9
Sar šaj te ovelmen bahtalji familjija?
1. Sose valjani o rom hem i romni te oven venčime te šaj te oveljen bahtalji familjija?
O šukar haberi avela ando Jehova kova tano bahtalo Devel, ov mangela o familjije te oven bahtalje (1. Timotejese 1:11). Ov čerdža o brak. Ked o rom hem i romni tane zakonski venčime, tegani o zakon ka arakhiljen hem ka osetinen soj tane ko sigurno than. Okola so mangena te šunen e Devlje, valjani te šunen o zakon kova rodela oljendar te oven venčime. Čitinen Luka 2:1, 4, 5.
Sar o Devel dikhela ko brak? Ov mangela oljengo brak te trajini celo dživdipe. O Jehova mangela o rom hem i romni te oven verna jekh jekhese (Jevrejendže 13:4). Ov mrzini o razvod (Malahija 2:16). Ama, o Devel mukela o hrišćanija te razvodinenpe hem palje te ženinenpe samo ako jekh oljendar prevarija pe rome ja pe romnja. Čitinen Matej 19:3-6, 9.
2. Sar valjani o rom hem i romni te ponašinenpe jekh jekheja?
O Jehova čerdža e rome hem e romnja te pomožinen jekh jekhese (1. Mojsieso 2:18). O rom sar poglavari valjani te akhari gajlja andi pi familjija, adžahar so ka anel sa so valjani ko čher hem te sikaviljen ando Devel. Ov valjani te del sa pestar te mothovi pe romnjače kobor mangelala. O rom hem i romni valjani te mangen hem te poštujinen jekh jekhe. Sebepi soj tane solduj nesavršena, odoljese tano but šukar te sikljoven te oprostinen jekh jekhese te šaj te oven bahtalje ko po brak. Čitinen Efeskonendže 4:31, 32; 5:22-25, 33 hem 1. Petareso 3:7.
3. Da lji valjani te muke te romnja ja te rome ako to brak nane bahtalo?
Ako isi tumen pharipe ko tumaro brak, o solduj valjani te mothoven mangipe jekh jekhese (1. Korintskonendže 13:4, 5). Ked isi tumen problemija ko brak i Biblija phenela so na valjani odmah te muke te rome ja te romnja. Čitinen 1. Korintskonendže 7:10-13.
4. So o Devel mangela e čhavendže?
O Jehova mangela o čhave te oven bahtalje. Ov delaljen najšukar savetija sar te oven bahtalje ko po ternipe. O Devel mangela o čhave te šunen pe daja hem pe dade, sose on džanena pobuter hem nakhlje but ko po dživdipe (Koloskonendže 3:20). O Jehova mangela te ove bahtalo ko buča kola čereja oljese hem oljese Čhavese. Čitinen Vačerutno 11:9-12:1 hem Matej 19:13-15; 21:15, 16.
5. Sar šaj te čhave te oven bahtalje?
I daj hem o dad valjani te čeren buti te šaj oljenge čhave te oveljen maro, čher hem urajbe (1. Timotejese 5:8). Ama, te šaj te čhave te oven bahtalje tu valjani te sikaveljen te mangen e Devlje hem te sikljoven oljestar (Efeskonendže 6:4). Ked te čhave dikhena so tu šuneja e Devlje odova šaj hor te khuvel ko oljengo vilo. Odova so sikaveja oljen ando Devljeso Lafi šaj te čerenljen te oven šukar manuša. Čitinen 5. Mojsieso 6:4-7 hem Godžalje lafija 22:6.
But tano važno te ohrabrine hem te pohvaline te čhaven. Isto adžahar, e čhavendže valjani te delpe godi hem te vaspitinenpe. Ama, odova na značini so valjani te ova but gruba (Godžalje lafija 22:15). Adžahar šaj te arakheljen te na džan ko lošno drumo. Čitinen Koloskonendže 3:21.
E Jehovase svedokija ikaldže nekobor knjige kola tane čerde te pomožinen e familjijendže. O lafija kola tane pisime ko odola knjige avena ando Devljeso Lafi. Čitinen Psalam 19:7, 11.
