1. Sar valjani te dikha upro Jehova?

O ISUS kova tano „prvo kotar sa soj tano stvorimo“ hem o anđelija tane deo andi e Jehovasi porodica (Kol. 1:15; Ps. 103:20). Ked hine ki phuv, o Isus pomožinđa e manušenđe te dikhen upro Jehova sar upro po Dad. Đi vaćerđa pe učenikonencar, o Isus objasninđa lenđe so o Jehova tano hem oleso hem olengo Dad (Jov. 20:17). Ked predajinđam amaro životi e Jehovase hem ked krstinđam amen, amen uljam deo andi e Jehovasi porodica (Mar. 10:29, 30).

2. Sostar ka vaćera ko akava članko?

² Disavenđe tano but pharo te dikhen e Jehova sar pe Dade. Avera šaj na đanena sar te mothoven mangipe premalo phralja hem phenja. Ko akava članko, ka dikha sar o Isus pomožini amen te dikha upro Jehova sar upro amaro Dad hem sar šaj te ova paše oleja. Isto ađahar, ka dikha sar šaj te oponašina e Jehova đi mothovaja mangipe premalo amare phralja hem phenja.

3. Sar i molitva Očenaš, pomožini amen te ova paše e Jehovaja?

³ O Jehova tano Dad kova but mangela amen. O Isus mangela te dikha upro Jehova ađahar sar so ov dikhela le – sar jekh roditelj kova but mangela amen, kasa šaj te vaćera bilo ked, a na sar jekh strogo Devel kova samo vaćeri amenđe so te ćera. Odova dikhlja pe ked o Isus sikavđa pe učenikonen te molinen pe. Ov phenđa lenđe: „Molinen  tumen ađahar: ’Dade amareja‘“ (Mat. 6:9). O Isus šaj hine te phenel amenđe, đi molinaja amen e Jehovase te koristina o titule sar soj tane Svemoćno, Stvoritelj ili Kralj andi večnost. Sa akala titule tane šukar, sose ki Biblija on koristinena pe te mothoven savo tano o Jehova (Post. 49:25; Is. 40:28; 1. Tim. 1:17). Ama, o Isus phenđa so ked molinaja amen šaj te phena e Jehovase „Dade.“

4. Sar đanaja so o Jehova mangela te ova paše oleja?

⁴ Da li tano tuće pharo te dikhe upro Jehova sar upro to Dad? Disavenđe tano pharo te zamislinen jekhe dade kova mangela len sose olengo dad na mothovđa lenđe mangipe. Ama, o Jehova najšukar đanela sar osetinaja amen hem sose osetinaja amen ađahar. Ov mangela te ovel paše amencar. Odolese, ko oleso Lafi pisini: „Oven popaše e Devleja, hem ov ka ovel popaše tumencar“ (Jak. 4:8). O Jehova mangela amen hem ov tano najšukar Dad kova šaj te ovel amen.

5. Premalo Luka 10:22, sar o Isus pomožini amen te ova popaše e Jehovaja?

⁵ O Isus pomožini amen te ova popaše e Jehovaja. Ov but šukar penđari e Jehova hem odobor hine slično olese so šaj hine te phenel: „Ko dikhlja man, dikhlja hem e Dade“ (Jov. 14:9). Sar jekh phureder phral, o Isus sikavi amen sar te poštujina hem te šuna amare Dade. Isto ađahar, sikavi amen so valjani te ćera te šaj o Jehova te ovel zadovoljno amencar. Ama, e Isusese hine najvažno te pomožini amen te haljova kobor tano o Jehova šukar hem kobor mangela amen. (Čitin Luka 10:22.) Akana ka dikha sar o Jehova odova mothovi.

6. Vaćer disave primerija kola mothovena so o Jehova šunđa e Isusese molitve.

⁶ O Jehova šunela pe ćhaven. Razmislin ando odova sar o Jehova šunđa pe Ćhave, e Isuse. Ked o Isus hine ki phuv, o Jehova but putija šunđa le sar molini pe (Luka 5:16). O Jehova šunđa le ked molinđa pe angleder te anel disave važna odluke. Na  primer, ked birinđa o dešuduj apostolija (Luka 6:12, 13). Isto ađahar, ked e Isusese hine but pharo, o Jehova šunđa olese molitve. Hari angleder o Juda te izdajini le, ov ki molitva phenđa pe Dadese kobor tano lese pharo, sebepi o buća kola ka nakhel. O Jehova na samo so šunđa pe Ćhave, već hem bićhalđa jekhe anđele te ohrabrini le (Luka 22:41-44).

7. Sar osetineja tut ked đaneja so o Jehova šunela te molitve?

⁷ O Jehova hem avdije šunela amare molitve hem odgovorini amenđe ko pravo vreme hem ko pravo način (Ps. 116:1, 2). Jekh phen andi Indija dikhlja sar o Jehova odgovorinđa ko olake molitve. Oj hine depresivno hem odolese molinđa pe e Jehovase. Oj pisinđa: „E masekosi emisija aso maj 2019. berš vaćerđa ando odova so šaj te ćera ked but brininaja amen. Baš odova valjanđa maje te šunav. Odija emisija hine odgovor ko me molitve.“

8. Sar o Jehova mothovđa so mangela e Isuse?

⁸ O Jehova mothovi so brinini pe amendar hem so mangela amen, isto sar so mothovđa so mangela pe Ćhave, e Isuse, đi hine ki phuv (Jov. 5:20). Ov pomožinđa e Isusese te ovel le zorali vera, ohrabrinđa le ked hine lese pharo hem dinđa le sa so valjani te šaj te živini. O Jehova phenđa pe Ćhavese so mangela le hem soj tano zadovoljno oleja (Mat. 3:16, 17). Odolese, o Isus đanđa so oleso Dad uvek ka pomožini lese hem so niked na ka aćhavi le (Jov. 8:16).

9. Sar đanaja so o Jehova mangela amen?

⁹ Sar o Isus, sare amen ko razna načinija osetinđam kobor o Jehova mangela amen. Razmislin akalestar: O Jehova pomožinđa amen te ova olese amala hem dinđa amen but phralja hem phenja kola ćerena amen bahtale hem kola ohrabrinena amen ked tano amenđe pharo (Jov. 6:44). Isto ađahar, o Jehova dela amen sa so valjani amenđe te šaj amari vera te ovel zorali. Uzo odova, o Jehova dela amen sa so valjani amenđe te šaj te živina (Mat. 6:31, 32). Ked razmislinaja ando odova kobor o Jehova mangela amen, amaro mangipe premalo leste barjola.

10. So o Jehova osetini premalo amare phralja hem phenja hem so amen šaj te sikljova olestar?

¹⁰ O Jehova mangela amare phralen hem phenjen. Podijekh puti, šaj te ovel amenđe pharo te mothova so mangaja amare phralen hem phenjen. Odova tano ađahar, sose sare avaja ando različita kulture ili averćhane bariljam. Uzo odova, sare amen grešinaja hem šaj te povredina jekh jekhe. Ipak, svako amendar šaj te ćerel diso te šaj o mangipe maškaro amende te ovel pana pobaro. Odova šaj te ćera ako oponašinaja e Jehova (Ef. 5:1, 2; 1. Jov. 4:19). Hajde te dikha so šaj te sikljova ando Jehova.

11. Sar o Isus mothovđa soj tano saosećajno sar o Jehova?

¹¹ O Jehova tano saosećajno Devel (Luka 1:78). Ked dikhela soj tano nekase pharo, o saosećajno manuš mangela te pomožini lese hem te utešini le. Odoleja sar ponašinđa pe premalo manuša, o Isus mothovđa kobor o Jehova brinini pe olendar (Jov. 5:19). Jekhvar, „ked dikhlja bute manušen“, o Isus „sažalinđa pe upro lende sose hine mučime hem našalde sar o bakre bizo pastiri“ (Mat. 9:36). O Isus na samo so sažalinđa pe upro lende, već hem ćerđa diso te bi pomožini lenđe. Ov saćarđa e nabormen hem olese lafija dinđe snaga okolenđe  kola hine „umorna hem opteretime“ (Mat. 11:28-30; 14:14).

12. Sar šaj te mothova so hijam saosećajna?

¹² Ako mangaja te ova saosećajna premalo amare phralja hem phenja, valjani te razmislina kola problemija on isi len. Na primer, šaj jekh phen tani but nabormi. Iako na žalini pe, odova na značini so na valjani laće pomoć. Šaj te puća amen: „Da li oj šaj te ćerel sa so valjani ko ćher? Da li valjani laće pomoć te ćerel o habe ja te čistini o ćher?“ Ja šaj jekh phral našalđa pi buti. Razmislin da li šaj te pomožine lese ađahar so ka de le hari pare, bizo te đanel kastar tane.

13-14. Sar šaj te ova phravde vastese sar o Jehova?

¹³ O Jehova tano phravde vasteso (Mat. 5:45). Ako mangaja te ova saosećajna, amen na valjani te ađićera amare phralja hem phenja te roden amendar pomoć. Amen valjani te ova sar o Jehova. Iako amen na rodaja olestar odova, ov svako dive dela amen kham. O kham taćari sa e manušen, bizo obzir da li on tane zahvalna ja na. O Jehova mothovi so mangela amen, ađahar so dela amen sa so valjani amenđe. Amen but mangaja e Jehova, sose ov tano šukar hem phravde vasteso!

¹⁴ But amare phralja hem phenja tane phravde vastese, sar o Jehova. Na primer, ko 2013. berš ko Filipini, sebepi o supertajfun Haijan, but amare phralja hem phenja našalđe pe ćhera hem sa so hine len. Ama, o phralja hem o phenja ando celo sveto pomožinđe len. But olendar dinđe prilogija, a avera pomožinđe te popravinen pe ja palem te ćeren pe olenge ćhera. Aso samo jekh berš hine ćerde oko 750 ćhera. Čak hem ko period andi pandemija kotar koronavirus, amare phralja hem phenja dena sa pestar te pomožinen jekh jekhese. Ked hijam spremna sigate te pomožina amare phralenđe hem phenjenđe, tegani mothovaja so mangaja len.

15-16. Premalo Luka 6:36, so valjani te ćera te šaj te oponašina amare nebesko Dade?

¹⁵ O Jehova tano milosrdno hem spremno tano te oprostini. (Čitin Luka 6:36.)  Svako dive o Jehova oprostini amenđe (Ps. 103:10-14). E Isusese učenikija but putija grešinđe, ama ov mothovđa soj tano milosrdno ađahar so spremno oprostinđa lenđe. Ov čak hine spremno te del po životi te šaj amare grehija te oven oprostime (1. Jov. 2:1, 2). Sar osetineja tut ked đaneja so o Jehova hem o Isus tane spremna te oprostinen amenđe? Da li odova pašaćeri tut olencar?

¹⁶ Ked „ando vilo oprostinaja jekh jekhese“, tegani amaro mangipe ovela pobaro (Ef. 4:32). Naravno, podijekh puti šaj te ovel amenđe but pharo te oprostina. Ađahar osetinđa pe hem jekh amari phen. Ama, olaće but pomožinđa odova so čitinđa ko članko „Spremno opraštajte jedni drugima.“ * Oj pisini: „Akava članko pomožinđa maje te haljovav so ked oprostinaja, odova tano amare šukaripase. Haljiljum so ked oprostinaja nekase, odova na značini so tiknjaćeraja olenge greške ja so ćeraja amen ka phene ništa na ulo. Ama, ked oprostinaja averenđe, odova značini so na ićeraja i holi ano amende hem so isi amen mir ko vilo.“ Ked spremno oprostinaja amare phralenđe hem phenjenđe, tegani mothovaja so mangaja len hem so oponašinaja amare Dade, e Jehova.

17. Premalo Matej 5:16, sar šaj te slavina amare nebesko Dade?

¹⁷ Amen hijam zahvalna so ko celo sveto isi amen phralja hem phenja kola mangena jekh jekhe. Odolese, na mangaja te ćera ništa so ka ćhivel averen te mislinen lošno ando Jehova hem ando oleso narodo. Mangaja te da sa amendar te ponašina amen šukar sose sebepi amaro o manuša šaj ka mangen te sikljon ando Jehova hem te služinen lese. (Čitin Matej 5:16.)

18. So ka pomožini amen hrabro te propovedina?

¹⁸ Podijekh puti, disave šaj te maren amenđe muj ja te progoninen amen sebepi so šunaja amare nebesko Dade. So valjani  te ćera ako daraja te vaćera averencar ando amare verovanja? Amen šaj te ova sigurna so o Jehova hem oleso Ćhavo ka pomožinen amen. O Isus phenđa pe učenikonenđe so na valjani te brininen pe ando odova so ka phenen hem sar ka phenen. O Isus phenđa: „Ko odova trenutko ka đanen so te vaćeren. Sose na ka vaćeren samo tumen, nego tumare Dadeso duho ka vaćeri prekalo tumende“ (Mat. 10:19, 20).

19. Vaćer jekh primer kova mothovi sar neko hrabro propovedinđa.

¹⁹ Hajde te dikha o primer ando amaro phral o Robert. Ked počminđa te proučini, ov na đanđa but andi Biblija. Ama, ko odova vreme valjanđa te đal ko vojno sud, ki Južno Afrika. Ov hrabro objasninđa so na mangela te đal ko maribe, sose mangela pe phralen. Ov hine zahvalno soj tano deo andi e Jehovasi porodica. Tegani, o sudija pućlja le: „Koj tane te phralja?“ O Robert na ađićerđa odova pućibe. Ama, odmah alo lese ki godi o citati kova čitinđa odova dive. Odova hine o stih ando Matej 12:50: „Svako ko ćerela odova soj tano premali me Dadesi volja kova tano ko nebo, ov tano mo phral hem mi phen hem mi daj.“ Iako o Robert tegani tek počminđa te proučini, o Jehova pomožinđa lese te odgovorini ko odova hem ko but avera pućiba. O Jehova sigurno hine but ponosno upro Robert. Isto ađahar, ov tano ponosno ked dikhela sar amen avdije uzi olesi pomoć propovedinaja, čak ked odova nane lokho.

20. So valjani te ova odlučna te ćera? (Jovan 17:11, 15)

²⁰ But hijam zahvalna so hijam deo andi e Jehovasi porodica. Amen isi amen najšukar Dad hem but phralja hem phenja kola mangena amen. Uvek valjani te ova zahvalna aso odova. O Beng hem okola kola služinena olese mangena te ćhiven amen te mislina so amaro Dad, o Jehova, na mangela amen hem mangena te ruminen amaro jekhipe. Odolese, o Isus molinđa pe Dade te arakhi amen hem te aćhova ko jekhipe. (Čitin Jovan 17:11, 15.) O Jehova ćerđa odova so o Isus rodinđa olestar. Sar o Isus, hem amen valjani te ova uverime so amaro Dad mangela amen hem so ka pomožini amen. Valjani te ova odlučna te barjaćera amaro mangipe premalo Jehova hem premalo amare phralja hem phenja.