1-2. (a) Sar disave vlastija protivinena pe e Jehovase narodose hem sar oleso narodo reagujini? (b) Sose šaj te ova bahtale čak hem ked hijam progonime? (Vaćer andi slika ki naslovno strana.)

 TRENUTNO, amare aktivnostija tane ograničime ja amaro delo tano zabranimo ko prekalo 30 phuvja. Ko disave ando odola phuvja, o vlastija amare phralen hem phenjen ćhivđe ko phanlipe. Sose? Odolese so čitinđe hem proučinđe i Biblija, đelje ko sastankija, propovedinđe averenđe hem na mešinđe pe ki politika. Ama, o Jehova na mislini so on ćerđe diso pogrešno. Iako tane progonime, akala verna sluge, aćhilje lese verna. Sebepi odova, on tane but bahtale.

² Verovatno dikhljan o slike ando phralja hem phenja kola tane progonime hem primetinđan so olengo muj asala. On tane bahtale odolese so đanena so radujinena e Jehova odoleja so aćhona lese verna (2. Let. 16:10). O Isus phenđa: „Bahtale tane okola soj tane progonime sebepi i pravednost. Oven bahtale hem but radujinen tumen, sose tumari nagrada. . . tani but bari“ (Mat. 5:10-12).

3. Sar so pisini ko Dela 4:19, 20, so ćerđe o apostolija ked hine progonime hem sose ćerđe odova?

³ Isto ađahar, hem o apostolija ko prvo veko doživinđe progonstvo odolese so propovedinđe ando Isus. Nekobor putija, o sudije ando jevrejsko vrhovno sudo, „naredinđe  lenđe više te na vaćeren ando Isuseso anav“ (Dela 4:18; 5:27, 28, 40). So ćerđe o apostolija? (Čitin Dela apostolska 4:19, 20.) On đanđe so okova kova isi le pobaro autoritet „zapovedinđa lenđe te propovedinen e narodose“ hem temeljno te svedočinen ando Isus (Dela 10:42). Odolese, o Petar hem o Jovan hrabro vaćerđe so on ka šunen e Devle, a na e sudijen hem so na ka ćhinaven te vaćeren ando Isus. U stvari, on ka phene vaćerđe lenđe: „Da li mislinena so isi tumen pobaro autoritet ando Devel“?

4. Premalo Dela 5:27-29, savo primer aćhavđe amenđe o apostolija hem sar šaj amen te ova sar olende?

⁴ O apostolija aćhavđe amenđe but šukar primer. On hine odlučna te šunen e „Devle sar vladare, a na e manušen.“ (Čitin Dela apostolska 5:27-29.) Palo odova so hine marde, on ikljilje ando jevrejsko vrhovno sud hem „radujinđe pe so hine dostojna te trpinen i lađ sebepi e Isuseso anav“ hem nastavinđe te propovedinen (Dela 5:40-42).

5. Ko kola pućiba valjani te dobina odgovor?

⁵ Sebepi odova so o apostolija ćerđe, neko šaj te pućel, na primer, sar šaj hine on te šunen e Devle, a na e manušen, a ko isto vreme te ićeren pe ki zapovest koja phenela so valjani te oven podložna e vlastenđe soj tane upreder olende? (Rimlj. 13:1). Sar šaj amen avdije te šuna o vlastija hem e vladaren, a ko isto vreme te aćhova verna e Devlese, kova tano Vrhovno Vladari? (Titu 3:1).

6. (a) Koj tane o vlastija kola pominena pe ko Rimljanima 13:1 hem sar valjani te ponašina amen premalo lende? (b) Savi vlast isi len o manušikane vladarija?

⁶ Čitin Rimljanima 13:1. Ko akava stih o lafi „vlastija“ odnosini pe ko manuša kola isi len moć hem kola vladinena upro avera. O hrišćanija valjani te oven podložna odole manušenđe. On ćerena te ovel mir, dena sa pestar o  manuša te šunen o zakonija hem čak podijekh puti zaštitinena e Jehovase narodo (Otkr. 12:16). Odolese valjani te platina o porezija hem te poštujina o vlastija (Rimlj. 13:7). Ama, o vlastija isi len autoritet samo odolese so o Jehova dozvolini lenđe odova. O Isus odova phenđa ked ispitinđa le o rimsko namesnik, o Pontije Pilat. Ked o Pilat phenđa so ov isi le vlast te zaštitini oleso životi ili te mudari le, o Isus phenđa lese: „Tu ne bi ovela tut nisavi vlast upro mande ako nane tuće dindi ando nebo“ (Jov. 19:11). O vladarija hem o političarija avdije isi len ograničeno vlast isto sar so hine le hem o Pilat.

7. Ked na valjani te šuna o vlastija hem so on na valjani te bistren?

⁷ O hrišćanija valjani te šunen o zakonija kola dinđe o vlastija sa đi odola zakonija nane protiv e Devlese zakonija. Ama, amen na ka šuna o vlastija ked on rodena amendar te ćera diso so o Jehova zabranini amenđe ja ked zabraninena amenđe te ćera diso so o Jehova rodela amendar te ćera. Na primer, on šaj te roden jekh terno ćhavo te đal ki vojska. b Ja šaj te zabraninen amaro prevod andi Biblija hem amare publikacije ja te zabraninen amenđe te propovedina hem te ćeda amen e phralencar hem e phenjencar. Ked o vlastija odova ćerena, on ka odgovorinen anglo Jehova aso odova. O Jehova sa dikhela (Prop. 5:8).

8. Koja tani i razlika maškar o manušikane vladarija hem o Jehova?

⁸ O manušikane vladarija isi len baro autoritet, ama nane len vrhovno autoritet. Asavko autoritet isi le samo o Jehova. Ki Biblija, štar putija phenela pe e Jehovase soj tano o Najbaro (Dan. 7:18, 22, 25, 27).

9. So o prorok Danilo dikhlja ko vizije?

⁹ O prorok Danilo dikhlja vizije kola mothovđe so o Jehova isi le pobari vlast ando bilo kova aver vladari. O Danilo prvo dikhlja štar zverija kola predstavinena o svetska sile kola vladinđe angleder, a odola tane o Vavilon, i Medo-Persija, i Grčka, o Rim hem i svetsko sila koja akana vladini, i Anglo-amerika (Dan. 7:1-3, 17). Palo odova, o Danilo dikhlja sar o Jehova bešela ko presto ko nebesko sudo (Dan. 7:9, 10). Odova so akava proroko pana dikhlja ko vizije tano upozorenje aso vladarija avdije.

10. Premalo Danilo 7:13, 14, 27, kase o Jehova dela vlast te vladini upri celo phuv hem so odova mothovi olestar?

¹⁰ Čitin Danilo 7:13, 14, 27. O Devel ka lel sa i moć hem i vlast ando manušikane vladarija hem ka del okolenđe kola odova pobuter zaslužinena hem kola isi len pobari moć. Kase ka del? Nekase koj tano sar „o manušikano ćhavo“, o Isus Hrist hem e „sveta slugenđe ando Najbaro“, o 144 000 kola ka vladinen „zauvek hem ki sa i večnost“ (Dan. 7:18). Kotar akava dikhaja so o Jehova, o „Najbaro“, isi le vlast te ćerel odova.

11. Sar ando Danilose lafija dikhaja so o Jehova isi le najbari vlast?

¹¹ O događaj kova o Danilo dikhlja ki vizija potvrdini odova so angleder phenđa: „O nebesko Devel“, phenela o Danilo „peravi hem ćhivela e kraljen.“  Pana phenđa: „O Najbaro Devel vladini upro manušikano kraljevstvo hem dela le kase mangela“ (Dan. 2:19-21; 4:17). Da li dijekhvar o Jehova ćhivđa nekas te ovel kralj, a palo odova cidinđa le kotar presto? Naravno!

12. Vaćer sar o Jehova cidinđa disave kraljen ando olengo presto. (Dikh i slika)

¹² O Jehova mothovđa so isi le najbari vlast. Akana ka dikha trin primerija kola mothovena odova. O egipatsko faraon zarobinđa e Jehovase narodo hem na manglja te oslobodini le. Ama, o Jehova oslobodinđa le hem ćerđa o faraon te tasljol ko Crveno more (Izl. 14:26-28; Ps. 136:15). O Vavilonsko kralj, o Valtasar, „uštinđa protiv o Gospodari ando nebo“ hem ćerđa jekh proslava kuri „hvalinđa e devlen ando srebro hem ando zlato“ umesto e Jehova (Dan. 5:22, 23). Ama, o Devel ponizinđa odole ponosno manuše. Ki „odija isto rat“, o Valtasar hine mudardo hem oleso kraljevstvo dinđa pe jekhe avere kraljese kova vladinđa upri Medija hem Persija (Dan. 5:28, 30, 31). O Irod Agripa I, mudarđa e Jakove, a palo odova ćhivđa ko phanlipe hem e Petare sose manglja hem ole te mudari. Ama, o Jehova ćhinavđa e Irode te ćerel odova. E Jehovaso anđeo „bićhalđa upro leste jekh baro nabormipe“ hem ov mulo (Dela 12:1-5, 21-23).

13. Vaćer jekh primer sar o Jehova porazinđa jekh celo grupa ando vladarija.

¹³ Isto ađahar, o Jehova mothovđa pi moć upri jekh bari grupa ando vladarija. Ov borinđa pe e Izraelcenđe hem pomožinđa lenđe te pobedinen 31 kralje andi phuv Hanan hem te osvojinen jekh pobaro deo andi Obećimi phuv (Is. Nav. 11:4-6, 20; 12:1, 7, 24). Isto ađahar, pomožinđa lenđe te pobedinen e kralje Ven-Adad hem pana 32 vladaren andi Sirija kola alje te borinen pe protiv o Izraelcija (1. Kralj. 20:1, 26-29).

14-15. (a) So o kralj Navuhodonosor hem o kralj Darije phenđe andi Jehovasi vrhovno vlast? (b) So o psalmista phenđa ando Jehova hem ando oleso narodo?

¹⁴ O Jehova uvek mothovđa soj tano Najbaro. Umesto te hvalini e Devle,  o vavilonsko kralj, o Navuhodonosor, hvalinđa pe kobor tano moćno hem zoralo. Odolese, o Jehova ćerđa te ikljol andi godi. Ama ked saćilo, ov hvalinđa e „Najbare“ Devle hem phenđa so „olesi vlast tani večno hem so ov zauvek ka vladini.“ Isto ađahar, phenđa so „nane niko ko šaj te ćhinavi le“ (Dan. 4:30, 33-35). Palo odova so o Danilo mothovđa soj tano verno e Jehovase hem palo odova so o Jehova spasinđa le ando lavija, o kralj Darije phenđa: „O manuša te tresinen andi dar kotar Daniloso Devel! Sose ov tano đivdo Devel kova zauvek ka postojini“ (Dan. 6:7-10, 19-22, 26, 27, fusn.).

¹⁵ O psalmista phenđa: „O Jehova ćhinavi e manušenge lošna planija, hem ćhinavi len te ćeren odova so mangena.“ Ov pana phenđa: „Bahtalo tano o narodo kaso Devel tano o Jehova, o narodo kole ov birinđa te pripadini samo olese“ (Ps. 33:10, 12). Akava tano but šukar razlog sose valjani te aćhova verna e Jehovase!

16. Ko so šaj te ova sigurna ked ka avel i „bari nevolja“ hem sose? (Dikh i slika)

¹⁶ Đi akana dikhljam so o Jehova ćerđa ko purano vreme. Ama, so o Jehova pana hari ka ćerel? Amen šaj te ova sigurna so o Jehova ka spasini pe verno slugen ked ka avel i „bari nevolja“ (Mat. 24:21; Dan. 12:1). Odova ka ćerel ked i koalicija ando narodija ja o Gog ando Magog ka napadini olese narodo. Čak ako ki odija koalicija ka oven uključime sa o 193 članice ando Ujedinjena nacije, on na ka pobedinen e Najbare hem olese nebesko vojska. O Jehova dela po lafi: „Ka mothovav mi moć hem so hijum sveto Devel hem ka mothovav man anglo bute manušenge jaćha, hem tegani  ka priznajinen so me hijum o Jehova“ (Jezek. 38:14-16, 23; Ps. 46:10).

17. Premali Biblija, so ađićeri e kraljen ki celo phuv hem so ka ovel okolencar kola tane verna e Jehovase?

¹⁷ Ked o Gog ando Magog ka napadini e Devlese narodo, odova ka legari đi o Armagedon kuri o Jehova ka uništini e „kraljen ando celo sveto“ (Otkr. 16:14, 16; 19:19-21, fusn.). Tegani, „ov [ka] arakhi o životi ando okola kola tane olese verna“ hem samo on ka živinen ki phuv (Ps. 97:10; Posl. 2:21).

18. So but hrišćanija hine spremna te ćeren hem sose? (Danilo 3:28)

¹⁸ Sar đelo o vreme, but hrišćanija rizikujinđe pi sloboda čak hem po životi sose manglje e Jehova, e Vrhovno Vladare. On tane odlučna te aćhon verna e Jehovase sar o trin Jevreja kola aćhilje verna, iako hine fordime ki jag. (Čitin Danilo 3:28.)

19. Sar o Jehova ka sudini sa e manušenđe hem so akana valjani te ćera?

¹⁹ O psalmista David pisinđa kobor tano važno te aćhova verna e Jehovase: „Ov vićini o nebo hem i phuv sar svedokija te šaj te sudini pe narodose: ’Ćeden koro mande okolen kola tane maje verna‘“ (Ps. 50:4, 5). Ko jekh aver psalam o David pisinđa: „O Jehova mangela i pravda hem na ka mukhel pe verno slugen. Ov zauvek ka arakhi len“ (Ps. 37:28). So god te ovel, najšukar tano te aćhova verna e Jehovase. Tegani, hem amen ka osetina amen isto sar o psalmista kova phenđa: „Nek te verna sluge ovena bahtale“ (Ps. 132:9).