1. Sose but manuša avdije na đanena ko so te verujinen?

AVDIJE, isi but religije kola phenena soj tane hrišćanska hem so služinena e Devlese ko ispravno način. Odolese, but manuša avdije na đanena ko so te verujinen. On pućena pe: „Isi li samo jekh pravo religija ja o Devel prihvatini sa o religije?“ Odolese but tano važno te đana sose hijam uverime so odova so e Jehovase svedokija sikavena tano ćaćipe hem so on služinena e Devlese ko ispravno način. Ama, da li amen šaj te đana ko avdije služini e Devlese ko ispravno način? Akana ka dikha disave buća kola odova mothovena.

2. Premali 1. Solunjanima 1:5, sose o apostol Pavle hine uverimo so arakhlja o ćaćipe?

² O apostol Pavle hine uverimo so arakhlja o ćaćipe. (Čitin 1. Solunjanima 1:5.) Ov na verujinđa ko odova samo sose o ćaćipe pomožinđa lese te osetini pe pošukar. Ov hor proučinđa e Devleso Lafi hem verujinđa so „celo Lil avela ando Devel“ (2. Tim. 3:16). So o Pavle haljilo đi proučinđa e Devleso Lafi? Ov haljilo so o Isus hine o obećimo Mesija. Odova hine jekh važno ćaćipe ko kova o religiozna vođe ko odova vreme na manglje te verujinen. On hine dujemujenge sose umesto te sikaven e manušen ando Devel, on ćerđe but buća kola o Devel mrzini (Titu 1:16). Ama, o apostol Pavle na hine sar olende. Ov na birinđa ko kova deo ando e Devleso Lafi ka verujini, a ko kova na. Ov hine spremno te sikavi averen ando „sa odova so o Devel mangela“ hem te ićeri pe ko odova (Dela 20:27).

3. Da li valjani te đana o odgovorija ko sa amare pućiba te šaj te ova uverime so arakhljam o ćaćipe? (Isto ađahar, dikh o okvir „ E Jehovase delija hem mislija našti te đenen pe.“)

 ³ Disave manuša mislinena so i pravo religija valjani te del odgovorija ko sa amare pućiba, čak iako i Biblija na vaćeri odolestar. Ama, da li odova ćaće šaj te ovel ađahar? Te dikha o primer ando apostol Pavle. Ov phenđa pe phralenđe: „Sa proverinen te šaj te uverinen tumen so odova tano o ćaćipe.“ Ama, isto ađahar, ov phenđa so isi but buća kola ni ov kokri na haljola (1. Sol. 5:21). Ov pisinđa: „Amen đanaja samo disave buća... sose akana dikhaja ko ogledalo kuri na dićhona jasno sa o buća“ (1. Kor. 13:9, 12). Sar o apostol Pavle, ni amen našti sa te haljova. O Pavle haljilo o osnovna e biblijake sikljoviba. Ov đanđa odobor kobor valjanđa lese te šaj te ovel sigurno so arakhlja o ćaćipe.

4. Sar šaj te uverina amen so arakhljam o ćaćipe hem so ka dikha ko akava članko?

⁴ Amen šaj te uverina amen so arakhljam o ćaćipe ađahar so ka dikha sar o Isus služinđa e Devlese hem sar e Jehovase svedokija odova avdije ćerena. Ko akava članko, ka dikha so o prava hrišćanija (1) na koristinena o idolija, (2) poštujinena e Devleso anav, (3) mangena o ćaćipe, hem (4) mangena jekh jekhe.

5. (a) So sikljovaja ando Isus kotar odova sar ov služinđa e Devlese? (b) Sar šaj te ićera amen ko odova so ov sikavđa?

⁵ Sebepi so manglja e Jehova, o Isus služinđa samo olese. Odova ćerđa hem ked hine ko nebo hem ked hine ki phuv (Luka 4:8). Ov sikavđa pe učenikonen te ćeren isto odova. O Isus hem olese verna  učenikija na koristinđe o idolija. Sebepi so e Devle niko na dikhlja, nijekh manuš našti te ćerel diso so ličini upro Devel (Is. 46:5). Ama, da li o ikone šaj te pomožinen amen te ova popaše e Devleja hem da li valjani te molina amen e sveconenđe? Ki jekh ando Deš zapovestija, o Jehova phenđa: „Ma ćer tuće kip niti bilo so aver so dićhola sar odova soj tano upre ko nebo ili tele ki phuv... Ma klanin tut hem ma služin olenđe“ (Izl. 20:4, 5). O manuša kola mangena te šunen e Devle haljona so ov na mangela te koristina o idolija.

6. Sar e Jehovase svedokija služinena e Devlese isto sar o prva hrišćanija?

⁶ Disave istoričarija ando prvo veko phenđe so o prva hrišćanija služinđe samo e Devlese. Ki jekh istorijsko knjiga pisinđa so e hrišćanenđe ko odova vreme ni ki godi na alo te ovel len idolija. Sar on, hem e Jehovase svedokija avdije na koristinena o idolija. Amen na molinaja amen e sveconenđe, e anđelenđe, pa čak ni e Isusese. Na pozdravinaja i zastava, na đilabaja i himna, niti ćeraja diso sova ka da pobari čast e državaće, a na e Devlese. Save god pharipa te ovel amen, amen ićeraja amen ko e Isusese lafija: „E Jehovase, te Devlese, klanin tut hem samo olese služin“ (Mat. 4:10).

7. Sar e Jehovase svedokija razlikujinena pe ando avera religije?

⁷ Avdije, but manuša đana palo religiozna vođe. Disave manuša odobor uživinena te šunen len, so samći obožavinena len. O manuša đana ko olenge crkve, ćinena olenge knjige, dena len pare ja podupirinena olenge organizacije. Disave verujinena ko svako olengo lafi. Ked dikhena len, odobor tane bahtale, ka phene dikhlje e Isuse. Ama, okola kola služinena e Jehovase na dikhena nijekhe manuše sar pe vođa. Iako poštujinaja okolen kola predvodinena, amen ićeraja amen ko e Isusese lafija: „Tumen sare hijen phralja“ (Mat. 23:8-10). Amen na obožavinaja e manušen, bilo on te oven vođe andi disavi religija ja vladarija ki disavi phuv. Isto ađahar, na podržinaja olenge ideje. Umesto odova, amen hijam neutralna hem na hijam deo ando akava sveto. Ko sa akala buća amen razlikujinaja amen ando but religije kola phenena soj tane hrišćanska (Jov. 18:36).

8. Sar đanaja so o Jehova mangela te proslavini po anav hem sare te đanen oleso anav?

⁸ Jekhvar, o Isus molinđa pe: „Mo Dad, proslavin to anav.“ O Jehova odgovorinđa ki odija molitva hem tegani kotar nebo šundilo baro glaso kova phenđa so ka ćerel odova (Jov. 12:28). Đi hine ki phuv, o Isus vaćerđa e manušenđe kotar pe Dadeso anav (Jov. 17:26). Odolese hem o prava hrišćanija koristinena e Devleso anav hem vaćerena averenđe kotar odova anav.

9. Sar o hrišćanija ando prvo veko mothovđe so poštujinđe e Devleso anav?

⁹ Sigate palo odova so i skupština hine osnujimi, o Jehova „obratinđa pažnja ko manuša ando avera narodija te šaj olendar te stvorini e narodo kova ka akhari oleso anav“ (Dela 15:14). O hrišćanija ko prvo veko koristinđe e Devleso anav hem pomožinđe averenđe te đanen pobuter kotar odova anav. On koristinđe e Devleso anav ked propovedinđe hem ked pisinđe i Biblija. * Ađahar mothovđe so on tane jedino  narodo kova vaćeri ando e Devleso anav (Dela 2:14, 21).

10. So mothovi so e Jehovase svedokija tane jedina kola vaćerena ando e Devleso anav?

¹⁰ Da li e Jehovase svedokija koristinena e Devleso anav hem da li vaćerena averenđe kotar odova anav? Hajde te dikha. Avdije, but religiozna vođe dinđe sa pestar te garaven e Devleso anav. On ikalđe le ando but prevodija andi Biblija hem ko verska službe na mukhena te koristini pe e Devleso anav. * Avdije, nijekh manuš našti te phenel so e Jehovase svedokija na poštujinena e Devleso anav. Amen vaćeraja kotar e Devleso anav pobuter andi bilo koja aver religija. Amen daja sa amendar te ova odova so amaro anav mothovi, te ova Svedokija aso Jehova (Is. 43:10-12). Štampinđam pobuter ando 240 milionija primerkija andi Biblija prevod Novi Svet ko kova e Devleso anav tano irimo ko sa o thana. Isto ađahar, ko amare publikacije, kola ikljona ko prekalo hiljada ćhibja, terđola e Devleso anav.

11. Sar o hrišćanija ando prvo veko mothovđe so manglje o ćaćipe?

¹¹ O Isus but manglja o ćaćipe ando Devel hem kotar sa odova so ov mangela te ćerel. Odoleja sar živinđa, o Isus  mothovđa so verujini ko odova ćaćipe hem odolestar vaćerđa averenđe (Jov. 18:37). Isto ađahar, e Isusese učenikija manglje o ćaćipe (Jov. 4:23, 24). Ked vaćerđa ando hrišćanstvo, o apostol Petar vaćerđa sar ando „drumo e ćaćipaso“ (2. Petr. 2:2). Sebepi so but manglje o ćaćipe, o hrišćanija ando prvo veko na prihvatinđe o verska sikljoviba, o običaja hem o način sar o manuša ko odova vreme razmislinđe (Kol. 2:8). Isto ađahar, hem o prava hrišćanija avdije dena sa pestar te živinen premalo ćaćipe, ađahar so verujinena ko odova so pisini ko e Devleso Lafi hem ćerena odova so o Devel rodela olendar (3. Jov. 3, 4).

12. So ćerela o Vodeće telo ked valjani te menjina disave buća hem sose?

¹² Avdije, e Devlese sluge na phenena so sa đanena kotar e Devleso Lafi hem so sa haljona. Disavo puti pogrešno haljilje disave e biblijake sikljoviba hem na haljilje sar valjani te organizujini pe i skupština. Ama, odova na iznenadini amen. E Devleso Lafi mothovi so sar đala o vreme, e Devlese sluge pana pošukar haljona o ćaćipe (Kol. 1:9, 10). O Jehova hari pohari pomožini pe slugenđe te haljon o ćaćipe. Odolese, valjani te ova strpljiva ked diso na haljovaja (Posl. 4:18). Ked o Vodeće telo dikhela so valjani te menjina odova sar angleder haljiljam disave buća, on odova odmah ćerena. Disave crkve avdije menjinena pe sikljoviba sose mangena te ugodinen e manušenđe. Ama, e Jehovase svedokija odova ćerena sebepi so mangena te oven popaše e Devleja hem te služinen olese ađahar sar so o Isus ćerđa (Jak. 4:4). Đi o promene na avela sebepi so menjini pe o način sar o manuša ko sveto razmislinena, već sebepi so pošukar haljovaja e Devleso Lafi. Amen ćaće mangaja o ćaćipe! (1. Sol. 2:3, 4).

13. Premali koja osobina penđarena pe o prava hrišćanija hem sar odija osobina dićhola ko e Jehovase svedokija?

¹³ O hrišćanija ko prvo veko hine penđarutne sar manuša kola hine len but šukar osobine. Ama, i najvažno osobina premali koja hine penđarutne tano o mangipe. O Isus phenđa: „Premalo odova sare ka đanen so hijen me učenikija, ako ka mangen jekh jekhe“ (Jov. 13:34, 35). Avdije, e Jehovase svedokija tane penđarutne premalo mangipe hem jekhipe kova isi len maškaro peste. Amen hijam averćhane ando sa avera religije, sose iako živinaja ko razna phuvja hem avaja ando različita kulture, amen hijam sar jekh porodica. Odova dićhola ked ćedaja amen ko amare sastankija hem ko bare skupija. Odolese, šaj te ova uverime so amen služinaja e Devlese ađahar sar so ov mangela.

14. Premalo Kološanima 3:12-14, sar šaj te mothova so mangaja jekh jekhe?

¹⁴ E Devleso Lafi podstaknini amen te manga jekh jekhe (1. Petr. 4:8). Ked spremno oprostinaja jekh jekhese hem ked podnosinaja jekh jekhe, amen mothovaja so mangaja amen. Isto ađahar, šaj te mothova so mangaja jekh jekhe ked hijam phravde vastese hem gostoljubiva, čak hem premalo okola kola povredinđe amen. (Čitin Kološanima 3:12-14.) Asavko mangipe mothovi so hijam prava hrišćanija.

15. So pana mothovi so amen služinaja e Devlese sar o hrišćanija ando prvo veko?

¹⁵ Pana disave buća mothovena so amen služinaja e Devlese sar o hrišćanija ando prvo veko. Na primer, amen hijam organizujime ko isto način sar on. Isi amen pokrajinska nadglednikija, starešine hem sluge pomoćnikija (Fil. 1:1; Titu 1:5). Sar on, hem amen poštujinaja e Jehovase zakonija ando moral, ando brak, ando rat hem štitinaja i skupština okolendar so na mangena te ićeren pe ko e Devlese zakonija (Dela 15:28, 29; 1. Kor. 5:11-13; 6:9, 10; Jevr. 13:4).

16. So sikljovaja ando Efešanima 4:4-6?

¹⁶ O Isus phenđa so but manuša ka phenen soj tane olese učenikija, ama on odova na ka oven ćaće (Mat. 7:21-23). Isto ađahar, e Devleso Lafi phenela so ko poslednja dive but manuša „samo ka dićhon so mangena e Devle“ (2. Tim. 3:1, 5). Ama, i Biblija phenela so isi samo „jekh vera“ ja religija koja o Devel prihvatini. (Čitin Efešanima 4:4-6.)

17. Ko avdije služini e Jehovase ađahar sar so ov mangela?

¹⁷ Ko avdije služini e Jehovase ađahar sar so ov mangela? Ko akava članko dikhljam sar o Isus hem o hrišćanija ando prvo veko služinđe e Devlese. Šaj te phena so avdije jedino e Jehovase svedokija služinena e Devlese ađahar sar so ov mangela. Ćaće tani but bari čast te ova deo ando e Devleso narodo hem te đana o osnovna e biblijake sikljoviba. Odolese, de sa tutar hem ponodri te uverine tut so arakhljan o ćaćipe.