1. Sar o Jehova koristinđa e Petare hari angleder te merel?

 O APOSTOL Petar beršencar služinđa e Jehovase. Ov sarađujinđa e Isuseja ki služba hem hine jekh ando prva manuša kola počminđe te propovedinen e manušenđe kola na hine Jevreja. Kasnije, ulo član ando Vodeće telo. Ko kraj ando oleso životi, ked već đanđa so ka merel, o Jehova dinđa le jekh važno zadatko. Ko 62-64. berš ki n. e., o Jehova koristinđa le te pisini duj lila, a odola tane i prvo hem i dujto Petrova. Ov nadinđa pe so odola lila ka pomožinen e hrišćanenđe palo oleso meribe (2. Petr. 1:12-15).

2. Sose e Petarese lila hine pisime ko pravo vreme?

² Ked o Petar pisinđa pe lila, o phralja hem o phenja hine len „razna kušnje“ (1. Petr. 1:6). O lošna manuša pokušinđe te anen o hovavne sikljoviba hem o nečisto ponašanje ki skupština (2. Petr. 2:1, 2, 14). Pana hari, o hrišćanija kola živinđe ko Jerusalim valjanđe te doživinen „o krajo ando sa o buća“. O Rimljanija valjanđe te uništinen i diz hem o hram (1. Petr. 4:7). E Petarese lila sigurno pomožinđe e hrišćanenđe te dikhen so šaj te ćeren te bi istrajinena ko kušnje kola hine len hem te šaj te spreminen pe aso kušnje kola ka oven. b

3. Sose valjani te razmotrina e Petarese lila?

³ Iako o Petar akala lila pisinđa e hrišćanenđe ko prvo veko, o Jehova ćerđa te oven deo ando oleso Lafi. Odolese, odola lila šaj hem amenđe avdije te pomožinen (Rimlj. 15:4). Sar odola hrišćanija, hem amen živinaja ko sveto kuri o manuša ćerena but melale buća. Pana hari, amen ka doživina pobari nevolja nego so on doživinđe. Ko Petarese lila isi nekobor važna podsetnikija kola šaj te pomožinen  amen te ićera ki godi e Jehovaso dive, te pobedina i dar ando manuša hem te barjaćera amaro mangipe premalo phenja hem phralja. Isto ađahar, odola podsetnikija ka pomožinen e starešinenđe te dikhen sar te pomožinen e phralenđe te aćhon zorale.

4. Premali 2. Petrova 3:3, 4, so šaj te slabonćeri amari vera?

⁴ Amen hijam okružime e manušencar kola na verujinena ko biblijake proročanstvija. O protivnikija šaj te maren amenđe muj odolese so beršencar vaćereja so ka avel o kraj. Disave manuša phenena so o kraj niked na ka avel. (Čitin 2. Petrova 3:3, 4.) Ako asavke buća phenena amenđe amare kolege, o manuša ki služba ili amari familija, amari vera šaj te slaboni. O Petar pisinđa so tegani šaj te pomožini amenđe.

5. So ka pomožini amen strpljivo te ađićera o kraj ando akava sveto? (2. Petrova 3:8, 9)

⁵ Disave manuša šaj mislinena so o Jehova but ađićeri te anel o krajo ando akava sveto. Ama, e Petarese lafija setinćerena amen so o način sar o Jehova dikhela ko vreme tano averćhane ando odova sar o manuša dikhena. (Čitin 2. Petrova 3:8, 9.) E Jehovase hiljada berš tane sar jekh dive. Ov tano strpljivo hem na mangela niko te ovel uništimo. Ked oleso dive ka avel, akava lošno sveto ka ovel uništimo. Kobor bari čast isi amen te koristina o vreme so aćhilo te propovedina sa e manušenđe ki celo phuv.

6. So šaj te ćera te šaj e Jehovaso dive „te ovel amenđe ki godi“? (2. Petrova 3:11, 12)

⁶ O Petar podstakninđa amen te ovel amen „ki godi“ e Jehovaso dive. (Čitin 2. Petrova 3:11, 12.) Sar šaj te ćera odova? Ađahar so svako dive, ako šaj, ka razmislina savo ka ovel amaro životi ko nevo sveto. Zamislin sar ko nevo sveto dišineja ćaće čisto vazduho, sar haja but ukusno hem zdravo hrana, sar ađićereja te familija hem te amalen kola uskrsninđe hem sar okolen kola živinđe but berša angleder sikaveja sar ispuninđe pe e biblijake proročanstvija. Odova šaj te pomožini tut istrajno te ađićere hem te ove uverimo so o kraj sigurno ka avel. Ako „akava angleder već [đanaja]“, amen „na ka ova prevarime“ e manušenge hovajbaja (2. Petr. 3:17).

7. Sar šaj te utičini upro amende i dar ando manuš?

⁷ Đanaja soj tano e Jehovaso dive but paše. Odolese, mangaja te da sa amendar te propovedina i šukar vest e manušenđe. Ama, disavo puti nane amen hrabrost te vaćera e manušencar. Sose? Odolese so isi amen dar so ka mislinen amendar ja so ka ćeren amenđe. Odova desinđa pe hem e Petarese i rat ked astarđe e Isuse. Ov darandilo te phenel soj tano jekh ando Isusese učenikija. Čak nekobor putija phenđa so na penđari le (Mat. 26:69-75). Ama, kasnije o Petar pobedinđa pi dar hem pisinđa: „Ma daran kotar odova sostar on darana hem ma oven uznemirime“ (1. Petr. 3:14). E Petarese lafija uverinena amen so hem amen šaj te pobedina i dar ando manuš.

8. So šaj te pomožini amen te pobedina i dar ando manuš? (1. Petrova 3:15)

⁸ So šaj te pomožini amen te pobedina i dar ando manuš? O Petar phenđa: „O Hrist sar Gospod nek ovel sveto ko  tumaro vilo“. (Čitin 1. Petrova 3:15.) Akava uključini te razmislina odolestar savi uloga o Isus isi le hem kobor bari moć isi le sar Kralj. Ako isi tut trema ili daraja te svedočine ked aso odova isi tut prilika, setin tut so o Isus tano amaro Kralj. Zamislin le sar vladini ko nebo hem okolo leste tane milionija anđelija. Setin tut so ov isi le „sa i vlast ko nebo hem ki phuv“ hem so ov ka ovel tuvaja „ko sa o dive đi o svršetko ando akava poretko“ (Mat. 28:18-20). O Petar podstaknini amen „uvek [te ova] spremna“ te branina amari vera. Da li mangeja te svedočine ki škola, ki buti ili ki disavi aver neformalno prilika? Razmislin angleder ked šaj te ćere odova hem spremin tut so ka vaćere. Molin tut asi hrabrost hem ov uverimo so o Jehova šaj te pomožini tut te pobedine i dar ando manuš (Dela 4:29).

9. Sar o Petar ki jekh situacija na mothovđa mangipe? (Dikh i slika.)

⁹ O Petar sikljilo sar te mothovi mangipe. Ov hine prisutno ked o Isus phenđa: „Dava tumen nevi zapovest: Mangen jekh jekhe. Sar so me mangljum tumen, ađahar hem tumen mangen jekh jekhe“ (Jov. 13:34). Iako o Petar šunđa akija zapovest, kasnije odbinđa te hal maro pe phralencar hem pe phenjencar kola na  hine Jevreja, sose darandilo ando hrišćanija kola hine Jevreja. O Pavle phenđa e Petarese so postupinđa licemerno (Gal. 2:11-14). O Petar prihvatinđa o ukor hem sikljilo ando odova. Ko pe solduj lila, ov jasno phenđa so na valjani samo te osetina mangipe premalo phralja već hem te mothova odova mangipe.

10. So ka pomožini amenđe te mothova „iskreno phralikano mangipe“? Objasnin. (1. Petrova 1:22)

¹⁰ O Petar phenela so valjani te mothova „iskreno phralikano mangipe“ premalo amare phralja hem phenja. (Čitin 1. Petrova 1:22.) Asavko mangipe ka mothova ako ka ićera amen ko sa odova so pisini ki Biblija. Na primer, ki Biblija pisini so o „Devel na dikhela koj tano ko“ (Dela 10:34, 35). Amen našti te šuna e Isusesi zapovest ando mangipe ako samo disavenđe ki skupština mothovaja mangipe, a disavenđe na. Naravno, sar o Isus hem amen šaj te ova nekasa popaše, a averencar na odobor (Jov. 13:23; 20:2). Ama, o Petar setinćeri amen so valjani te mothova „phralikano mangipe“ sa amare phralenđe hem phenjenđe sose tane deo andi amari porodica (1. Petr. 2:17).

11. So značini te manga averen „hor hem celone vileja“?

¹¹ O Petar podstakninđa amen „hor te manga jekh jekhe celone vileja.“ Akala lafija značinena te manga čak okolen kase tano amenđe pharo te mothova mangipe. Na primer, so ka ćere ako jekh phral holjanćeri tut ili povredini tut? Amari prvo reakcija šaj te ovel te irina lese ki isto mera. Ama, o Petar sikljilo ando Isus so odova nane ugodno e Devlese (Jov. 18:10, 11). O Petar pisinđa: „Ma irinen o lošnipe e lošnipaja niti i uvreda asi uvreda. Umesto odova, tumen blagoslovinen len“ (1. Petr. 3:9). Ked isi tut hor mangipe, odova ka podstaknini tut te ove ljubazno hem obzirno čak hem premalo okola kola povredinđe tut.

12. (a) Ko so pana ka podstaknini amen o baro mangipe? (b) So mangaja te ćera sar soj tano mothovdo ko video Čuvajmo naše dragoceno jedinstvo?

¹² Ko po prvo lil, o Petar koristinđa o izraz „but mangen jekh jekhe.“ Asavko mangipe, ućhari na samo nekobor grehija nego „but grehija“ (1. Petr. 4:8). Šaj o Petar setinđa pe so o Isus sikavđa le but berša angleder ando opraštanje. Tegani, verovatno o Petar mislinđa soj tano but velikodušno odolese so phenđa so valjani te oprostini pe phralese „đi ko efta putija.“ Ama, o Isus sikavđa hem ole hem amen so valjani te oprostina „đi ko 77 putija“ so značini so valjani but te oprostina (Mat. 18:21, 22). Ako tano tuće pharo te primenine akava savet, ma obeshrabrin tut. Sa e Jehovase sluge tane nesavršena hem sebepi odova podijekh puti tano lenđe pharo te oprostinen. Ama, but tano važno te ćere sa so šaj te oprostine te phralese hem te ove ko mir oleja. c

13. Sose e starešinenđe šaj te ovel pharo te arakhen vreme te ohrabrinen pe phralen hem phenjen?

¹³ O Petar sigurno niked na bisterđa e Isusese lafija kola vaćerđa lese palo odova so uskrsninđa. Ov phenđa lese: „Brinin tut ando me bakre“ (Jov. 21:16). Ako hijan starešina, tu đaneja so akala lafija primeninena pe hem upro tute. Ama, jekhe starešinase šaj te ovel but pharo te arakhi  vreme te ispunini akava zadatak. O starešine najangleder valjani te brininen pe ando pe porodicake fizička, emocionalna hem duhovna potrebe. Isto ađahar, on predvodinena ko propovedibe. Spreminena hem iznesinena pe tačke ko sastankija hem kongresija. Disave olendar pomožinena ko Odbor aso odnos e bolnicencar ili ko disavo projekat ki gradnja. O starešine tane ćaće but zauzeta.

14. So šaj te podstaknini e starešinen te brininen pe ando stado? (1. Petrova 5:1-4)

¹⁴ O Petar podstakninđa e starešinen: „Brininen tumen ando Devleso stado“. (Čitin 1. Petrova 5:1-4.) Ako hijan starešina, amen đanaja so mangeja e phralen hem e phenjen hem so mangeja te brinine tut olendar. Ama, podijekh puti šaj osetineja tut but umorno ili hijan but zauzeto hem mislineja so odolese našti te ispunine odova zadatko. So tegani šaj te ćere? Vaćer e Jehovase sar osetineja tut. O Petar pisinđa: „Ako neko služini, tegani nek oslonini pe ki snaga koja dela o Devel“ (1. Petr. 4:11). Te phralja hem te phenja šaj isi len problemija kola našti te oven rešime ko akava sveto. Ama, ma bistri so „o vrhovno pastiri“, o Isus Hrist, šaj te pomožini len pošukar tutar. Odova šaj te ćerel akana, ama hem ko nevo sveto. O Jehova na rodela but buća ando starešine. Ov rodela te mangen pe phralen, te brininen pe olendar hem te oven „primer e stadose.“

15. Sar jekh starešina brinini pe ando pe phralja hem phenja? (Dikh i slika.)

¹⁵ O Vilijam, kova but berša služini sar starešina, haljola kobor tano važno te brinini pe ando phralja. Ked počminđa i pandemija kotar koronavirus, ov hem avera starešine andi olesi skupština hine len cilj svako kurko te vaćeren svakone objaviteljeja andi pi grupa. Ov phenđa hem sose ćerđe odova: „But phralja hem phenja hine kokri ćhere hem sebepi odova lokho šaj hine te počminen te razmislinen negativno.“ Ked disavo phral ili phen isi len problemi, o Vilijam pažljivo šunela len te šaj te haljol so valjani lenđe hem so brinini len. Palo odova, ov trudini pe te arakhi disavi publikacija ili video ko amaro sajt kova šaj te ohrabrini odole  phrale ili phenja. Ov pana phenela: „Akana tano považno nego iked angleder, te brinina amen ando amare phralja hem phenja. Amen but trudinaja amen te pomožina e manušenđe te sikljon ando Jehova, ama isto valjani te pomožina amare phralenđe hem phenjenđe te aćhon ko ćaćipe.“

16. Sar šaj te primenina o pouke kola sikljiljam ando Petarese lila?

¹⁶ Akana vaćerđam samo ando disave buća kotar Petarese duj lila. Šaj primetinđan so ko disave buća valjani te popravine tut. Na primer, da li valjani počesto te razmisline kotar blagoslovija kola ka oven amen ko nevo sveto? Da li ka ćhive tuće cilj te propovedine ki škola, ki buti ja ko disave avera neformalna prilike? Da li dikhljan sar šaj pana pobuter te mothove mangipe premalo phralja hem phenja? Starešine, da li hijen odlučna ando vilo te brininen tumen kotar Jehovase bakre? Ov iskreno tuvaja hem dikh kaj valjani te popravine tut, ama ma obeshrabrin tut. „O Gospod tano šukar“ hem ov ka pomožini tut te popravine tut (1. Petr. 2:3). O Petar uverini amen: „O Devel [. . .] ka završini tumari obuka đi o krajo. Ov ka zorjaćeri tumen, ka pomožini tumenđe te aćhon verna hem ka pomožini tumenđe te na peren“ (1. Petr. 5:10).

17. So ka dobina ako istrajinaja hem dozvolinaja e Jehovase te obučini amen?

¹⁷ Jekh puti o Petar mislinđa so nane dostojno te ovel uzo Isus (Luka 5:8). Ama, uzi Jehovasi hem Isusesi pomoć, o Petar istrajinđa hem verno sledinđa e Isuse. Sebepi odova, o Jehova dozvolinđa e Petarese te „khuvel ko večno Kraljevstvo ando amaro Gospod hem Spasitelj o Isus Hrist“ (2. Petr. 1:11). Odija hine ćaće jekh but šuži nagrada! Ako hem tu sar o Petar istrajineja hem dozvolineja e Jehovase te obučini tut hem tu ka dobine o večno životi. Sebepi ti „vera ka ove spasimo“ (1. Petr. 1:9).