36. ČLANKO PROUČIBASE
ĐILI 89 Ćer sa so sikljoveja
„Ćeren odova so šunđen“
Ma samo šunen o lafi već hem ćeren odova so šunđen (JAK. 1:22)
SO KA SIKLJOVA?
Akava članko ka pomožini amen te barjaćera amari želja na samo svako dive te čitina e Devleso Lafi nego hem te razmislina ando odova so čitinđam hem te primenina odova so sikljiljam.
1-2. Sose tane e Devlese sluge bahtale? (Jakovljeva 1:22-25)
O JEHOVA hem oleso manglo Ćhavo mangena te ova bahtale. Ko Psalam 119:2 pisini: „Bahtale tane okola kola ićerena pe ko olese opomene kola rodena le celone vileja.“ O Isus phenđa: „Bahtale tane okola kola šunena e Devleso Lafi hem ićerena le“ (Luka 11:28).
2 Sar e Jehovase sluge, amen hijam but bahtale. Sose? Isi amen but razlogija aso odova. Ama, jekh važno razlog tano so redovno čitinaja e Devleso Lafi hem trudinaja amen te ićera amen ko odova so sikljovaja. (Čitin Jakovljeva 1:22-25.)
3. Sar pomožini amen ked primeninaja odova so čitinaja ko Devleso Lafi?
3 Ako primeninaja odova so sikljovaja ando Devleso Lafi, odova but ka pomožini amen. Na primer, odoleja ugodinaja e Jehovase, a odova ćerela amen te ova bahtale (Prop. 12:13). Isto ađahar, tegani isi amen bahtali porodica hem šukar odnos e phralencar hem e phenjencar. Sigurno hem tu uverinđan tut ko odova. Uzo odova, nane amen problemija kola isi len o manuša kola na šunena e Jehovase zapovestija. Ćaće složinaja amen odoleja so phenđa o kralj David. Palo odova so ki jekh đili pominđa e Jehovaso zakon, naredbe hem presude, ov phenđa: „Ko ićeri len dobini bari nagrada“ (Ps. 19:7-11).
4. Sose nane uvek lokho te primenina odova so čitinaja ko Devleso Lafi?
4 Te ova iskrena, nane uvek lokho te čitina e Devleso Lafi hem te primenina odova so sikljovaja. Ama kobor god te ova zauzeta, valjani te arakha vreme te čitina hem te proučina e Devleso Lafi te šaj te haljova so o Jehova rodela amendar. Akana ka dikha nekobor predlogija kola ka pomožinen amen te ćera odova. Isto ađahar, ka dikha so šaj te pomožini amen te razmislina odolestar so čitinaja hem sar šaj te primenina odova.
ODVOJIN VREME TE ČITINE E DEVLESO LAFI
5. Kola buća lena amaro vreme?
5 But e Jehovase sluge tane zauzeta. Amenđe valjani but vreme te šaj te ćera o buća aso kola i Biblija phenela soj tane važna. Na primer, but amendar ćerena buti te šaj te izdržinen pes hem pe porodica (1. Tim. 5:8). But hrišćanija brininena pe nekastar koj tano nabormo ili phuro. Sare valjani te brinina amen aso amaro sastipe, a aso odova valjani vreme. Uzo sa odova, isi amen hem zadatkija ki skupština. Jekh važno zadatko tano te propovedina i šukar vest. Sar šaj uzo sa akala buća te arakha vreme redovno te čitina i Biblija, te razmislina ando odova so čitinaja hem te primenina odova so sikljiljam?
6. So valjani te ćere te šaj te čitine i Biblija svako dive? (Dikh i slika.)
6 Jekh andi najvažno buti aso jekh hrišćanin tani te čitini i Biblija. Odolese, valjani te da sa amendar te ćera odova (Fil. 1:10). Ki Biblija pisini so o bahtalo manuš „uživini ko Jehovaso zakon, dive hem rat pažljivo čitini oleso zakon“ (Ps. 1:1, 2). Odova značini so valjani te odvojina vreme te čitina i Biblija. Ked tano najšukar vreme aso odova? Svako amendar šaj te birini ked odova ka ćerel. Ama, najšukar tano te birina vreme ked odova šaj redovno te ćera. Amaro phral o Viktor, phenela: „Me volinava te čitinav i Biblija sabale. Na hijum manuš kova rano uštela, ama tegani nane ništa so šaj te smetini man. Sabale isi man najšukar koncentracija.“ Sar tano tuvaja? Puć kokri tut: „Ked tano maje najšukar vreme te čitinav i Biblija?“
Ked tano najšukar vreme te čitine i Biblija? (Dikh o 6. odlomko)
RAZMISLIN ANDO ODOVA SO ČITINEJA
7-8. So valjani te ćera te šaj te pomožini amen odova so čitinaja? Vaćer jekh primer.
7 Amen šaj te čitina but buća, ama ništa te na aćhol amenđe ki godi. Da li nekad čitinđan diso hem kratko palo odova našti hine te setine tut so čitinđan? Sarinenđe odova desinđa pe. Nažalost, odova šaj te desini pe hem ked čitinaja i Biblija. Šaj ćhivđam amenđe cilj svako dive te čitina nekobor poglavlja. Odova tano pohvalno. Amen valjani te ćhiva amenđe ciljija hem te trudina amen te ispunina len (1. Kor. 9:26). Te čitina i Biblija tano jekh šukar početak, ama samo tano početak. Valjani te ćera diso pobuter ako mangaja te pomožini amen odova so čitinaja.
8 Razmislin andi akija ilustracija. O boršim tano važno aso životi. Ama ako đala but boršim, aso kratko vreme i phuv poplavini. Ked odova ovela, o boršim na koristini odobor but. Pošukar tano ked o boršim đala pohari, sose tegani i phuv upijini o pani hem odova pomožini e biljkenđe te barjon. Isto ađahar, amen na valjani te čitina i Biblija ki sig sose tegani na ka šaj te razmislina, te pamtina hem te primenina odova so čitinaja (Jak. 1:24).
Sar so e phuvjaće valjani vreme te upijini o pani hem amenđe valjani vreme te razmislina hem te primenina odova so čitinaja ko Devleso Lafi (Dikh o 8. odlomko)
9. So valjani te ćere ako haljiljan so sigate čitineja i Biblija?
9 So ako podijekh puti samo sigate čitineja i Biblija? Čitin posporo. Trudin tut te razmisline ando odova so čitineja ili ando odova so čitinđan. Odova nane pharo. Šaj ka odlučine te odvojine poviše vreme aso lično proučibe te šaj te uspine hem te razmisline. Ki aver strana, šaj ka birine te čitine samo nekobor stihija te šaj te ovel tut vreme te razmisline ando odova so čitinđan. O Viktor, kole pominđam angleder, phenela: „Me na čitinava but, šaj samo jekh poglavlje. Odolese so sabale čitinava, šaj celo dive te razmislinav ando odova so čitinđum.“ Tu šaj te birine kobor ka čitine, ama but tano važno te čitine pohari te šaj te razmisline odolestar so čitineja (Ps. 119:97; dikh o okvir „ Pućiba kolendar šaj te razmisline“).
10. Vaćer jekh primer sar šaj te primenine odova so čitinđan. (1. Solunjanima 5:17, 18)
10 Bizo obzir ked čitineja i Biblija ili kobor vreme odvojineja aso odova, trudin tut te primenine odova so čitineja. Đi čitineja e Devleso Lafi, šaj te puće tut: „Sar šaj akava so čitinava te primeninav akana ili ki budućnost?“ Na primer, zamislin so resljan ki 1. Solunjanima 5:17, 18. (Čitin.) Palo odova so čitineja akala stihija šaj te terđove hem te razmisline kobor često hem usrdno molineja tut. Isto ađahar, šaj te razmisline ando buća aso kola hijan zahvalno. Šaj tegani ka mange te zahvaline tut e Jehovase aso trin posebna buća. Iako ka odvojine samo nekobor minutija te razmisline ando odova so čitinđan, odova šaj te pomožini tut te haljove e Devleso Lafi hem te ćere odova so pisini odothe. Ako svako dive primenineja odova so čitinđan, sar đala o vreme, šaj te ove pošukar e Jehovaso sluga. Ama, so ako haljiljan so isi but buća ko kola valjani te ćere?
ĆHIV TUĆE RAZUMNA CILJIJA
11. Sose podijekh puti šaj te obeshrabrina amen? Vaćer jekh primer.
11 Ked čitineja i Biblija, disavo puti šaj te obeshrabrine tut ked haljoveja ko kobor buća valjani te ćere. Zamislin so avdije čitineja ando odova so na valjani te ćere razlika maškaro manuša (Jak. 2:1-8). Tu haljoveja so ko odova valjani te popravine tut hem odlučineja te ćere disave promene. Bravo! Tajsato dive čitineja so valjani te pazine ki ti ćhib (Jak. 3:1-12). Haljoveja so podijekh puti hijan negativno. Odolese, hijan odlučno te ove pozitivno hem te vaćere odova so ka ohrabrini averen. O trito dive čitineja so valjani te pazine te na oven tut amala ko sveto (Jak. 4:4-12). Tu haljoveja so valjani te pazine savi zabava isi tut. Ko krajo, o štarto dive na đaneja kaj tano to šero sose valjani te popravine tut već ko trin buća.
12. Sose na valjani te obeshrabrine tut ako haljiljan so valjani te ćere disave promene? (Dikh i fusnota.)
12 Ako haljiljan so valjani te ćere nekobor promene, ma obeshrabrin tut. Odova mothovi so hijan ponizno hem so isi tut ispravno motivi. I ponizno osoba đi čitini e Devleso Lafi dikhela kuri valjani te menini pe. a Isto ađahar, ma bistri so te uravi pe „i nevi ličnost“ tano proces kova trajini (Kol. 3:10). So ka pomožini tut hem ponodri te ićere tut ko odova so pisini ko Devleso Lafi?
13. Sar šaj te ćhive tuće razumna ciljija? (Dikh i slika.)
13 Umesto te trudine tut te menine sa kotar jekh puti, valjani te ćhive tuće razumna ciljija (Posl. 11:2). Na primer, šaj ko jekh lil te pisine ko so valjani te ćere buti. Palo odova, birin jekh ja duj buća ko kola najangleder mangeja te ćere, a okola avera mukh aso aver puti. Kotar šaj te počmine?
Umesto te trudina amen te primenina sa kotar jekhvar, sose na bi ćhivaja amenđe razumna ciljija? Šaj te trudina amen te ćera buti ko jekh ili duj ciljija (Dikh o 13. hem 14. odlomko)
14. Ko kola ciljija šaj najangleder te ćere buti?
14 Šaj te počmine ando odova soj tano tuće polokho ili ando odova kuri valjani najviše te popravine tut. Ked haljiljan ko so mangeja te ćere buti, šaj odolestar te istražine ko amare publikacije, ađahar so ka koristine o Indeks ando publikacije hem o Vodič kotar publikacije ando Jehovase svedokija. Molin tut e Jehovase te del tut hem želja hem snaga te ispunine te ciljija (Fil. 2:13). Palo odova, trudin tut te primenine odova so sikljiljan. Ked dikheja so ispuninđan jekh cilj, tegani ka ovel tut pobari želja te ispunine hem aver cilj. Ako već uspinđan te menine diso koro tute ja te razvijine disavi osobina, verovatno ka ovel tuće polokho te ćere hem avera promene.
MUKHEN E DEVLESO LAFI TE „DELUJINI ANO TUMENDE“
15. Sar tano e Jehovaso narodo averćhane ando avera manuša kola čitinena i Biblija? (1. Solunjanima 2:13)
15 Disave manuša phenena so čitinđe i Biblija but putija. Ama, da li ćaće verujinena ko odova so pisini koro late? Da li primeninena odova so pisini odothe hem meninena po životi? Nažalost, o odgovor tano na. E Jehovase narodoja tano averćhane! Sar o hrišćanija ko prvo veko, hem amen prihvatinđam i Biblija „sar e Devleso Lafi, sar soj tano hem ćaće.“ Isto ađahar, amen daja sa amendar te primenina olake savetija ko amaro životi. (Čitin 1. Solunjanima 2:13.)
16. So šaj te pomožini amen te ćera odova so pisini ko Devleso Lafi?
16 Nane uvek lokho te čitina e Devleso Lafi hem te primenina odova so čitinaja. Disavo puti tano pharo te arakha vreme te čitina i Biblija. A podijekh puti šaj čitinaja la ki sig hem hić na odvojinaja vreme te razmislina odolestar so čitinđam. Disavo puti hijam obeshrabrime sose haljiljam kola promene valjani te ćera. Save god pharipa te oven amen, na hijam kokri. Uzi Jehovasi pomoć, šaj te uspina. Odolese, hajde sare te prihvatina e Jehovasi pomoć hem te na ova samo okola kola šunena, već okola kola ćerena odova so pisini ko Devleso Lafi. So pobuter čitinaja e Devleso Lafi hem primeninaja le ko amaro životi, pana pobahtale ka ova (Jak. 1:25).
ĐILI 94 Zahvalna so isi amen e Devleso Lafi
a Ko amaro sajt jw.org dikh o video So avera terne phenena – Čitibe andi Biblija.
