1. Sar đana o berša, kova cilj šaj te ćhiva amenđe?

SAR đana o berša, šaj daraja so na ka ova korisna e Jehovase sar ked hijam le poterne. Iako nane amen snaga sar angleder, ipak isi amen iskustvo hem sposobnostija, kola šaj te koristina te pomožina e ternenđe te služinen e Jehovase hem te prihvatinen disave zaduženja ki e Jehovasi organizacija. Jekh phral kova dugo služini sar starešina phenđa: „Ked sebepi me berša, više naštinđum te ćerav sa o zaduženja kola hine man, hijum le but bahtalo so o terne phralja manglje te ćeren odola zaduženja.“

2. Sostar ka vaćera ko akava članko?

² Ko okova članko dikhljam sose tano šukar o terne te oven amala e phurencar. Ko akava članko, ka dikha sose o phure phralja hem phenja valjani te mothoven soj tane ponizna, skromna, zahvalna hem phravde vastese ked pomožinena e ternenđe hem sar odova ka utičini upri celo skupština.

3. Premalo Filipljanima 2:3, 4, soj tani i poniznost hem sose tano važno o phure phralja hem phenja te mothoven akija osobina?

³ Ako mangena te pomožinen e ternenđe, o phure phralja hem phenja valjani te oven ponizna. O manuš kova tano ponizno upro avera dikhela sar pobare pestar. (Čitin Filipljanima 2:3, 4.) O phure phralja hem phenja đanena so ked ićeraja amen ko e biblijake načelija o buća šaj te ćera ko različita načinija. Odolese, on na mislinena  so sare valjani te ćeren o buća ađahar sar so on ćerđe len angleder (Prop. 7:10). On mangena te pomožinen e ternenđe ađahar so ka vaćeren lenđe ando odova so nakhlje, ama on haljona so „i scena ando akava sveto menjini pe“ hem so on valjani te sikljon te ćeren o buća ko aver način (1. Kor. 7:31).

4. Sar o pokrajinska nadglednikija mothovena slično stav kova hine len hem o Levitija?

⁴ O ponizna manuša haljona so, sar đana o berša, on našti te ćeren sa odova so angleder ćerđe. Na primer, ked o pokrajinska nadglednikija pherena 70 berš, on tane zamolime te prihvatinen avera zaduženja. Odova šaj te ovel lenđe pharo sose hine bahtale te pomožinen e phralenđe. Šaj but manglje odija služba hem šaj pana mangena te ćeren odova zaduženje. Ama, on haljona soj tano pošukar o poterne phralja te ćeren odija služba. On mothovena slično stav kova hem o Levitija ko purano vreme hine len. Ked pherđe 50 berš, on više naštinđe te služinen ko sveto šatori. Ama, odola Levitija aćhilje bahtale. Olenđe na hine važno kova zadatko ćerena. On ćerđe odova so šaj hem pomožinđe e ternenđe (Br. 8:25, 26). Avdije, o pokrajinska nadglednikija kola isi len 70 berš, više našti te posetinen o skupštine. Ama, šaj te pomožinen hem te ohrabrinen e phralen hem e phenjen ki skupština ki koja služinena.

5. So šaj te sikljova ando Dan hem andi Kejt?

 ⁵ Hajde te dikha o primer ando Dan, kova 23 berš služinđa sar pokrajinsko nadglednik. Ked pherđa 70 berš, ov hem olesi romni, i Kejt, hine zamolime te služinen sar specijalna pionirija. Sar hine lenđe ko akava nevo zadatko? O Dan phenela so akana isi le pobuter buti nego angleder. Ov isi le pobuter odgovornostija ki skupština, pomožini e phralenđe te haljon so valjani te ćeren te šaj te služinen sar sluge pomoćnikija hem sikavi averen sar te svedočinen ko javna thana hem ko phanlipa. Nane važno da li hijen ki punovremeno služba ja na, tumen phure phraljalen hem phenjalen, šaj te pomožinen averenđe ko but načinija. Sar? Oven bahtale ked dobinena neve zadatkija, ćhiven tumenđe neve ciljija hem umesto te žalinen aso buća kola našti te ćeren, dikhen so šaj te ćeren.

6. Sose tano mudro te ova skromna? Vaćer jekh primer.

⁶ O manuš kova tano skromno đanela so našti sa te ćerel (Posl. 11:2). Sebepi soj tano skromno, ov na očekujini pestar te ćerel pobuter ando odova so šaj. Odolese, ov ka aćhol bahtalo hem ka del poklo najšukar e Jehovase. Jekh skromno osoba tani sar o manuš kova vozini vorda ko brego. Te šaj te nakhel o brego, o vozači mora te menjini i brzina hem te vozini pohari. Iako akana vozini pohari, ov tano hem ponodri ko drumo. Isto ađahar, jekh skromno osoba đanela ked tano o vreme „te menjini i brzina hem te vozini pohari“, te šaj hem ponodri te služini e Jehovase hem te pomožini averenđe (Fil. 4:5).

7. Sar o Varzelaj mothovđa soj tano skromno?

⁷ Razmislin ando Varzelaj kova hine le 80 berš ked o kralj David vićinđa le te đal oleja ko Jerusalim te ovel oleso savetnik. Sebepi so hine skromno, o Varzelaj na prihvatinđa e kraljeso poziv. Ov đanđa so sebepi pe berša, but buća našti te ćerel. Odolese phenđa te đal jekh poterno manuš, o Himam (2. Sam. 19:35-37). Sar o Varzelaj, hem amare phure phralja tane bahtale ked o poterne phralja šaj te ćeren disave buća ki skupština.

8. Sar o kralj David mothovđa soj tano skromno?

⁸ O kralj David hine ćaće skromno manuš. Ov manglja te ćerel hram e Jehovase. Ama, ked o Jehova phenđa so oleso ćhavo ka ćerel o hram, o David prihvatinđa odija odluka hem pripreminđa sa so valjani aso hram (1. Let. 17:4; 22:5). O David na mislinđa so bi ovela pošukar ov te ćerel o hram, sose oleso ćhavo, o Solomon, tano „terno hem neiskusno“ (1. Let. 29:1). O David đanđa so i gradnja ando hram zavisinđa ando Jehova, a na ando odova kobor tane iskusna o manuša kola ćerena le. Sar o David, hem amare phure phralja dena sa pestar te služinen e Jehovase, iako olenge zadatkija menjinena pe. On đanena so o terne phralja šukar ka ćeren o zadatkija kola on angleder ćerđe, sebepi so o Jehova ka pomožini lenđe.

9. Sar jekh phral mothovđa soj tano skromno?

⁹ Isto ađahar, hem avdije isi but phralja kola tane skromna. Jekh olendar tano o phral kova vićini pe Šigeo. Ko 1976. berš, ked hine le 30 berš, ov počminđa te služini ko Odbor andi podružnica. Ko 2004. berš, ov ulo o koordinator ando Odbor. Sar nakhlje o berša, ov haljilo so više nane zoralo  sar angleder hem so našti te ćerel sa o buća kola valjani. Ov phravđa po vilo e Jehovase hem haljilo so bi ovela pošukar jekh poterno phral te ovel koordinator. Iako više nane koordinator, o Šigeo hem ponodri služini ko Odbor andi podružnica. Ando Varzelaj, ando kralj David hem ando Šigeo sikljovaja so ako jekh manuš tano ponizno hem skromno, ov na ka mislini so o terne tane neiskusna hem so isi len but buća te sikljon, već ka cenini len sebepi o buća kola već đanena te ćeren. Ov na ka mislini soj tane on olese suparnikija, već ka dikhel len sar pe saradnikija (Posl. 20:29).

10. Sar o phure phralja hem phenja valjani te dikhen upro terne?

¹⁰ O phure phralja hem phenja upro terne dikhena sar poklon ando Jehova hem on tane zahvalna aso odova so o terne ćerena. Akana ked više nane zorale sar angleder, o phure phralja hem phenja tane zahvalna sose o terne tane spremna te ćeren sa so valjani hem te služinen ki skupština.

11. Sar o stihija andi Ruta 4:13-16 mothovena soj tano šukar ked o phure prihvatinena e ternengi pomoć?

¹¹ Andi Nojemina šaj te sikljova sose tano šukar ked o phure prihvatinena e ternengi pomoć. Ked olako ćhavo mulo, i Nojemina phenđa pe borjaće, e Rutaće, te irini pe peklenđe. Ama, i Ruta na manglja te mukhel e Nojemina hem pođinđa olaja ko Vitlejem. I Nojemina hine but bahtali sebepi odova hem prihvatinđa e Rutaki pomoć (Ruta 1:7, 8, 18). Odova hine šukar hem e Rutaće hem e Nojeminaće. (Čitin Ruta 4:13-16.) O phure kola tane  ponizna, sar i Nojemina, ka prihvatinen averengi pomoć.

12. Sar o apostol Pavle mothovđa soj tano zahvalno?

¹² O apostol Pavle hine zahvalno asi pomoć koja dobinđa. Na primer, ked o phralja ando Filipi bićhalđe o buća kola valjanđe olese, ov zahvalinđa pe olenđe (Fil. 4:16). Isto ađahar, ov hine but zahvalno e Timotejese, sebepi so pomožinđa lese (Fil. 2:19-22). Ked putujinđa ko Rim, sebepi so odothe valjanđa te ovel phanlo, ov zahvalinđa pe e Devlese aso phralja kola ađićerđe le te ohrabrinen le (Dela 28:15). O Pavle hine jekh revno manuš. But putujinđa te šaj te propovedini hem te zorjaćeri pe phralen hem phenjen. Ama, ov hine jekh ponizno manuš kova prihvatinđa pomoć kotar pe phralja hem phenja.

13. Sar šaj o phure phralja hem phenja te mothoven soj tane zahvalna aso terne ki skupština?

¹³ O phure phralja hem phenja ko but načinija šaj te mothoven soj tane zahvalna aso terne ki skupština. Ako o terne mangena te vozinen tumen, te ćinen odova so valjani tumenđe, ja te pomožinen tumen ko disavo aver način, prihvatinen olengi pomoć. Ma bistren so prekalo lende, o Jehova mothovi tumenđe kobor mangela tumen. Ađahar ka oven pana popaše e ternencar ki skupština. Ama, hem tumen šaj te pomožinen olenđe te oven pana popaše e Jehovaja. Vaćeren lenđe kobor hijen bahtale ked dikhena sar pomožinena ki skupština. Odvojinen vreme olenđe hem vaćeren lenđe so nakhljen ko tumaro đivdipe. Ked ađahar ćerena, ka mothoven so hijen zahvalna e Jehovase aso terne ki skupština (Kol. 3:15; Jov. 6:44; 1. Sol. 5:18).

14. Sar o kralj David mothovđa soj tano phravde vasteso?

¹⁴ Ando kralj David sikljovaja so o phure phralja hem phenja valjani te oven phravde vastese. Ked valjanđa te ćerel pe o hram, ov dinđa but buća, sar soj tane o zlato hem o srebro (1. Let. 22:11-16; 29:3, 4). Ov ćerđa odova iako đanđa so o manuša ka hvalinen olese ćhave, e Solomone, a na ole. Isto ađahar, šaj hem amen više našti te učestvujina ki gradnja ando amare objektija, sebepi so nane amen snaga. Ama, i gradnja šaj te podupirina ađahar so ka da amare prilogija, odobor kobor šaj. Uzo odova, šaj te pomožina e ternenđe ađahar so ka sikava len te ćeren o buća kola amen sikljiljam.

15. Sar o apostol Pavle mothovđa soj tano phravde vasteso?

¹⁵ Isto ađahar, hem o apostol Pavle mothovđa soj tano phravde vasteso. Ov vićinđa e Timoteje te đal oleja ko misionarska putovanja hem sikavđa le sar te propovedini hem te sikavi e manušen (Dela 16:1-3). Ađahar, o Timotej sikljilo pana pošukar te propovedini hem te sikavi averen (1. Kor. 4:17). Odova so o Pavle sikavđa le, o Timotej koristinđa te sikavi averen.

16. Sose o Šigeo sikavđa avere phralen?

¹⁶ O phure avdije na darana so na ka oven korisna ako sikavena e ternen sar te ćeren o odgovornostija ki skupština. Na primer, o Šigeo, kolestar vaćerđam angleder, beršencar dinđa obuka e terne phralenđe kola služinđe ko Odbor andi podružnica. Ov odova ćerđa sose manglja o delo ki odija phuv te napredujini. Sebepi odova,  ked više naštinđa te služini sar koordinator ando Odbor, jekh poterno phral šajinđa te avel ko oleso than. Pobuter ando 45 berš, o Šigeo služinđa ko Odbor andi podružnica. O buća kola sikljilo ov hem ponodri koristini te pomožini e poterne phralenđe. O phralja kola tane sar o Šigeo, tane ćaće but baro blagoslov averenđe.

17. Premalo Luka 6:38, so o phure šaj te den averenđe?

¹⁷ Tumen, phure phraljalen hem phenjalen, mothovena so o manuš šaj te ovel bahtalo samo ako verno služini e Jehovase. Tumaro đivdipe mothovi sose tano šukar te ićera amen ko e biblijake načelija. Tumen đanena sar o buća angleder ćerđe pe, ama isto ađahar, tumen haljona hem sose tano važno te sikljova te ćera o buća ko nevo način. Tumen kola akana sigende krstinđen tumen, isi tumen but buća kola šaj te den averenđe. Na primer, šaj te vaćeren averenđe sose hijen bahtale so akana penđarena e Jehova. E ternenđe but ka koristini te šunen so nakhljen ko tumaro đivdipe. Ako „dena“ ađahar so vaćerena averenđe ando buća kola sikljiljen, o Jehova but ka blagoslovini tumen. (Čitin Luka 6:38.)

18. Sar šaj o phure hem o terne te pomožinen jekh jekhese?

¹⁸ Ked o phure phralja hem phenja trudinena pe te oven paše e ternencar, tegani on šaj te pomožinen jekh jekhese (Rimlj. 1:12). Svako olendar isi le diso so okova aver nane le. O phure isi len but bari mudrost hem nakhlje but buća ko po đivdipe. O terne isi len snaga koja o phure nane len. Ked o phure hem o terne sarađujinena, on ađahar slavinena e Jehova hem pomožinena celona skupštinaće.