37. ČLANKO PROUČIBASE
ĐILI 118 „De amen pobuter vera“
O lil kova pomožini amen te istrajina đi o krajo
Đi o krajo ka arakha amaro pouzdanje kova hine amen ki početka (JEVR. 3:14)
SO KA SIKLJOVA?
Ko lil kova hine pisimo e Jevrejenđe isi savetija kola šaj te pomožinen amen te istrajina verno đi o krajo.
1-2. (a) Savi situacija hine ki Judeja ked o apostol Pavle pisinđa lil e Jevrejenđe? (b) Sose akava lil hine pisimo ko pravo vreme?
PALO odova so o Isus mulo ko 33. berš, o hrišćanija ko Jerusalim hine len bare pharipa. Sigate palo odova so hine osnujimi i hrišćansko skupština, počminđa te ovel len baro progonstvo (Dela 8:1). Oko 20 berš palo odova, e Isusese sledbenikija hine len bare pharipa sose ki celo phuv hine baro bokhalipe (Dela 11:27-30). Ama, oko 61. berš o hrišćanija na hine odobor progonime kobor ka oven progonime ki budućnost. Ko odova period, o apostol Pavle pisinđa jekh lil e hrišćanenđe. O savetija kola hine ko odova lil hine baš odova so valjanđa lenđe te šaj te pripreminen pe aso odova so ađićeri len ki budućnost.
2 Akava lil hine ko pravo vreme, odolese so odova mirno period kova o hrišćanija hine len na trajinđa but. O Pavle dinđa len savetija kola šaj hine te pomožinen len te istrajinen ko odova so ađićerđa len. O proročanstvo ko kova o Isus phenđa so o Jerusalim valjani te ovel uništimo, pana hari valjanđa te ispunini pe (Luka 21:20). Ni o Pavle ni o hrišćanija ki Judeja na đanđe ked odova tačno ka ovel. Ama, odova vreme so hine len šaj hine koristinen te razvijinen pana pobari vera hem istrajnost (Jevr. 10:25; 12:1, 2).
3. Sose valjani te ovel amenđe važno odova so pisini ki knjiga Jevrejima?
3 Pana hari, hem amen ka doživina pobari nevolja nego so hine len o hrišćanija ko prvo veko (Mat. 24:21; Otkr. 16:14, 16). Odolese, akana ka razmotrina disave savetija kola o Jehova dinđa odole hrišćanenđe, a kola šaj hem amenđe te pomožinen.
„TE NAPREDUJINA PREMALI ZRELOST“
4. Kola pharipa hine len o Jevreja kola ulje hrišćanija? (Dikh i slika.)
4 O Jevreja kola ulje hrišćanija valjanđe te ćeren bare promene, a odova na hine lenđe hić lokho. On beršencar hine e Jehovaso birimo narodo. O Jerusalim hine jekh posebno than. O kraljija kola vladinđe uduri predstavinđa e Jehovasi vlast. Sa o manuša kola manglje te služinen e Jehovase ko ispravno način, valjanđe te ćeren odova ko hram kova hine ko Jerusalim. Sa o verna Jevreja ićerđe pe ko Mojsijeso zakon hem ko pravilija kola sikavđe len o religiozna vođe. Hine pravilija andi hrana, obrezanje hem ando odova sar te ponašinen pe e manušencar kola na hine Jevreja. Ama, palo e Isuseso meribe o Jehova više na prihvatinđa odola žrtve. Odolese na hine lokho e Jevrejenđe kola ulje hrišćanija te služinen e Jehovase ko jekh aver način (Jevr. 10:1, 4, 10). Čak aso zrela hrišćanija sar so hine o apostol Petar, na hine lokho te ćeren akala promene (Dela 10:9-14; Gal. 2:11-14). Isto ađahar, sebepi odova e hrišćanen progoninđe o jevrejska religiozna vođe.
O hrišćanija valjanđe hem ponodri te ićeren pe ko ćaćipe ando Devleso Lafi hem te ciden pe ando hovavne sikljoviba kola sikavđe o jevrejska religiozna vođe (Dikh o 4. hem o 5. odlomko)
5. Sova borinđe pe o hrišćanija ki Judeja?
5 E hrišćanen ki Judeja progoninđe duj grupe ando manuša. O jevrejska religiozna vođe upro lende dikhlje sar otpadnikija odolese so aćhavđe o judaizam. Uzo odova, disave ki skupština phenđe so o hrišćanija pana valjani te ićeren pe ko Mojsijeso zakon. Šaj odova phenđe odolese so na manglje te oven progonime (Gal. 6:12). Ama, so pomožinđa e hrišćanenđe te aćhon verna e Jehovase?
6. So o Pavle podstakninđa e hrišćanen te ćeren? (Jevrejima 5:14–6:1)
6 Ko po lil e Jevrejenđe, o Pavle podstakninđa e hrišćanen hor te proučinen hem te razmislinen ando Devleso Lafi. (Čitin Jevrejima 5:14–6:1.) Ov citirinđa ando hebrejsko deo hem objasninđa sose tano o način sar o hrišćanija služinđe e Jehovase but pošukar ando način sar o Jevreja služinđe lese. a O Pavle đanđa so ako haljona pošukar o ćaćipe ando Devleso Lafi, ka đanen kola tane o hovavne sikljoviba hem ka ciden pe olendar.
7. Kola pharipa isi amen avdije?
7 Avdije, o manuša širinena o informacije kola tane protiv e Jehovase merilija. O protivnikija phenena so hijam okrutna sose poštujinaja e biblijake merilija ando moral. O stavija kola isi ko akava sveto tane protiv odova sar o Devel razmislini (Posl. 17:15). Odolese tano but važno te đana kola stavija isi len o protivnikija hem te cida amen olendar. Na valjani nikase te dozvolina te obeshrabrini amen ili te ćhinavi amen te služina e Jehovase (Jevr. 13:9).
8. So ka pomožini amen te ova zrela hrišćanija?
8 O Pavle phenđa e hrišćanenđe so valjani hem ponodri te napredujinen premali zrelost, a odova valjani hem amen te ćera. Odova značini so valjani temeljno te proučina i Biblija te šaj pošukar te upoznajina e Jehova hem te haljova sar ov razmislini. Odova valjani te ćera hem palo krštenje. Bizo obzir kobor hijam ko ćaćipe sare valjani redovno te čitina hem te proučina e Devleso Lafi (Ps. 1:2). Odova ka pomožini amen te zorjaćera amari vera, a odija osobina o Pavle phenđa e Jevrejenđe so valjani te ovel len (Jevr. 11:1, 6).
„OKOLA KOLA VERUJINENA KA SPASINEN PO ŽIVOTI“
9. Sose hine but važno o hrišćanija te ovel len bari vera?
9 O hrišćanija ki Judeja valjanđe te ovel len zorali vera sose odova šaj hine te pomožini len te aćhon đivde ked o Jerusalim hine uništimo (Jevr. 10:37-39). O Isus phenđa pe sledbenikonenđe te našen ko planine ked ka dikhen so o Jerusalim opkolinđa i vojska. Odova savet valjanđe sare te primeninen, bizo obzir kaj živinđe (Luka 21:20-24). Ked bi i vojska napadini, o manuša kola živinđe ko gava obično đelje ki diz sose hine la bare zidine hem uduri šaj hine te oven zaštitime. Ama, te našel pe ko planine na hine logično, odolese valjanđa lenđe bari vera te ićeren pe ko savet kova o Isus dinđa len.
10. So i vera ka podstaknini e hrišćanen te ćeren? (Jevrejima 13:17)
10 Isto ađahar, o hrišćanija kola hine Jevreja valjanđe te ovel len poverenje upro okola kolen o Isus ćhivđa te predvodinen ki skupština. Okola so predvodinđe, verovatno dinđe len konkretna smernice ando odova ked te našen hem sar te ćeren odova. (Čitin Jevrejima 13:17.) O grčko lafi „poslušna“ kova tano koristimo ko Jevrejima 13:17, odnosini pe upro nekaste ko tano odlučno te šunel sose isi le poverenje upro okova so dela o smernice. Ov na šunela samo sose i osoba isi la autoritet te del smernice. Znači, odola hrišćanija valjanđe te ovel len poverenje upro starešine angleder so alji i nevolja. Odolese, ako hijam poslušna e starešinenđe ko mirno period, ka ovel polokho te šuna len ko pharo vreme.
11. Sose tano but važno te ovel amen zorali vera?
11 Avdije hem amen valjani te ovel amen vera sar o hrišćanija ko prvo veko. Živinaja ko vreme ked o manuša marena amenđe muj sose vaćeraja lenđe so o krajo ando akava sveto tano but paše (2. Petr. 3:3, 4). Iako i Biblija vaćeri amenđe ando odova sar ka ovel ked ka avel i bari nevolja, isi but buća kola pana na đanaja. Odolese, valjani te ovel amen zorali vera so o kraj ando akava sveto ka avel ko pravo vreme hem so o Jehova ka brinini pe amendar (Avak. 2:3).
12. So ka pomožini amen te preživina i bari nevolja?
12 Amen isto valjani te zorjaćera amaro poverenje ko odova so o Jehova vodini amen prekalo „verno hem razborito robo“ (Mat. 24:45). Ked ka počmini i bari nevolja šaj ka dobina disave konkretna smernice kola ka spasinen amaro životi, sar so dobinđe hem o Jevreja ki Judeja ked o Rimljanija alje. Akana tano vreme te zorjaćera amaro poverenje upro okola so predvodinena ki Jehovasi organizacija. Ako tano akana pharo te ovel amen poverenje upro lende hem te šuna o smernice kola dena amen, ka ovel amenđe pharo hem ki bari nevolja.
13. Sose e hrišćanenđe valjanđa o savet ando Jevrejima 13:5?
13 Đi ađićerđe o znak te našen, o hrišćanija valjanđe skromno te živinen hem te na ovel len „mangipe premalo pare“. (Čitin Jevrejima 13:5.) Disave olendar već nakhlje disave pharipa, sar soj tane o bokhalipe hem o ćororipe (Jevr. 10:32-34). Iako angleder hine spremna te istrajinen sebepi i šukar vest, disave olendar počminđe ko pare te dikhen sar zaštita. Ama, na hine pare kola šaj hine te spasinen len ked o Jerusalim hine uništimo (Jak. 5:3). U stvari, svako ko manglja o materijalna buća verovatno hine lese but popharo te našel hem te mukhel po ćher hem pe buća.
14. Sar amari vera utičini ko odova sar dikhaja ko materijalna buća?
14 Ako isi amen zorali vera so o krajo sigurno ka avel, amen ka cida amen ando materijalna buća. Ki bari nevolja, o manuša „ka forden po srebro ko ulice“ odolese so ka haljon so „ni o srebro ni o zlato na ka šaj te spasini len ko dive andi Jehovasi holi“ (Jezek. 7:19). Umesto te da sa amendar te ćeda so pobuter pare, amen valjani te ana odluke kola ka pomožinen amen skromno te živina. Nane mudro akana te khuva ko disave nepotrebna dugija niti te oven amen but buća aso kola valjani amenđe but vreme te održina len. Amen valjani te pazina o materijalna buća te na oven amenđe najvažna ko životi (Mat. 6:19, 24). Sar tano o krajo sa popaše, amen ka valjani te odlučina da li ka ovel amen poverenje upro Jehova ili ka oslonina amen ko materijalna buća.
„VALJANI TUMENĐE ISTRAJNOST“
15. Sose o hrišćanija ki Judeja valjanđe te oven istrajna?
15 E hrišćanenđe valjanđa istrajnost odolese so i situacija ki Judeja hine sa pološno (Jevr. 10:36). Iako disave hrišćanija angleder hine len progonstvo, but olendar na hine len. Odolese, o Pavle setinćerđa len so valjani te pripreminen pe aso baro progonstvo, čak te oven spremna hem te meren, sar so o Isus mulo (Jevr. 12:4). But Jevreja hine holjame hem nasilna sose but manuša prihvatinđe o ćaćipe. Nekobor berš angleder, ked o Pavle alo ko Jerusalim te propovedini, jekh grupa ando manuša napadinđa le. Pobuter ando 40 manuša „halje sovel so na ka han hem na ka pijen đi na mudarena e Pavle“ (Dela 22:22; 23:12-14). Iako hine len pharipa hem baro progonstvo, o hrišćanija hem ponodri valjanđe te ćeden pe, te propovedinen i šukar vest hem te ovel len zorali vera.
16. Sar o lil kova hine pisimo e Jevrejenđe šaj te pomožini amen te ovel amen ispravno stav premalo progonstvo? (Jevrejima 12:7)
16 So šaj hine te pomožini e hrišćanenđe andi Judeja te istrajinen ko progonstvo? O Pavle đanđa so valjanđe te ovel len ispravno stav premalo kušnje. Ov objasninđa lenđe so prekalo kušnje o Devel šaj te sikavi diso pe slugen. (Čitin Jevrejima 12:7.) Na primer, đi trajinđe o kušnje šaj hine te razvijinen disave šukar osobine. Ako bi razmislinena ando šukar buća kola o kušnje šaj hine te anen, sigurno bi ovela lenđe polokho te istrajinen (Jevr. 12:11).
17. So o Pavle sikljilo ando odova sar šaj te istrajini pe ko progonstvo?
17 O Pavle podstakninđa e hrišćanen te istrajinen hem te na odustajinen. Ov šaj hine te del len šukar savet ando odova. Sose? Angleder, progoninđa e hrišćanen hem đanđa kobor o manuša šaj te oven gruba hem okrutna premalo lende. Isto ađahar, đanđa sar te istrajini ko progonstvo, sose hine le baro protivljenje palo odova so ulo hrišćanin (2. Kor. 11:23-25). Odolese, đanđa so o phralja valjani te ćeren te šaj te istrajinen. Ov phenđa lenđe so ked isi len pharipa, valjani te osloninen pe upro Jehova, a na upro peste. O Pavle šaj hine hrabro te phenel: „O Jehova tano mo pomoćniko, na ka darav“ (Jevr. 13:6).
18. So ka ovel amencar ki budućnost hem so akana valjani te ćera?
18 Disave amare phralja trenutno istrajinena ko progonstvo. Amen šaj te pomožina len ađahar so ka molina amen olenđe hem podijekh puti ađahar so ka da len odova so valjani lenđe (Jevr. 10:33). Ki Biblija pisini: „Sare kola mangena te živinen verno e Devlese ko jekhipe e Hristeja e Isuseja, ka oven progonime“ (2. Tim. 3:12). Odolese, sare valjani te spremina amen aso odova so ađićeri amen. Valjani hem ponodri te ovel amen potpuno poverenje ko Jehova hem te ova sigurna so ka pomožini amen te istrajina ki bilo savi kušnja. A ko vreme kova odredinđa, ka cidel amare kušnje (2. Sol. 1:7, 8).
19. So valjani te ćera te šaj te pripremina amen asi bari nevolja? (Dikh i slika.)
19 Sigurno but pomožinđa e hrišćanenđe o lil kova o Pavle pisinđa. Ko odova lil podstakninđa len temeljno te proučinen e Devleso Lafi hem pošukar te haljon le. Odova šaj hine te pomožini lenđe te penđaren o sikljoviba kola šaj hine te slabonćeren olengi vera. Ov ohrabrinđa len te zorjaćeren pi vera te šaj spremno te ićeren pe ko smernice kola dinđe o Isus hem o phralja kola predvodinđe. O Pavle pomožinđa len te oven istrajna hem ko kušnje te dikhen sar prilika o Jehova diso te sikavi len. Amen šaj isto te primenina akava savet sose odova ka pomožini amen verno te istrajina đi o krajo (Jevr. 3:14).
O verna hrišćanija hine blagoslovime sebepi pi istrajnost. Palo odova so našlje andi Judeja, on palem ćedinđe pe. So šaj te sikljova olendar? (Dikh o 19. odlomko)
ĐILI 126 Đangavde hem zorale te aćhova
a Ko prvo poglavlje, o Pavle citirinđa najhari efta stihija kotar hebrejsko deo ando Devleso Lafi te mothovi so o način sar o hrišćanija služinena e Jehovase tano pošukar ando način sar o Jevreja ćerđe odova (Jevr. 1:5-13).
