1. Sar o Petar osetinđa pe palo odova so o Isus ćerđa jekh čudo?

 JEKH PUTI, o Petar đelo te astari maćhen, ama celo rat ništa na astarđa. Kotar jekhvar, o Isus phenđa lese: „Đan uduri kuri tano hor hem forden o mreže ko pani“ (Luka 5:4). O Petar sumnjinđa so bilo so ka astaren, ama ćerđa odova so o Isus phenđa lese. Ko krajo, ov hem o manuša kola hine oleja, astarđe odobor but maćhe so o mreže počminđe te pharavđon. Ked on haljilje so o Isus ćerđa čudo, on but čudinđe pe. O Petar phenđa: „Gospode, ma ava uzo mande, sose hijum grešno manuš“ (Luka 5:6-9). O Petar verovatno mislinđa so nane dostojno čak ni te ovel uzo Isus.

2. Sose tano šukar te razmislina ando Petareso primer?

² O Petar hine u pravu, ov hine „grešno manuš.“ Ki Biblija pisini so disavo puti ov ćerđa hem phenđa disave buća sebepi kola kasnije kajinđa pe. Da li hem tu osetineja tut sar o Petar? Da li isi tut disavi slabost ja mana kolaja borineja tut? Ako ja, tegani e Petareso primer šaj but te ohrabrini tut. Razmislin akalestar: O Jehova šaj hine te na mukhel e Petarese greške te oven pisime ko oleso Lafi, ama ipak mukhlja te oven pisime te šaj amen te sikljova diso olendar (2. Tim. 3:16, 17). Ked haljovaja sova akava manuš borinđa pe, odova ka pomožini amen te haljova so o Jehova na očekujini amendar savršenstvo. Iako hijam slaba, o Jehova na mangela te odustajina, već te borina amen.

3. Sose na valjani te odustajina?

³ Sose na valjani te odustajina? Ked jekh vreme ćeraja disavi buti, amen obično ovaja pošukar ki odija buti. Aće jekh primer. Jekh muzičar šaj beršencar te sikljol te bašali disavo instrumenti. Ko odova period, ov šaj te ćerel but greške. Ama ako nastavini te vežbini, ov ka napredujini.  Čak hem ako ovela but šukar muzičar, podijekh puti palem šaj te ćerel disavi greška. Ama, na odustajini. Ov nastavini te vežbini te šaj te ovel pana pošukar. Ko slično način, čak hem ako borinđam amen protiv disavi slabost, amen šaj palem te ćera isto greška. Ama, na valjani te vazda amare vasta. Sare amen podijekh puti phenaja ili ćeraja diso aso so kasnije kajinaja amen. Šaj te ova sigurna so ako na odustajinaja, o Jehova ka pomožini amen te ova sa pošukar (1. Petr. 5:10). Akana ka razmotrina e Petareso primer hem ka dikha sar odova so o Isus mothovđa lese saosećajnost, iako hine le slabostija, šaj te podstaknini amen te nastavina te služina e Jehovase.

4. Premalo Luka 5:5-10, so o Petar phenđa pestar hem ko so o Isus uverinđa le?

⁴ Ki Biblija na pisini sose o Petar phenđa soj tano „grešno manuš“ ja ko kola grehija mislinđa. (Čitin Luka 5:5-10.) Ama, ov šaj ćerđa disave ozbiljna greške. O Isus đanđa so o Petar darandilo odolese so mislinđa so nane dovoljno šukar. Isto ađahar, đanđa so o Petar ka aćhol verno. Odolese, o Isus phenđa lese „ma dara“. Odova so o Isus hine le poverenje upro Petar, pomožinđa e Petarese te menini po životi. O Petar hem oleso phral o Andrija kasnije aćhavđe pi buti hem ulje e Isusese učenikija. Sebepi odova, o Jehova but blagoslovinđa len (Mar. 1:16-18).

5. Kola blagoslovija o Petar doživinđa odolese so pobedinđa pe negativna osećanja?

⁵ Sar e Isuseso sledbeniko, o Petar doživinđa but šuže buća. Dikhlja sar o Isus saćari e nabormen, ikali e demonen e manušendar hem čak sar vazdela e mulen (Mat. 8:14-17; Mar. 5:37, 41, 42). b O Petar hine othe ked ki jekh vizija o Isus hine mothovdo sar vladini sar budućo kralj ando Devleso Kraljevstvo. Odova niked na bisterđa (Mar. 9:1-8; 2. Petr. 1:16-18). Sa akala buća ne bi doživini, ked ne bi ovela e Isuseso sledbeniko. Sigurno hine but bahtalo so na dozvolinđa o negativno mišljenje kova hine le pestar te sprečini le te doživini akala blagoslovija.

6. Da li o Petar sigate pobedinđa pe slabostija? Objasnin.

⁶ Iako sa odova dikhlja hem šunđa, o Petar palem morandilo te borini pe protiv pe slabostija. Te dikha nekobor  primerija. Ked o Isus objasninđa sar valjani te patini hem te merel, odolese so valjani te ispuninen pe e biblijake proročanstvija, o Petar phenđa so odova na ka desini pe olese (Mar. 8:31-33). Isto ađahar, nekobor putija o Petar hem avera apostolija raspravinđe pe koj tano pobaro (Mar. 9:33, 34). I rat angleder o Isus te merel, o Petar napadinđa jekhe manuše hem ćhinđa oleso kan (Jov. 18:10). Ki odija isto rat, odobor darandilo so trin putija odrekninđa pe ando Isus (Mar. 14:66-72). Sebepi sa odova, o Petar hine but tužno (Mat. 26:75).

7. Savi prilika o Petar hine le palo Isuseso uskrsenje?

⁷ O Isus na vazdinđa pe vasta ando akava apostol kova hine but obeshrabrimo. Palo odova so uskrsninđa, o Isus dinđa e Petarese prilika te mothovi po mangipe. Ov phenđa lese te brinini pe ando olese bakre (Jov. 21:15-17). O Petar hine spremno te ćerel odova. Sebepi odova, ov hine ko Jerusalim ki Pedesetnica hem maškar o prva hine pomazimo sveto duhoja.

8. Koja ozbiljno greška o Petar ćerđa ki Antiohija?

⁸ Čak hem palo odova so hine pomazimo, o Petar morandilo te borini pe pekle manencar. Ko 36. berš, o Devel bićhalđa le ko Kornelije kova na hine Jevrejin. Tegani, o Devel pomazinđa e Kornelije pe sveto duhoja, sova mothovđa so na ćerela razlika maškar o manuša hem so okola kola nane Jevreja šaj te oven deo andi hrišćansko skupština (Dela 10:34, 44, 45). Palo odova, o Petar počminđa te hal maro olencar, diso so angleder niked na ćerđa (Gal. 2:12). Ama, disave hrišćanija kola hine Jevreja mislinđe so on hem okola so na hine Jevreja na valjani te han maro zajedno. Ked neko ko ađahar mislinđa bi avela ki Antiohija, o Petar bi ćhinavi te hal maro e phralencar kola na hine Jevreja, sose verovatno darandilo te na povredini e phralen kola hine Jevreja. Ked o Pavle dikhlja so o Petar ćerela, ov ispravinđa le anglo sarinende (Gal. 2:13, 14). Ama, iako ćerđa akija greška, o Petar na odustajinđa. So pomožinđa lese?

9. Sar o lafija ando Jovan 6:68, 69 mothovena so o Petar hine verno?

⁹ O Petar hine verno manuš hem na mukhlja ništa te ćhinavi le te sledini e Isuse. Jekh puti, o Isus phenđa diso so olese učenikija na haljilje. (Čitin Jovan 6:68, 69.) On na ađićerđe o Isus te objasnini lenđe so odola lafija značinena, već samo ćhinavđe te sledinen le. Ama, o Petar na ćerđa odova. Ov haljilo so samo o Isus šaj te ovel le o „lafija ando večno đivdipe.“

10. Sar o Isus mothovđa so isi le poverenje upro Petar? (Dikh i slika.)

¹⁰ O Isus na aćhavđa e Petare. Ki rat angleder te merel, o Isus đanđa so o Petar hem avera apostolija ka aćhaven le. Ama, ipak hine sigurno so o Petar ka irini pe lese hem ka aćhol lese verno (Luka 22:31, 32). O Isus haljilo so e „manušeso vilo tano spremno, ama oleso telo tano slabo“ (Mar. 14:38). Odolese, čak hem palo odova so o Petar odrekninđa pe olestar, o Isus na odustajinđa kotar akava apostol. Ked uskrsninđa, ov pojavinđa pe e Petarese hem odova izgleda ked o Petar hine kokri (Mar. 16:7; Luka 24:34; 1. Kor. 15:5). Šaj samo te zamislina kobor odova ohrabrinđa akale apostole, kova hine but tužno sebepi odova so ćerđa.

11. Sar o Isus uverinđa e Petare so o Jehova ka brinini pe ando olese materijalna potrebe?

 ¹¹ O Isus uverinđa e Petare so o Jehova ka brinini pe olestar. Ked uskrsninđa, ov ćerđa pana jekh čudo. Tegani, o Petar hem avera apostolija astarđe bute maćhen (Jov. 21:4-6). Akava čudo sigurno uverinđa e Petare so e Jehovase nane pharo te brinini pe ando olese materijalna potrebe. Šaj akava apostol tegani setinđa pe ko Isusese lafija so o Jehova ka brinini pe ando okola kola „najangleder rodena o Kraljevstvo“ (Mat. 6:33). Sa akava pomožinđa e Petarese te ćhivel i služba ko prvo than ko po životi, a na i buti. Ki Pedesetnica ko 33. berš, o Petar dinđa temeljno svedočanstvo hem ađahar pomožinđa bute manušenđe te prihvatinen i šukar vest (Dela 2:14, 37-41). Palo odova, pomožinđa e Samarićanenđe hem averenđe kola na hine Jevreja te sikljon ando Isus hem te sledinen le (Dela 8:14-17; 10:44-48). O Jehova koristinđa e Petare ko jekh šukar način hem ađahar šaj hine te pomožini bute manušenđe te oven deo andi hrišćansko skupština.

12. Sar šaj te pomožini amenđe e Petareso primer ako borinaja amen disave problemeja?

¹² O Jehova šaj te pomožini amen te istrajina. Odova na ka ovel uvek lokho, posebno ako već jekh vreme borinaja amen jekhe problemeja. Disavo puti, amare slabostija šaj te oven pophare ando okola kolencar o Petar borinđa pe. Ama, o Jehova dela amen snaga te istrajina (Ps. 94:17-19). Te dikha jekh primer. Jekh phral beršencar angleder te penđari o ćaćipe hine homoseksualco. Ama, ov potpuno meninđa po životi hem počminđa te živini premalo Jehovase merilija. Ipak disavo puti palem hine le pogrešna želje. So pomožinđa lese te istrajini? Ov phenela: „O Jehova zorjaćeri amen. Uzi Jehovasi pomoć, sikljiljum soj tano moguće hem ponodri te služina e Jehovase ađahar sar so ov mangela. Iako isi man mane, o Jehova hem ponodri zorjaćeri man.“

13. Premalo Dela 4:13, 29, 31, sar šaj te oponašina e Petareso primer? (Dikh i slika.)

¹³ Sar so dikhljam, o Petar ćerđa nekobor ozbiljna greške odolese so darandilo ando manuša. Ama, ov molinđa pe e Jehovase asi snaga hem odolese šaj hine  hrabro te postupini. (Čitin Dela apostolska 4:13, 29, 31.) Hem amen šaj te pobedina amari dar. Te dikha so hine jekhe terne phralese kova vićini pe Horst. Ov živinđa ki nacističko Nemačka. But putija olese amala ki škola zorjeja ćhivđe le te phenel: „Haj Hitler!“ Umesto te holjanen upro leste, olese roditeljija molinđe pe oleja hem rodinđe ando Jehova te pomožini lese te ovel hrabro. Uzi Jehovasi hem pe roditeljengi pomoć, akava phral šaj hine te ovel zoralo hem te aćhol verno. Kasnije, ov phenđa: „O Jehova niked na aćhavđa man.“ c

14. Sar o starešine pomožinena okolenđe kola tane obeshrabrime?

¹⁴ O Jehova hem o Isus na ka odustajinen amendar. Palo odova so odrekninđa pe ando Isus, o Petar valjanđa te odlučini da li ka aćhol e Isuseso sledbeniko. O Isus usrdno molinđa pe e Jehovase te na slaboni e Petaresi vera. Ov phenđa e Petarese so molinđa pe aso odova hem mothovđa lese so isi le poverenje upro leste so ov šaj te zorjaćeri pe phralen (Luka 22:31, 32). Akala e Isusese lafija sigurno but značinđe e Petarese. Ked valjani te ana disavi važno odluka ko životi, o Jehova šaj prekalo starešine te uverini amen so šaj te aćhova lese verna (Ef. 4:8, 11). Jekh phral kova vićini pe Pavle hem kova beršencar služini sar starešina, trudini pe te ohrabrini averen. Ov podstaknini okolen kola tane obeshrabrime te razmislinen sar o Jehova privucinđa len ki istina. Palo odova, ov uverini len so o Jehova sebepi po verno mangipe na ka odustajini olendar. Ov phenela: „Dikhljum sar but phralja hem phenja  kola hine obeshrabrime, istrajinena uzi Jehovasi pomoć.“

15. Sar e Petareso hem e Horsteso primer mothovi so o lafija ando Matej 6:33 tane ćaće?

¹⁵ Sar so o Jehova brininđa pe ando Petar hem ando avera apostolija, ađahar šaj te brinini pe hem amendar ako ćhivaja i služba ko prvo than (Mat. 6:33). Palo Dujto svetsko rat, o Horst, kolestar angleder vaćerđam, razmislinđa odolestar te ovel pioniri. Ov hine but ćororo hem mislinđa so na ka šaj te izdržini kokri pes hem te ovel ki punovremeno služba. So ćerđa? Ov odlučinđa te dikhel da li o Jehova ka brinini pe ando odova so valjani lese. Ked alo o pokrajinsko nadgledniko ki olesi skupština, ov celo kurko đelo ki služba. Ko krajo ando odova kurko hine but iznenadimo ked o pokrajinsko nadgledniko dinđa le jekh koverta kuri hine pare, ama na phenđa lese kastar tano odova. Ki odija koverta hine dovoljno pare te šaj nekobor masek te služini sar stalno pioniri. Akava poklon uverinđa e Horste so o Jehova uvek ka pomožini lese. Amaro phral, celo po životi ćhivđa o Kraljevstvo ko prvo than (Mal. 3:10).

16. Sose tano šukar te sikljova pobuter ando Petar hem ando odova so pisinđa ko pe lila?

¹⁶ O Petar sigurno hine but bahtalo so o Isus na cidinđa pe olestar, sar so jekh puti o Petar phenđa lese odova. O Isus nastavinđa te sikavi e Petare te ovel verno apostol hem šukar primer e hrišćanenđe. Amen šaj te sikljova but buća kotar odova so o Isus sikavđa e Petare. But buća kola sikljilo ando Isus, o Petar pisinđa ko duj lila kola bićhalđa e hrišćanenđe ko prvo veko kola avdije tane deo andi Biblija. Ko aver članko ka vaćera so šaj te sikljova kotar odola lila hem sar šaj te primenina odola pouke.