Amen živinaja ko sveto kova probini te ćhivel amen te mislina soj tane o šukar buća lošna, a o lošna buća šukar (Is 5:20). Nažalost, disave manuša ćerena buća kola o Jehova mrzini, sar soj tano o nepristojno ponašanje maškaro okola kola tane isto pol. O vrsnikija ki škola ili avera šaj te terinen amare ternen te ponašinen pe sar olende. Sar šaj te pripreminen tumare ćhaven te ikljon ko krajo akale problemencar hem avere slično bućencar?

Sikaven tumare ćhaven te đanen e Jehovase merilija (Le 18:3). Hari pohari sikav len so i Biblija vaćeri ando seksualna odnosija. Odova so ka vaćeren lenđe ka zavisini odolestar kobor berš isi len hem kobor šaj te haljoven (Pz 6:7). Puć tut: Da li sikavđum me ćhaven ko ispravno način te mothoven pe osećanja, kobor tano važno te uraven pe skromno hem so avera valjani te poštuijinen olengi privatnost? Da li me ćhave đanena so te ćeren ako neko probini te mothovi lenđe pornografija ili rodena olendar te ćeren diso so o Jehova mrzini? Ako ko vreme sikavena len šaj te izbegninen but problemija (Psl 27:12; Pro 7:12). Ked sikavena tumare ćhaven, tumen mothovena so mangena len, sar vredno poklon kova dinđa tumen o Jehova (Ps 127:3).

DIKH O FILM GRADIN O ĆHER KOVA KA TRAJINI – ZAŠTITIN TE ĆHAVEN ANDO LOŠNIPE HEM PALO ODOVA ODGOVORIN KO AKALA PUĆIBA:

• Sose disave darana te sikaven pe ćhaven ando seksualna odnosija?

• Sose o roditeljija valjani te vaspitinen pe ćhaven hem te „usmerinen len premali Jehovasi volja“? (Ef 6:4)

• So e Jehovasi organizacija ćerđa te bi pomožini e roditeljenđe te sikaven pe ćhaven ando seksualna odnosija? (w19.05 12, okvir)

• Sose valjani redovno te vaćeren tumare ćhavencar angleder so ovena problemija?