalji pi vera ko Jehova?
7 Ćer o buća kola ka pomožinen tut te aćhove paše uzo Jehova. Odova pomožinđa jekha amare phenjaće koja vićini pe Širli. Oj živini ki Papua Nova Gvineja. b Olaki porodica hine ćorori. Podijekh puti, on na hine len dovoljno hajbase. Jekh andi olaki familija manglja te ćhivel la te našalji po poverenje upro Jehova. Ov phenđa laće: „Tu pheneja so o Devel pomožini tuće prekalo po sveti duh, pa kaj tano akana? Ti porodica tani i dalje ćorori, tu samo našaleja to vreme ked đaja te propovedine.“ I Širli phenela: „Pućljum man: ’Da li o Devel brinini pe amendar?‘ Tegani, odmah molinđum man e Jehovase hem phenđum lese sar osetinava man. Me na ćhinavđum te čitinav i Biblija hem amare publikacije hem te đav ki služba hem ko sastankija.“ Sigate palo odova, oj haljilji so o Jehova brinini pe olake porodicaće. Olaki porodica na hine bokhali hem hine bahtale. Oj phenela: „Osetinđum sar o Jehova odgovorini ki mi molitva“ (1. Tim. 6:6-8). Ako hem ponodri ćereja o buća kola pomožinena tut te ove paše e Jehovaja, tu na ka cide tut ando Jehova sebepi o problemija ili disave sumnje.
KED O PHRALJA KOLA PREDVODINENA TANE MALTRETIRIME
8. So šaj te desini pe e phralenđe kola predvodinena ki organizacija?
8 Amare dušmanija prekalo medije hem društvena mreže širinena hovajbe hem pogrešna informacije ando phralja kola predvodinena ki organizacija (Ps. 31:13). Disave phralja tane ćhivde ko phanlipe hem optužime soj tane kriminalcija. Ko prvo veko, o hrišćanija hine len isto problemi ked o apostol Pavle hine nepravedno optužimo hem phanlo. Sar o phralja reagujinđe?
9. So disave hrišćanija ćerđe ked o Pavle hine ko phanlipe?
9 Disave hrišćanija ko prvo veko na pomožinđe e Pavlese ked hine ko phanlipe ko Rim (2. Tim. 1:8, 15). Sose? Da li lađandilje e Pavlestar, sose o manuša dikhlje le sar kriminalco? (2. Tim. 2:8, 9). Da li darandilje so hem on ka oven progonime? Bizo obzir so te ovel o razlog, zamislin sar tegani o Pavle osetinđa pe. Ov hine le but problemija hem čak rizikujinđa po životi sebepi olende (Dela 20:18-21; 2. Kor. 1:8). Amen na valjani te ova sar okola so aćhavđe e Pavle ked najviše valjanđe lese. So na valjani te bistra ked tane progonime disave phralja kola predvodinena?
10. So na valjani te bistra ked o odgovorna phralja tane progonime hem sose?
10 Ma bistri sose hijam progonime hem ko ćerela odova. Ki 2. Timoteju 3:12 pisini: „Sare kola mangena te živinen verno e Devlese ko jekhipe e Hristeja e Isuseja, ka oven progonime.“ Odolese, na iznenadini amen so o Satana posebno napadini e phralen kola predvodinena. Ov na mangela odola phralja te oven verna e Jehovase hem odoleja mangela amen te daravi (1. Petr. 5:8).
Ked o Pavle hine ko phanlipe, o Onisifor hine hrabro hem pomožinđa le. Avdije, amare phralja hem phenja pomožinena e phralenđe kola tane ko phanlipe, sar so dikhaja ki akija slika (Dikh o 11. hem o 12. odlomko)
11. So sikljovaja ando Onisifor? (2. Timoteju 1:16-18)
11 Pomožin te phralenđe hem ov uzo lende. (Čitin 2. Timoteju 1:16-18.) Ko prvo veko, jekh phral kova vićinđa pe Onisifor, reagujinđa averćhane averendar ked o Pavle hine ko phanlipe. Ov na „lađandilo ando [e Pavlese] lancija.“ Umesto odova, ov rodinđa e Pavle hem ked arakhlja le, manglja te pomožini le hem te obezbedini lese sa so valjani. Odoleja ov rizikujinđa po životi. So sikljovaja odolestar? Na valjani te mukha i dar te sprečini amen te pomožina amare phralenđe kola tane progonime. Umesto odova, valjani te da sa amendar te pomožina len (Posl. 17:17). Olenđe valjani amaro mangipe hem amari pomoć.
12. So sikljovaja ando phralja hem phenja andi Rusija?
12 Razmislin sar o phralja hem o phenja andi Rusija pomožinena pe phralenđe hem phenjenđe kola tane ko phanlipe. Ked disave phralja hem phenja ikljona ko sudo, but đene avena te podržinen len. So sikljovaja olendar? Ked neko klevetini e phralen kola predvodinena, progonini len ili ćhivela len ko phanlipe, amen na valjani te dara. Valjani te molina amen olenđe, te brinina amen andi olengi porodica hem te roda avera načinija sar šaj te pomožina len (Dela 12:5; 2. Kor. 1:10, 11).
KED MARENA AMENĐE MUJ
13. Sar šaj sebepi odova so avera marena amenđe muj te našala amaro poverenje upro Jehova hem olesi organizacija?
13 Amari familija, amare kolege ja amala ki škola šaj te maren amenđe muj odolese so propovedinaja hem so ićeraja amen ko Jehovase zakonija (1. Petr. 4:4). On šaj te phenen: „Me mangava tut sar manuš, ama ti religija tani previše strogo hem staromodno.“ Disave šaj te kritikujinen amen sebepi odova sar ponašinaja amen okolencar kola tane isključime hem te phenen: „Sar šaj tumen te phenen so mangena e manušen?“ Ked šunaja asavke buća, šaj pućaja amen: „Da li tane e Jehovase zakonija ćaće pravedna?“ Ja šaj pućaja amen: „Da li o Jehova rodela previše amendar? Da li tani olesi organizacija but strogo?“ Ako podijekh puti ka puće tut diso asavko, so ka pomožini tuće te aćhove uzo Jehova hem olesi organizacija?
O Jov hine odlučno te aćhol verno e Jehovase, na verujinđa ko hovajba kola vaćerđe lese o manuša kola phenđe soj tane olese amala (Dikh o 14. odlomko)
14. So valjani te ćera ako avera marena amenđe muj odolese so ićeraja amen ko Jehovase merilija? (Psalam 119:50-52)
14 Ov odlučno te ićere tut ko Jehovase moralna merilija. O Jov uvek ićerđa pe ko Jehovase merilija, iako avera marđe lese muj. Jekh manuš kova phenđa soj tano e Joveso amal, čak probinđa te uverini le so e Devlese nane važno da li o Jov ićeri pe ko Devlese merilija ili na (Jov 4:17, 18; 22:3). Ama, o Jov na verujinđa ko odola hovajba. Ov đanđa so e Jehovase merilija aso odova soj tano lošno, a soj tano šukar uvek ispravna hem hine odlučno te ićeri pe ko odola merilija. Ov na mukhlja o manuša te ćhinaven le te ovel verno e Jehovase (Jov 27:5, 6). So sikljovaja olestar? Iako o manuša ka maren amenđe muj, amen na valjani te sumnjina ko Jehovase merilija. Razmislin so sa nakhljan e Jehovaja. Verovatno but putija uverinđan tut so to životi tano pošukar ked ćereja odova so o Jehova phenela soj tano šukar. Valjani te ova odlučna uvek te ova deo andi Jehovasi organizacija koja ićeri pe ko olese merilija. Tegani, bizo obzir kobor o manuša marena amenđe muj, amen na ka ćhinava te služina e Jehovase. (Čitin Psalam 119:50-52).
15. Kola problemija hine la amari phen i Bridžet?
15 Te dikha o iskustvo andi amari phen i Bridžet koja živini ki Indija. Olaki familija protivinđa pe laće sebepi olaki vera. Hari palo olako krštenje, olako rom aćhilo bizi buti. Odolese, ov odlučinđa te đan te živinen olese roditeljencar kola živinđe ki aver diz. Uduri i Bridžet hine la but problemija. Olako rom aćhilo bizi buti, odolese oj valjanđa te ćerel but buti te šaj te pomožini pe porodicaće. Isto ađahar, i najpaše skupština hine 350 kilometrija ando olako ćher. Olake romesi porodica but protivinđa pe laće hem on morandilje palem te selinen pe. Ama, iznenada olako rom mulo. Palo odova, jekh ando olake trin ćhaja hine la rak hem sebepi odova mulji ked hine la 12 berš. Olaće hine but pharo. Ama, uzo sa olake problemija, olaki familija krivinđa la aso sa odova so ulo. On phenđe so ked oj ne bi ovela e Jehovaso svedoko, sa akava ne bi desini pe laće. Ama, oj hem ponodri hine la poverenje upro Jehova hem aćhilji paše uzi olesi organizacija.
16. Sar o Jehova blagoslovinđa e Bridžeta?
16 I Bridžet živinđa but dur andi skupština, odolese jekh pokrajinsko nadgledniko podstakninđa la te propovedini othe kaj živini hem te ićeri o sastankija ko po ćher. Ki početka, mislinđa so odova tano but pharo. Ama, šunđa akale phraleso savet. Počminđa te propovedini, ićerđa o sastankija ko po ćher hem hine la porodično proučavanje pe ćhajencar. So hine sebepi odova? I Bridžet počminđa te proučini bute manušencar hem but olendar krstinđe pe. Ko 2005. berš, oj počminđa te služini sar stalno pioniri. O Jehova nagradinđa la sose hine la poverenje upro leste hem so aćhilji uzi olesi organizacija. Olake ćhaja verno služinena e Jehovase. Akana ko than kaj živini isi duj skupštine. I Bridžet tani uverimi so o Jehova dinđa la snaga te istrajini, iako hine la but problemija hem olaki familija marđe laće muj.
AĆHOV PAŠE UZO JEHOVA HEM OLESI ORGANIZACIJA
17. So valjani te ova odlučna te ćera?
17 O Satana mangela te mislina so o Jehova na ka pomožini amen hem so ako aćhovaja paše uzi olesi organizacija samo ka ovel amenđe pana popharo. Ked o phralja kola predvodinena tane progonime, ćhivde ko phanlipe ili avera klevetinena len, o Satana mangela amen te dara. A ked avera marena amenđe muj, ov na mangela te ićera amen ko Jehovase merilija hem te ovel amen poverenje ki olesi organizacija. Ama, ov našti te hovavi amen, sose amen đanaja kola tane olese namere (2. Kor. 2:11). Valjani te ova odlučna te na šuna e Satanase hovajba hem te aćhova paše uzo Jehova hem olesi organizacija. Ma bistri so o Jehova niked na ka aćhavi tut (Ps. 28:7). Odolese, ma mukh nikase hem nisose te cidel tut ando Jehova (Rimlj. 8:35-39).
18. Sostar ka vaćera ko aver članko?
18 Ko akava članko dikhljam kola pharipa šaj te oven amen. Ama, amen šaj te oven amen hem disave pharipa ki skupština sebepi kola šaj te našala amaro poverenje ko Jehova hem ki olesi organizacija. So tegani ka pomožini amen? Odolestar ka vaćera ko aver članko.
ĐILI 118 „De amen pobuter vera“
a Te šaj te aćhova verna e Jehovase hem te istrajina ko akala zadnja dive, amen valjani hem ponodri te ovel amen poverenje ko Jehova hem ki olesi organizacija. O Satana mangela te uništini odova poverenje. Ko akava članko, ka dikha kola trin buća o Beng ćerela hem so valjani te ćera te na pera ko olese zamke.
b Disave anava tane menjime.