Šel berš angleder – 1922.
„O DEVEL. . . dela amen i pobeda prekalo. . . Isus Hrist!“ (1. Kor. 15:57). Akava stih, kova hine lendo te ovel e beršeso stiho aso 1922. berš, uverinđa e phralen so o Jehova ka blagoslovini olengi vernost. Ko odova berš, ov ćaće blagoslovinđa len. On počminđe kokri te štampinen amare knjige hem te koristinen o radio te šaj pana pobuter manuša te šunen i šukar vest. Hari kasnije ko odova isto berš, pana jekh puti jasno dićhilo sar o Jehova blagoslovini pe narodo. O Istraživačija andi Biblija ićerđe jekh baro kongres ko Sidar Point, ko Ohajo. Odova so hine ko odova kongres hem avdije utičini ki Jehovasi organizacija.
„JEKH BUT ŠUKAR IDEJA“
So pobuter amare phralja hem phenja propovedinđe, pana pobuter literatura valjanđa lenđe. Amare phralja ko Betel, ko Bruklin štampinđe o časopisija, ama na hem o knjige. O knjige štampinđe pe ki jekh aver štamparija. Ama, o problemi hine so odola štamparije masekoncar na štampinđe dovoljno knjige asi služba. Odolese, o phral Džozef Raterford pućlja e phrale Robert Martin, kova hine nadglednik andi štamparija, da li šaj on kokri te štampinen amare knjige.
I zgrada ki ulica Konkurd ko Bruklin, ko Njujork
„Odija hine but šukar ideja“, phenđa o phral Martin, „odova značinđa so šaj hine te phravel pe jekh štamparija hem amen kokri te štampina amare knjige.“ O phralja lelje ki kirija jekh zgrada ki ulica Konkord 18 ko Bruklin hem anđe i oprema koja valjanđa amenđe.
Ama, na hine sare bahtale so o phralja akana kokri ka štampinen amare knjige. O direktor andi kompanija koja angleder štampinđa amare knjige, alo te posetini amari nevi zgrada. Ov phenđa: „Isi tumen but šuži oprema kuri šaj te štampinen tumare knjige, ama niko tumendar na đanela sar te koristini la. Aso šov masek, tumen ka uništinen akija oprema.“
„Odova so ov phenđa ćaće šaj hine te ovel“ phenđa o phral Martin, „ama amen đanđam so o Jehova ka pomožini amenđe hem ađahar hine.“ O phral Martin hine u pravu. Sigate palo odova, aso jekh dive štampinđa pe oko 2 000 knjige.
O phralja terđona uzi linotep mašina ki amari štamparija
HILJADE MANUŠA ŠUNENA I ŠUKAR VEST PREKALO RADIO
Uzo odova so štampinđe amare knjige, e Jehovase sluge počminđe te koristinen jekh nevi metoda te šaj pana pobuter manuša te šunen i šukar vest – i radio-stanica. Ki nedelja, po podne ko 26. februar ko 1922. berš, o phral Raterford prvo puti ićerđa govor prekalo radio. I tema ando odova govor hine: „Milionija kola akana živinena niked na ka meren.“ Odova govor hine ićerdo ki radio-stanica ko Los Anđeles.
Tegani, oko 25 000 manuša šunđe o program. Disave olendar bićhalđe lila kuri pisinđe soj tane zahvalna aso odova govor. Jekh ando odola lila pisinđa o Vilard Ašford, jekh manuš kova živinđa ki Santa Ana, ki Kalifornija. Ov pohvalinđa e phrale, e Raterforde, aso šukar govor hem phenđa: „Ko mo ćher isi trin naborme manuša kola našti te ikljon ando ćher. Amen na bi šaj te ava te šuna akava govor, čak iako bi ićeri pe uzo amende.“
Nekobor kurće hine ićerde pana govorija prekalo radio. Ko krajo ando 1922. berš, ki Stražarsko kula pisinđa so „najhari 300 000 manuša šunđe i šukar vest prekalo radio.“
But manuša šunđe o program, odolese o Istraživačija andi Biblija odlučinđe te phraven jekh radio-stanica ki amari farma ko Staten Ajland. Odova than na hine but dur ando Betel ko Bruklin. O Istraživačija andi Biblija nekobor berš koristinđe i radio-stanica koja vićinđa pe WBBR te šaj te pomožinen e manušenđe te šunen i šukar vest.
„ADV“
Ki Stražarsko kula kotar 15. jun 1922. berš, pisinđa so ko Sidar Point, ko Ohajo ka ićeri pe jekh kongres kova ka ovel kotar 5-13. septembar ko 1922. berš. O Istraživačija andi Biblija hine but bahtale ked reslje ko Sidar Point.
Ko po prvo govor, o phral Raterford phenđa: „Sigurno hijum so o Gospod ka. . . blagoslovini akava kongres hem so akava kongres ka del but baro svedočanstvo e manušenđe.“ O phralja kola ko odova kongres ićerđe govorija but putija ohrabrinđe e objaviteljen te den sa pestar te vaćeren i šukar vest averenđe.
O phralja hem o phenja ko kongres ko Sidar Point, ko 1922. berš
Ko petak, po podne ko 8. septembar, oko 8 000 manuša khuvđe ki sala hem jedva ađićerđe o phral Raterford te počmini po govor. On nadinđe pe so ov ka phenel so značinena o slovija „ADV“ kola hine ki pozivnica. Ked bešlje ko pe thana, disave dikhlje jekh baro platno kova hine šukar paćardo upreder i bina. O Artur Klaus, kova ko kongres alo andi Tulsa ki Oklahoma, arakhlja pese than kuri šaj hine šukar te šunel o govor. Odova hine pharo, sose ko odova vreme, ko kongresija na hine mikrofonija hem ozvučenje.
„Pažljivo šunđam svako lafi“
Te na bi neko ćhinavi o govor, o predsedavajući ando program phenđa so ako neko ka harini našti te khuvel ki sala đi o phral Raterford ićeri po govor. Ko ekvaš ko deš, o phral Raterford počminđa po govor ađahar so citirinđa e Isusese lafija ando Matej 4:17, kuri pisini: „Paše tano o nebesko Kraljevstvo.“ Đi vaćerđa ando odova ko kova način o manuša ka šunen ando akava Kraljevstvo, ov phenđa: „O Isus objavinđa so ko vreme andi pi prisutnost, ov ka nadgledini i žetva ando po narodo hem ka ćedel okolen kola tane verna.“
O phral Klaus, kova bešlja ki glavno sala, setini pe: „Pažljivo šunđam svako lafi.“ Ama, kotar jekhvar na hine lese diso šukar. Đanđa so ako jekhvar ka ikljol, našti palem te khuvel, ama morandilo te ikljol.
Palo nekobor minutija, hine lese pošukar. Ov setini pe so irindoj ki sala šunđa jekh baro aplauz. Sebepi odova, pućlja pe so hine. Ov odlučinđa te ukljel ko krov samo te šunel o govor đi o krajo. Amaro phral, o Klaus, kova tegani hine le 23 berš, arakhlja način sar te ukljel ko krov. Ked ukljinđa dikhlja so o prozorija ko krov hine phravde hem ked alo hari popaše, haljilo so odothar šunđola but šukar.
Ama, o Artur odothe na hine kokri. Disave avera phralja isto hine ko krov. Jekh olendar, o Frenk Džonson, prastandilo đi oleste hem pućlja le: „Da li koro tute isi tut disavi oštro ćhurik“?
„Ja, isi man“, phenđa o Artur.
„Tu hijan odgovor ko amare molitve“, phenđa o Frenk. „Da li dikheja akava baro platno? Odova tano o znak kova tano kovimo ko akala baskije. Pažljivo šun so ka phenel o Sudija. a Ked ka phenel: ’Objavinen, objavinen,‘ tegani ćhin akala štar šele.“
Odolese, o Artur ćhurikaja ko vas, zajedno averencar ađićerđa o phral Raterford te phenel o lafija kola ka mothoven so valjani te mukhel pe o znak. Sigate o phral Raterford reslja đi ko glavno deo ando po govor. Ov hine but oduševimo hem odolese verovatno hem hari pobuter vazdinđa po glaso ked phenđa: „Oven verna hem ćaćutne svedokija e Gospodese. Đan anglal hem borinen tumen sa đi i hovavni religija na ovela uništimi. Vaćeren i šukar vest kuri god šaj hem ked god šaj. O sveto mora te đanel so o Jehova tano o Devel hem so o Isus Hrist tano o Kralj upro kraljija hem o Gospodar upro gospodarija. Akava tano najvažno vreme ki celo istorija. Dikhen, o Kralj vladini! Tumaro zadatko tano akava te vaćeren sarinenđe. Odolese, objavinen, objavinen, objavinen e Kralje hem oleso Kraljevstvo!“
O Artur hem avera phralja ćhinđe o šele hem o znak phravdilo hem dićhilo so hine pisimo odothe. Premalo slovija kola hine pisime ki pozivnica „ADV“ ko znak pisinđa: „Objavinen e Kralje hem oleso Kraljevstvo.“ (O slovija „ADV“ tane prva trin slovija ando englesko lafi advertise kova značini objavinen.)
BUT VAŽNO BUTI
O kongres kova hine ićerdo ko Sidar Point pomožinđa e phralenđe te den sa pestar te propovedinen ando Devleso Kraljevstvo hem okola kola hine spremna te ćeren odova hine but bahtale. Jekh kolporteri (angleder ađahar vićinđe pe o pionirija) andi Oklahoma, pisinđa: „Ko than kuri propovedinđam, but manuša ćerena buti ko rudnikija hem but tane ćorore.“ Ov phenela so but putija o manuša runđe sebepi odova so pisini ko časopis Zlatni vek. Ov phenđa: „Hijam le but bahtale so šaj hine te utešina len.“
O Istraživačija andi Biblija haljilje kobor tane važna e Isusese lafija ando Luka 10:2, kuri pisini: „I žetva tani bari, ama radnikija isi hari.“ Hari angleder te završini pe odova berš, on hine odlučna, sar niked angleder, te vaćeren i šukar vest kuri god šaj hem ked god šaj.
a E phrale, e Raterforde, vićinđe „Sudija“ odolese so podijekh puti ćerđa buti sar sudija ko Misuri, ki Amerika.
