Na valjani te mislina so o 70 učenikija aćhavđe e Isuse ili so ov više na prihvatinđa len, samo odolese so na hine oleja ked uspostavinđa i Spomen-svečanost. O Isus manglja ki odija prilika te ovel samo pe apostolencar.

E Isusese učenikija hine hem o 12 apostolija hem o 70 učenikija. Najangleder, o Isus ando pe učenikija birinđa samo dešuduj te oven olese apostolija (Luka 6:12-16). Ov hine ki Galileja ked „vićinđa e dešuduj učenikonen“ hem „bićhalđa len te propovedinen ando Devleso Kraljevstvo hem te saćaren e nabormen“ (Luka 9:1-6). Kasnije, ki Judeja o Isus „odredinđa pana 70 učenikija hem bićhalđa len po duj“ (Luka 9:51; 10:1). Znači, o Isus ko razna thana hine le učenikija kola propovedinđe.

O Jevreja kola ulje e Isusese učenikija pana slavinđe i Pasha svako berš, verovatno zajedno pe porodicencar (Izl. 12:6-11; 17-20). Kratko angleder te merel, o Isus hem olese apostolija đelje ko Jerusalim. Ama, ov na vićinđa sa pe učenikonen andi Judeja, Galileja hem Pereja te aven hem te slavinen zajedno i Pasha. Jasno tano so o Isus manglja te ovel samo pe apostolencar ki akija prilika. Ov phenđa lenđe: „But mangljum te hav tumencar akija pashalno večera angleder te počminen me muke“ (Luka 22:15).

Ov hine le šukar razlog aso odova. O Isus valjanđa pana hari te merel sar „e Devleso Bakro kova cidela o greh ando sveto“ (Jov. 1:29). Ov mulo ko Jerusalim kaj but vreme dinđe pe žrtve e Devlese. O bakro ki Pasha setinćerđa e Izraelcen so o Jehova izbavinđa len ando Egipat. Ama, pe žrtvaja o Isus šaj hine te ćerel but poviše. Ov šaj hine te oslobodini sa e manušen ando greh hem meribe (1. Kor. 5:7, 8). Sebepi e Isusesi žrtva, o 12 apostolija šaj hine te oven deo ando temelji ki hrišćansko skupština (Ef. 2:20-22). I sveto diz o Jerusalim hine le „12 bara ko po temelji“ ko kola hine pisime o „12 anava ando Bakrese 12 apostolija“ (Otkr. 21:10-14). O verna apostolija hine len važno uloga te ispunini pe e Devlesi namera. Odolese, šaj te haljova sose o Isus manglja te oven oleja ki zadnjo Pasha hem ki Gospodesi večera koja tegani uspostavinđa.

O 70 učenikija hem avera učenikija na hine e Isuseja ki odija večera. Ama, sa o učenikija kola hine verna šaj hine te ovel len korist andi Gospodesi večera. Sa odola učenikija, kola ko odova vreme ulje pomazanikija, šaj hine te oven deo ando savez aso Kraljevstvo kova o Isus pominđa odija rat pe apostolenđe (Luka 22:29, 30).