1. Sar amaro bahtalipe zavisini ando amare „duhovna potrebe“?

 O BAHTALIPE nane diso so samo trenutno osetinaja, već šaj te trajini celo životi. Ki Propoved ki gora, o Isus phenđa: „Bahtale tane okola soj tane svesna so valjani lenđe o Devel [ando pe duhovna potrebe]“ (Mat. 5:3). O Isus đanđa so o manuša tane stvorime te ovel len želja te penđaren e Devle hem te služinen lese. Odola tane amare duhovna potrebe. O Jehova tano „bahtalo Devel“, odolese okola so služinena lese šaj te oven bahtale (1. Tim. 1:11).

2-3. (a) Premalo odova so phenđa o Isus, ko šaj te ovel bahtalo? (b) Sostar ka vaćera ko akava članko?

² Da li valjani te ovel amenđe sa šukar ko životi te šaj te ova bahtale? Na. Ki Propoved ki gora, o Isus phenđa so čak hem „okola soj tane tužna“ – sebepi so angleder ćerđe disavo greh ja isi len disave bare problemija – šaj te oven bahtale. Isto ađahar, phenđa so šaj te oven bahtale hem okola kola tane „progonime sebepi i pravednost“ ili okola kas avera „vređinena“ odolese soj tane e Isusese učenikija (Mat. 5:4, 10, 11). Ama, sar šaj te ova bahtale ko asavke situacije?

³ O Isus phenđa so o bahtalipe na zavisini ando amare okolnostija, već kobor hijam paše e Devleja (Jak. 4:8). Ko akava članko, ka dikha trin buća kola ka pomožinen amen te ova ćaće bahtale.

4. Koja tani i prvo buti koja ka pomožini amenđe te ova bahtale? (Psalam 1:1-3)

⁴ PRVO BUTI: Valjani redovno te la i duhovno hrana, avere lafencar, valjani redovno te čitina hem hor te razmislina ando Devleso Lafi. Te šaj te aćhon đivde e manušenđe hem e životinjenđe valjani i doslovno hrana. Ama, samo o manuša valjani te len hem i duhovno hrana. Odolese, o Isus phenđa: „O manuš na živini samo ando maro, nego hem ando svako lafi kova ikljola ando Jehovaso muj“ (Mat. 4:4). Sebepi odova, na valjani te mukha jekh dive te nakhel, a te na čitina e Devleso Lafi, i Biblija. O psalmista phenđa: „Bahtalo tano o manuš kova uživini ko Jehovaso zakon hem čitini le dive hem rat.“ (Čitin Psalam 1:1-3.)

5-6. (a) So šaj te sikljova andi Biblija? (b) Sar šaj te pomožini amen odova so čitinaja i Biblija?

⁵ O Jehova mangela amen hem odolese mothovi amenđe so valjani te ćera te šaj te ova bahtale. Ko po Lafi, ov phenela amenđe sose živinaja, sar šaj te ova paše oleja hem so valjani te ćera te šaj te oven oprostime amare grehija. Isto ađahar, phenela amenđe hem savo životi ađićeri amen ki budućnost (Jer. 29:11). Odova so sikljovaja andi Biblija ćaće ćerela amen but bahtale!

⁶ Ki Biblija isi but savetija aso amaro životi. Ked ićeraja amen ko odola savetija, šaj te ova bahtale. Odolese, ked hijam obeshrabrime sebepi amare problemija, amen valjani pana pobuter te čitina e Jehovaso Lafi hem te razmislina ando odova so čitinđam. O Isus phenđa:  „Bahtale tane okola kola šunena e Devleso lafi hem ićerena le“ (Luka 11:28).

7. Sar šaj odova so čitinaja i Biblija pana pobuter te pomožini amenđe?

⁷ Ked čitineja i Biblija, odvojin dovoljno vreme te šaj te uživine. Te šaj te haljova sose tano odova važno, aće jekh primer. Zamislin so neko spreminđa tuće to omiljeno habe. Ama, šaj odolese so siđarđan ja brininđan tut disose haljan but sigate. Tek ked završinđan, haljiljan kobor sigate haljan hem so na uživinđan ko svako zalgo. Odova isto šaj te ovel hem ked čitinaja i Biblija. Šaj čitinaja odobor sigate so nane amen vreme te uživina ko odova so o Jehova mangela te sikavi amen. Odolese, ako mangaja te uživina đi čitinaja i Biblija, valjani te odvojina dovoljno vreme te šaj te ćera amenđe slike ki godi hem te zamislina sar vaćerena okola kastar čitinaja. Ako ađahar ćeraja, amen ka ova pobahtale.

8. Sar o „verno hem o razborito robo“ dela amen hrana ko pravo vreme? (Dikh i fusnota.)

⁸ O Isus ćhivđa e „verno hem razborito robe“ te del amen hrana ko pravo vreme b (Mat. 24:45). Odija duhovno hrana temeljini pe ki Biblija (1. Sol. 2:13). I duhovno hrana pomožini amenđe te haljova sar o Jehova razmislini. Odolese, amen čitinaja amare časopisija i Stražarsko kula hem o Probudite se! hem o člankija ko amaro sajt. Spreminaja amen aso sastankija ko radno dive hem ko vikend. Isto ađahar, dikhaja amari masekosi emisija ko JW Broadcasting^®. Ako redovno laja i duhovno hrana, amen šaj te ćera i dujto buti koja ka pomožini amen te ova bahtale.

9. Koja tani i dujto buti koja ka pomožini amen te ova bahtale?

⁹ DUJTO BUTI: Valjani te ićera amen ko Jehovase merilija. O psalmista pisinđa: „Bahtale tane sare kola darana ando Jehova, kola đana olese drumoja“ (Ps. 128:1). Te ovel amen dar ando Jehova značini so odobor poštujinaja le so cidaja amen ando sa so šaj te povredini le (Posl. 16:6). Odolese, valjani te da sa amendar te ićera amen ko Jehovase merilija aso odova soj tano šukar, a soj tano lošno sar so pisini ki Biblija (2. Kor. 7:1). Amen ka ova bahtale, ako ćeraja odova so o Jehova mangela hem cidaja amen ando odova so ov mrzini (Ps. 37:27; 97:10; Rimlj. 12:9).

10. Premalo Rimljanima 12:2, so valjani te ćera?

¹⁰ Čitin Rimljanima 12:2. Jekh manuš šaj đanela so o Jehova isi le pravo te odlučini soj tano šukar, a soj tano lošno. Ama, ov mora hem te ićeri pe ko Devlese merilija. Na primer, jekh manuš šaj đanela so o vlastija isi len pravo te odredinen kobor sigate šaj te vozini pe ko drumo. Ama, šaj na mangela te ićeri pe ko odova. Odolese, vozini posigate ando odova so valjani. Isto ađahar, amen odoleja so ćeraja mothovaja da li ćaće verujinaja so e Jehovase merilija tane aso amaro šukaripe (Posl. 12:28). O David ćaće verujinđa hem odolese phenđa: „Mothoveja maje o drumo kova legari ko životi. But hijum bahtalo ked terđovava anglo tute, ko to desno vas isi večno bahtalipe“ (Ps. 16:11).

11-12. (a) Ko so valjani te pazina ked isi amen disavo pharipe ja hijam obeshrabrime? (b) Sar o lafija ando Filipljanima 4:8 šaj te pomožinen amen te birina šukar zabava?

 ¹¹ Ked isi amen disave pharipa ja hijam obeshrabrime, tegani razmislinaja so valjani diso te ćera te šaj te rešina odova. Normalno tano te razmislina odolestar, ama valjani te pazina te na ćera diso so o Jehova mrzini (Ef. 5:10-12, 15-17).

¹² Ko lil kova pisinđa e hrišćanenđe ko Filipi, o apostol Pavle podstakninđa len te razmislinen ando odova soj tano „pravedno. . . čisto. . . so ćhivela len te mothoven mangipe. . . hem soj tano pristojno.“ (Čitin Filipljanima 4:8.) Iako o Pavle na pisinđa andi disavi konkretno zabava, odova so pisinđa šaj te pomožini amenđe te birina šukar zabava. Probin umesto o lafi „sa“, kova pojavini pe ko akava stih, te ćhive o lafi „đilja“, „filmija“, „serije“ ja „video-igrice“. Odova ka pomožini amenđe te dikha soj tano šukar anglo Jehovase jaćha, a so nane. Amen mangaja te ićera amen ko Jehovase merilija (Ps. 119:1-3). Akana šaj te dikha i trito buti koja šaj te pomožini amen te ova bahtale (Dela 23:1).

13. Koja tani i trito buti koja ka pomožini amen te ova bahtale? (Jovan 4:23, 24)

¹³ TRITO BUTI: De sa tutar te ćhive e Jehova ko prvo than ko to životi. Sebepi so stvorinđa amen, o Jehova zaslužini te služina lese (Otkr. 4:11; 14:6, 7). Odolese, i najvažno buti ko amaro životi valjani te ovel te služina lese ađahar sar so ov mangela. (Čitin Jovan 4:23, 24.) Amen mangaja e Devleso sveti duh te pomožini amenđe te služina lese ađahar sar so pisini ko oleso Lafi. O Jehova valjani te ovel amenđe ko prvo than, čak iako živinaja ki phuv kuri tane amare aktivnostija ograničime ja amaro delo tano zabranimo. Trenutno, prekalo 100 phralja hem phenja tane ko phanlipe sebepi soj tane e Jehovase svedokija. c Ama, on tane bahtale so šaj te molinen pe, te proučinen e Devleso Lafi hem te vaćeren averenđe ando Devel hem ando oleso Kraljevstvo! Ked o manuša progoninena amen ja vređinena amen, šaj te ova bahtale sose đanaja so o Jehova ka pomožini amen te istrajina hem so ka blagoslovini amen (Jak. 1:12; 1. Petr. 4:14).

14. So desinđa pe amare phralese ko Tadžikistan hem sose?

¹⁴ Disave amare phralja hem phenja isi len bare pharipa. Ama, on tane bahtale sose ćerena akala trin buća kolendar akana vaćerđam. Amaro phral o Džovidon Bobodžonov živini ko Tadžikistan. Ked hine le 19 berš hine vićimo te đal ki vojska, ama ov na manglja te đal. Odolese, ko 4. oktobar ko 2019. berš, silaja hine legardo kotar po ćher hem ćhivdo ko phanlipe. Odothe hine nekobor masek hem premalo leste ponašinđe pe samći tano kriminalco. Ko nekobor phuvja o medije vaćerđe ando oleso slučaj. On phenđe so ko phanlipe marđe le hem so silaja manglje te ćhiven le te uravi i vojno uniforma hem te del sovel so ka del sa pestar te branini i država. Palo odova, o sudo phenđa soj tano  krivo hem bićhalđa le ko radno logor hem othe hine sa đi o predsednik andi odija država na phenđa so šaj te ovel oslobodimo. Sa odova vreme, o Džovidon aćhilo verno e Jehovase hem hine bahtalo. Sar uspinđa ko odova? Ađahar so hine uvek svesno ando pe duhovna potrebe.

15. Sar o Džovidon redovno lelja i duhovno hrana đi hine ko phanlipe?

¹⁵ Đi hine ko phanlipe, o Džovidon redovno lelja i duhovno hrana, iako na hine le Biblija ja amare publikacije. Sar? Amare phralja hem phenja bićhalđe lese hrana hem ko kese kuri hine odija hrana pisinđe e diveso stiho. Ađahar šaj hine svako dive te čitini e Devleso Lafi hem hor te razmislini odolestar so čitinđa. Ked ikljilo ando phanlipe, okolenđe kola pana na hine len disave bare kušnje phenđa: „But tano važno te koristinen tumari sloboda šukar te penđaren e Jehova ađahar so ka čitinen oleso Lafi hem amare publikacije.“

16. Sostar razmislinđa o Džovidon?

¹⁶ Amaro phral, o Džovidon, ićerđa pe ko Jehovase merilija. Ov na razmislinđa ando pogrešna želje hem na ćerđa  diso soj tano lošno. Umesto odova, razmislinđa ando Jehova hem ando odova soj tano olese važno. But razmislinđa odolestar so o Jehova stvorinđa. Svako sabalje vazdinđe le o ćiriklja, a raćate posmatrinđa o mesec hem o ćerenja. Odolese phenđa: „Odola poklonija ando Jehova but pomožinđe man te ovav bahtalo hem but ohrabrinđe man.“ Ked hijam zahvalna aso odova so o Jehova dela amen, amen hijam but bahtale hem odova dela amen snaga te istrajina.

17. Sar šaj o lafija andi 1. Petrova 1:6, 7 te pomožinen amen ako jekh dive ka ova ki situacija ki koja hine o Džovidon?

¹⁷ Isto ađahar, o Džovidon ćhivđa e Jehova ko prvo than. Ov đanđa kobor tano važno te aćhol verno e Jehovase. O Isus phenđa: „E Jehovase, te Devlese, klanin tut hem jedino olese služin“ (Luka 4:8). O komandirija hem o vojnikija manglje silaja te ćhiven e Džovidone te odreknini pe andi pi vera. Ama, ov dive rat asvencar molinđa e Jehova te pomožini le te aćhol lese verno. Iako nakhlja sa akala pharipa, o Džovidon na cidinđa pe ando Jehova. Sebepi odova, ov tano bahtalo sose akana isi le diso so na hine le angleder o phanlipe, olesi vera tani pana pozorali. (Čitin 1. Petrova 1:6, 7.)

18. Sar šaj te ova bahtale?

¹⁸ O Jehova đanela so valjani te ćera te šaj te ova bahtale. Ked ćeraja akala trin buća kolendar akana vaćerđam, amen šaj te ova bahtale iako isi amen bare pharipa. Tegani, hem amen šaj te phena: „Bahtalo tano o narodo kaso Devel tano o Jehova“ (Ps. 144:15).