1. Savi nada dela amen o Jehova?

 O JEHOVA dinđa amen but šuži nada. Disave amendar nadinena pe so zauvek ka živinen ko nebo sar besmrtna duhovna stvorenja (1. Kor. 15:50, 53). A but amendar nadinena pe so zauvek ka živinen ki phuv kuri ka ovel len savršeno sastipe hem kuri ka oven but bahtale (Otkr. 21:3, 4). Bizo obzir kaj ka živina, sare amen but ceninaja i nada koja isi amen.

2. Sose šaj te phena so amari nada nane samo jekh suno?

² O lafi „nada“, kova koristini pe ki Biblija, šaj te odnosini pe ko „buća kola jedva ađićeraja te oven.“ Amen hijam sigurna so ka ispunini pe odova so nadinaja amen sebepi so o Jehova obećini odova (Rimlj. 15:13). Amen đanaja so obećinđa hem so uvek ićeri pe ko po lafi (Br. 23:19). Isto ađahar, amen hijam uverime so isi le moć hem želja te ćerel odova so phenđa so ka ćerel. Odolese, amari nada nane samo suno, već diso so ćaće ka ovel.

3. Sostar ka vaćera ko akava članko? (Psalam 27:14)

³ Amaro nebesko Dad mangela amen hem mangela te ovel amen poverenje upro leste. (Čitin Psalam 27:14.) Ked amari nada tani zorali, save god problemija te oven amen, amen šaj te ova hrabra hem bahtale. Akana ka dikha sar šaj amari nada te zaštitini amen. Najangleder, ka dikha sar tani amari nada sar sidro hem sar kaciga. Palo odova ka dikha, sar šaj te zorjaćera amari nada.

4. Sar tani i nada sar sidro? (Jevrejima 6:19)

⁴ Ko po lil e Jevrejenđe, o apostol Pavle phenđa so amari nada tani sar sidro. (Čitin Jevrejima 6:19.) Ov but putija putujinđa brodoja hem đanđa kobor o sidro šaj te pomožini e brodose te aćhol stabilno. Jekh puti, đi hine ko brod, hine jekh bari oluja. Tegani dikhlja sar o mornarija mukhena o sidro ko pani te na bi o brodo khuvela ko bara (Dela 27:29, 39-41). Sar so o sidro pomožini e brodose te aćhol stabilno, ađahar amari nada pomožini amenđe te aćhova uzo Jehova hem te aćhova smirime ked isi amen problemija sose verujinaja so o buća ka oven pošukar. Ama, na valjani te bistra so o Isus phenđa so ka ova progonime (Jov. 15:20). Odolese, ked razmislinaja ando Jehovase obećanja, odova pomožini amen hem ponodri te služina lese.

5. Sar i nada pomožinđa e Isusese angleder te merel?

⁵ Te dikha sar i nada pomožinđa e Isusese te aćhol verno, iako đanđa so ka merel. Ki Pedesetnica, ko 33. berš ki nevi era, o apostol Petar citirinđa jekh proročanstvo ando Psalam kova phenela so o Isus ka aćhol smireno hem so ka ovel le baro poverenje upro Jehova. Ov phenđa: „Me ka živinav ki nada, sose tu na ka aćhave man ko grobo, niti ka mukhe o telo ando toklo verno sluga te ćirnjol. . . but hijum bahtalo ked terđovava anglo tute“ (Dela 2:25-28; Ps. 16:8-11). Iako đanđa so ka merel, o Isus hine le nada so ka uskrsnini hem so palo odova ka ovel pe Dadeja ko nebo (Jevr. 12:2, 3).

6. So jekh phral phenđa andi nada?

⁶ Bute phralenđe hem phenjenđe i nada pomožinđa te oven istrajna. Te dikha o primer ando Leonard Čin, jekh verno phral kova živinđa ki Engleska. Ked hine o Dujto svetsko rat, sebepi so na manglja te đal ki vojska, ov hine ćhivdo ko phanlipe. Duj masek hine ki ćelija, a palo odova ćhivđe le te ćerel but phari buti. Ov pisinđa: „Odova so nakhljum ko phanlipe, pomožinđa maje te haljovav kobor tano važno te ovel amen nada te šaj te istrajina. Isi amen o primer ando Isus, ando apostolija, ando prorokija hem but obećanja ko Devleso Lafi. Sa odova dela amen nada hem zorjaćeri amen te istrajina.“ E Leonardese i nada hine sar sidro, a odova šaj te ovel hem amenđe.

7. Sar šaj o kušnje te zorjaćeren amari nada? (Rimljanima 5:3-5; Jakovljeva 1:12)

⁷ Ked istrajinaja ko kušnje hem ked dikhaja sar o Jehova pomožini amenđe, amen haljovaja kobor o Jehova ćaće mangela amen. (Čitin Rimljanima 5:3-5; Jakovljeva 1:12.) Tegani amari nada ovela pana pozorali nego ked prvo puti šunđam i šukar vest. O Beng mangela te osetina amen so ućharđe amen o problemija, a o Jehova mangela te del amen po vas hem te pomožini amenđe te ikljova ko krajo olencar.

8. Sar tani i nada sar kaciga? (1. Solunjanima 5:8)

⁸ Ki Biblija pisini so amari nada tani sar kaciga. (Čitin 1. Solunjanima 5:8.) Jekh vojniko akhari i kaciga te šaj te zaštitini po šero ando strele kola fordena o dušmanija. Ko amaro duhovno maribe, amen valjani te zaštitina amari godi  ando Bengese napadija. Ov koristini but buća te rumini amare mislija. Ama, sar so i kaciga zaštitini e vojnikoso šero, amari nada štitini amare mislija te šaj te aćhova verna e Jehovase.

9. So ovela e manušencar ako nane len nada?

⁹ I nada so ka živina večno šaj te pomožini amenđe te ana šukar odluke. Ama, ako amari nada nane zorali, amen šaj te počmina te razmislina samo ando amare želje hem ađahar te našala amari nada. Te dikha so ulo disave hrišćanenđe ki skupština Korint. Disave olendar našalđe pi vera ko jekh važno obećanje – ki nada ando uskrsenje (1. Kor. 15:12). O apostol Pavle phenđa so živinđe samo aso odova te ispuninen pe želje (1. Kor. 15:32). Avdije, but manuša kola na verujinena ko Devlese obećanja dena sa pestar te šaj akana te oven bahtale. Ama, amen hijam averćhane olendar sose isi amen nada so o Devel ka ispunini pe obećanja. Amari nada tani sar kaciga koja štitini amare mislija hem pomožini amen te na razmislina samo amendar sose odova šaj te rumini amaro amalipe e Jehovaja (1. Kor. 15:33, 34).

10. Sar šaj i nada te zaštitini amen ando pogrešno razmišljanje?

¹⁰ Amari nada šaj te zaštitini amen ando pogrešno razmišljanje. Na primer, disave mislinena so niked našti te ugodinen e Jehovase. Šaj phenena: „Me niked na ka živinav maškaro okola kola ka živinen večno. Me ništa na vredinava hem niked na ka šaj te ćerav odova so o Jehova rodela mandar.“ Setin tut so diso slično hem o Elifas phenđa e Jovese. Ov phenđa: „Sar šaj o manuš te ovel čisto anglo Devlese jaćha? Sar šaj neko kas i đuvli bijanđa te ovel pravedno? Dikh, o Devel na verujini pe sveto slugenđe, čak ni o nebo nane čisto anglo lese jaćha“ (Jov 15:14, 15). Ama, odova hine baro hovajbe. Okova kova mangela te ćhivel amen te mislina ađahar tano o Beng. Ov đanela so ako razmislinaja ađahar, amen ka našala amari nada. Odolese, cide tut ando odola hovajba hem razmislin ando Devlese obećanja. O Jehova mangela zauvek te živine hem ov ka pomožini tuće te rese đi odova cilj (1. Tim. 2:3, 4).

11. Sose valjani te ova strpljiva đi ađićeraja o Devel te ispunini pe obećanja?

¹¹ Nane uvek lokho amari nada te ovel zorali. Sar đala o vreme, šaj te ova nestrpljiva đi ađićeraja o Devel te ispunini pe obećanja. Sose? Sebepi so amen hem o Jehova na dikhaja isto ko vreme. Odova so šaj amenđe te dićhol so nakhlja but vreme, e Jehovase nane ađahar sose ov oduvek postojini (2. Petr. 3:8, 9). Ov ka ćerel odova so obećinđa, ama na tegani ked amen mislinaja. So šaj te pomožini amenđe amari nada te ovel zorali đi ađićeraja o Devel te ispunini pe obećanja? (Jak. 5:7, 8).

12. Premalo Jevrejima 11:1, 6, sar i vera pomožini amen te ovel amen nada?

¹² Amari nada ka ovel zorali ako hijam paše e Jehovaja. Ov šaj te ispunini odova ko so amen nadinaja amen. Ama, te šaj te ovel amen nada, amen mora te verujina so ov postojini hem so „nagradini okolen so revno rodena le.“ (Čitin Jevrejima 11:1, 6.) Ako verujinaja so o Jehova postojini, amen ka ova sigurna so ov ka ćerel sa so phenđa. Akana ka dikha nekobor buća kola ka pomožinen amen  te ova paše oleja hem amari nada te ovel zorali.

13. Sar šaj te ova paše e Devleja?

¹³ Molin tut e Jehovase hem čitin oleso Lafi. Amen šaj te ova paše e Jehovaja, iako na dikhaja le. Šaj te vaćera oleja ađahar so ka molina amen olese hem sigurna hijam so ka šunel amen (Jer. 29:11, 12). Isto ađahar, šaj te šuna le ađahar so ka čitina oleso Lafi hem hor ka razmislina odolestar so čitinđam. Đi čitinaja ando odova sar o Jehova pomožinđa pe verno slugenđe ko purano vreme, amari nada ovela pana pozorali. Sa odova soj tano pisimo ko Devleso Lafi „pisimo tano te sikavi amen hem te del amen snaga te istrajina te bi ovela amen nada“ (Rimlj. 15:4).

14. Sose tano šukar te razmislina ando odova so o Jehova ćerđa averenđe?

¹⁴ Razmislin ando odova sar o Jehova ićerđa pe ko po lafi. Te dikha so o Devel ćerđa e Avrahamese hem e Saraće. On duj hine but phure te ovel len ćhave. Ama, o Jehova obećinđa lenđe so ka ovel len jekh ćhavo (Post. 18:10). Sar o Avraham reagujinđa? Ki Biblija pisini: „Ov verujinđa so ka ovel dad ando but narodija“ (Rimlj. 4:18). Iako o Avraham na đanđa sar o Jehova ka ćerel odova so phenđa lese, ov ipak verujinđa so o Jehova ka ićeri pe ko po lafi. Odova verno manuš na razočarinđa pe (Rimlj. 4:19-21). Asavke izveštaja pomožinena amenđe te haljova so o Jehova ka ispunini odova so obećinđa amenđe kobor god odova te dićhol soj tano nemoguće.

15. Sose valjani te razmislina ando odova so o Jehova već ćerđa amenđe?

¹⁵ Razmislin odolestar so o Jehova ćerđa tuće. Da li šaj te setine tut sar o  Jehova đi akana pomožinđa tuće? Na primer, o Isus phenđa so oleso Dad ka del amen sa so valjani amenđe aso životi (Mat. 6:32, 33). Isto ađahar, phenđa so o Jehova ka del amen po sveti duh ked ka molina amen aso odova (Luka 11:13). Verovatno đi akana o Jehova već dinđa amen akala buća. Ama, šaj akana ki godi avena tuće pana disave obećanja kola o Jehova ispuninđa. Na primer, ov obećinđa so ka oprostini te grehija, so ka utešini tut hem so ka del tut sa so valjani te šaj te ove paše oleja (Mat. 6:14; 24:45; 2. Kor. 1:3). Ked razmislinaja ando odova sar o Devel pomožinđa amenđe, odova šaj te zorjaćeri amari nada so ka ispunini sa odova so phenđa asi budućnost.

16. Sose tani i nada jekh but šužo poklon?

¹⁶ Amari nada tani jekh but šužo poklon kova dinđa amen o Devel. Odolese, jedva ađićeraja te ćerel odova so phenđa. Amari nada tani sar sidro sose dela amen stabilnost te istrajina ked isi amen kušnje, ked doživinaja progonstvo ja čak ako ka valjani hem te našala amaro životi. Isto ađahar, oj tani sar kaciga sose zaštitini amen te na razmislina ando odova soj tano lošno hem te ćera odova soj tano šukar. I nada andi koja vaćeri i Biblija pomožini amen pana pobuter te penđara e Devle hem mothovi amenđe kobor ov mangela amen. Ako tani amari nada zorali, ka ovel amen but blagoslovija.

17. Sar i nada pomožini amen te ova bahtale?

¹⁷ „Oven bahtale ki tumari nada“, akale lafencar o apostol Pavle ohrabrinđa e hrišćanen ko Rim (Rimlj. 12:12). O Pavle šaj hine te ovel bahtalo sose hine sigurno so ako ka aćhol verno đi o krajo, ka dobini o večno životi ko nebo. Isto ađahar, hem amen šaj te radujina amen ki amari nada sose hijam sigurna so o Jehova ka ispunini sa so obećinđa. Sar so o psalmista pisinđa: „Bahtalo tano o manuš. . . kasi nada tani ko Jehova. . . o Devel kova tano uvek verno“ (Ps. 146:5, 6).