1-2. (a) Ko kola pućiba ka dobina odgovor? (b) Sar đanaja so o Jehova isi le bari želja te pomožini amen?

 O JEHOVA šaj te pomožini amenđe te istrajina ko amare problemija hem te ova radosna đi služinaja lese. Sar pomožini amenđe? So valjani te ćera te šaj te dobina odija pomoć? Ko akava članko ka dobina odgovorija ko akala pućiba. Ama, najangleder te dikha da li o Jehova ćaće mangela te pomožini amen.

² Te šaj te dobina odgovor ko akala pućiba, hajde te dikha kova lafi o Pavle koristinđa ko po lil e Jevrejenđe. Ov pisinđa: „O Jehova tano mo pomoćniko, na ka darav. So šaj te ćerel maje o manuš?“ (Jevr. 13:6). Ki jekh biblijaki enciklopedija pisini so o lafi „pomoćniko“, kova koristini pe ko akava stiho, odnosini pe ko jekh manuš kova prastala te pomožini nekase ko rodela pomoć. Zamislin sar o Jehova siđari te pomožini nekase kova isi le problemi. Odova so ki Biblija pisini so o Jehova tano amaro pomoćniko, jasno mothovi amenđe so ov isi le bari želja te pomožini amen. A ked tano ov ki amari strana, amen šaj te istrajina ko problemija hem te ova radosna.

3. Ko kola trin načinija o Jehova pomožini amen te istrajina ko pharipa?

³ Sar o Jehova pomožini amen te istrajina ko pharipa? Te šaj te dobina odgovor ko akava pućibe ka pomožini amenđe i knjiga Isaija. Sose? Odolese so o prorok Isaija pisinđa but proročanstvija kola primeninena pe hem upro Devleso narodo avdije. Ov opisujinđa e Jehova e lafencar kola šaj lokho te haljova. Na primer, ko 30. poglavlje koristinđa but šukar primerija kola mothovena sar  o Jehova pomožini pe narodose. Ov ćerela odova ađahar so (1) šunela amen hem odgovorini ko amare molitve, (2) vodini amen hem (3) dela amen blagoslovija akana hem ki budućnost. Akana ka vaćera ando akala trin načinija sar o Jehova pomožini amen.

4. (a) So o Jehova phenđa ando Izraelcija kola živinđe ko Isaijaso vreme hem so ov dozvolinđa te desini pe olenđe? (b) Savi nada o Jehova dinđa e verno manušenđe? (Isaija 30:18, 19)

⁴ Ko početko ko 30. poglavlje ko Isaija, o Jehova phenela so o Izraelcija tane „zorale šerese“ hem so „ćhivena greh upro greh.“ Ov pana phenđa: „On tane buntovno narodo, kola na mangena te šunen e Jehovaso zakoni“ (Is. 30:1, 9). Odolese so o manuša hine neposlušna, o Isaija prorokujinđa so o Jehova ka dozvolini te ovel len pharipe (Is. 30:5, 17; Jer. 25:8-11). Odova hem ulo ked o Vaviloncija legarđe len ko ropstvo. Ama, maškaro lende hine hem verna manuša. O Isaija phenđa so olenđe isi nada hem so o Jehova jekh dive ka irini len ko Jerusalim. (Čitin Isaija 30:18, 19.) Ađahar hem hine. O Jehova irinđa len ko Jerusalim, ama na odmah, nego palo nekobor berš. O lafija „o Jehova strpljivo ađićeri te mothovi tumenđe šukaripe“ mothovđe so valjani te nakhel disavo vreme đi o verna manuša na ovena spasime. U stvari, o Izraelcija hine 70 berš ko ropstvo ko Vavilon angleder so disave olendar irinđe pe ko Jerusalim (Is. 10:21; Jer. 29:10). Ked đelje ko Vavilon, on runđe andi tuga. Ama, ked irinđe pe ko Jerusalim, on runđe andi radost.

5. Ko so uverinena amen o lafija ando Isaija 30:19?

⁵ Avdije amen šaj but te utešinen o lafija ando Isaija 30:19 kuri pisini: „Ov sigurno ka smilujini pe tuće ked ka šunel so asvencar rodeja le.“ O Isaija uverini amen so o Jehova pažljivo ka šunel amen ked rodaja olestar pomoć hem sigate ka odgovorini ki amari molitva. O Isaija pana phenđa: „Samo so ka šunel tut, ov ka odgovorini tuće.“ Akala lafija setinćerena amen ko odova so o Jehova isi le bari želja te pomožini okolenđe kola rodena lestar pomoć. Odova so đanaja akava, pomožini amen te istrajina hem te ova radosna.

6. Sar e Isaijase lafija mothovena so o Jehova pažljivo šunela svakonesi molitva?

⁶ So kotar akava stih šaj pana te sikljova andi molitva? O Jehova pažljivo šunela svakone amendar ked molinaja amen. Sar đanaja odova? Ko prvo deo ando 30. poglavlje ki knjiga Isaija, o Jehova obratini pe pekle narodose sar grupa. Ama ko 19. stiho, ov obratini pe svakonese posebno. O Isaija pisinđa: „Ov sigurno ka smilujini pe tuće“ hem „ov ka odgovorini tuće.“ O Jehova tano amaro Dad kova but mangela amen hem ked jekh ando olese ćhave tane obeshrabrime, ov na vaćeri: „Tu valjani te ove zoralo sar to phral ja sar ti phen“. Umesto odova, ov brinini pe svakonestar amendar hem pažljivo šunela svakonesi molitva (Ps. 116:1; Is. 57:15).

7. Sar o Isaija hem o Isus mothovđe kobor tano važno te ova istrajna ki molitva?

⁷ Ked molinaja amen e Jehovase hem phenaja lese so mučini amen, ov najangleder šaj te del amen snaga te istrajina. Ako amare problemija na nakhena  odobor sigate sar so nadinđam amen, šaj valjani nekobor putija te molina amen e Jehovase te del amen snaga te istrajina. Ov podstaknini amen te ćera odova sar so hem pisini ko Isaija 62:7: „Ma aćhaven [e Jehova] ki mira.“ So značinena akala lafija? Amen valjani odobor često te molina amen e Jehovase, so ka phene na aćhavaja le ki mira. E Isaijase lafija setinćerena amen ko Isuseso poređenje andi molitva kova tano pisimo ko Luka 11:8-10, 13. Othe o Isus podstakninđa amen te ova uporna đi molinaja amen hem te roda sveti duh. Isto ađahar, šaj te molina amen e Jehovase te pomožini amenđe te ana šukar odluke.

8. Sar ko purano vreme ispuninđe pe o lafija ando Isaija 30:20, 21?

⁸ Čitin Isaija 30:20, 21. I vavilonsko vojska berš tekvaš opkolinđa o Jerusalim. Tegani, e Jehovase narodose o problemija ulje diso normalno, ka phene sar pani hem maro. Ama, premalo 20. hem 21. stih o Jehova obećinđa e Izraelcenđe so ako kajinena pe hem menjinena pe, ka oven spasime. O Isaija phenđa e Jehovase soj tano „Veličanstveno Učitelj“ hem obećinđa e narodose so o Jehova ka sikavi len te služinen lese ko ispravno način. Odola lafija ispuninđe pe ked o Izraelcija hine oslobodime ando ropstvo. O Jehova hine olengo Veličanstveno Učitelj hem odolese so ov vodinđa len on šaj hine te služinen lese ko ispravno način. Avdije, amen hijam but bahtale soj tano o Jehova hem amaro Veličanstveno Učitelj.

9. Sar o Jehova avdije sikavi amen?

⁹ Ko akala stihija, o Isaija phenđa so amen hijam sar učenikija kolen o Jehova sikavi ko duj načinija. Sar prvo, o Isaija phenđa: „Te jaćhencar ka dikhe te Veličanstveno Učitelje.“ Ko akava poređenje, o Veličanstveno Učitelj bešela anglo pe učenikija. Isi amen bari čast so o Jehova sikavi amen avdije. Ov odova ćerela prekali pi organizacija hem but hijam zahvalna so dobinaja jasna smernice. Prekalo sastankija, kongresija, publikacije, amare masekose emisije hem ko avera načinija, amen dobinaja smernice kola pomožinena amen te istrajina ko amare problemija hem te ova radosna.

10. Ko kova način šunaja „o glaso palo amende“?

 ¹⁰ O Isaija pisinđa kova tano o dujto način sar o Jehova sikavi amen. Ov phenđa: „Palo tumende ka šunen o glaso.“ Ov akate phenđa so o Jehova tano sar jekh pažljivo učitelj kova phirela palo pe učenikija hem phenela lenđe kole drumoja valjani te đan. Avdije, hem amen šunaja e Jehovaso glaso palo amende. Sar? But berša angleder, ki Biblija hine pisime e Jehovase lafija. Odolese, ked čitinaja i Biblija, odova tano ka phene šunaja e Jehovaso glaso palo amende (Is. 51:4).

11. So valjani te ćera ako mangaja te istrajina hem te ova radosna hem sose?

¹¹ So valjani te ćera te šaj te pomožini amen odova so o Jehova sikavi amen prekali pi organizacija hem po Lafi? O Isaija pominđa duj buća. Sar prvo, ov phenđa „odova tano o drumo“, a sar dujto „đan odole drumoja“ (Is. 30:21). Nane dovoljno samo te đana odova „drumo“, amen valjani hem te „đa odole drumoja.“ Amen sikljovaja so o Jehova rodela amendar prekalo oleso Lafi hem o objašnjenja kola dobinaja andi olesi organizacija. Isto ađahar, amen sikljovaja sar šaj te primenina odova so sikljiljam. Te šaj te istrajina hem te ova radosna đi služinaja e Jehovase, amen valjani te sikljova ando Jehova hem te primenina odova so sikljiljam. Tegani, o Jehova ka blagoslovini amen.

12. Premalo Isaija 30:23-26, sar o Jehova pomožinđa pe narodose?

¹² Čitin Isaija 30:23-26. Sar akava proročanstvo ispuninđa pe ked o Izraelcija irinđe pe ko Jerusalim? O Jehova dinđa len but buća kola valjanđe lenđe te šaj te živinen hem te nastavinen te služinen lese. Ov dinđa len but hajbe. Soj tano najvažno, ov dinđa len hem sa so valjani lenđe te šaj te oven paše oleja hem palem te služinen lese ko ispravno način. E Devleso narodo niked angleder na hine le odobor but buća. Sar so pisini ko 26. stiho, o Jehova dinđa len pobuter svetlost, avere lafencar pomožinđa len te haljon oleso Lafi (Is. 60:2). Sebepi sa o šukar buća kola dobinđe, e Jehovaso narodo šaj hine te služini lese radosno (Is. 65:14).

13. Sar avdije ispunini pe o proročanstvo so o manuša palem ka služinen e Jehovase ko ispravno način?

 ¹³ Da li akava proročanstvo so o manuša palem ka služinen e Jehovase ko ispravno način primenini pe hem upro amende? Ja. Sar? Ando 1919. berš ki n. e., milionija manuša više nane ko ropstvo ando Baro Vavilon, kova tano o svetsko carstvo andi hovavni religija. On hine legarde ko jekh pošukar than andi Obećimi phuv. On hine legarde ko duhovno raj (Is. 51:3; 66:8). Soj tano o duhovno raj?

14. Soj tano o duhovno raj hem ko avdije živini odothe?

¹⁴ Ando 1919. berš ki n. e., o pomazanikija živinena ko duhovno raj. b Sar nakhlja o vreme hem okola so isi len nada so ka živinen ki phuv, o „avera bakre“, isto tane ko duhovno raj hem o Jehova blagoslovini len (Jov. 10:16; Is. 25:6; 65:13).

15. Kaj avdije nalazini pe o duhovno raj?

¹⁵ Kaj nalazini pe o duhovno raj? Avdije, e Jehovaso narodo živini ki celo phuv. Odolese, o duhovno raj tano ki celo phuv. Bizo obzir kaj živinaja, amen šaj te ova deo ando duhovno raj ako ko ispravno način služinaja e ćaćutne Devlese, e Jehovase.

16. Sar šaj hem ponodri te dikha o šuže buća ando duhovno raj?

¹⁶ Te šaj te aćhova ko duhovno raj, valjani hem ponodri te ova zahvalna so hijam deo andi Jehovasi organizacija. Sar šaj te ćera odova? Ađahar so ka dikha amare phralenge hem phenjenge šukar osobine, a na olengi nesavršenost (Jov. 17:20, 21). Sose tano odova važno? Razmislin ando akava primer. Ked đaja ki jekh šuži šuma, amen očekujinaja so odothe ka oven različita kašta. Isto ađahar, ko amare skupštine avdije isi različita phralja hem phenja kolen šaj  te uporedina kaštencar (Is. 44:4; 61:3). Valjani te trudina amen te dikha kobor tani šuži i „šuma“, a na so falini e „kaštenđe“ kola tane uzo amende. Amen na valjani te dozvolina amari ili averengi nesavršenost ki skupština te cidel amen andi Jehovasi but šuži organizacija.

17. So šaj svako amendar te ćerel te šaj te ovel jekhipe ki skupština?

¹⁷ So šaj svako amendar te ćerel te šaj te ovel jekhipe ki skupština? Svako amendar šaj te trudini pe te ćerel te ovel mir (Mat. 5:9; Rimlj. 12:18). Svako puti ked daja sa amendar te ova ko mir averencar ki skupština, amen ćeraja amaro duhovno raj te ovel pana pošužo. Na valjani te bistra so sarinen o Jehova anđa ko duhovno raj te služinen lese (Jov. 6:44). Zamislin kobor tano o Jehova bahtalo ked dikhela so daja sa amendar te ova ko mir hem ko jekhipe olese slugencar kolen ov but mangela (Is. 26:3; Avak. 2:7).

18. Sostar valjani hor te razmislina hem sose?

¹⁸ O Jehova dela amen but šukar buća. Sar šaj te pomožinen amen odola buća? Ađahar so hor ka razmislina ando odova so čitinaja ko Devleso Lafi hem ko amare publikacije. Odova šaj te pomožini amen te oven amen osobine kola ka podstakninen amen „iskreno te manga jekh jekhe“ (Rimlj. 12:10). Ked razmislinaja ando blagoslovija kola isi amen akana, odova zorjaćeri amaro amalipe e Jehovaja. A ked razmislinaja ando blagoslovija kola o Jehova ka del amen ki budućnost, odova zorjaćeri amari nada. Sa akava pomožini amen te ova pana poradosna đi služinaja e Jehovase.

19. (a) Premalo Isaija 30:18 ko so šaj te ova sigurna? (b) So ka pomožini amenđe te istrajina hem te ova radosna?

¹⁹ O Jehova „ka mothovi amenđe milost“ ked ka uništini akava lošno sveto (Is. 30:18). Amen đanaja soj tano o Jehova pravedno Devel hem ov na ka mukhel e Satanaso sveto te postojini ni jekh dive pobuter nego so valjani (Is. 25:9). Amen hijam strpljiva đi ađićeraja o Jehova te oslobodini amen ando akava lošno sveto. Đi odova na avela, hem ponodri ceninaja odova so šaj te molina amen olese hem te proučina oleso Lafi. Isto ađahar, daja sa amendar te primenina odova so sikljovaja hem te razmislina ando blagoslovija kola isi amen. Ked ćeraja odova, o Jehova ka pomožini amenđe te istrajina ko pharipe hem te služina lese radosno.