Angleder so ka phenav tumenđe so ulo palo odova, ka vaćerav tumenđe sar počminđum e punovremeno službaja.

Bijandiljum ko 1942. berš ko jekh karipsko ostrvo kova vićini pe Kurasao. Mo dad tano ando Surinam, ama preselinđa pe ko akava ostrvo te ćerel buti. Nekobor berš angleder so bijandiljum, ov krstinđa pe hem ulo prvo Jehovaso svedoko ko Kurasao. a Svako kurko proučinđa i Biblija mancar, me phraleja hem me phenjencar. Odova na hine lese hić lokho, odolese so amen na volinđam te proučina. Ked hine man 14 berš, selinđam amen ko Surinam sose valjanđam te brinina amen andi me dadesi daj.

Ko Surinam počminđum te družinav man e ternencar andi skupština kola revno služinđe e Jehovase. On hine nekobor berš pobare mandar hem služinđe sar stalna pionirija. Ked vaćerđe maje pe iskustvija andi služba, dikhljum kobor hine bahtale. Palo sastankija često hine vaćeraja andi disavi tema kotar Biblija, a disavo puti odova ćerđam đi dikhljam o zvezde. Akala amala pomožinđe maje te haljovav so me mangava te ćerav ko mo životi. Me mangljum te služinav e Jehovase. Odolese, krstinđum man ked hine man 16 berš, a uljum stalno pioniri ko 18 berš.

Sikljiljum but buća sar pioniri hem odova pomožinđa maje ki punovremeno služba. Na primer, jekh andi prvo buti koja sikljiljum hine kobor tano važno te dav obuka averenđe. Ked uljum pioniri, jekh misionari kova vićinđa pe Vilem van Sejl but pomožinđa maje. b Olestar sikljiljum sar šaj te ćerav me  zadatkija ki skupština. Me ni na hijum le svesno kobor valjani maje i obuka. Aver berš uljum specijalno pioniri hem počminđum te pomožinav e phralenđe hem e phenjenđe kola živinđe ki kišno šuma ko Surinam, dur ando avera skupštine. Tegani hijum le but zahvalno asi obuka koja dinđa man o phral Vilem hem avera phralja. Kotar tegani, me hijum le odlučno te oponašinav olengo primer hem uvek te odvojinav vreme te dav obuka averenđe.

Jekh aver buti koja sikljiljum hine so valjani te živinav jednostavno hem šukar te organizujinav man. Ki početka ando svako masek me hem o phral kova služinđa mancar sar specijalno pioniri, valjanđam te planirina so valjani te ćina ando habe hem ando avera buća kola valjanena amenđe odova masek. Palo odova, jekh amendar bi dugo putujini đi i glavno diz te ćinel amenđe sa so valjani. Amen valjanđam pažljivo te trošina amare pare hem odova so ćinđam, sose odoleja valjanđam te nakha celo masek. Ako bi nešto valjani amenđe đi hijam le ki kišno šuma, samo nekobor manuša hine šaj te pomožinen amen, a nekad na hine niko ko šaj te pomožini amenđe. Odova so ko terne berša sikljiljum te živinav jednostavno hem te organizujinav man šukar, pomožinđa maje uvek te ćhivav i služba ko prvo than ko mo životi.

Pana jekh buti koja sikljiljum hine soj tano but važno te sikava e manušen ando ćaćipe ki olenge dajaki ćhib. Đi bariljum, me vaćerđum nekobor ćhibja kola vaćerena pe ko Surinam, sar soj tane: holandski, engleski, papiamento hem sranatongo. c Ama, ki kišno šuma dikhljum so o manuša pošukar reagujinena ki šukar vest ked propovedinaja lenđe ki olenge dajaki ćhib. Maje hine but pharo te sikljovav disave ando olenge ćhibja, sar soj tani saramakan. Ama, mo trud isplatinđa pe. Palo nekobor berš, me šaj hine bute manušen te sikavav o ćaćipe odolese so vaćerđum olengi ćhib.

Naravno, hine man hem neprijatna iskustvija. Na primer, jekh puti mangljum ki ćhib saramakan, te pućav jekha romnja so proučini sar tani, odolese so dukhandilo la lako vođi. Ama, u stvari me pućljum la da li tani khamni. Tegani hine laće but neprijatno. Iako često grešinđum đi vaćerđum, me uvek trudinđum man te vaćerav i ćhib koja vaćerena o manuša ko moklo područje.

Ko 1970. berš, hijum le naimenujimo te služinav sar pokrajinsko nadgledniko. Odova berš bute manušenđe kola živinđe ki kišno šuma mothovđum jekh film. Odova film vićinđa pe „Posetinen o glavno sedište ando Jehovase svedokija.“ Te šaj te resa đi olende, me hem pana nekobor phralja, valjanđam te putujina čamcoja ki reka. Ko čamco valjanđam te la o generator, o prenosno rezervoari e gorivoja, o fenjeri hem i oprema aso projektor. Đi resljam ko than kaj valjanđam te mothova odova e  manušenđe, amen valjanđam ki šuma te akhara odija oprema. Setinava man kobor o manuša uduri manglje te dikhen akava film. Hijum le bahtalo so šaj hine te pomožinav lenđe te sikljon ando Jehova hem andi olesi organizacija. Ked dikheja sar o manuša ovena paše e Jehovaja, odova ćerela tut but bahtalo bizo obzir save žrtve valjani te ćere.

Iako dikhljum soj maje polokho te ćerav mo zadatko odolese so hijum kokri, ipak mangljum te ženinav man. Odolese, počminđum konkretno te molinav man e Jehovase te arakhav jekha romnja koja ka ovel spremno radosno te služini e Jehovase mancar ko phare okolnostija ki kišno šuma. Palo jekh berš, počminđum te upoznajinav man jekha specijalno pionirkaja koja vićini pe Etel hem koja hine but samopožrtvovano. Pana ked hine terni, oj but ceninđa e apostole, e Pavle hem manglja te del sa pestar ki služba sar oleste. Venčinđam amen ko 1971. berš hem počminđam te služina ki pokrajinsko služba.

Đi barilji i Etel na hine la but materijalna buća. Odova pomožinđa laće lokho te prilagodini pe ki kišno šuma. Na primer, ked pripreminđam amen te đa te posetina o skupštine dur ki kišno šuma, na leljam but buća amencar. Amen thovđam amare šeja hem nanđiljam ki reka. Isto ađahar, haljam sa so o phralja dinđe amen. Podijekh puti odova hine iguane, pirane ja bilo so aver so astarđe ki šuma ili ki reka. Ked na hine tanjirja, haljam ko kore ando banane. A ked na hine amen sova te ha, haljam vastencar. I Etel hem me mislinaja so odova so ćerđam žrtve đi služinđam e Jehovase, ćerđa te ova sar trin šele phanlje ko jekh e Jehovaja (Prop. 4:12). A odova iskustvo ne bi daja nisose ko sveto!

Jekh dive đi irinđam amen ćhere ked posetinđam e phralen ki kišno šuma, desinđa  pe amenđe odova so vaćerđum ki početka. Đi nakhljam odola brzakija, o čamco kratko vreme toninđa ko pani, ama sigate ikljilo ki površina. Odolese so tegani akharđam o prslukija aso spasavanje, na peljam ando čamco. Ama, o čamco pherdilo panjeja. Odolese, fordinđam i hrana ando amare ćare hem olencar ikalđam o pani ando brodo.

Odolese so više na hine amen so te ha, đi irinđam amen ćhere počminđam te astara maćhen ki reka, ama ništa na astarđam. Molinđam amen e Jehovase te del amen maro aso odova dive. Palo odova, jekh phral fordinđa i ribarsko mreža hem astarđa jekhe bare maćhe kova hine dovoljno amen panđ đene te ha odova dive.

Palo panđ berš so hijam le ki pokrajinsko služba, i Etel hem me dobinđam jekh neočekivano blagoslov. I Etel aćhilji khamni. Hijum le bahtalo ked šunđum odova, ama na hijum le sigurno so ka ovel ponodri. I Etel hem me mangljam, ako šaj te aćhova ki punovremeno služba. Ko 1976. berš, bijandilo amaro ćhavo, o Etnijel. A amaro dujto ćhavo, o Đovani, bijandilo palo duj tekvaš berš.

Ko Surinam hine bari potreba ko odova vreme, odolese odlučinđam hem ponodri te služina ki pokrajinsko služba đi barjaćeraja amare ćhaven. Ked amare ćhave hine tikne, hijum le pokrajinsko nadgledniko ko pokrajine kola hine len nekobor tikne skupštine. Sebepi odova šaj hine nekobor kurće ko masek te služinav sar pokrajinsko nadgledniko, a ko avera kurće sar pioniri ki mi skupština. I Etel hem o ćhave alje mancar ked posetinđum o skupštine kola hine paše uzo amende. Ama, kokri putujinđum ked valjanđum te đav ki kišno šuma te posetinav o skupštine hem te ovav ko pokrajinska sastankija.

Valjanđum but šukar te organizujinav man te šaj te ćerav me zadatkija. Dinđum sa mandar svako kurko te ovel amen porodično proučavanje. Ked posetinđum o skupštine kola hine dur ki kišno šuma, i Etel hine la porodično proučavanje amare ćhavencar. Ama, ked god šaj hine, amen trudinđam amen zajedno te ćera o buća. Često ćhelđam amenđe amare ćhavencar ili igarđam len ko šuže thana kola hine paše uzo amaro ćher. But putija bi bešava hine raćate, te spreminav me zadatkija. I Etel hine  but bućarni, isto sar i romni kolatar vaćeri pe ko Poslovice 31:15. Oj hine uštela angleder te phravđol o sabaj te šaj te ćerel amenđe doručak hem zajedno sar porodica te čitina e diveso stiho, angleder so amare ćhave đana ki škola. Hijum but zahvalno so isi man odobor samopožrtvovano romni koja pomožinđa man te ćerav sa me zadatkija kola o Jehova dinđa man.

Sar roditeljija amen dinđam sa amendar te pomožina amare ćhavenđe te mangen e Jehova hem i služba. Amen mangljam amare ćhave te oven ki punovremeno služba, ama na sebepi amaro nego odova te ovel olengo izbor. Uvek vaćerđam lenđe kobor bahtalipe i punovremeno služba šaj te anel. Iako hine amen but pharipa, amen trudinđam amen uvek te istaknina sar o Jehova pomožinđa amenđe hem blagoslovinđa amen. Isto ađahar, amen dinđam sa amendar amare ćhave te ovel len šukar društvo, te oven e phralencar hem e phenjencar kola e Jehova ćhivena ko prvo than ko po životi.

O Jehova dinđa sa so valjani me porodicaće. Naravno, hem me ćerđum mo deo. Odova so služinđum kokri sar specijalno pioniri ki kišno šuma pomožinđa man te đanav sar te rasporedinav o materijalna buća. Ama, podijekh puti čak hem ked ćerđam sa so šaj, na hine amen uvek sa odova so valjanđa amenđe. Tegani, me verujinava so o Jehova pomožinđa amenđe. Na primer, ando 1986. đi 1992. berš hine građansko maribe ki Surinam hem hine but pharo te oven amen čak hem o osnovna buća. Ama, čak hem tegani o Jehova dinđa amen sa so valjanđa amenđe (Mat. 6:32).

O Jehova uvek brininđa pe amendar hem pomožinđa amen te ova bahtale hem zadovoljna. Amare ćhave tane amenđe baro blagoslov. Amen hijam but bahtale so šaj hine te barjaćera len hem on akana te služinen e Jehovase. Hijam but radosna soj tane hem on ki punovremeno služba. O Etnijel hem o Đovani hine ko amare teokratska škole hem akana služinena ki podružnica ko Surinam zajedno pe romnjencar.

I Etel hem me akana hijam but phure, ama služinaja sar specijalna pionirija. U stvari, odobor hijam zauzeta so pana našti te arakhav vreme te sikljovav te plivinav. Ama, na kajinava man. Ked iranava man napalal ko berša so nakhlje, ćaće hijum but bahtalo so ando ternipe služinđum punovremeno e Jehovase hem odija hine najšukar odluka koja šaj hine te anav.