1. So amen đanaja hem ko so hijam sigurna?

 AMEN đanaja so ka ovel amen progonstvo ki služba. Sar đala o vreme, đanaja so ka ovel sa pobaro (Dan. 11:44; 2. Tim. 3:12; Otkr. 16:21). Ama, hijam sigurna so o Jehova ka pomožini amenđe. Sose? Odolese so ko purano vreme o Jehova uvek pomožinđa pe slugenđe te ćeren disavo zadatko, bizo obzir kobor hine pharo. Akana ka dikha nekobor buća kola pomožinđe e Jezekiljese te propovedini e Izraelcenđe kola hine ko Vavilon.

2. Save hine o manuša kolenđe o Jezekilj valjanđa te propovedini hem sostar ka vaćera ko akava članko? (Jezekilj 2:3-6)

² Save hine o manuša kolenđe o Jezekilj valjanđa te propovedini? O Jehova phenđa so hine „buntovna“ hem „zorale vilese.“ On hine sar o kare kola posavena hem opasna sar o škorpije. Odolese, o Jehova nekobor putija phenđa e Jezekiljese: „Ma dara!“ (Čitin Jezekilj 2:3-6.) O Jezekilj šaj hine te ćerel po zadatko odolese so (1) o Jehova bićhalđa le, (2) e Devleso duho dinđa le snaga hem (3) e Devlese lafija zorjaćerđe olesi vera. Sar akala trin buća pomožinđe e Jezekiljese te ćerel po zadatko hem sar šaj odola buća te pomožinen amenđe?

3. Kola lafija zorjaćerđe e Jezekilje hem sar o Jehova uverinđa le so ka pomožini lese?

³ O Jehova phenđa e Jezekiljese: „Me bićhalava tut“ (Jezek. 2:3, 4). Akala lafija sigurno zorjaćerđe e Jezekilje. Sose? Odolese so sigurno setinđe le so o Jehova koristinđa ista lafija ked ćhivđa e Mojsije hem e Isaija te oven prorokija (Izl. 3:10; Is. 6:8). Isto ađahar, đanđa sar  o Jehova pomožinđa lenđe te ćeren pe zadatkija, iako na hine lokhe. Odolese, ked o Jehova duvar phenđa lese: „Me bićhalava tut“, ov hine le šukar razlog te verujini so o Jehova ka pomožini lese. Uzo odova, ki pi knjiga, o Jezekilj nekobor putija pisinđa: „Alo maje e Jehovaso lafi“ (Jezek. 3:16; 6:1). Akava mothovi so ov hine uverimo so o Jehova bićhalđa le. Isto ađahar, oleso dad hine svešteniko hem sigurno phenđa lese so o Jehova uvek pomožinđa pe prorokonenđe. Na primer, e Isakese, e Jakovese hem e Jeremijase o Jehova phenđa: „Me hijum tuvaja“ (Post. 26:24; 28:15; Jer. 1:8).

4. Kola lafija verovatno ohrabrinđe e Jezekilje?

⁴ Sar o Izraelcija reagujinđe ked o Jezekilj propovedinđa lenđe? O Jehova phenđa: „O Izraelcija na ka mangen te šunen tut, sose na mangena te šunen man“ (Jezek. 3:7). Odoleja so na manglje te šunen e Jezekilje, on odbacinđe e Jehova. Akala lafija uverinđe le so ov šukar ćerela po zadatko, iako o manuša na manglje te šunen. Isto ađahar, o Jehova pomožinđa lese te haljol so ked ka ispunini pe odova sostar ov vaćeri, o manuša „ka đanen so o proroko hine maškaro olende“ (Jezek. 2:5; 33:33). Akala lafija sigurno but ohrabrinđe e Jezekilje hem ponodri te ćerel o zadatko kova o Jehova dinđa le.

5. Premalo Isaija 44:8, ko dela amen snaga te ćera amaro zadatko?

⁵ Avdije, amen šaj te ova hrabra odolese so đanaja so o Jehova bićhali amen te propovedina. Ov čak phenela amenđe so hijam olese svedokija (Is. 43:10). Odija tani ćaće bari čast! Sar so phenđa e  Jezekiljese hem amenđe avdije phenela so nane amen sostar te dara. Sose na valjani te dara ando progonstvo? Odolese so hem amen o Jehova bićhali te propovedina hem isi amen olesi pomoć đi ćeraja odova. (Čitin Isaija 44:8.)

6. (a) Sar o Jehova uverini amen so isi amen olesi podrška? (b) So amen ohrabrini?

⁶ O Jehova dela amen po lafi so ka pomožini amenđe. Na primer, hari angleder te phenel „tumen hijen me svedokija“, ov pana phenđa: „Ked nakheja kotar panja, me ka ovav tuvaja. Ked nakheja kotar reke, on na ka poplavinen tut. Ked nakheja kotar jag, na ka thabljove hem o plameno na ka tharel tut“ (Is. 43:2). Đi hijam ki služba, disavo puti amare problemija šaj te oven bare sar reka hem amare kušnje sar jag. Ama, amen ipak propovedinaja sose o Jehova pomožini amenđe (Is. 41:13). Sar ko Jezekiljeso vreme, hem avdije but manuša na mangena te šunen i šukar vest. Ama, odova nane sose amen na propovedinaja šukar. Amen đanaja so o Jehova tano zadovoljno amencar ked daja sa amendar te propovedina i šukar vest hem odova dela amen snaga hem ponodri te ćera amaro zadatko. O apostol Pavle phenđa: „Svako ka dobini pi nagrada premalo po trud“ (1. Kor. 3:8; 4:1, 2). Jekh phen koja beršencar služini sar pioniri, phenela: „Bahtali hijum sose đanava so o Jehova nagradini amaro trud.“

7. Sar o Jezekilj osetinđa pe svako put ked razmislinđa andi vizija? (Dikh i slika ki naslovno strana.)

⁷ Ki jekh vizija, o Jezekilj dikhlja kobor tano moćno e Jehovaso duho. Ov dikhlja sar odova duho pomožini e moćno anđelenđe hem sar odova duho gurini o bare točkija andi nebesko kočija (Jezek. 1:20, 21). Sar o Jezekilj reagujinđa? Ov phenela so ulo: „Ked odova dikhljum, peljum ki phuv.“ Ov hine le odobor baro strahopoštovanje premalo Devel so pelo ki phuv (Jezek. 1:28). Kasnije, ked god razmislinđa andi akija vizija, odova zorjaćerđa le hem pomožinđa lese te na bistrel so e Jehovaso duho ka pomožini lese te ćerel po zadatko.

8-9. (a) So o Jehova phenđa e Jezekiljese te ćerel? (b) Sar o Jehova pana zorjaćerđa e Jezekilje te ćerel jekh pharo zadatko?

⁸ O Jehova phenđa e Jezekiljese: „Tu so hijan o manušikano ćhavo, ušti te vaćerav tuvaja.“ Odija zapovest hem e Devleso duho dinđe e Jezekiljese snaga koja valjanđa lese te šaj te uštel. Ov pisinđa: „O duh khuvđa ano mande hem vazdinđa man ko pre te šunav okole kova vaćeri manđe“ (Jezek. 2:1, 2). Sa đi o Jezekilj ćerđa pi služba, o Jehova pomožinđa lese prekalo po duho (Jezek. 3:22; 8:1; 33:22; 37:1; 40:1). E Devleso duho zorjaćerđa le te propovedini e manušenđe kola hine len zoralo šero hem zoralo vilo (Jezek. 3:7). O Jehova phenđa e Jezekiljese: „Ka ćerav tut te ove zorale šereso sar soj tane on zorale šerese hem to ćekat ka ovel zoralo sar olengo ćekat. Ka ćerav to ćekat te ovel zoralo sar dijamanti, pozoralo ando kremen. Ma dara olendar“ (Jezek. 3:8, 9). Avere lafencar, ov phenđa lese: „Ma mukh te obeshrabrinen tut o manuša kola tane zorale šerese. Me ka zorjaćerav tut.“

⁹ Palo odova, e Devleso duho vazdinđa e Jezekilje hem legarđa le ko than kaj valjanđa  te propovedini. O Jezekilj phenđa: „Upro mande but delujinđa e Jehovasi sila.“ E Jezekiljese valjanđa kurko dive te haljol i poruka koja valjanđa te objavini. Tek palo odova, ov šaj hine te vaćeri i poruka e manušenđe (Jezek. 3:14, 15). Tegani, o Jehova phenđa lese te đal ki jekh dolina kuri oleso „duho khuvđa ano [leste]“ (Jezek. 3:23, 24). Palo odova, o Jezekilj hine spremno te počmini pi služba.

10. So valjani amenđe te šaj te propovedina hem sose?

¹⁰ So amenđe pomožini te šaj te propovedina? Razmislin so pomožinđa e Jezekiljese. Angleder te počmini pi služba, o Jehova zorjaćerđa le prekalo po duho. Sar o Jezekilj, hem amen šaj te propovedina samo sebepi so e Jehovaso duho pomožini amenđe. Sose phenaja odova? Odolese so o Beng borini pe protiv amende hem mangela te ćhinavi amen te propovedina (Otkr. 12:17). O manuša mislinena so o Beng tano odobor zoralo so amen našti te borina amen oleja. Ama, ked propovedinaja, amen odoleja pobedinaja e Benge (Otkr. 12:9-11). Sar odova? Ked đaja ki služba, amen mothovaja so na daraja e Bengestar hem ađahar pobedinaja le. Ando akava haljovaja so amen šaj te propovedina, čak iako isi amen progonstvo, odolese so o Jehova zorjaćeri amen prekalo po duho hem odolese so ov tano ki amari strana (Mat. 5:10-12; 1. Petr. 4:14).

11. Sar ka pomožini amenđe e Jehovaso sveti duh hem so valjani te ćera te šaj te ovel amen odova?

¹¹ So šaj pana te sikljova ando odova so o Jehova dinđa snaga e Jezekiljese te propovedini? E Jehovaso sveti duh šaj te pomožini hem amenđe, bizo obzir savo problemi isi amen ki služba (2. Kor. 4:7-9). So valjani te ćera te šaj te dobina e Jehovaso sveti duh? Valjani te  molina amen hem te ovel amen poverenje so o Jehova ka šunel amare molitve. O Isus phenđa pe učenikonenđe: „Molinen... roden... khuven.“ Ako ađahar ćereja, o Jehova ka del po duho „okolenđe kola molinena le aso odova“ (Luka 11:9, 13; Dela 1:14; 2:4).

12. Premalo Jezekilj 2:9–3:3, kotar alo o svitko hem so hine pisimo koro leste?

¹² O Jehova na zorjaćerđa e Jezekilje samo prekalo po duho nego hem prekalo pe lafija. Ki vizija, o Jezekilj dikhlja sar jekh vas ićeri o svitak. (Čitin Jezekilj 2:9–3:3.) Kotar alo odova svitak? So hine pisimo koro leste? Sar akava svitak zorjaćerđa e Jezekilje? O svitak alo ando Devleso presto. Verovatno o Jehova koristinđa jekhe ando štar anđelija kolen o Jezekilj angleder dikhlja te den le o svitak (Jezek. 1:8; 10:7, 20). Ko svitak hine pisime e Devlese lafija – jekh bari poruka andi osuda koja o Jezekilj valjanđa te vaćeri e Izraelcenđe kola hine ko Vavilon (Jezek. 2:7). Odija poruka hine pisimi ko solduj strane ando svitko.

13. So o Jehova phenđa e Jezekiljese te ćerel hem sose odova hine gudlo?

¹³ O Jehova phenđa e Jezekiljese te hal o svitko hem te „[ćaljol] olestar.“ Ov šunđa e Jehova hem halja celo svitko. So značinđa akava deo andi vizija? Odova značinđa so o Jezekilj valjanđa te haljol i poruka koja valjani te objavini. Ov valjanđa te verujini ki odija poruka hem odova te podstaknini le te vaćeri olatar. Palo odova, desinđa pe diso but zanimljivo. Ked halja o svitko, o Jezekilj dikhlja soj tano „gudlo sar avđin“ (Jezek. 3:3). Sose? Odolese so i čast koja o Jezekilj hine le te predstavini e Jehova hine gudli sar avđin (Ps. 19:8-11). Ov hine but zahvalno e Jehovase so šaj hine te služini sar oleso proroko.

14. So pomožinđa e Jezekiljese te počmini te ćerel po zadatko?

¹⁴ Kasnije, o Jehova phenđa e Jezekiljese: „Šun šukar sa o lafija kola ka phenav tuće hem ćhiv len ko to vilo“ (Jezek. 3:10). Avere lafencar, o Jehova phenđa lese te del sa pestar te na bistrel odova soj tano pisimo ko svitko hem hor te razmislini ando odola lafija. Ked o Jezekilj ćerđa odova, olesi vera hine pana pozorali. Isto ađahar, ko svitko hine pisimo so valjani te vaćeri odole narodose (Jezek. 3:11). Ked haljilo hem verujinđa ki Jehovasi poruka, o Jezekilj hine spremno te počmini te propovedini hem odova ćerđa sa đi oleso zadatko na hine završimo (Uporedin e stihoja ando Psalam 19:14).

15. So valjani te ćhiva ko amaro vilo ako mangaja te istrajina?

¹⁵ Te šaj te istrajina ki amari služba, amen valjani te mukha e Devlese lafija te zorjaćeren amari vera. Sar o Jezekilj, hem amen valjani „te ćhiva ko amaro vilo“ odova so o Jehova vaćeri amenđe. Avdije, o Jehova vaćeri amenđe prekalo po Lafi, i Biblija. So valjani te ćera te šaj e Devleso Lafi te utičini ko odova sostar razmislinaja, sar osetinaja amen hem ko odova so ćeraja?

16. So valjani te ćera e Devlese Lafeja hem sar šaj te ćhiva le ko amaro vilo?

¹⁶ Ked redovno haja maro, amen ovaja pana pozorale. Isto ađahar, ked redovno  proučinaja e Devleso Lafi hem hor razmislinaja olestar, amari vera ovela pana pozorali. O Jehova mangela te sikljova diso kotar vizija ando svitko. Ov mangela te „ćaljova“ ando oleso Lafi, avere lafencar šukar te haljova so pisini odothe. Ama, sar šaj te ćera odova? Najangleder, molinaja amen te šaj te pripremina amaro vilo aso odova so o Jehova mangela te phenel amenđe. Palo odova, čitinaja e Devleso Lafi, i Biblija. Ko krajo, terđovaja hem hor razmislinaja odolestar so čitinđam. So ovela palo odova? So pobuter haljovaja e Devleso Lafi, amari vera ovela pana pozorali.

17. Sose valjani hor te razmislina odolestar so čitinaja ko Devleso Lafi?

¹⁷ Sose tano važno te čitina e Devleso Lafi hem hor te razmislina odolestar so čitinđam? Odolese so odova ka del amen snaga te propovedina i šukar vest akana hem te objavina i poruka andi osuda ko vreme kova avela. Isto ađahar, ked razmislinaja ando odova savo tano o Jehova, amen šaj te ova pana popaše oleja. Sebepi odova, šaj te ovel amen mir ko vilo hem te ova zadovoljna, a odola buća tane „pogudle ando avđin“ (Ps. 119:103).

18. So o manuša ko amaro tereni ka haljon hem sose?

¹⁸ Avdije, amen na hijam prorokija sar o Jezekilj. Ama, hijam odlučna te vaćera e manušenđe e Jehovasi poruka koja pisini ko oleso Lafi, sa đi ov na phenela soj tano dosta. Ked ka avel o vreme andi osuda, o manuša na ka šaj te phenen so o Devel na upozorinđa len angleder so ka ovel (Jezek. 3:19; 18:23). Umesto odova, on ka valjani te haljon so i poruka andi koja vaćerđam hine ando Devel.

19. So dela amen snaga te šaj te ćera amari služba?

¹⁹ So šaj te zorjaćeri amen đi propovedinaja? O trin buća kola zorjaćerđe hem e Jezekilje. Amen hem ponodri propovedinaja sose đanaja so o Jehova bićhali amen, e Devleso duho dela amen snaga hem e Devlese lafija zorjaćerena amari vera. Odolese so o Jehova pomožini amenđe, amen mangaja te da sa amendar hem ponodri te propovedina hem te istrajina đi o krajo (Mat. 24:13).