1. So o Isus pana hari ka ćerel?

 AMEN živinaja ko but zanimljivo vreme. Pana hari, o Isus ka sudini sa e manušenđe. Ov vaćerđa amenđe so ka desini pe ko sveto angleder te sudini. Pe učenikonenđe phenđa so ka ovel o „znak“ andi olesi prisutnost hem „ando krajo kotar akava sveto“ (Mat. 24:3). Ando odova znak vaćeri pe ko Matej 24. hem 25. poglavlje hem ko paralelna izveštaija ko Marko 13. hem Luka 21. poglavlje.

2. Sostar ka vaćera ko akava članko hem sose odova ka pomožini amenđe?

² O Isus koristinđa trin poređenja te pomožini amen te ove pripremime aso odova so ka ovel. On tane sar upozorenje amenđe. Odola tane o poređenja ando bakre hem jarcija, ando razborita hem diline ćhaja hem ando talantija. Svako poređenje pomožini amen te haljova so o Isus ka sudini e manušenđe premalo odova so ćerena. Ko akava članko ka razmotrina akala poređenja hem ka dikha so šaj te sikljova olendar. Akana ka razmotrina o poređenje ando bakre hem ando jarcija.

O BAKRE HEM O JARCIJA

3. Ked o Isus ka sudini e manušenđe?

³ Ko poređenje ando bakre hem ando jarcija, o Isus vaćeri so ka sudini e manušenđe premalo odova sar reagujinđe ki šukar vest hem da li podržinđe olese pomazime  phralen (Mat. 25:31-46). Đi ka trajini i „bari nevolja“, ov ka sudini hari angleder so ka počmini o Armagedon (Mat. 24:21). Sar so jekh pastiri odvojini e bakren ando jarcija, ađahar o Isus ka odvojini okolen kola podržinena e pomazanikonen ando okola so odova na ćerena.

4. Premalo Isaija 11:3, 4, sose šaj te ova sigurna so o Isus pravedno ka sudini? (Dikh i slika .)

⁴ Ki Biblija pisini so o Jehova ćhivđa e Isuse te ovel Sudija. Jekh proročanstvo ki Biblija phenela so ked ov ka sudini e manušenđe, odova ka ćerel pravedno. (Čitin Isaija 11:3, 4.) Ov posmatrini so o manuša ćerena, sar razmislinena hem sostar vaćerena. Isto ađahar, posmatrini hem sar ponašinena pe premalo olese pomazime phralja (Mat. 12:36, 37; 25:40). O Isus đanela ko podržini len. a Jekh ando najšukar načinija sar šaj te podržina e Isusese phralen tano ađahar so ka propovedina i šukar vest. Okola so pomožinena len ki akija buti, ka oven prosudime sar „pravedna“ hem ka ovel len nada te živinen večno ki phuv (Mat. 25:46; Otkr. 7:16, 17). Kobor šukar nagrada! Ako ka aćhon verna đi ka trajini i bari nevolja hem palo odova, olenge anava ka oven pisime „ki knjiga ando životi“ (Otkr. 20:15).

5. So sikljovaja ando poređenje ando bakre hem jarcija hem kase akava poređenje šaj te pomožini?

⁵ Mothov so hijan verno. E Isuseso poređenje ando bakre hem ando jarcija, najangleder odnosini pe ko okola so isi len nada so ka živinen večno ki phuv. On mothovena so isi len vera na samo ađahar so podržinena e Isusese phralen ki služba nego hem ađahar so prihvatinena o vođstvo ando verno hem razborito robo kole o Isus birinđa (Mat. 24:45). Ama, hem okola so isi len nebesko nada, valjani te obratinen pažnja ko upozorenje kotar akava poređenje. Sose? Odolese so Isus posmatrini hem odova so on ćerena, sostar razmislinena hem so vaćerena. On isto valjani te mothoven soj tane verna. U stvari, o Isus vaćerđa avera duj poređenja ko kola istakninđa disave upozorenja aso pomazanikija. Odola upozorenja nalazinena pe hem ko Matej 25. poglavlje. Akana ka vaćera kotar poređenje ando razborita hem diline ćhaja.

RAZBORITA HEM DILINE ĆHAJA

6. Sar o panđ ćhaja mothovđe so hine razborita? (Matej 25:6-10)

⁶ Ko poređenje ando ćhaja, o Isus vaćerđa ando deš ćhaja kola đelje te resen pe e đamutreja (Mat. 25:1-4). Sare nadinđe so ka đan e đamutreja ko oleso bijav. O Isus vaćerđa so panđ olendar tane „razborita“, a avera panđ tane „diline“. O razborita ćhaja hine pripremime hem đangavde. On hine spremna te ađićeren e đamutre kobor god valjanđa, čak hem ako ov ka avel kasno raćate. On lelje peja o svetiljke te šaj te ovel len svetlo ki tomnina. Čak lelje peja dodatno ulje, ako o đamutro ka harini. Odolese, on pripreminđe pe svetiljke te svetlinen. (Čitin Matej 25:6-10.) Ked o đamutro alo, o razborita ćhaja khuvđe oleja ko ćher kuri hine o bijav. Ko slično način, o pomazanikija kola ka mothoven soj tane spremna, ađahar so ka aćhon đangavde hem verna ked o Isus ka avel, ka  dobinen pi nagrada. Tegani, ka pridružinen pe e Đamutrese, e Isusese, ko oleso Kraljevstvo (Otkr. 7:1-3). b So hine e diline ćhajencar?

7. So desinđa pe e diline ćhajenđe hem sose?

⁷ Ki aver strana, o panđ diline ćhaja na hine spremna ked o đamutro reslja. On na lelje peja dodatno ulje, a olenge svetiljke samo so na aćhilje. Odolese, ked haljilje so o đamutro pana hari ka resel, đelje te ćinen ulje. Na hine odothe ked o đamutro reslja. Tegani, „o ćhaja kola hine spremna khuvđe oleja ko bijav hem o udar phanljilo“ (Mat. 25:10). Kasnije, ked o diline ćhaja reslje hem manglje te khuven andre, o đamutro phenđa lenđe: „Na penđarava tumen“ (Mat. 25:11, 12). Akala ćhaja na hine spremna te ađićeren e đamutre odobor kobor valjanđa. So šaj akalestar te sikljon o pomazanikija?

8-9. So šaj o pomazanikija te sikljon ando poređenje kotar ćhaja? (Dikh i slika.)

⁸ Mothov so hijan spremno hem đangavdo. O Isus na phenđa so ka oven duj različita grupe ando pomazanikija. Jekh grupa koja ka ovel spremno te ađićeri đi o krajo hem jekh grupa koja na ka ovel spremno. Umesto odova, ov objasninđa so ka ovel e pomazanikonencar ako nane spremna verno te istrajinen đi o krajo. Ako nane spremna, on na ka dobinen pi nagrada (Jov. 14:3, 4). Odova tano but ozbiljno. Bizo obzir da li isi amen nada te živina ko nebo ili ki phuv sare amen valjani te obratina pažnja ko upozorenje ando poređenje kotar ćhaja. Svako amendar hem ponodri valjani te ovel đangavdo hem spremno te istrajini đi o krajo (Mat. 24:13).

⁹ Palo odova so vaćerđa o poređenje ando ćhaja, te istaknini kobor tano važno te ova pripremime hem đangavde, o Isus vaćerđa jekh poređenje ando talantija.  Akava poređenje istaknini kobor tano važno te ova bućarne.

O TALANTIJA

10. Sar o prva duj robija mothovđe soj tane verna? (Matej 25:19-23)

¹⁰ Ko poređenje ando talantija, o Isus vaćerđa ando duj robija kola hine verna pe gospodarese hem ando jekh robo kova na hine verno (Mat. 25:14-18). O prva duj robija hine bućarne hem ćerđe pe gospodareso barvalipe te ovel pana pobaro. Angleder te đal ko drumo, ov dinđa len talantija – jekh bari suma ando pare. O duj robija hine bućarne hem mudro koristinđe odola pare. So hine sebepi odova? Ked olengo gospodari irinđa pe, ov hine le duj putija pobuter pare ando odova so dinđa len. Ov pohvalinđa len hem „on radujinđe pe oleja“. (Čitin Matej 25:19-23.) Ama, so hine e trito robeja? So ćerđa e parencar kola dinđa le oleso gospodari?

11. So ulo e „mrzale“ robeja hem sose?

¹¹ O trito robo dobinđa samo jekh talant, ama ov hine „mrzalo“. Oleso gospodari očekujinđa olestar mudro te koristini odova talant. Ama, ov garavđa le ki phuv. Ked oleso gospodari irinđa pe, na hine le ništa so te del le. Odova robo na hine le šukar stav. Umesto te izvinini pe so na uspinđa te ćerel pe gospodareso barvalipe te ovel pana pobaro, ov phenđa pe gospodarese soj tano „zahtevno manuš“. Oleso gospodari našalđa po poverenje upro leste. Odolese, lela lestar o talant hem uspudinđa le ando po ćher (Mat. 25:24, 26-30).

12. Kas avdije predstavinena o duj verna robija?

¹² O duj verna robija predstavinena e verna pomazanikonen. O Gospodari, o Isus, vićini len „te radujinen pe“ oleja. On dobinena pi nebesko nagrada, o prvo uskrsenje (Mat. 25:21, 23; Otkr. 20:5b). Ki aver strana, o lošno primer ando mrzalo robo tano sar upozorenje aso pomazanikija.

13-14. So šaj o pomazanikija te sikljon kotar poređenje ando talantija? (Dikh i slika.)

 ¹³ Mothov so hijan bućarno. Ko poređenje ando talantija, sar hem ko poređenje ando ćhaja, o Isus na manglja te phenel so o pomazanikija ka oven mrzale. Umesto odova, ov objasninđa so šaj te desini pe ako našalena pi revnost. Ako odova ka desini pe, on na ka aćhon maškaro okola kas o Devel „vićinđa hem birinđa“ hem na ka khuven ko nebesko Kraljevstvo (2. Petr. 1:10).

¹⁴ E Isusese poređenja ando ćhaja hem talantija mothovena so sa o pomazana hrišćanija valjani te oven spremna, đangavde hem bućarne. Ama, da li o Isus phenđa pana disavo upozorenje e pomazanikonenđe? Ja, phenđa! Odova šaj te arakha ko Matej 24:40, 41.

KO KA OVEL „LENDO“?

15-16. Sar o lafija ando Matej 24:40, 41 pomožinena e pomazanikonenđe te haljon soj tano važno te aćhon đangavde?

¹⁵ Angleder so vaćerđa akala trin poređenja, o Isus vaćerđa ando vreme ked ka procenini pe ko ando pomazanikija tano dostojno te ovel obeležimo pečateja. Ov vaćerđa ando duj manuša kola ćerena buti ki njiva hem ando duj đuvlja kola ćerena buti ko mlin. Izgleda so on ćerena isto buti, ama o Isus phenđa so „jekh ka ovel lendo, a o dujto aćhavdo“. (Čitin Matej 24:40, 41.) Palo odova phenđa pe učenikonenđe: „Oven đangavde, sose na đanena ko kova dive avela tumaro Gospod“ (Mat. 24:42). O Isus phenđa diso slično hem palo odova so vaćerđa o poređenje kotar ćhaja (Mat. 25:13). Da li tane akala lafija povezime? Izgleda so ja. Samo okola kola tane ćaće pomazime hem verna „ka oven lende“ te vladinen e Isuseja ko nebesko Kraljevstvo (Jov. 14:3).

¹⁶ Mothov so hijan đangavdo. O pomazanikija kola na ka aćhon đangavde, na ka oven maškaro okola soj tane „birime“ (Mat. 24:31). Isto ađahar, sa okola kola isi len nada te živinen večno ki phuv valjani te aćhoven đangavde hem verna.

17. Sose na valjani te brinina amen ako o Jehova ko amaro vreme birini nekas te pomazini sveto duhoja?

¹⁷ Amen šukar đanaja e Jehova hem odolese isi amen poverenje so sa so ćerela tano pravedno. Na brininaja amen ako ko amaro vreme odlučini nekas te pomazini sveto duhoja. c Setin tut so o Isus vaćerđa ko poređenje ando radnikija kola ko dešujekhto sati alje te ćeren buti ko vinograd (Mat. 20:1-16). Okola kola kasnije hine vićime, dobinđe isto plata sar okola kola porano počminđe te ćeren buti. Isto ađahar, bizo obzir ked tane o pomazanikija birime, on ka dobinen pi nebesko nagrada ako ka aćhon verna.

OBRATIN PAŽNJA KO UPOZORENJA

18-19. So sikljiljam ko akala poređenja?

¹⁸ Sostar vaćerđam đi akana? Aso okola so isi len nada so ka živinen večno ki phuv o poređenje ando bakre hem jarcija mothovi kobor tano važno te aćhova verna e Jehovase akana hem ked ka avel i bari nevolja. Ko vreme kova tano anglo amende, o Isus ka sudini e manušenđe hem okola kola tane verna ka proglasini sar dostojna te dobinen o „večno životi“ (Mat. 25:46).

 ¹⁹ Isto ađahar, razmotrinđam pana duj poređenja ko kola isi upozorenja aso pomazanikija. Ko Isuseso poređenje ando razborita hem diline ćhaja, panđ olendar hine mudra. On hine pripremime hem đangavde, spremna te ađićeren e đamutre kobor god valjanđa. Ama, o diline ćhaja na hine pripremime, odolese o đamutro na manglja te mukhel len ko po bijav. Amen isto valjani te ova pripremime hem te ađićera kobor god valjani đi o Isus na anela o kraj. Isto ađahar, ko Isuseso poređenje ando talantija amen vaćerđam ando duj verna robija kola hine bućarne. On dinđe sa pestar te ćeren buti pe gospodarese hem odolese olengo gospodari hine le poverenje upro lende. Ama, okole mrzale robo, ov uspudinđa. So sikljiljam ando akava poređenje? Amen valjani te ova zaokupime ki služba e Jehovase sa đi o krajo. Isto ađahar, vaćerđam odolestar so o pomazanikija mora te oven oprezna te šaj te „oven lende“ e Isuseja hem te priminen pi nebesko nagrada. On jedva ađićerena te oven „ćedime“ e Isuseja ko nebo. Palo Armagedon, on ka oven e Isusesi bori (2. Sol. 2:1; Otkr. 19:9).

20. So o Jehova ka ćerel okolenđe kola obratinena pažnja ko olese upozorenja?

²⁰ Iako o vreme ko kova o Isus ka sudini tano but paše, nane amen sostar te dara. Ako aćhovaja verna, amaro nebesko Dad ka del amen bari snaga „te šaj te terđova anglo manušikano Ćhavo“ (2. Kor. 4:7; Luka 21:36). Bizo obzir savi nada isi amen, amen ka ugodina amare Dadese ako obratinaja pažnja ko upozorenja kola o Isus dinđa ko poređenja. Sebepi e Jehovaso bizaslužimo šukaripe, amare anava ka oven „pisime ki knjiga ando životi“ (Dan. 12:1; Otkr. 3:5).