1-2. Sar šaj e Samsoneso primer te pomožini amen?

 SO AVELA tuće ki godi ked šuneja o anav Samson? Verovatno so hine jekh but zoralo manuš. Odova tano ćaće. Ama, o Samson ćerđa disave greške sebepi kola hine le bare pharipa. Ipak, o Jehova usredsredinđa pe ko odova so o Samson ćerđa te šaj te služini lese hem odova dinđa te pisini pe ki Biblija sar primer amenđe.

² O Jehova prekalo Samson ćerđa but bare buća, te šaj te pomožini pe narodose. But berša palo odova so o Samson mulo, o Jehova dinđa ko po Lafi o apostol Pavle te pisini ando manuša kola hine len but zorali vera, maškaro kola hine hem e Samsoneso anav (Jevr. 11:32-34). E Samsoneso primer šaj but te ohrabrini amen. Ov uzdajinđa pe upro Jehova čak ko phare okolnostija. Ko akava članko ka dikha, so šaj te sikljova ando oleso primer.

3. Kova zadatko o Samson dobinđa?

³ Ked o Samson bijandilo, o Filistejcija vladinđe upro Izraelcija hem ćerđe lenđe bare pharipa (Sud. 13:1). O Izraelcija but patinđe sose o Filistejcija hine but okrutna premalo lende. Odolese, o Jehova birinđa e Samsone te „izbavini e Izraelconen ando Filistejenge vasta“ (Sud. 13:5). Odova na hine lokho zadatko. Te šaj te ćerel odova, o Samson morandilo te oslonini pe upro Jehova.

4. Sar o Jehova pomožinđa e Samsonese te oslobodini pe ando Filistejcija? (Sudije 15:14-16)

 ⁴ Akana ka razmotrina jekh situacija ando Samsoneso životi koja mothovi kobor uzdajinđa pe upro Jehova. Jekh puti, i filistejsko vojska alji ki Lehija, koja verovatno hine ki Juda, te zarobini e Samsone. O manuša andi Juda darandile. Odolese odlučinđe te predajinen e Samsone. E Samsonese manuša phanlje le duje neve šelencar hem igarđe le ko Filistejcija (Sud. 15:9-13). Ama, e „Jehovaso duh dinđa snaga“ e Samsonese hem oslobodinđa pe ando odola šele. Palo odova, ov „dikhlja e heresi vilica, dolinđa la hem olaja mudarđa 1 000 manušen“. (Čitin Sudije 15:14-16.)

5. Sar o Samson mothovđa so osloninđa pe upro Jehova?

⁵ Sose o Samson koristinđa e heresi vilica? Odova na hine oružje asi borba. Ama, ov sigurno đanđa so oleso uspeh zavisini ando Jehova, a na ando odova kova oružje koristinđa. Akava verno manuš koristinđa odova so hine le, te šaj te ispunini pe e Jehovasi namera. O Samson pobedinđa sa akale manušen odolese so osloninđa pe upro Jehova.

6. So šaj te sikljova kotar izveštaj ando Samson?

⁶ O Jehova šaj hem amen te zorjaćeri te ćera disavo zadatko, iako amen šaj te mislina so niked našti te ćera le. Ov šaj te pomožini amen ko način kova šaj te iznenadini amen. Nek ovel tut pouzdanje so o Jehova, sar so zorjaćerđa e Samsone, šaj te zorjaćeri hem tut ako oslonineja tut upro leste hem rodeja olesi pomoć (Posl. 16:3).

7. Kova primer mothovi soj tano but važno te roda e Jehovastar te usmerini amen?

⁷ But phralja hem phenja kola pomožinđe ki gradnja ando amare objektija mothovđe so isi len poverenje upro Jehova. Angleder, o phralja obično gradinđe neve dvorane hem avera objektija. Ama, odolese so hine baro porast,  i organizacija valjanđa te ćerel disave promene. O odgovorna phralja rodinđe e Jehovastar te usmerini len hem probinđe disave neve metode, sar na primer te ćinen disave objektija hem te renovirinen len. O Robert, kova ko zadnja nekobor berš gradinđa but amare projektija ko celo sveto, phenela: „Ki početka, disavenđe na hine lokho te prihvatinen akava nevo način. Ov hine but averćhane ando odova so beršencar ćerđam. Ama, o phralja hine spremna te prilagodinen pe hem hine očigledno so o Jehova blagoslovini akala promene.“ Akava tano samo jekh primer sar o Jehova usmerini pe narodo te šaj te ispunini pi volja. Šukar tano te puća amen: „Da li rodaja e Jehovastar te vodini amen hem da li hijam spremna te ćera disave promene te šaj pana pošukar te služina lese?“

8. So ćerđa o Samson ked jekh dive hine but trošalo?

⁸ Šaj setineja tut hem avera buća kola o Samson ćerđa. Na primer, ov kokri mudarđa jekhe lave, a kasnije hem 30 Filistejcen ki diz Askalon (Sud. 14:5, 6, 19). Ov đanđa so asavke buća šaj te ćerel jedino uzi Jehovasi pomoć. Jekh dive, ked mudarđa 1 000 Filistejcen, hine but trošalo. So tegani ćerđa? Umesto kokri te rodel pese pani, ov rodinđa pomoć ando Jehova (Sud. 15:18).

9. So ćerđa o Jehova ked o Samson rodinđa lestar pomoć? (Sudije 15:19)

⁹ O Jehova odgovorinđa e Samsonese ađahar so prekalo jekh čudo dinđa le pani. Ked o Samson pilja odova pani, „irinđa pe olesi snaga hem oporavinđa pe.“ (Čitin Sudije 15:19.) Izgleda so akava nevo izvor pana postojinđa ked o Samuilo pisinđa e biblijaki knjiga Sudije. Akava izvor šaj setinćerđa e Izraelcen so ako ka uzdajinen pe upro Jehova, ov uvek ka pomožini len.

10. So valjani te ćera te šaj te dobina e Jehovasi pomoć? (Dikh i slika.)

¹⁰ Bizo obzir save sposobnostija isi amen ja so ćerđam ki Jehovasi organizacija, sarinenđe valjani e Jehovasi pomoć. Amen valjani te ova skromna hem te priznajina so ako o Jehova rodela amendar diso te ćera, amen šaj te ćera odova jedino ako osloninaja amen upro oleste. O Samson dobinđa snaga ked pilja o pani kova o Jehova dinđa le. Sar oleste, hem amen valjani te prihvatina e Jehovasi pomoć hem te aćhova lese verna (Mat. 11:28).

11. Sar šaj te uzdajina amen upro Jehova hem so jekh bračno par ćerđa?

¹¹ Te razmotrina o primer ando amaro phral o Aleksej kotar Rusija, kova verno istrajini ko progonstvo. So pomožinđa lese te aćhol zoralo ko akala phare okolnostija? Ov hem olesi romni isi len šukar duhovno rutina. Ov phenela: „Trudinava man te ovel man redovno lično proučibe hem svako dive te čitinav i Biblija. Svako sabalje, me hem mi romni zajedno vaćeraja ando diveso stiho hem molinaja amen.“ So sikljovaja ando akava phral? Amen na valjani te uzdajina amen upro amende, nego upro Jehova. Sar šaj te ćera odova? Ađahar so ka ćera o buća kola zorjaćerena amari vera, sar soj tane: o proučavanje, i molitva, o sastankija  hem i služba. Ako ka ćera odova, o Jehova ka pomožini amen hem ponodri te služina lese. Ov zorjaćerđa e Samsone, a sigurno šaj te zorjaćeri hem amen.

12. Koja lošno odluka o Samson anđa hem sose olesi veza e Dalilaja hine averćhane?

¹² O Samson hine nesavršeno sar amende. Odolese, disavo puti anđa lošna odluke. Jekh asavki odluka anđa lese bare posledice. Palo odova so nekobor berš služinđa sar sudija, ov „zaljubinđa pe upri jekh romni koja vićinđa pe Dalila hem koja živinđa ki dolina Sorik“ (Sud. 16:4). Angleder, o Samson hine verimo jekha Filistejkaja. O Jehova usmerinđa e Samsone te ćerel odova, sose odija hine prilika te borini pe protiv o Filistejcija. Kasnije, o Samson đelo ko jekh ćher kuri hine jekh prostitutka ki Filisteja, ki diz Gaza. Tegani, o Jehova dinđa odobor snaga e Samsonese so ikalđa e dizjake udara. Sebepi odova, odija diz na hine više odobor moćno (Sud. 14:1-4; 16:1-3). Ama, i situacija e Dalilaja hine averćhane, sose oj izgleda hine Izraelka hem odolese na hine le prilika te borini pe protiv o Filistejcija.

13. So i Dalila ćerđa e Samsonese?

¹³ O Filistejcija nudinđe e Dalilaće bare pare te izdajini e Samsone hem oj prihvatinđa. Da li o Samson odobor manglja la so odova mangipe korjaćerđa le hem na dikhlja so oj mangela te ćerel? Amen odova na đanaja. Ama, odova so đanaja tano so i Dalila but putija pućlja e Samsone kotar lese odija snaga sa đi na phenđa laće. Nažalost, o Samson dozvolinđa te avel ki situacija sebepi  koja našalđa pi snaga hem jekh vreme po amalipe e Jehovaja (Sud. 16:16-20).

14. So ulo e Samsoneja odolese so verujinđa e Dalilaće?

¹⁴ O Samson hine le bare posledice sose šunđa e Dalila, a na e Jehova. O Filistejcija astarđe le hem korjaćerđe le. Isto ađahar, ćhivđe le ko phanlipe ki Gaza kase manušen angleder lađaćerđa hem ulo olengo robo. Palo odova, anđe e Samsone ki jekh zabava kuri dinđe bare žrtve pe devlese, e Dagonese, sose verujinđe so ov pomožinđa len te astaren e Samsone. Jedino razlog sose vićinđe le te avel ki odija zabava hine te maren lese muj (Sud. 16:21-25).

15. Sar o Samson mothovđa so palem osloninđa pe upro Jehova? (Sudije 16:28-30; dikh i slika ki naslovno strana.)

¹⁵ O Samson ćerđa ozbiljno greška, ama na odustajinđa. Ov rodinđa prilika te ispunini po zadatko, te borini pe protiv o Filistejcija. (Čitin Sudije 16:28-30.) Ov molinđa e Jehova: „Mukh man te osvetinav man e Filistejenđe.“ O Jehova odgovorinđa ki olesi molitva hem dinđa le but bari snaga. Sebepi odova, o Samson mudarđa pobuter Filistejcen tegani nego iked angleder.

16. So šaj te sikljova andi Samsonesi greška?

¹⁶ Iako o Samson hine le bare posledice sebepi pi greška, ov na ćhinavđa te ćerel e Jehovasi volja. Čak iako sebepi disavi greška dobinaja ozbiljno savet ja našalaja amare odgovornostija, amen na valjani te odustajina. Ma bistri so o Jehova tano spremno te oprostini amenđe (Ps. 103:8-10). Iako ćerđam disavi greška, pana šaj te ova korisna e Jehovase sar so hine o Samson.

17-18. Sose šaj te ohrabrini tut o primer ando Majkl? (Dikh i slika.)

¹⁷ Te dikha o primer ando amaro terno phral kova vićini pe Majkl. Ov služinđa sar sluga pomoćnik hem sar stalno pioniri. Nažalost, ćerđa jekh greška sebepi koja našalđa pe odgovornostija ki skupština. Ov phenela: „Đi tegani, ćerđum but buća ki služba e Jehovase. Ama, ando jekh puti osetinđum so ništa više našti te ćerav. Niked na mislinđum so o Jehova ka vazdel pe vasta mandar.  Ama, pućljum man da li mo amalipe oleja ka ovel sar angleder hem da li šaj nekad palem te služinav ki skupština sar so angleder služinđum.“

¹⁸ But tano šukar so o Majkl na odustajinđa. Ov phenela: „Trudinđum man palem te ovel man šukar amalipe e Jehovaja ađahar so phravđum lese mo vilo ki molitva, proučinđum hem hor razmislinđum.“ Sar nakhlja o vreme, o Majkl palem hine le odgovornostija ki skupština. Akana služini sar starešina hem stalno pioniri. Ov pana phenela: „I podrška hem o ohrabrenje kova dobinđum, posebno ando starešine, pomožinđe man te haljovav so o Jehova pana mangela man. Palem isi man čisto savest đi služinava ki skupština. Akava iskustvo sikavđa man so o Jehova tano spremno te oprostini svakonese ko ando vilo kajini pe.“ Ako na ćeraja više odova so angleder ćerđam hem ako osloninaja amen upro Jehova, šaj te ova uverime so ov ka koristini amen hem ka blagoslovini amen, čak iako ćerđam disavi greška (Ps. 86:5; Posl. 28:13).

19. Sar zorjaćerđa tut e Samsoneso primer?

¹⁹ Ko akava članko dikhljam nekobor događaja ando Samsoneso životi. Ov na hine savršeno, ama na odustajinđa ando odova te služini e Jehovase, čak hem ked ćerđa greška e Dalilaja. Ama, ni o Jehova na odustajinđa olestar. Ov koristinđa le ko jekh šukar način. O Jehova pana upro leste dikhela sar jekh manuš kova hine le bari vera, odolese hem ćhivđa le ko spisko avere verno manušencar kolendar šaj te čitina ko Jevrejima 11. poglavlje. But ohrabrini amen odova so đanaja so amen služinaja amare nebesko Dadese kova mangela te zorjaćeri amen, posebno ked hijam slaba. Odolese, sar o Samson, hajde hem amen te molina e Jehova: „Molinava tut, setin tut upro mande [hem] de man snaga“ (Sud. 16:28).