1. So značini te ova trezvena? (2. Timoteju 4:5)

 KED isi amen problemija, šaj te ovel pharo te aćhova uzo Jehova hem olesi organizacija. So tegani šaj te pomožini amen? Amen valjani te ova trezvena hem te aćhova „verna.“ (Čitin 2. Timoteju 4:5.) Amen hijam trezvena ked aćhovaja smirime, hijam razumna hem daja sa amendar ko buća te dikha sar o Jehova. Tegani, na ka mukha amare osećanja te utičinen ko odova sar razmislinaja.

2. Sostar ka vaćera ko akava članko?

² Ko okova članko vaćerđam ando trin problemija sebepi kola šaj te našala amaro poverenje ko Jehova hem ki olesi organizacija. Ko akava članko, ka dikha sebepi kola trin problemija ki skupština šaj te našala amaro poverenje ko Jehova. A odola problemija tane (1) ked povredinena amen o phralja hem o phenja, (2) ked dobinaja ukor hem (3) ked tano amenđe pharo te prihvatina o promene ki organizacija. Sar šaj tegani te ova trezvena hem te aćhova uzo Jehova hem olesi organizacija?

3. Sar šaj te reagujina ako disavo phral ja phen povredinđa amen?

³ Da li nekad povredinđa tut dijekh phral ili phen, šaj neko ko isi le bare odgovornostija, sar na primer, jekh starešina? Verovatno, odova phral na manglja namerno te povredini tut (Rimlj. 3:23; Jak. 3:2). Ama, šaj razočarinđan tut sebepi odova. Čak šaj našti hine ni te sove. Šaj pućljan tut: „Ako jekh phral šaj te ćerel ađahar, da li tani akija ćaće e Devlesi organizacija?“ O Satana baš ađahar mangela te razmislina (2. Kor. 2:11). Ako ađahar razmislinaja, amen šaj te ćhinava te služina e Jehovase hem te cida amen andi olesi organizacija. Odolese, so valjani te ćera ako jekh phral ja phen povredinđe amen? Sar šaj tegani  te mothova so hijam trezvena hem te na razmislina ađahar sar so o Satana mangela?

4. Sar o Josif mothovđa so hine trezveno, iako hine povredimo hem so sikljovaja olestar? (Postanak 50:19-21)

⁴ Ma ićer i holi ano tute. Ked o Josif hine tinejdžer, olese phralja but povredinđe le. On mrzinđe le hem čak disave olendar manglje te mudaren le (Post. 37:4, 18-22). Ko krajo, bikinđe le te ovel robo. Sebepi odova, ov 13 berš hine le but problemija. Tegani, ov šaj hine te pućel pe da li o Jehova ćaće mangela le hem sose aćhavđa le baš ked najviše valjani lese. Ama, o Josif na ićerđa i holi ano peste. Umesto odova, ov hine trezveno ađahar so aćhilo smirimo. Ked hine le prilika te osvetini pe pekle phralenđe, ov na ćerđa odova. Umesto odova, ov mothovđa so mangela len hem oprostinđa lenđe (Post. 45:4, 5). O Josif ćerđa odova odolese so hine razumno. Umesto te razmislini samo ando pe problemija, ov razmislinđa so o Jehova mangela. (Čitin Postanak 50:19-21.) So sikljovaja olestar? Ako neko povredinđa amen, na valjani te ova holjame upro Jehova hem te mislina so ov aćhavđa amen. Umesto odova, valjani te razmislina sar o Jehova pomožini amen ko amaro problemi. Isto ađahar, valjani te da sa amendar te manga amare phralen, sose „o mangipe ućhari but grehija“ (1. Petr. 4:8).

5. Sar o Mikejas hine trezveno ked hine povredimo?

⁵ Te dikha o iskustvo ando amaro phral andi Južno Amerika kova vićini pe Mikejas. b Ov setini pe ked jekh phral kova hine le bare odgovornostija ki organizacija, povredinđa le. Ov phenela: „Niked na osetinđum man ađahar. Hijum le but nervozno. Naštine ni te sovav hem čak runđum sose na hine ništa so šaj te ćerav.“ Ama, o Mikejas hine trezveno hem na mukhlja olese emocije te peraven le. Ov često molinđa pe hem rodinđa e Jehovastar sveti duh hem snaga te istrajini. Ov istražinđa ko amare publikacije odova so valjanđa lese. So sikljovaja olestar? Ako dijekh phral ja phen povredinđa amen, valjani te aćhova smirena hem te trudina amen te kontrolišina amare negativna emocije. Amen na đanaja save okolnostija anđe đi odova neko te vaćeri ja te ćerel diso. Odolese, valjani te molina e Jehova te pomožini amen te haljova sar odija osoba dikhela ko problemi. Ako ćeraja odova, tegani na ka mislina so amare phralja namerno manglje te povredinen amen hem ka ovel amenđe polokho te oprostina lenđe (Posl. 19:11). Ma bistri, o Jehova dikhela so desini pe tuće hem ov ka del tut snaga te istrajine (2. Let. 16:9; Prop. 5:8).

6. Sose tano važno te haljova so o Jehova ukorini amen odolese so mangela amen? (Jevrejima 12:5, 6, 11)

⁶ Ked dobinaja ukor, odova šaj but te dukhal amen. Ama, ako razmislinaja samo odolestar sar amen osetinaja amen, tegani šaj te mislina so odova ukor na hine ko than, so nane amenđe hem soj tano but strogo. Ako ađahar razmislinaja, tegani na ka haljova diso but važno — so o Jehova ukorini amen odolese so mangela amen. (Čitin Jevrejima 12:5, 6, 11.) Ako samo razmislinaja odolestar kobor tano amenđe pharo, o Satana šaj te  koristini odova te napadini amen. Ov mangela amen te na prihvatina o ukor hem čak te cida amen ando Jehova hem andi skupština. Sar šaj te ove trezveno ked dobineja ukor?

7. (a) Sar so dikhaja ki slika, kola zadatkija o Jehova dinđa e Petarese palo odova so prihvatinđa o ukor? (b) So sikljovaja ando Petar?

⁷ Prihvatin o ukor hem ćer o potrebna promene. O Isus nekobor putija ukorinđa e Petare anglo avera apostolija (Mar. 8:33; Luka 22:31-34). Odova sigurno hine bari lađ e Petarese. Ama, ov aćhilo verno e Isusese. Prihvatinđa o ukor hem sikljilo ando pe greške. Sebepi odova, o Jehova blagoslovinđa le hem dinđa le but bare odgovornostija ki skupština (Jov. 21:15-17; Dela 10:24-33; 1. Petr. 1:1). So sikljovaja olestar? Amen na valjani samo te razmislina odolestar kobor tano amenđe pharo, nego valjani te prihvatina o ukor hem te ćera o potrebna promene. Ađahar o ukor šaj te pomožini hem amenđe hem averenđe. Tegani, šaj te ćera but buća e Jehovase hem amare phralenđe.

8-9. Sar o Bernardo osetinđa pe ki početka ked dobinđa ukor, ama so pomožinđa lese te ispravini po razmišljanje?

⁸ Razmislin ando odova so desinđa pe jekhe amare phralese kotar Mozambik, kova vićini pe Bernardo. Ov našalđa po zaduženje sar starešina. Sar ki početka osetinđa pe? Ov phenela: „Hijum le but holjamo, odolese so na mangljum odova ukor kova dobinđum.“ Ov sikirinđa pe sar avera ki skupština ka dikhen upro leste. Ov pana phenela: „Valjanđa maje nekobor masek te dikhav ispravno ko ukor kova dobinđum hem palem te ovel man poverenje upro Jehova hem olesi organizacija.“ So pomožinđa e Bernardose te menjini po razmišljanje?

⁹ Ov phenela: „Ked služinđum sar starešina, koristinđum o lafija ando Jevrejima 12:7 te pomožinav averenđe te dikhen ko ukor ađahar sar so o Jehova dikhela. Akana pućljum man: ’Ko valjani te primenini akava stih?‘ Sa e Jehovase sluge, pa hem me.“ Tegani o Bernardo ćerđa o potrebna promene te šaj palem te ovel le poverenje ko Jehova hem ki olesi organizacija.  Ov pana pobuter čitinđa i Biblija hem pana pobuter vreme odvojinđa hor te razmislini ando odova so čitinđa. Iako pana brininđa pe ando odova sar o phralja hem o phenja ka dikhen le, ov nastavinđa te đal olencar ki služba hem te učestvujini ko sastankija. Palo disavo vreme, o Bernardo palem ulo starešina. Ako sar oleste hem tu dobinđan disavo ukor, de sa tutar te na razmisline kobor tano tuće pharo, prihvatin le hem ćer o potrebna promene (Posl. 8:33; 22:4). c Ako ćereja odova, ov sigurno so o Jehova ka blagoslovini tut so hijan lese verno hem so hijan othe ki olesi organizacija.

10. Sar disave Izraelcija reagujinđe ked hine dindo e Mojsijeso zakon?

¹⁰ Ked ovena disave promene ki amari organizacija, podijekh puti amenđe tano pharo te prihvatina len. Ako na pazinaja, šaj čak te cida amen ando Jehova. Hajde te dikha sar disave buća ko Izraelcengo životi menjinđe pe ked hine dindo e Mojsijeso zakon. Angleder so hine dindo o Zakon, o poglavarija ki porodica ćerđe o buća kola valjanđe te ćeren o sveštenikija. On gradinđe oltarija hem dinđe žrtve e Jehovase asi pi porodica (Post. 8:20, 21; 12:7; 26:25; 35:1, 6, 7; Jov 1:5). Ama, ked hine dindo o Zakon, on više na isminđe te ćeren odova. O Jehova ćhivđa e sveštenikonen andi Aronesi porodica te den žrtve. Ando tegani, ako bi jekh poglavari kova nane andi Aronesi porodica, ćerela o buća kola o sveštenikija valjanđe te ćeren, ov valjanđa te ovel mudardo (Lev. 17:3-6, 8, 9). d Da li o Korej, o Datan, o Aviron hem o 250 manuša kola protivinđe pe e Mojsijese hem e Aronese mulje sebepi odova? (Br. 16:1-3). Amen na đanaja tačno. Bizo obzir kova hine o razlog, o Korej hem olese manuša na hine verna e Jehovase. So šaj tu te ćere ked tano tuće pharo te prihvatine disavi promena ki organizacija?

11. So sikljovaja kotar disave Levitija andi Katesi porodica?

¹¹ Spremno prihvatin o promene ki organizacija. Đi o Izraelcija hine ki pustinja, disave murša andi Katesi porodica hine len but važno zadatko. Svako puti ked o izraelsko logor valjanđa te selini pe, on đelje anglo narodo hem akharđe o kovčeg ando savez (Br. 3:29, 31; 10:33; Is. Nav. 3:2-4). Odija hine bari čast! Ama, ked o Izraelcija alje ki Obećimi phuv, on više na hine len odova zadatko. Odolese so o kovčeg na valjanđa više te selini pe. Ked o Solomon ulo kralj, disave olendar hine len zadatko te đilaben, nesave te phraven hem te phanen o udara ando hram, a avera te brininen pe ando ostave (1. Let. 6:31-33; 26:1, 24). Nigde na čitinaja so on žalinđe pe ili rodinđe pošukar zadatko. So sikljovaja olendar? Ked ovela disavi promena ki organizacija, celone vileja prihvatin odija promena bizo obzir da li odija promena utičini ko to zadatko. Savo god zadatko te ćere, trudin tut te ove radosno. O Jehova na cenini  amen samo odolese so ćeraja ki organizacija. Olese tani považno amari poslušnost ando amare zadatkija (1. Sam. 15:22).

12. Sar osetinđa pe i Zaina ked ikljilji ando Betel?

¹² Razmislin andi amari phen i Zaina koja menjinđa po zadatko. Oj hine bićhaldi te služini sar specijalno pioniri palo odova so 23 berš služinđa ko Betel. Sar osetinđa pe sebepi odova? Oj phenela: „Odova so menjinđum mo zadatko hine maje but pharo. Osetinđum man so na hijum korisno hem pućljum kokri man: ’So grešinđum?‘“ Nažalost, disave phralja hem phenja andi skupština hić na pomožinđe la odolese so phenđe laće: „Te ove hine šukar ne bi ikljoveja ando Betel.“ Jekh vreme, i Zaina osetinđa pe but lošno hem svako rat runđa. Ama, oj phenela: „Niked na sumnjinđum ki organizacija hem ko odova da li o Jehova mangela man.“ So pomožinđa e Zainaće te ovel trezveno?

13. So ćerđa i Zaina te šaj te pobedini pe negativna emocije?

¹³ I Zaina pobedinđa pe negativna emocije. Sar? Oj čitinđa o člankija ko amare publikacije kola vaćerena ando olako problemi hem odova pomožinđa laće te istrajini. O članko „Možeš nadvladati obeshrabrenje!“ ki Stražarsko kula kotar 1. februar 2001. berš but pomožinđa la. Odova članko vaćerđa ando biblijako pisco o Marko. Olese hine pharo ked valjanđa te menjini po zadatko. I Zaina phenela: „E Markoso primer hine maje sar leko protiv o obeshrabrenje.“ Pana jekh buti koja pomožinđa e Zainaće hine so na cidinđa pe pekle amalendar hem na žalinđa kokri pes. Oj haljilji so e Jehovaso sveti duh pomožini e phralenđe te anen o odluke ki organizacija hem so o phralja kola predvodinena but brininđe pe olaće. Isto ađahar, haljilji so e Jehovasi organizacija valjani te ćerel odova soj tano najšukar te šaj o delo te napredujini.

14. Save promene ki organizacija o Vlado valjanđa te prihvatini hem so pomožinđa lese?

¹⁴ Amaro phral o Vlado isi le 73 berš hem služini sar starešina ki Slovenija. Olese hine but pharo ked olesi skupština valjanđa te spojini pe jekha avera skupštinaja hem olengi dvorana valjanđa  te phanel pe. Ov phenela: „Na haljiljum sose odobor šuži dvorana valjani te phanel pe. Hijum le povredimo sose sigende renovirinđam i dvorana. Me hijum stolari hem ćerđum disavo nevo nameštaj asi dvorana. Isto ađahar, but objaviteljija kola tane ko berša valjanđe te ćeren promene kola na hine odobor lokhe.“ So pomožinđa e Vladose te podržini akija promena? Ov phenela: „Ako prihvatinaja o promene kola ćerela e Jehovasi organizacija, odova uvek ka ovel šukar. On spreminena amen aso pobare promene ki budućnost.“ Da li tano hem tuće pharo odolese so ti skupština spojinđa pe avera skupštinaja ja to zadatko menjinđa pe? Ov sigurno so o Jehova haljola sar osetineja tut. Ked prihvatineja asavke promene hem aćhoveja uzo Jehova hem olesi organizacija, ov ka blagoslovini tut (Ps. 18:25).

15. Sar šaj te ova trezvena ked isi amen problemija ki skupština?

¹⁵ Sar o krajo kotar akava sveto tano sa popaše, amen šaj te očekujina so ka oven amen problemija ki skupština. Odola problemija šaj te oven ispit asi amari vera. Ama, amen valjani te ova trezvena. Ako povredinena amen o phralja ja o phenja, na valjani te ićera i holi ano amende. Ako dobinaja ukor, na valjani te razmislina samo ando odova kobor tano amenđe pharo, nego valjani te prihvatina o savet hem te ćera o potrebna promene. A ked ovena promene ki Jehovasi organizacija kola utičinena ko amaro zadatko, tegani valjani celone vileja te prihvatina odola promene hem te šuna o smernice.

16. So ka pomožini tut te na našale to poverenje upro Jehova hem olesi organizacija?

¹⁶ Tu šaj te ovel tut poverenje ko Jehova hem ki olesi organizacija, čak hem ked tani ti vera ko ispit. Ama, tu valjani te ove trezveno, avere lafencar valjani te aćhove smirimo, te ove razumno hem te dikhe ko buća sar o Jehova. Isto ađahar, valjani te proučine ando biblijake ličnostija kola hine len slična problemija sar tekle hem hor te razmisline ando olengo primer. Valjani te moline tut e Jehovase te pomožini tut hem niked ma cide tut andi skupština. Tegani, bizo obzir so te desini pe, o Satana na ka uspini te cidel tut ando Jehova hem andi olesi organizacija (Jak. 4:7).