1. Sose na iznenadini amen odova so bute manušenđe tano pharo te verujinen averenđe?

 O MANUŠA ko e Satanaso sveto na đanena kase te verujinen. On tane često razočarime upro političarija, religiozna vođe ili trgovačko sistemi. Olenđe tano but pharo te verujinen pe amalenđe, pe komšijenđe pa čak hem pe familijaće. Ama, akava na iznenadini amen. Ki Biblija tano proreknimo: „Ko poslednja dive. . . o manuša ka oven. . . neverna. . . klevetnikija. . . izdajice.“ On tane asavke sose oponašinena e Satana kova tano devel ando akava sveto hem kase našti te verujini pe (2. Tim. 3:1-4; 2. Kor. 4:4).

2. (a) Upro kaste šaj te ovel amen potpuno poverenje? (b) So disave šaj pućena pe?

² Sar hrišćanija, amen đanaja so šaj te ovel amen potpuno poverenje upro Jehova (Jer. 17:7, 8). Amen hijam sigurna so ov mangela amen hem so „niked na ka [aćhavi]“ amen (Ps. 9:10). Isto ađahar, šaj te ovel amen poverenje hem upro Isus Hrist, odolese so dinđa po životi amenđe (1. Petr. 3:18). A ando lično iskustvo đanaja so šaj te verujina so o savetija andi Biblija šaj te pomožinen amen (2. Tim. 3:16, 17). Ćaće, amen hijam sigurna so šaj te ovel amen poverenje ko Jehova, ko Isus hem ki Biblija. Ama, disave šaj pućena pe da li šaj uvek te ovel amen poverenje upro amare phralja hem sose šaj te ovel amen poverenje upro lende?

3. Savi čast isi amen? (Marko 10:29, 30)

³ O Jehova birinđa amen ando celo sveto te ova deo andi olesi porodica. Odija tani bari čast koja anela amenđe but blagoslovija. (Čitin Marko 10:29, 30.) Ko celo sveto, isi  amen phralja hem phenja kola sar amen mangena e Jehova hem dena sa pestar te živinen ađahar sar so ov mangela. Šaj na vaćeraja isto ćhib, na akharaja ista šeja hem na avaja andi isto kultura, ama amen mangaja jekh jekhe čak iako niked angleder na dikhljam amen. Amen hijam but bahtale ked zajedno olencar hvalinaja amare Dade, e Jehova (Ps. 133:1).

4. Sose valjanena amenđe amare phralja hem phenja?

⁴ Akana poviše nego iked angleder valjani te aćhova ko jekhipe amare phralencar hem phenjencar. On tane othe te pomožinen amen ked isi amen pharipa (Rimlj. 15:1; Gal. 6:2). Isto ađahar, ohrabrinena amen te ćera poviše ki služba e Jehovase hem te aćhova paše uzo leste (1. Sol. 5:11; Jevr. 10:23-25). Zamislin sar bi osetinaja amen ked amare phralja na bi pomožinena amenđe te borina amen protiv amaro dušmani o Beng hem oleso lošno sveto. O Satana hem okola kola tane ki olesi strana pana hari ka napadinen e Devlese narodo. Tegani, sigurno ka ova but zahvalna amare phralenđe so ka oven uzo amende hem so ka pomožinen amen.

5. Sose nekase šaj te ovel pharo te ovel le poverenje upro phralja hem phenja?

⁵ Ama, nekase šaj tano pharo te ovel le poverenje upro phralja hem phenja. Šaj vaćerđa jekhe phralese diso ko poverenje, a odova phral đelo hem vaćerđa averenđe odova. Ili disavo phral na ćerđa odova so obećinđa lese. Ja šaj neko ki skupština phenđa ili ćerđa diso so but povredinđa le. Ked diso ađahar desini pe, šaj te ovel but pharo palem te ovel tut poverenje upro avera. Ama, so šaj te pomožini tut palem te ovel tut poverenje upro phralja hem phenja?

6. Sar o mangipe šaj te pomožini amen te ovel amen poverenje upro avera? (1. Korinćanima 13:4-8)

⁶ Te šaj te ovel amen poverenje, prvo mora te ovel amen mangipe. Ki prvo Korinćanima ko 13. poglavlje pisini savo tano o mangipe, a odova mangipe šaj te pomožini amenđe te ovel amen pana pobaro poverenje upro nekaste ili te obnovina amaro poverenje. (Čitin 1. Korinćanima 13:4-8.) Na primer, ko 4. stih pisini so „o mangipe tano strpljivo hem šukar.“ O Jehova tano strpljivo amencar čak hem ked grešinaja lese. Odolese, hem amen valjani te ova strpljiva amare phralencar hem phenjencar ked on phenena ili ćerena diso so nerverini amen ili povredini amen. Ko 5. stih pisini so o mangipe „na holjani sigate, na pamtini o lošnipe.“ Odova značini so na mangaja te pamtina o buća kola amare phralja ćerđe sovaja povredinđe amen. Ko Propovednik 7:9 pisini: „Ma uvredin tut sigate.“ Šukar tano te primenina o savet ando Efešanima 4:26: „Ma mukhen te nakhel o dive, a tumen pana te oven holjame.“

7. Sar o načelija ando Matej 7:1-5 šaj te pomožinen amen te ovel amen poverenje upro avera?

⁷ Pana jekh buti koja šaj te pomožini amen te ovel amen poverenje upro amare phralja hem phenja tani ako trudinaja amen te dikha len ađahar sar so o Jehova dikhela len. O Jehova mangela len hem na pamtini olenge grehija. Odolese, ni amen na valjani te ćera odova (Ps. 130:3). Umesto te dikha samo olenge mane, valjani te trudina amen te dikha olenge šukar osobine hem te razmislina kola šukar buća on šaj te ćeren. (Čitin Matej 7:1-5.) Odolese so o mangipe ko „sa verujini“, amen verujinaja so on mangena te ćeren odova soj tano šukar hem so niked na mangena namerno te povredinen amen (1. Kor. 13:7). Ama, akava na značini so o Jehova rodela amendar sarinenđe lokho te verujina. Amen verujinaja amare phralenđe odolese so olenge delija mothovđe so šaj te verujina lenđe. b

8. So šaj te pomožini tut te ovel tut poverenje upro phralja?

⁸ Te šaj te ovel tut poverenje upro nekaste, valjani te nakhel vreme. So šaj te pomožini tut te ovel tut poverenje upro phralja? Upoznajin len šukar. Vaćer olencar ko sastankija. Đa olencar ki služba. Ov strpljivo olencar hem sar ka nakhel o vreme, ka dikhe so šaj te ovel tut poverenje upro lende. Ako nekas na penđareja šukar, verovatno ki početka na ka vaćere lese but buća tutar. Ama, sar pošukar upoznajineja le, šaj ka mange te vaćere diso poviše tutar (Luka 16:10). Ama, so šaj te ćere ako disavo phral razočarinđa tut? Ma cide tut odmah olestar, nego de le vreme. Isto ađahar, ma sebepi jekh manuš te našalje to poverenje upro sa o phralja. Akana ka razmotrina disave primerija ando Jehovase verna sluge kola na našalđe po poverenje upro manuša, iako disave razočarinđe len.

9. (a) Sar i Ana mothovđa so isi la poverenje upro Jehova, iako okola kas ćhivđa te predvodinen ćerđe bare greške? (b) So sikljovaja ando Anako primer? (Dikh i slika)

⁹ Da li nekad razočarinđa tut disavo phral kova isi le bare odgovornostija? Ako  ja, tegani but ka pomožini tuće ako razmislineja ando Anako primer. Ko olako vreme, o Ilije hine le bari odgovornost ko Izrael, odolese so hine prvosvešteniko. Olese ćhave hine sveštenikija, ama na hine šukar primer. On ćerđe nemoralna buća, a o Ilije hine previše blago premalo lende. Ama, o Ilije na našalđa odmah pe zaduženja. Iako hine asavki situacija ko sveto šatori, i Ana ipak alji odothe. Jekh puti ked i Ana alji ko šator te molini pe e Jehovase, o Ilije dikhlja la hem mislinđa soj tani mati. Umesto te pućel sar tani, ov odmah kritikujinđa la (1. Sam. 1:12-16). Iako desinđa pe laće odova, i Ana ipak dinđa zavet so ako bijani murše ka anel le te služini ko sveto šatori, a đanđa so olestar ka brinini pe o Ilije (1. Sam. 1:11). Da li e Ilijese ćhave hine ukorime? Ja, o Jehova palo disavo vreme kazninđa len (1. Sam. 4:17). I Ana hine blagoslovimi ađahar so bijanđa e Samuile (1. Sam. 1:17-20).

10. Sose o kralj David na ćhinavđa te ovel le poverenje upro manuša, iako hine razočarimo?

¹⁰ Da li nekad razočarinđa tut to šukar amal? Ako ja, tegani šaj te pomožini tuće o primer kotar o kralj David. O Ahitofel hine oleso šukar amal. Ama, ked e Davideso ćhavo o Avesalom manglja te ovel kralj ko pe dadeso than, o Ahitofel hine ki Avesalomesi strana hem pobuninđa pe protiv o David. Tegani sigurno hine but pharo e Davidese, sose razočarinđa le hem oleso ćhavo hem oleso amal. Ama, o David na ćhinavđa te verujini averenđe. Na primer, ov hem ponodri verujinđa pe amalese e Husajese. O David hine le šukar razlogija te verujini lese, odolese so o Husaj mothovđa soj tano šukar amal hem čak hine spremno te rizikujini po životi te pomožini lese (2. Sam. 17:1-16).

11. Sar jekh e Navaleso sluga mothovđa so isi le poverenje upri Avigeja?

¹¹ Razmislin ando primer kotar e Navaleso sluga. O David hem olese manuša zaštitinđe e Navalese slugen. Jekh dive, o David rodinđa diso hajbase pese hem pe manušenđe ando Naval kova hine barvalo. Ama, o Naval na manglja te del len ništa. Odolese, o David but holjanđa hem manglja te mudari sa e muršen ko oleso ćher. Ked odova šunđa jekh e Navaleso sluga umesto  te našel, ov đelo hem phenđa odova e Navalese romnjaće, e Avigejaće. Ov hine le poverenje so i Avigeja šaj te spasini oleso životi hem te rešini odova problemi, odolese so hine penđardi sar mudro romni. Ki akija situacija, oj ćaće mothovđa soj tani mudro ađahar so hrabro đelji anglo David hem pomožinđa lese te menjini pi odluka (1. Sam. 25:2-35). I Avigeja hine la poverenje upro David so ov ka ovel razumno.

12. Sar o Isus mothovđa so isi le poverenje upro pe učenikija, iako on grešinđe?

¹² O Isus hine le poverenje upro pe učenikija, iako on grešinđe (Jov. 15:15, 16). Ked o Jakov hem o Jovan pućlje le te ovel len posebno than ko Kraljevstvo, ov na sumnjinđa ko odova sose služinena e Jehovase hem na mislinđa so on na zaslužinena te oven apostolija (Mar. 10:35-40). Kasnije, ked o vojnikija astarđe le, sa olese učenikija aćhavđe le (Mat. 26:56). Ipak, ov na našalđa po poverenje upro lende. Ov đanđa soj tane nesavršena, ama „mothovđa lenđe mangipe sa đi o krajo“ (Jov. 13:1). Palo po uskrsenje, o Isus pe 11 apostolenđe dinđa bare odgovornostija. On valjanđe te predvodinen ko propovedibe hem te brininen pe ando phralja hem phenja (Mat. 28:19, 20; Jov. 21:15-17). O Isus hine le šukar razlogija te verujini akale nesavršeno manušenđe. Sare on aćhilje verna e Jehovase sa đi na mulje. Ćaće, i Ana, o David, e Navaleso sluga, i Avigeja hem o Isus aćhavđe amenđe but šukar primer so valjani te ovel amen poverenje upro nesavršena manuša.

13. Sose tano podijekh puti pharo te ovel amen poverenje upro avera?

¹³ Da li desinđa pe tuće so vaćerđan dijekhe phralese diso ko poverenje, a ov vaćerđa odova averenđe? Odova šaj but te povredini amen. Jekh puti, jekh phen vaćerđa diso pestar ko poverenje jekhe starešinase. Tajsato dive, olesi romni vićinđa la ko telefoni te ohrabrini la hem olaće hine jasno so odova starešina sa vaćerđa pe romnjaće. Akala phenjaće palo odova hine but pharo te verujini odole starešinase. Ama, šukar tano so oj rodinđa pomoć hem đelji ko jekh aver starešina kova pomožinđa laće palem te ovel la poverenje upro starešine.

14. So pomožinđa jekhe phralese palem te ovel le poverenje ko starešine?

¹⁴ Jekh phral but vreme hine holjamo upro duj starešine hem na hine le poverenje upro lende. Ama, ov počminđa te razmislini ando odova so phenđa jekh phral kas ov but poštujini. Odova phral phenđa: „O Satana tano amaro dušmani, a na amare phralja.“ Ov razmislinđa ando akala lafija, molinđa pe e Jehovase hem pomirinđa pe akale starešinencar.

15. Sose podijekh puti valjani amenđe vreme palem te ovel amen poverenje upro nekaste? Vaćer jekh primer.

¹⁵ Da li nekad našalđan te odgovornostija ki skupština? Odova šaj but te povredini amen. I Greta hem olaki daj verno služinđe e Jehovase ki nacističko Nemačka ko 1930-ta berša, ked uduri amaro delo hine zabranimo. I Greta hine la odgovornost te kucini i Stražarsko kula hem but manglja te ćerel odija buti. Ama, ked o phralja šunđe so olako dad tano protivniko, on lelje latar odija odgovornost. On darandilje so ov ka vaćeri disave poverljiva informacije andi skupština e protivnikonenđe. Ama, odova na hine olako jedino problemi. Ked hine o Dujto svetsko rat, o phralja olaće hem olake dajaće čak na manglje te den časopisija. A ked bi resena len ki ulica ni na  vaćerena hine olencar. Odova but povredinđa e Greta. Olaće valjanđa but vreme te oprostini odole phralenđe hem palem te verujini lenđe. Ama, palo disavo vreme haljilji so o Jehova oprostinđa lenđe hem so valjani hem oj te ćerel odova. c

16. Sose valjani te da sa amendar te obnovina amaro poverenje ko amare phralja hem phenja?

¹⁶ Ako hem tu doživinđan diso slično, de sa tutar palem te ovel tut poverenje upro phralja. Šaj ka valjani tuće vreme, ama ov sigurno so to trud ka isplatini pe. Aće jekh primer. Zamislin so haljan diso hem dobinđan otrovanje. Palo odova ka pazine so haja, ama sigurno na ka ćhinave te ha. Isto ađahar, ako neko razočarinđa amen, na valjani te našala amaro poverenje upro sa o phralja hem o phenja, sose đanaja so sare hijam nesavršena. Ked palem isi amen poverenje upro avera, amen ka ova pana pobahtale hem pobuter ka razmislina ando odova so amen šaj te ćera te šaj ki amari skupština sare te ovel len poverenje jekh upro aver.

17. Sose tano važno te ovel amen poverenje upro avera hem so ka dikha ko aver članko?

¹⁷ Ko e Satanaso sveto tano but pharo te arakhe manuše kase šaj te verujine. Ama, amen šaj te verujina jekh jekhese odolese so isi amen baro mangipe maškaro amende. Odolese so isi amen poverenje maškaro amende, amen hijam bahtale hem ko jekhipe akana, a ko pharo vreme so avela odova ka ovel amenđe bari zaštita. So šaj te ćere ako razočarinđan tut upro nekaste? De sa tutar ki odija situacija te dikhe sar o Jehova. Primenin o načelija andi Biblija, barjaćer to mangipe premalo te phralja hem sikljov ando biblijake primerija. Iako šaj hijan razočarimo, tu šaj te obnovine to poverenje upro avera. Ako ćereja odova, ka dikhe so „isi hem amala kola tane popaše ando phral“ (Posl. 18:24). Ama, nane dovoljno samo tu te ovel tut poverenje upro avera. On valjani te đanen so šaj te ovel len poverenje upro tute. Ko aver članko ka dikha, sar šaj te mothove so avera šaj te ovel len poverenje upro tute.