1-2. Kova tano najšukar način te čitina hem te proučina i Biblija? Vaćer jekh primer.

 ZAMISLIN so mangeja te ćine jekh ćher. So bi mangeja te dikhe angleder te ćine le? Da li ka ovel tuće dovoljno samo te dikhe i slika ando odova ćher? Sigurno na. Tu bi mangeja te đa uduri lično, te khuve ki svako soba hem te dikhe svako ćoši. Čak bi mangeja te vaćere nekasa kova đanela sar odova ćher ćerđa pe. Sigurno bi mangeja te dikhe svako detalji ando odova ćher.

² Diso slično šaj te ćera ked čitinaja hem proučinaja e Devleso Lafi. Jekh biblijako izučavalac phenđa so i Biblija tani sar jekh bari zgrada koja tani but ući hem isi la hor temelji. Tegani, sar šaj pana pošukar te haljova odova so pisini ki Biblija? Ako samo sigate čitinaja, amen ka sikljova samo o „osnovna buća kotar Devlese sveta lafija“ (Jevr. 5:12). Ama, sar so valjani te khuva andre ko ćher te šaj te đana savo tano, isto ađahar valjani pažljivo te proučina i Biblija te šaj te haljova la. Jekh šukar način sar šaj te ćera odova tano ađahar so ka dikha sar tane povezime o različita delija andi olaki poruka. Svako amendar valjani te trudini pe te haljol na samo ko so verujini već hem sose verujini.

3. So o apostol Pavle podstakninđa e hrišćanen te ćeren hem sose? (Efešanima 3:14-19)

³ Te šaj potpuno te haljova disavo detalji ando Devleso Lafi, amen valjani te sikljova o hor ćaćipa andi Biblija. O apostol Pavle podstakninđa e hrišćanen hor te proučinen e Devleso Lafi te šaj potpuno te haljoven „kobor tano buvlo, dugačko, ućo hem hor o ćaćipe“. Palo odova, on šaj hine te oven „ukorenime hem utemeljime ki vera.“  (Čitin Efešanima 3:14-19.) Amen valjani te ćera isto odova. Akana ka dikha sar šaj temeljno te istražina e Devleso Lafi te šaj potpuno te haljova le.

4. So šaj te ćera te ova popaše e Jehovaja? Vaćer jekh primer.

⁴ Amen na mangaja te haljova samo o osnovna buća ando Devleso Lafi. E Jehovaso sveti duh šaj te pomožini amen te haljova hem „e Devlese hor buća“ (1. Kor. 2:9, 10). Sose ne bi ko to lično proučibe istražineja diso so šaj te pomožini tuće te ove popaše e Jehovaja? Na primer, šaj te istražine sar o Jehova mothovđa po mangipe pe slugenđe ko purano vreme hem sar odova mothovi so hem tut mangela. Ja šaj te proučine odolestar sar o Jehova manglja o Izraelcija te služinen lese ko purano vreme hem uporedin odova sar o Jehova mangela amen te služina lese. Isto ađahar, šaj detaljno te proučine o proročanstvija kola o Isus ispuninđa đi hine ki phuv.

5. Da li isi diso so mangeja pohor te proučine?

⁵ Disave phralja hem phenja kola volinena te proučinen vaćerđe ando kola buća bi mangena pobuter te istražinen. Diso ando odova šaj te dikha ko okvir „ Predlogija aso lično proučibe“. Tu šaj te uživine đi ka proučine asavke pohor buća ađahar so ka koristine o Indeks ando publikacije hem o Vodič kotar publikacije ando Jehovase svedokija. Ako hor proučineja i Biblija, odova šaj te zorjaćeri ti vera hem te pomožini tut te đane „koj tano o Devel“ (Posl. 2:4, 5). Akana ka dikha kola hor buća šaj temeljno te proučina.

6. (a) Koja tani razlika maškaro plan hem i namera? (b) Sose šaj te phena so e Jehovasi namera aso manuša hem i phuv tani „večno“? (Efešanima 3:11)

⁶ Te dikha so i Biblija vaćeri andi Devlesi namera. Isi bari razlika maškaro plan hem i namera. O plan tano sar jekh konkretno drumo kova legari tut ko than ko kova mangeja te rese. Ama, ako  diso blokirini odova drumo, na ka šaj te rese odothe kuri mangljan. Ki aver strana, i namera šaj te uporedina e thaneja ko kova mangeja te rese. Amen tačno đanaja kaj mangaja te đa. Ama, te šaj te resa uduri šaj te koristina različita drumija. Ako tano jekh drumo blokirimo, šaj te koristina aver. O Jehova šaj te birini različita drumija te šaj te ispunini pi namera hem uvek tano uspešno odolese so „ćerđa sa te služini asi olesi namera“ (Posl. 16:4). Ki Biblija pisini so e Jehovasi namera tani „večno“ (Ef. 3:11). Odija namera tani večno sose o Devel mukhlja te nakhel but vreme đi potpuno na ispunini pe. Isto ađahar, sa odova so ka ćerel ka trajini večno. Ama, soj tani e Jehovasi namera hem so ov ćerđa te šaj te ispunini la? Akana ka dikha.

7. Palo odova so o prva manuša grešinđe, sar o Jehova meninđa o način sar ka ispunini pi namera? (Matej 25:34)

⁷ O Devel phenđa e prvo manušenđe koja tani olesi namera olencar. Ov phenđa lenđe: „Nek ovel tumen but ćhave hem tumendar nek oven but manuša, pheren i phuv hem vladinen upro late [. . .] hem upro stvorenja ki phuv“ (Post. 1:28). Ked o Adam hem i Eva grešinđe, sa o manuša nasledinđe o greh. Ama, o Jehova na meninđa pi namera. Ov samo meninđa o način sar ka ispunini pi namera. Ov odmah odlučinđa so ka ćerel jekh Kraljevstvo ko nebo prekalo kova ka ispunini pi namera e manušencar hem e phuvjaja. (Čitin Matej 25:34.) Ko vreme kova odredinđa, o Jehova bićhalđa pe Ćhave te avel ki phuv, te sikavi e manušen ando odova Kraljevsto hem te otkupini amen ando greh hem ando meribe. Palo odova so uskrsninđa, o Isus irinđa pe ko nebo te vladini sar Kralj ko Devleso Kraljevstvo. Ama, isi pana buća kola šaj te sikljova andi Devlesi namera.

8. (a) Koja tani i tema andi Biblija? (b) Premalo Efešanima 1:8-11, so o Jehova pana ka ćerel? (Dikh i slika ki naslovno strana.)

⁸ I glavno tema andi Biblija tani te posvetini pe e Jehovaso anav prekalo Kraljevstvo ko kova ka vladini o Hrist, kova ka ispunini e Devlesi namera e phuvjaja. E Jehovasi namera našti te menini pe. Ov obećini amenđe so ka ćerel sa odova so phenđa (Is. 46:10, 11, fusn.; Jevr. 6:17, 18). I phuv ka ovel raj kuri e Adamese hem e Evake savršena hem pravedna potomkija „zauvek ka živinen“ (Ps. 22:26). Ama, odova nane sa. Ov ka ćerel sa olese sluge kola tane ko nebo hem ki phuv te oven ko jekhipe. Tegani sare ka oven podložna e Devlese, pe Vrhovno Vladarese. (Čitin Efešanima 1:8-11.) Ćaće oduševini amen odova sar o Jehova ka ispunini pi namera.

9. Đi čitinaja i Biblija, kobor dur šaj te dikha o događaja kola ka oven ki budućnost?

⁹ Te dikha o proročanstvo kova o Jehova vaćerđa ko Postanak 3:15. b Akava proročanstvo vaćeri ando događaja kola ka ispuninen e Jehovasi namera. Ama, odola događaja valjanđe te ispuninen pe but berša palo odova so hine vaćerdo akava proročanstvo. Na primer, o Jehova phenđa e Avrahamese so o Isus ka avel andi olesi loza (Post. 22:15-18). Ko 33. berš ki nevi era, sar so  hine proreknimo, o Isus hine ranimo ki peta (Dela 3:13-15). O završno događaj ando akava proročanstvo, so e Satanaso šero ka ovel zdrobimo, ka ispunini pe pali Hristesi hiljadaberšengi vladavina (Otkr. 20:7-10). I Biblija vaćeri ando but buća kola ka oven đi sa pobuter barjola o neprijateljstvo ando Satanaso sveto premali Jehovasi organizacija.

10. (a) So pana hari ka ovel? (b) Sar šaj te pripremina amari godi hem amaro vilo aso događaja kola avena? (Dikh i fusnota.)

¹⁰ Te dikha pana disave događaja kola i Biblija prorekninđa. Najangleder, o vladarija ka objavinen „mir hem sigurnost“ (1. Sol. 5:2, 3). I bari nevolja „iznenada“ ka počmini ked o narodija ka napadinen i hovavni religija (Otkr. 17:16). Palo odova, o narodija ka dikhen „e manušikane Ćhave sar avela ko oblakija ko nebo silaja hem bare slavaja“ (Mat. 24:30). Odova izgleda ka ovel disavi vrsta andi natprirodno pojava. Tegani, ov ka sudini e manušenđe ađahar so ka odvojini e bakren ando jarcija (Mat. 25:31-33, 46). Ama, o Satana na ka bešel phanle vastencar. Odolese so odobor mrzini e Devlese narodo, ov ka ćhivel i koalicija ando narodija, koja i Biblija vićini Gog andi phuv Magog, te napadini e Devlese verna slugen (Jezek. 38:2, 10, 11). Ko disavo trenutko đi ka trajini i bari nevolja, o pomazime hrišćanija ka oven ćedime ko nebo. Zajedno e Isuseja hem e nebesko vojskaja ka počminen o maribe ando Armagedon. Tegani, ka ovel kraj andi bari nevolja (Mat. 24:31; Otkr. 16:14, 16). c Palo odova, ka počmini e Hristesi hiljadaberšengi vladavina (Otkr. 20:6).

11. So o večno životi značini tuće? (Dikh i slika.)

¹¹ Akana razmislin ando odova so ađićeri tut ki budućnost. Ki Biblija pisini so amaro Stvoritelj čak i „večnost e manušenđe ko vilo ćhivđa“ (Prop. 3:11). Razmislin so odova značini tuće hem aso to amalipe e Jehovaja. Ki knjiga Približi se Jehovi ki 319.  strana pisini: „Palo odova so ka živina stotine, hiljada, milionija čak hem milijarde berša, ka đana but pobuter ando Jehova nego so akana đanaja. Ama, palem ka oven but buća kola ka valjani te sikljova. Našti ni te zamislina kobor o večno životi ka ovel zanimljivo hem kola buća ka oven amen.“ Ama, hem tegani i najvažno buti ka ovel amaro amalipe e Jehovaja. So pana šaj te istražina đi proučinaja e Devleso Lafi?

12. Sar šaj barem hari te đana sar tano ko nebo? Vaćer jekh primer.

¹² E Jehovaso Lafi mothovi amenđe samo hari sar tano ki Jehovasi prisutnost upre ko nebo (Is. 33:5). I Biblija vaćeri but šukar buća ando Jehova hem andi olesi nebesko organizacija (Is. 6:1-4; Dan. 7:9, 10; Otkr. 4:1-6). Na primer, amen šaj te čitina ando but šukar buća kola o Jezekilj dikhlja ked „o nebo phravdilo hem dobinđa vizija ando Devel“ (Jezek. 1:1).

13. Premalo Jevrejima 4:14-16, so mislineja andi Isusesi uloga koja isi le ko nebo?

¹³ Razmislin andi Isusesi uloga koja isi le sar Kralj hem Prvosveštenik. Prekalo leste amen šaj te ava anglo Devleso „presto ando bizaslužimo šukaripe“ ki molitva hem te roda lestar milosrđe hem pomoć „ked valjani amenđe“. (Čitin Jevrejima 4:14-16.) Ma te mukha nijekh dive te nakhel, a te na razmislina ando odova so o Jehova hem o Isus ćerđe amenđe hem so akana ćerena. O mangipe kova mothovena amenđe valjani te pogodini amen ko vilo hem te podstaknini amen te ova revna đi služinaja e Jehovase (2. Kor. 5:14, 15).

14. So šaj te ćera te šaj te mothova so hijam zahvalna e Jehovase hem e Isusese? (Dikh i slika.)

 ¹⁴ Jekh šukar način sar šaj te mothova so hijam zahvalna e Devlese hem olese Ćhavese tano te pomožina averenđe te oven e Jehovase svedokija hem e Isusese učenikija (Mat. 28:19, 20). Odova ćerđa hem o apostol Pavle te šaj te mothovi pi zahvalnost e Devlese hem e Hristese. Ov đanđa so e Jehovasi volja tani „te spasinen pe sa o manuša hem šukar te penđaren o ćaćipe“ (1. Tim. 2:3, 4). Odolese, ov dinđa sa pestar te pomožini so pobuter manušenđe te spasinen pe (1. Kor. 9:22, 23).

15. Premalo Psalam 1:2, so ka ćerel amen bahtale?

¹⁵ O pisco ando prvo psalam phenđa so jekh uspešno hem bahtalo manuš tano okova kova uživini ko Jehovaso zakon hem kova dive hem rat hor razmislini olestar (Ps. 1:1-3; fusn.). Jekh biblijako prevodilac ando akala stihija phenđa so o manuš odobor valjani te mangel e Devleso vođstvo soj tano spremno te rodel le ko Devleso Lafi, te istražini olestar hem hor te razmislini olestar (Studies in the Psalms). Ov pana phenđa so ako neko dozvolini pese te nakhel jekh dive, a te na čitini i Biblija, odova manuš odova dive but propustinđa. Amen šaj te uživina đi proučinaja i Biblija ako trudinaja amen te istražina disave detaljija andi Biblija hem te dikha sar tane on povezime. Ked daja sa amendar hor te proučina i Biblija, amen ka ova but bahtale.

16. Sostar ka vaćera ko aver članko?

¹⁶ E biblijake sikljoviba nane odobor phare so amen našti te haljova len. Ko aver članko ka vaćera andi jekh pohor buti andi Biblija, kotar Jehovaso duhovno hram kolestar o Pavle vaćerđa ko po lil e Jevrejenđe. Uživin đi proučineja odija tema.