40. ČLANKO PROUČIBASE
„Buten anena đi i pravednost“
Okola so buten anena đi i pravednost ka sjajinen sar o ćerenja ki celo večnost (DAN. 12:3)
ĐILI 151 O Devel ka vazdel len
SOSTAR KA VAĆERA a
1. So ka ovel ki Hiljadaberšengi vladavina?
ZAMISLIN kobor ka ovel radosno odova dive ked o manuša kola mulje ka počminen te uskrsninen ki phuv đi ka trajini e Isusesi hiljadaberšengi vladavina. O Jehova jedva ađićeri odova dive. Tegani sare ka oven but bahtale sose ka dikhen pe manglen kola mulje (Jov 14:15). Sar so dikhljam ko okova članko, o „pravedna“ kase anava tane pisime ki knjiga ando životi ka ušten ko „uskrsenje ando životi“ (Dela 24:15; Jov. 5:29). Amare manglje kola mulje verovatno ka oven uskrsnime sigate palo Armagedon. b A o „nepravedna“ kola na hine len prilika te penđaren e Jehova hem te služinen lese angleder so mulje, on ka ušten ko „uskrsenje ando suđenje.“
2-3. (a) Premalo Isaija 11:9, 10, kova ka ovel o najbaro obrazovno program? (b) Sostar ka vaćera ko akava članko?
2 Sare kola ka uskrsninen ka valjani diso te sikljon (Is. 26:9; 61:11). Sebepi odova, ka ovel jekh baro obrazovno program ki phuv. (Čitin Isaija 11:9, 10.) So ka valjani te sikljon? Najangleder, o nepravedna kola ka uskrsninen ka valjani te sikljon ando Isus Hrist, e Devleso Kraljevstvo, andi otkupnina, ando Devleso anav hem ando odova so jedino o Jehova isi le pravo te vladini. Ama, hem o pravedna ka valjani te sikljon sar o Jehova hari pohari vaćerđa pe narodose koja tani olesi namera e phuvjaja. Disave e Jehovase verna sluge mulje but angleder nego so i Biblija hine završimi. O solduj grupe hem o pravedna hem o nepravedna, ka valjani but te sikljon.
3 Ko akava članko, ka dobina odgovorija ko akala pućiba: Sar ka ovel ićerdo o najbaro obrazovno program? Sar odova program ka utičini ko odova da li nekaso anav ka ovel zauvek pisimo ki knjiga ando životi? O odgovorija ko akala pućiba tane amenđe avdije but važna. Isto ađahar, ka dikha disave zanimljiva proročanstvija ando knjige Danilo hem Otkrivenje kola ka pomožinen amen pošukar te haljova so ka ovel okolencar kola ka uskrsninen. Najangleder, hajde te dikha kola događaja tane proreknime ko Danilo 12:1, 2.
„OKOLA KOLA SOVENA KO PHUVJAKO PRAHO KA UŠTEN“
4-5. So ko Danilo 12:1 pisini kotar vreme ando krajo?
4 Čitin Danilo 12:1. Ki knjiga Danilo pisini kole redoja ka oven disave važna događaja ko vreme ando krajo. Na primer, ko Danilo 12:1 pisini so o Mihailo, kova tano o Isus Hrist, „terđola hem pomožini [e Devlese] narodose.“ Akava deo ando proročanstvo počminđa te ispunini pe ko 1914. berš ked o Isus hine pomazimo te ovel Kralj ko nebo.
5 Isto ađahar, o Danilo phenđa so o Isus ka „uštel“ ko „vreme ando pharipe savo na hine odked tano o narodo pa đi odova vreme.“ Odova „vreme ando pharipe“ tano isto so hem i „bari nevolja“ koja pomini pe ko Matej 24:21. O Isus ka uštel ili ka zaštitini e Devlese narodo ko krajo kotar vreme ando pharipe ili ko Armagedon. I knjiga Otkrivenje andi akija grupa vaćeri sar ando baro mnoštvo „kova avela andi bari nevolja“ (Otkr. 7:9, 14).
6. So ka ovel palo odova so o baro mnoštvo ka preživini i bari nevolja? Objasnin. (Isto ađahar, dikh o „Pućiba ando čitaocija“ ko akava izdanje kova vaćeri ando uskrsenje ki phuv.)
6 Čitin Danilo 12:2. So ka ovel palo odova so o baro mnoštvo ka preživini i bari nevolja? Angleder mislinđam so o Danilo 12:2 vaćeri ando simbolično uskrsenje ja andi pobari aktivnost ando Devleso narodo palo odova so o protivnikija ko 1918. berš skoro ćhinavđe o propovedanje. c Ama, akana haljovaja so akava stih odnosini pe ko uskrsenje kova ka ovel ko nevo sveto. Sose šaj te phena odova? O lafi „praho“ kova koristini pe ko Jov 17:16 značini isto so hem o lafi „grobo.“ Odolese, o lafija ando Danilo 12:2 odnosinena pe ko doslovno uskrsenje kova ka ovel palo odova so ka završinen pe o poslednja dive hem palo Armagedon.
7. (a) So značini odova so disave ka oven uskrsnime aso „večno životi“? (b) Sar tano akava „pošukar uskrsenje“?
7 So značini odova ked ko Danilo 12:2 phenela pe so disave ka oven uskrsnime aso „večno životi“? Odova značini so okola kola ka uskrsninen hem ka nastavinen te sikljon ando Jehova hem ando Isus hem ka oven lenđe poslušna đi trajini i Hiljadaberšengi vladavina, ko krajo ka dobinen o večno životi (Jov. 17:3). Odova ka ovel „pošukar uskrsenje“ ando odova kova hine len disave manuša ko purano vreme (Jevr. 11:35). Sose? Odolese so odola nesavršena manuša palem mulje.
8. So značini odova so disave ka uskrsninen „asi večno lađ“?
8 Na ka mangen sare ando okola kola ka uskrsninen te sikljon ando Jehova. E Daniloso proročanstvo phenela so disave ka oven uskrsnime „asi večno lađ.“ On ka pobuninen pe hem odolese olenge anava na ka oven pisime ki knjiga ando životi hem na ka dobinen o večno životi. Umesto odova, on ka dobinen i „večno lađ“, avere lafencar ka oven uništime. Odolese ko Danilo 12:2 pisini so ko krajo ka ovel okolencar, kola palo odova so uskrsninđe, dobinđe prilika te sikljon ando Jehova d (Otkr. 20:12). Disave ka dobinen o večno životi, a disave na.
„BUTEN ANENA ĐI I PRAVEDNOST“
9-10. So pana ka ovel pali bari nevolja hem ko ka „sjajini sar o nebo“?
9 Čitin Danilo 12:3. So pana ka ovel pali „bari nevolja“? O lafija ando Danilo 12:2 hem 3 odnosinena pe ko diso so ka ovel pali bari nevolja.
10 Ko ka „sjajini sar o nebo“? Odova so o Isus phenđa ko Matej 13:43 šaj te pomožini amenđe te haljova koj tane on. Othe pisini: „Tegani o pravednikija ko pe Dadeso Kraljevstvo ka sjajinen sar o kham.“ O Isus akate vaćerđa kotar „ćhave ando Kraljevstvo“, avere lafencar vaćerđa kotar pe pomazime phralja kola ka služinen oleja ko nebesko Kraljevstvo (Mat. 13:38). Odolese šaj te phena so o lafija ando Danilo 12:3 odnosinena pe upro pomazanikija hem upro odova so on ka ćeren đi ka trajini e Hiljadaberšengi vladavina.
Zajedno e Isuseja, o 144 000 ka organizujinen o obrazovno program ki phuv đi ka trajini i Hiljadaberšengi vladavina (Dikh o 11. odlomko)
11-12. So o pomazanikija ka ćeren đi ka trajini i Hiljadaberšengi vladavina?
11 Sar o pomazanikija „ka anen buten đi i pravednost“? Zajedno e Isuseja on ka organizujinen o obrazovno program ki phuv đi ka trajini i Hiljadaberšengi vladavina. O pomazanikija na ka vladinen samo sar kraljija, već hem ka služinen sar sveštenikija (Otkr. 1:6; 5:10; 20:6). Odolese, on ka pomožinen „te lečinen pe o narodija“ so značini so o manuša hari pohari ka oven savršena (Otkr. 22:1, 2; Jezek. 47:12). Sebepi odova, o pomazanikija ka oven but radosna!
12 Kas o pomazanikija ka anen đi i pravednost? E manušen kola ka uskrsninen, okolen kola ka preživinen o Armagedon hem e ćhaven kola najverovatno ka bijanđon ko nevo sveto. Ko krajo andi Hiljadaberšengi vladavina, sare ki phuv ka oven savršena. Ama, ked olenge anava ka oven večno ja te phena hemijskaja pisime ki knjiga ando životi?
I ZAVRŠNO KUŠNJA
13-14. So o savršena manuša ka valjani te mothoven angleder te dobinen o večno životi?
13 Amen na valjani te bistra so ked ka ova savršena odova na ka značini so sigurno ka dobina o večno životi. Razmislin ando Adam hem andi Eva. On hine savršena, ama te šaj te dobinen o večno životi morandilje te mothoven so šunena e Jehova. Ama, nažalost, on na šunđe le (Rimlj. 5:12).
14 So ka ovel okolencar kola ka živinen ki phuv ked ka nakhel i Hiljadaberšengi vladavina? Sare ka oven savršena. Da li sa o savršena manuša zauvek ka aćhon ki Jehovasi strana? Da li disave ka oven sar o Adam hem i Eva, kola iako hine savršena na aćhilje verna e Jehovase? Sar ka dobina odgovor ko akala pućiba?
15-16. (a) Ked sa o manuša ka dobinen prilika te mothoven soj tane verna e Jehovase? (b) So ka ovel pali završno kušnja?
15 O Beng ka ovel phanlo 1 000 berš. Đi ka trajini odova vreme, ov na ka šaj te hovavi e manušen. Ama, ked ka nakhen odola 1 000 berš, ov ka ovel oslobodimo hem ka mangel te ćhivel e manušen te đan ki olesi strana. Tegani, sa o savršena manuša kola ka živinen ki phuv ka ovel len prilika te mothoven da li poštujinena e Jehovaso anav hem da li priznajinena so ov jedino isi le pravo zauvek te vladini (Otkr. 20:7-10). Odova so tegani ka ćeren, ka utičini ko odova da li olenge anava ka oven zauvek pisime ki knjiga ando životi.
16 I Biblija phenela so disave manuša ka oven sar o Adam hem i Eva, odolese so ka odbacinen e Jehova sar pe vladare. So ka ovel olencar? Ko Otkrivenje 20:15 pisini: „Svako kaso anav na hine pisimo ki knjiga ando životi, hine fordimo ko jagako jezero.“ Okola so ka pobuninen pe, ka oven zauvek uništime. Ama, ked ka ovel i završno kušnja, but manuša ka aćhon verna e Jehovase. Tegani, olenge anava ka oven zauvek pisime ki knjiga ando životi.
ĐI TRAJINI O „VREME ANDO KRAJO“
17. So o anđeo phenđa e Danilose kotar amaro vreme? (Danilo 12:4, 8-10)
17 Kobor tano šukar ked razmislinaja ando sa akava so ađićeri amen! Jekh anđeo phenđa e Danilose disave važna informacije ando amaro vreme, kotar „vreme ando krajo.“ (Čitin Danilo 12:4, 8-10; 2. Tim. 3:1-5.) Ov phenđa lese: „O pravo đandipe ka ovel pana pobaro.“ Odova značini so e Devleso narodo ka haljol o proročanstvija kola tane pisime ki Danilosi knjiga. O anđeo pana phenđa so ko vreme ando krajo o lošna ka „ćeren odova soj tano lošno hem niko koj tano lošno na ka haljol.“
18. So pana hari ka ovel e lošnonencar?
18 Avdije, šaj te dićhol amenđe so o lošna na dobinena kazna aso odova so ćerena (Mal. 3:14, 15). Ama, pana hari o Isus ka sudini e manušenđe kola tane sar jarcija hem ka odvojini len ando bakre (Mat. 25:31-33). O lošna na ka preživinen i bari nevolja niti ka uskrsninen ko nevo sveto. Olenge anava na ka oven pisime ki knjiga ando životi (Mal. 3:16).
19. So valjani akana te ćera hem sose? (Malahija 3:16-18)
19 Akana tano o vreme te mothove ki kasi strana hijan. (Čitin Malahija 3:16-18.) O Jehova ćedela okolen kola tane olese posebna, avere lafencar okolen kola tane vredna anglo olese jaćha. Sigurno hem tu mangeja te ove maškaro lende.
Jedva ađićeraja ko nevo sveto te dikha e Danilo, amare manglen kola mulje hem bute averen manušen (Dikh o 20. odlomko)
20. So o Jehova obećinđa e Danilose hem sose tu jedva ađićereja te ispunini pe odova?
20 Amen ćaće živinaja ko uzbudljivo vreme. Pana but buća valjani te oven. Pana hari, ka dikha sar o Devel ka cidel e lošnonen. Palo odova, ka dikha sar ispuninena pe o lafija kola o Jehova phenđa e Danilose: „Ka ušte te dobine to nasledstvo ko krajo ando dive“ (Dan. 12:13). Da li jedva ađićereja te dikhe e Danilo hem okolen kola mulje tutar? Ako ja, tegani de sa tutar te aćhove verno e Jehovase hem to anav te aćhol pisimo ki Jehovasi knjiga ando životi.
ĐILI 80 Dikh kobor tano šukar o Jehova
a Ko akava članko ka dikha, sar akana haljovaja o stihija ando Danilo 12:2, 3, kola vaćerena ando najbaro obrazovno program kova ka ovel ki phuv. Ka dikha, ked odova ka ovel hem koj tano uključimo ko odova program. Isto ađahar, ka dikha sar odova program ka pomožini okolenđe kola ka živinen ki phuv te pripreminen pe asi završno kušnja koja ka ovel ko krajo andi Isusesi hiljadaberšengi vladavina.
b O uskrsenje šaj ka počmini ando okola kola mulje verna đi trajinđe o poslednja dive, a palo lende ka uskrsninen okola kola mulje angleder olende. Znači ka uskrsninen generacija pali generacija. Ako odova ka ovel ađahar, odova značini so svako generacija ka ovel la prilika te ađićeri okolen kolen đanđe angleder. Ki Biblija pisini so o uskrsenje ko nebo tano „premalo redo“. Odolese, šaj te očekujina so hem o uskrsenje ki phuv ka ovel premalo redo (1. Kor. 14:33; 15:23).
c Akava tano nevo razumevanje kova zamenini o purano kova nalazini pe ko 17. poglavlje ki knjiga Obrati pažnju na Danilovo proročanstvo hem ki Stražarsko kula kotar 1. novembar 1987. berš, str. 15-19.
d Ki aver strana, o lafija „pravednikija“ hem „nepravednikija“ ko Dela 24:15 hem o lafija „okola so ćerđe šukar“ hem „okola so ćerđe lošno“ ko Jovan 5:29 odnosinena pe ko odova so ćerđe okola kola uskrsninđe angleder te meren.
