1-2. Sose o Jehova ćerđa amen te ova pobahtale ked daja?

 AMEN hijam pobuter bahtale ked diso daja nego ked dobinaja. Ađahar ćerđa amen o Jehova (Dela 20:35). Ama, da li odova značini so na hijam bahtale ked diso dobinaja? Na. Ama, pobahtale hijam ked daja. Ćaće, but tano šukar so o Jehova ćerđa amen ko asavko način. Sose?

² Odolese so o Jehova ćerđa amen ađahar, amen kokri šaj te utičina ko odova te ova bahtale. Šaj te ova pobahtale ked razmislinaja ando odova sar šaj te da diso averenđe. But tano šukar so o Jehova ćerđa amen ađahar (Ps. 139:14).

3. Sose aso Jehova phenela pe soj tano „bahtalo Devel“?

³ Ki Biblija pisini so okola kola dena tane bahtale. Odolese, šaj but lokho te haljova sose aso Jehova phenela soj tano „bahtalo Devel“ (1. Tim. 1:11). O Jehova prvo dinđa diso averenđe hem niko na dela pobuter olestar. Sar so o apostol Pavle phenđa „sebepi oleso isi amen životi, phiraja hem postojinaja“ (Dela 17:28). Ando Jehova avela „svako šukar hem savršeno poklon“ (Jak. 1:17).

4. So šaj te pomožini amen te ova pana pobahtale?

⁴ Sare amen verovatno bi mangaja te osetina pana pobaro bahtalipe kova avela ando odova ked daja. Odova šaj te ćera ađahar so ka oponašina e Jehovasi velikodušnost (Ef. 5:1). Ko akava članko ka razmotrina oleso primer hem ka sikljova so šaj te ćera ako osetinaja so avera nane zahvalna aso odova so ćeraja. Odova ka pomožini amen hem ponodri te da averenđe hem te ova pobahtale.

OV VELIKODUŠNO SAR O JEHOVA

5. Kola materijalna buća o Jehova dela amen?

⁵ Sar o Jehova mothovi soj tano velikodušno? Te dikha  nekobor primerija. O Jehova dela amen materijalna buća. Šaj nane amen uvek but buća, ama sebepi o Jehova isi amen sa odova so valjani amenđe. Na primer, isi amen hrana, šeja hem than kaj te živina (Ps. 4:8; Mat. 6:31-33; 1. Tim. 6:6-8). Da li o Jehova ćerela odova odolese so mora? Na. Sose o Jehova ćerela odova?

6. So sikljovaja ando Matej 6:25, 26?

⁶ O Jehova dela amen odova so valjani amenđe odolese so mangela amen. Razmislin ando Isusese lafija kotar Matej 6:25, 26. (Čitin.) O Isus odothe koristinđa o primerija ando stvaranje. Ked vaćerđa ando ćiriklja, ov phenđa: „On na sejinena, ni na ćedena, ni na anena ko žitnice, ama palem tumaro nebesko Dad parvari len.“ Palo odova, pućlja len: „Na hijen li tumen povredna olendar?“ So o Isus manglja te sikavi amen? E Jehovase olese verna sluge tane but povredna ando životinje. Ako o Jehova brinini pe ando životinje, šaj te ova sigurna so ka brinini pe hem amendar. Sar so jekh dad brinini pe ando pe ćhave, ađahar o Jehova brinini pe amendar sose mangela amen (Ps. 145:16; Mat. 6:32).

7. Sar šaj te ova velikodušna sar o Jehova? (Dikh i slika.)

⁷ Sar o Jehova, hem amen šaj te da averenđe odova so valjani lenđe odolese so mangaja len. Na primer, da li đaneja so dijekhe phralese ja phenjaće valjani hrana ja šeja? O Jehova šaj prekalo amende te pomožini lenđe hem te del len odova so valjani lenđe. E Jehovase sluge tane penđarutne so pomožinena jekh jekhese ko pharo vreme. Na primer, đi trajinđa i pandemija kotar koronavirus, o phralja hem o phenja dinđe hrana, šeja hem avera buća kola valjanđe okolenđe kola na hine len. But phralja hem phenja dinđe dobrovoljna prilogija. Sebepi odola prilogija, šaj hine ko celo sveto te pomožini pe e phralenđe hem e phenjenđe kola na hine len. On primeninđe o savet kova pisini ko Jevrejima 13:16: „Ma bistren te ćeren šukaripe hem te delinen averencar odova so isi tumen, odolese so asavke žrtvencar ugodini pe e Devlese.“

8. Sar o Jehova pomožini amen? (Filipljanima 2:13)

⁸ O Jehova dela snaga. Ov isi le but bari moć hem mangela te del snaga pe slugenđe. (Čitin Filipljanima 2:13.) Da li nekad  molinđan tut te istrajine ki disavi phari kušnja? Ili molinđan tut te del tut snaga aso buća kola valjani te ćere odova dive. Ked molinđan tut hem ked dobinđan odgovor ki ti molitva, sigurno složinđan tut e lafencar kola vaćerđa o apostol Pavle: „Sa šaj te ćerav prekalo okoleste kova dela man zoralipe“ (Fil. 4:13).

9. Sar šaj sar o Jehova te koristina amari snaga? (Dikh i slika.)

⁹ Iako hijam nesavršena, amen šaj sar o Jehova te koristina amari snaga. Amen našti doslovno te da snaga averenđe. Ama, šaj te koristina la te pomožina lenđe. Na primer, šaj te pomožina e phurenđe ili e nabormenđe, ađahar so ka pomožina len ko ćher ili ka đa te pazarina lenđe. Ako amare okolnostija dozvolinena amenđe, šaj te čistina hem te održina i dvorana. Ako ađahar koristinaja amari snaga, but ka pomožina amare phralenđe hem phenjenđe.

10. Sar šaj te zorjaćera averen amare lafencar?

¹⁰ Ma te bistra so hem amare lafija isi len moć. Da li đaneja nekas kase valjani iskreno pohvala ja uteha? Ako tano ađahar, sose na leja inicijativa te pomožine odola osobaće? Šaj te posetine la, te vićine la ko telefoni, te bićhale laće jekh tikno lil ili poruka. Na valjani te sikirine tut so ka phene. Nekobor lafija ando vilo šaj tane baš odova so valjani amare phralese ili phenjaće te aćhol verno e Jehovase hem te osetini pe pošukar (Posl. 12:25; Ef. 4:29).

11. Sar o Jehova koristini pi mudrost?

¹¹ O Jehova dela mudrost. O učenik Jakov pisinđa: „Ako nekase tumendar nedostajini mudrost, nek rodel ando Devel hem ov ka del le. Sose o Devel sarinenđe dela velikodušno hem bizo te rodel o greške“ (Jak. 1:5). Sar so mothovena akala lafija, o Jehova na garavi pi mudrost pese, već velikodušno dela hem averenđe. Isto ađahar, dikhljam so ked o Jehova dela mudrost, ov odova ćerela „bizo te rodel o greške“. Ov niked na mangela te osetina amen lošno ked priznajinaja so valjani amenđe oleso vođstvo. Umesto odova, čak ohrabrini amen te roda lestar mudrost (Posl. 2:1-6).

12. Kola prilike isi amen te sikava averen odova so đanaja?

¹² A sar tano amencar? Sar šaj amen te oponašina e Jehova hem te koristina amari mudrost te pomožina averenđe? (Ps. 32:8). E Jehovaso narodo isi le but  prilike te delini averencar odova so đanela. Na primer, često sikavaja e neven sar te propovedinen. O starešine strpljivo pomožinena okolenđe so služinena sar sluge hem e krstime phralenđe te sikljon sar te ćeren pe zadatkija ki skupština. Okola so isi len iskustvo ki gradnja pomožinena okolenđe kola nane len odobor iskustvo te sikljon te ćeren odija buti.

13. Sar šaj sar o Jehova te koristina amari mudrost te pomožina averenđe?

¹³ Trudin tut te oponašine e Jehova đi sikaveja averen. Ma bistri so o Jehova velikodušno dela pi mudrost averenđe. Odolese, mangaja te sikava averen odova so đanaja. Na mangaja amaro đandipe te garava amenđe, odolese so daraja so i osoba kola ka sikava ka lel amaro than. Niti na mangaja te ovel amen asavko stav: „Man niko na sikavđa. Kokri nek sikljol.“ Asavko stav nane le than maškaro Devleso narodo. Umesto odova, amen hijam bahtale te vaćera lenđe ando odova so đanaja hem te da sa amendar te sikava len (1. Sol. 2:8). Amen mangaja on te oven „osposobime te sikaven averen“ (2. Tim. 2:1, 2). Ako sare velikodušno delinaja i mudrost, avere lafencar o đandipe kova isi amen, tegani ka ova pobahtale hem pomudra.

KED O MANUŠA NA MOTHOVENA ZAHVALNOST

14. So o manuša ćerena ked hijam velikodušna?

¹⁴ Ked hijam velikodušna, pogotovo premalo amare phralja hem phenja, but putija mothovena amenđe soj tane zahvalna. Šaj bićhalena amenđe jekh tikno lil ili ko aver način mothovena pi zahvalnost (Kol. 3:15). Amenđe tano but drago, tegani osetinaja amen but šukar.

15. So na valjani te bistra ked avera na mothovena zahvalnost aso odova so ćeraja?

¹⁵ Disave manuša šaj na ka mothoven soj tane zahvalna aso odova so ćeraja lenđe. Podijekh puti, on na obratinena pažnja ko odova so pomožinđam len ili na haljona kobor vreme, snaga hem pare odova lelja amendar. So tegani valjani te ćera te na našala amari radost hem te na ova razočarime? Na valjani te bistra o lafija ando amaro vodećo stih kotar Dela 20:35. Amaro bahtalipe na zavisini ando odova sar o manuša reagujinena. Amen šaj te odlučina te ova bahtale ked daja, čak hem ked izgledini so avera nane zahvalna. Sar? Akana ka dikha.

16. So ka pomožini amen hem ponodri te ova bahtale ked daja?

¹⁶ Ked deja oponašineja e Jehova. Ov dela šukar buća e manušenđe, bizo obzir da li tane on zahvalna ili na (Mat. 5:43-48). O Jehova obećini so ako amen daja hem ništa na ađićeraja, amari „nagrada ka ovel but bari“ (Luka 6:35). Odolese, ma razočarin tut ako o manuša na zahvalinena pe tuće uvek aso odova so ćereja. Setin tut so o Jehova uvek ka nagradini tut aso šukar buća kola ćereja averenđe hem odolese so radosno deja (Posl. 19:17; 2. Kor. 9:7).

17. Kova tano najvažno razlog sose mangaja te da averenđe? (Luka 14:12-14)

¹⁷ Pana jekh način sar šaj te oponašina e Jehova tano ađahar so ka primenina odova so o Isus vaćerđa ko Luka 14:12-14. (Čitin.) Nane pogrešno te mothova gostoljubivost hem velikodušnost okolenđe kola šaj te irinen amenđe. Ama, so ako primetinđam so često daja okolenđe kolendar šaj diso te dobina? Tegani bi ovela šukar te ćera odova so o  Isus phenđa. Amen valjani te ova velikodušna premalo okola aso kola đanaja so našti te irinen amenđe. Tegani, ka ova bahtale sose đanaja so oponašinđam e Jehova. Ako na očekujinaja ništa te dobina, uvek ka ova bahtale ked daja averenđe, čak hem ked on na mothovena soj tane zahvalna.

18. So na valjani te ćera hem sose?

¹⁸ Ma mislin lošno averendar (1. Kor. 13:7). Ako avera na mothovena soj tane zahvalna, amen šaj te puća amen: „Da li on ćaće nane zahvalna ili samo bisterđe te mothoven odova?“ Šaj isi avera razlogija sose na mothovđe zahvalnost ađahar sar so amen nadinđam amen. Disave šaj tane but zahvalna, ama pharo lenđe te mothoven odova. Olenđe tano šaj lađavo te pomožini lenđe neko, posebno ako angleder on hine odola kola pomožinđe averenđe. Ama, ako ćaće mangaja amare phralen hem phenjen, na ka mislina lošno olendar već hem ponodri ka ova bahtale đi daja averenđe (Ef. 4:2).

19-20. So šaj pana te pomožini amen te ova bahtale ked daja averenđe? (Dikh i slika.)

¹⁹ Ov strpljivo. O mudro kralj Solomon pisinđa: „Forde to maro ko pani, sose palo but dive palem ka arakhe le“ (Prop. 11:1). Sar so akala lafija mothovena, disave manuša šaj te mothoven zahvalnost „palo but dive“. Odova desinđa pe jekha phenjaće.

²⁰ But berša angleder, i romni kotar pokrajinsko nadgledniko pisinđa jekh lil jekha phenjaće koja samo so krstinđa pe. Ko odova lil phenđa laće kobor tano važno te aćhol verno e Jehovase. Ofto berš palo odova, i phen odgovorinđa laće: „Tu na đaneja odova, ama mangava te phenav tuće kobor pomožinđa maje o lil kova pisinđan maje angleder but berša.“ Oj pana phenđa: „To lil but ohrabrinđa man. Ama, odova so dinđa man snaga tano o stih kova pisinđan  maje odothe hem niked na bisterđum le.“ a Oj objasninđa laće kobor bare pharipa hine la ko životi hem palo odova phenđa: „Disavo puti mangljum te vazdav me vasta kotar sa hem te ćhinavav te služinav e Jehovase. Ama, uvek setinđum man ko stih kova pisinđan maje hem odova dinđa man snaga te aćhovav verno e Jehovase.“ Oj pana phenđa: „Ko akala ofto berš, ništa na ohrabrinđa man odobor sar odova stih.“ Šaj samo te zamislina kobor hine bahtali i romni kotar pokrajinsko nadgledniko ked „palo but dive“ dobinđa akava lil kotar amari phen. Hem amenđe šaj neko te mothovi soj tano zahvalno but vreme palo odova so pomožinđam lese.

21. Sose mangeja hem ponodri te ove velikodušno sar o Jehova?

²¹ Sar so dikhljam, ked o Jehova ćerđa amen, ov dinđa amen jekh posebno sposobnost. Iako hijam bahtale ked dobinaja, amen hijam pobahtale ked daja. Amen osetinaja amen šukar ked šaj te pomožina amare phralenđe hem phenjenđe. Bahtale hijam ked mothovena so ceninena odova so ćeraja lenđe. Ama, bizo obzir da li mothovena soj tane zahvalna ili na, šaj te ova bahtale sose đanaja so ćerđam ispravno buti. Niked ma bistri so god te ćere „o Jehova šaj te del tut but pobuter ando odova“ (2. Let. 25:9). Amen niked našti te da averenđe odobor kobor o Jehova šaj te del amenđe. I najšukar nagrada koja šaj te dobina tani e Jehovaso blagoslov. Odolese, hajde sare te ova odlučna hem ponodri te oponašina amare velikodušno nebesko Dade, e Jehova.