1-2. (a) Premalo Poslovice 16:31, sar valjani te dikha upro amare phure? (b) Sostar ka vaćera ko akava članko?

KI AMERIKA, ko Arkanzas, isi jekh park ko kova isi dijamantija. O manuša šaj slobodno te hanen odothe hem ako arakhena, šaj te len odola dijamantija. Ama, sebepi so odola dijamantija nane obradime, o manuša šaj te nakhen uzo lende, a te na haljon so anglo lenge jaćha tano diso but vredno.

² Šaj te phena so amare phure phralja hem phenja tane sar odola dijamantija. On tane but dragocena. E Devleso Lafi phenela soj tane olenge parne bala sar jekh but šuži kruna. (Čitin Poslovice 16:31; 20:29.) Ama, lokho tano te bistra kobor tane on vredna. O terne kola haljona kobor tane o phure vredna, arakhlje diso povredno nego barvalipe. Ko akava članko, ka odgovorina ko trin pućiba: Sose o phure phralja hem phenja tane vredna e Jehovase? Sose e Jehovasi organizacija but cenini amare phuren? So šaj te sikljova olendar?

3. Premalo Psalam 92:12-15, sose tane o phure but dragocena e Jehovase?

³ Amare phure phralja hem phenja tane but dragocena e Jehovase. Ov đanela save tane on hem odolese cenini len. O Jehova tano bahtalo ked o phure vaćerena e ternenđe ando odova so sikljilje ki pi služba (Jov 12:12; Posl. 1:1-4). Isto ađahar, o Jehova but cenini olengi istrajnost (Mal. 3:16). Iako nakhlje but pharipa, on hem ponodri  verno služinena e Jehovase. Olengi nada akana tani pobari nego ked penđarđe o ćaćipe. O Jehova mangela len sose, iako tane phure, on pana vaćerena ando oleso anav. (Čitin Psalam 92:12-15.)

4. So šaj te ohrabrini amare phure phralen hem phenjen?

⁴ Ako sebepi te berša akana našti te ćere odova so angleder ćerđan, ov sigurno so o Jehova na bistrela odova so ćerđan (Jevr. 6:10). Revno propovedinđan i šukar vest hem odova ćerđa te nebesko Dade te ovel but bahtalo. Istrajinđan ko kušnje, čak iako disave olendar hine but phare. Ićerđan tut ko e biblijake načelija, dinđan sa tutar te ćere sa te zadatkija hem sikavđan averen. Spremno prihvatinđan sa o promene kola hine ki e Jehovasi organizacija. Ohrabrinđan averen te aćhon ki punovremeno služba. O Jehova but mangela tut sebepi so hijan lese verno. Ov dela po lafi so „na ka mukhel pe verno slugen“ (Ps. 37:28). Isto ađahar, ov phenela: „Ked tumare bala ka parnjon me ka pomožinav tumen“ (Is. 46:4). Odolese, ma mislin so sebepi so akana phuriljan, tu više nane tut than ki e Jehovasi organizacija. E Jehovase hem amenđe tu uvek hijan vredno.

5. So o phure niked na valjani te bistren?

⁵ Ando phure šaj te sikljova but buća. Iako više nane odobor zorale, on isi len baro iskustvo ko po životi. O Jehova hem ponodri koristini len ko razna načinija. Akana ka dikha nekobor primerija ando purano vreme hem ando amaro vreme kola odova mothovena.

6-7. Vaćer disave primerija kola mothovena so o Jehova nagradinđa okolen kola verno služinđe lese.

⁶ Ko e Devleso Lafi isi but primerija ando manuša kola iako hine phure, on hem ponodri verno služinđe e Jehovase. Na primer, o Mojsije hine le oko 80 berš ked počminđa te služini sar e Jehovaso proroko hem te ovel vođa andi izraelsko nacija. O Danilo hine le pobuter ando 90 berš hem pana služinđa e Jehovase  sar oleso proroko. Isto ađahar, o apostol Jovan hine le pobuter ando 90 berš ked pisinđa i knjiga Otkrivenje.

⁷ Ando disave verna manuša na vaćeri pe but ki Biblija hem odolese šaj na razmislinaja but ando olengo primer. Ama, o Jehova but šukar đanđa save tane on hem nagradinđa len sebepi so hine lese verna. Na primer, o Simeon hine jekh „pravedno hem pobožno“ manuš. Iako i Biblija na vaćeri but olestar, o Jehova but šukar đanđa koj tano ov. Odolese, hine le čast te dikhel e Isuse ked hine beba hem te vaćeri jekh proročanstvo kova ispuninđa pe beršencar palo odova (Luka 2:22, 25-35). Isto ađahar, razmislin andi proročica Ana. Iako hine la 84 berš, oj „uvek đelji ko hram.“ Odolese, o Jehova blagoslovinđa la hem oj šaj hine te dikhel e Isuse ked hine beba. O solduj đene, hem o Simeon hem i Ana, hine but dragocena e Jehovase (Luka 2:36-38).

8-9. So ćerđa jekh phen palo odova so mulo olako rom?

⁸ Ama, hem ko amaro vreme isi but phure phralja hem phenja kola tane šukar primer e ternenđe. Na primer, amari phen i Lois Didur. Oj hine la samo 21 berš ked počminđa te služini sar specijalno pioniri ki Kanada. Kasnije, oj hem olako rom hine ki pokrajinsko služba. Palo odova, prekalo 20 berš služinđe ko Betel, ki Kanada. Ked hine la 58 berš, oj hem o Džon hine vićime te služinen ki Ukrajina. Savi odluka on anđe? Da li mislinđe soj tane but phure te đan te služinen ki aver phuv? On prihvatinđe odova zadatko hem o Džon služinđa ko Odbor andi podružnica. Efta berš palo odova, olako rom mulo. Ama, i Lois odlučinđa te aćhol ki Ukrajina. Akana, oj isi la 81 berš hem pana služini ko Betel kuri sare but mangena la.

⁹ Upro disave phenja, kola tane udovice sar i Lois, šaj na obratinaja odobor bari pažnja sar ked olenge roma hine đivde. Ama, odova so on aćhilje bizo rom, na značini so nane više vredna. O Jehova but cenini e phenjen kola beršencar verno hine uzo pe roma hem kola akana verno služinena olese (1. Tim. 5:3). On tane but baro primer e ternenđe.

10. Sose tano o Toni but šukar primer amenđe?

¹⁰ Isto ađahar, but phure phralja hem phenja kola živinena ko starački dom tane but baro primer amenđe. Na primer, amaro phral o Toni akana živini ko starački dom. Ov krstinđa pe ki Amerika, ki Pensilvanija, ko avgust 1942. berš ked hine le 20 berš. Sigate palo odova, sebepi i neutralnost duj tekvaš berš hine ko phanlipe. Ov hem olesi romni i Hilda, barjaćerđe  duje ćhaven. Beršencar, o Toni služinđa ko trin skupštine sar koordinator ando starešinstvo hem hine nadglednik ando pokrajinsko sastanko. Ov propovedinđa ko phanlipe. Uduri hine le nekobor kursija hem ićerđa o sastankija. Akana, o Toni isi le 98 berš hem pana revno služini e Jehovase. Ov trudini pe te del poklo najšukar e Jehovase hem te služini e phralencar hem e phenjencar kotar pi skupština.

11. Sar šaj te mothova so poštujinaja okolen kola živinena ko starački dom?

¹¹ Sar šaj te mothova so poštujinaja e phure phralen hem e phenjen kola živinena ko starački dom? O starešine šaj te pomožinen len te aven ko sastankija ja te šunen o sastankija. Isto ađahar, on šaj te pomožinen lenđe te propovedinen kobor god šaj. Sare amen šaj te posetina len ja te vaćera olencar prekalo video-poziv. Posebno tano važno te ćera odova, ako disave phure phralja hem phenja šaj živinena ko starački dom kova tano but dur andi skupština. Valjani te pazina te na bistra upro lende. Disave phure phralenđe hem phenjenđe nane lokho te phraven pe, a disave na mangena te vaćeren pestar sose na mangena te hvalinen pe odoleja so ćerđe. Ama, ako odvojinaja amaro vreme olenđe, ako pućaja len diso hem ako pažljivo šunaja đi vaćerena, olengo primer but ka ohrabrini amen.

12. Kaso primer šaj but te ohrabrini amen?

¹² Ama, hem ko amare skupštine isi phure phralja hem phenja kola tane but šukar primer. Ked ka šuna olenge iskustvija, šaj ka ova but iznenadime. I phen, i Harijeta, beršencar verno služinđa e Jehovase ki pi skupština ko Nju Džersi, ki Amerika. Palo odova, preselinđa pe ki pi ćhaj. Ked o phralja hem o phenja kotar i nevi skupština upoznajinđe la, on haljilje soj tani oj ćaće posebno. Oj vaćerđa lenđe pe iskustvija andi služba ked ko početko ando 1920-ta berša upoznajinđa o ćaćipe. Ko odova vreme, svako ko propovedinđa šaj hine te ovel phanlo. Odolese, ki torba uvek hine la četkica aso danda. Ko 1933. berš duvar hine phanli po kurko dive. Olako rom, kova na hine phral, brininđa pe ando olenge trin ćhave. O phure kola tane verna sar i Harijeta, ćaće zaslužinena te poštujina len!

13. Sose o phure phralja hem phenja tane but važna?

¹³ Amare phure phralja hem phenja tane but važna e Jehovase hem amenđe. But putija, on dikhlje sar o Jehova blagoslovini pi organizacija hem sar olen lično blagoslovini. Isto ađahar, on sikljilje but buća ando greške kola ćerđe angleder. On tane but mudra. Odolese, sikljov olendar (Posl. 18:4). Ako odvojineja to vreme šukar te penđare len, ti vera ka ovel pana pobari hem ka sikljove olendar but buća.

14. Premalo Ponovljeni zakoni 32:7, so o terne valjani te ćeren?

¹⁴ Trudin tut te vaćere e phure phralencar hem e phenjencar. (Čitin Ponovljeni zakoni 32:7.) On šaj na dikhena odobor šukar ja šaj pohari phirena ja vaćerena, ama on tane terne ko vilo hem isi len „šukar anav“ anglo Jehova (Prop. 7:1). Ma bistri so on tane e Jehovase but vredna. Odolese hem ponodri mothov so  poštujineja len. Ov sar o Jelisej. Ked alo o vreme o Ilija te đal, o Jelisej trin putija phenđa: „Na ka aćhavav tut“ (2. Kralj. 2:2, 4, 6).

15. So šaj te puća e phure phralen hem phenjen?

¹⁵ Mothov so brinineja tut kotar o phure phralja hem phenja ađahar so ka vaćere olencar (Posl. 1:5; 20:5; 1. Tim. 5:1, 2). Na primer, šaj te puće len: „Ked hijan le poterno, so uverinđa tut so arakhljan o ćaćipe? Sar odova so nakhljan ko to životi pomožinđa tuće te ove pana popaše e Jehovaja? So pomožinđa tuće te aćhove bahtalo ki služba?“ (1. Tim. 6:6-8). Palo odova, pažljivo šun len.

16. Sar o phure hem o terne šaj te ohrabrinen jekh jekhe?

¹⁶ Ked o phure hem o terne vaćerena, on šaj te ohrabrinen jekh jekhe (Rimlj. 1:12). Đi vaćerena e phure phralencar hem phenjencar, o terne pana pobuter ka uverinen pe so o Jehova brinini pe ando pe sluge, a o phure ka osetinen kobor avera mangena len. O phure phralja hem phenja ćaće uživinena te vaćeren sar o Jehova blagoslovinđa len ko olengo životi.

17. Sose šaj te phena so amare phure phralja hem phenja tane pana pošuže sar nakhena o berša?

¹⁷ Sar đana o berša, o šužipe nakhela. Ama, okola kola tane verna e Jehovase, olese tane svako berš pana pošuže (1. Sol. 1:2, 3). Sose tano odova ađahar? Odolese so on beršencar mukhlje e Jehova te sikavi len hem te pomožini len te ovel len pana pošuže osobine. So pobuter penđaraja amare phure phralen hem phenjen, so pobuter poštujinaja len hem sikljovaja olendar, pana pobuter ka haljova kobor tane on vredna.

18. Sostar ka vaćera ko aver članko?

¹⁸ Te šaj i skupština te ovel zorali, važno tano o terne te mothoven so poštujinena e phuren, ama hem o phure te mothoven soj tane o terne važna olenđe. Ko aver članko, ka dikha sar šaj o phure te mothoven so ceninena e ternen.