1. Ko dijamen o dživdipe?

O JEHOVA „tano dživdo Devel“ (Jeremija 10:10). Ov tano okova so čerdžamen hem dijamen dživdipe. I Biblija phenela: „Tu čerdžan sa so isi hem teklja volja sa ulo hem sa tano čerdo“ (Pučaribe 4:11). Čače, o Jehova manglja te ovelmen dživdipe. O dživdipe tano jekh baro daro oljestar (Čitinen Psalam 36:9).

2. Sar šaj te ovelmen bahtalo dživdipe?

² O Jehova delamen sa so valjani te ačhova dživde, sar soj tano o habe hem o pani (Čeriba e apostolengo 17:28). Ov mangela te ovelmen bahtalo dživdipe (Čeriba e apostolengo 14:15-17). Te šaj te ovelmen bahtalo dživdipe amen valjani te čera odova so o Devel phenela (Isaija 48:17, 18).

3. So čerdža o Jehova ked o Kain mudardža e Avelje?

³ I Biblija sikavi amen so amaro hem averengo dživdipe tano but važno anglo Jehovase jačha. Na primer, ked o Kain, e Adameso hem e Evako čhavo, hine but holjamo upro po tikneder phral o Avelj, o Jehova vačerdža oljese so valjani te cidel i holji so isilje. Ama, o Kain na šuja e Jehova hem odobor holjandža so „ripija upro po phral o Avelj hem mudardžalje“ (1. Mojsieso 4:3-8). O Jehova kaznija e Kaine sebepi so mudardža e Avelje (1. Mojsieso 4:9-11). Odoljestar sikljova so ako hijam holjame ja mrzina džikas odova šaj te čerelmen te ova nasilna hem bizo vilo. O manuša kola tane asavke našti te živinen večno  (Čitinen 1. Jovaneso 3:15). Te šaj te čera odova so o Jehova rodela, amen valjani te sikljova te manga sa e manušen (1. Jovaneso 3:11, 12).

4. Sose o Jehova dija zapovest e Izraelcendže „ma mudar“?

⁴ But berša palo odova, o Jehova dija e Mojsiese Deš zapovestija hem odoljeja mothodža so ko dživdipe dikhela sar diso but važno. Jekh kotar odola zapovestija hine: „Ma mudar“ (5. Mojsieso 5:17). Ako jekh manuš mudardža džikas namerno, ov valjandža te ovel mudardo.

5. Sar o Jehova dikhela ko odova ked džiko mudari e čhavore kova pana na bijandilo?

⁵ Sar o Jehova dikhela ko odova ked džiko mudari e čhavore kova pana na bijandilo? Čak hem o dživdipe ando čhavoro kova na bijandilo tano but važno anglo Jehovase jačha. Ko zakon kova o Jehova dija e Izraelcendže, ov vačerdža so ako jekh manuš khuvela e romnja koja tani khamni hem sebepi odova olako čhavoro merela, odova manuš valjandža te ovel mudardo (Čitinen 2. Mojsieso 21:22, 23; Psalam 127:3). Odova sikavimen ked džiko mudari e čhavore kova pana na bijandilo tano but lošno. Moljinatu dikh o 28. dodatko.

6, 7. Sar šaj te mothova e Jehovase so cenina o dživdipe?

⁶ Sar šaj te mothova e Jehovase so cenina amaro hem averengo dživdipe? Adžahar so na te čera diso so šaj te anel dži odova te našala amaro ja averengo dživdipe. Odoljese amen na pija cigare hem na la droga sose on našaljena amaro sastipe hem šaj te mudaren amen.

⁷ Amaro telo hem o dživdipe tano daro ando Devel. Odoljese valjani te akhara gajlja ando amaro telo. Ako na čera odova, amen ka ova melalje ko Devljese jačha (Rimskonendže 6:19; 12:1; 2. Korintskonendže 7:1). Amen našti te služina e Jehovase, ako na cenina o dživdipe kova  dijamen. Te čhinava disave lošna tabijatija nane lokho, ama o Jehova ka pomožinimen ako mothova so cenina o dživdipe.

8. So šaj te čera te na avel dži odova te našala amaro ja averengo dživdipe?

⁸ Sar so sikljiljam o dživdipe tano važno daro. O Jehova džanela so amen ka da sa amendar te na čera diso so šaj te anel dži odova te našala amaro ja averengo dživdipe. Odoljese amen valjani te pazina sar vozina amare vorda, motorija ja diso aver. Amen valjani te cidamen kotar opasna ja nasilna sportija (Psalam 11:5). Isto adžahar, amen daja sa amendar te čera amaro čher te ovel sigurno than dživdipase. O Jehova dija zapovest e Izraelcendže: „Ako čereja nevo čher, čer i ograda ko krov, te na ovel to čher krivo e ratese ako bi džiko perela oljestar“ (5. Mojsieso 22:8).

9. Save valjani te ova premalo životinje?

⁹ E Jehovase tano važno odova save hijam premalo životinje. Ov muklja amen te mudara e životinjen te šaj te ovelmen so te ha hem so te urava. Isto adžahar, muklja te mudara disavi životinja koja mangela te mudarimen (1. Mojsieso 3:21; 9:3; 2. Mojsieso 21:28). Ama, na valjani te ova lošna premalo životinje ja te mudaraljen samo sebepi so isimen čefi te čera odova (Godžalje lafija 12:10).

10. Sar džana soj tano o rat o dživdipe?

¹⁰ Anglo Jehovase jačha o rat tano but važno sose odova tano dživdipe. Ked o Kain mudardža e Avelje, o Jehova vačerdža oljese: „Te phraljeso rat pištini nakro mande kotar Phuv“ (1. Mojsieso 4:10). E Aveljeso rat hine oljeso dživdipe hem o Jehova kaznija e Kaine sebepi so mudardža  e Avelje. Palo Potop, ko Nojeso vakti, o Jehova pana jekh puti mothodža soj tano o rat o dživdipe. O Jehova muklja e Nojese hem oljese familjijače te han mas ando životinje. Ov vačerdža: „Sa o životinje so phirena hem soj tane dživde nek oven tumendže habase. Sa odova dava tumen, sar so dijum tumen hem i zeleno čar.“ Ama, o Jehova vačerdža oljendže so „samo na troman te han o mas oljese duša, kova tano oljese rateja“ (1. Mojsieso 1:29; 9:3, 4).

11. Savi zapovest ando rat o Devel dija e Izraelcendže?

¹¹ Koro 800 berša palo odova so o Jehova vačerdža e Nojese te na hal rat, ov palje vačerdža pe narodose: „Svako manuš ando Izraelese čhave ja disavo jabandžija kova živini maškaro tumende kova astari disavi divljo životinja ja čiriklji, koja šaj te halpe, nek mukel te džal olako rat hem nek učharilje phuvja.“ Palje vačerdža: „Na troman te han o rat“ (3. Mojsieso 17:13, 14). O Jehova hem tegani manglja oljeso narodo te dikhel ko rat sar diso soj tano but važno. On šaj hine te han mas, ama na o rat. Ked mudardže disavi životinja habase, on valjandže te muken te džal olako rat ki phuv.

12. Sar o hrišćanja dikhena ko rat?

¹² Nekobor berša palo Isuseso meribe, o apostolija hem o starešine ki skupština ko Jerusalim, čedijepe te dikhen ko save buča ando zakon kova hine dindo e Izraelcendže, pana valjandže o hrišćanja te ičerenpe (Čitinen Čeriba e apostolengo 15:28, 29; 21:25). O Jehova pomožijaljen te haljon soj tano o rat oljese pana važno. On valjandže hem ponodri te dikhen soj tano o rat but važno. O hrišćanja kola živije ko jekhto veko, na valjandže te han ja te pijen o rat ja te han o mas koljestar o rat na thavdija sa. Ked bi čerena odova, ovela bi odobor lošno isto sar ked bi  klaninenape anglo idolija ja čerena seksualno greh. Kotar tegani o čačutne hrišćanja na mangena te han ja te pijen rat. Sar tano avdije? O Jehova hem avdije mangela te dikha ko rat sar diso soj tano but važno.

13. Sose o hrišćanja na ljena rat prekalji vena?

¹³ Da lji šaj o hrišćanja te ljen rat prekalji vena? Našti. O Jehova dijamen zapovest te na ha ja te na pija rat. Na primer, ako o doktori phenela tuče so našti te pije alkohol, da lji odova značini so šaj te lje o alkohol prekalji vena? Na, našti! Isto adžahar, i zapovest te na ha ja te na pija rat značini so amen na ka la rat prekalji vena. Moljinatu dikh o 29. dodatko.

14, 15. Kobor tano važno te cenina o dživdipe hem te šuna e Jehova?

¹⁴ So ka čera ako o doktori phenela amendže so ka mera ako na laja rat? Svako manuš valjani kokri te birini da lji ka šunel e Devljeso zakon ando rat. O hrišćanja but ceninena o dživdipe kova o Devel dijaljen hem odoljese rodena sar averčhane te sačarenpe te šaj te ačhon dživde. Ama, on na ka ljen rat.

¹⁵ Amen daja sa amendar te arakha amaro sastipe. Ama, sebepi soj tano o rat o dživdipe hem but tano važno e Devljese, amen na ka la rat. Amendže tano považno te šuna e Jehova, nego lji te živina pana disavo vakti, a te na šunalje. O Isus vačerdža: „Ko mangela te arakhi po dživdipe, ka našaljilje, a ko našalji po dživdipe sebepi moklo, ka arakhilje“ (Matej 16:25). Amen šuna e Jehova sose mangajalje. Ov džanela soj tano najšukar amendže. Odoljese ko dživdipe dikha sar so o Jehova dikhela, sar diso soj tano but važno (Jevrejendže 11:6).

16. Sose e Devljese sluge šunena olje?

¹⁶ E Devljese verna sluge čače mangena te šunen oljeso zakon ando rat. On na hana hem na pijena rat, a ni na  ljena o rat te šaj te sačarenpe. * Ama, on ljena avera buča kola dena o doktorija te šaj te ačhon dživde. On verujinena so o Jehova džanela soj tano najšukar oljendže, sose ov čerdžaljen. Da lji verujineja so ov džanela soj tano najšukar tuče?

17. So o Jehova muklja e Izraelcendže te čeren e rateja?

¹⁷ Ko Mojsieso zakon o Jehova vačerdža e Izraelcendže: „Sose i duša e telosi [o dživdipe] tani ano rat hem me dijumlje e oltarese te čistinenpe tumare duše [ja te moljinen te oprostinipe tumendže], sose o rat tano odova so čerela te oven čista sose tani i duša ano oljeste“ (3. Mojsieso 17:11). Ked o Izraelcija grešije, on šaj hine te moljinenpe e Jehovase te oprostini oljendže. Odova čerdže adžahar so dije jekha životinja sar žrtva hem o svešteniko valjandža te čhivel hari rat ko oltari, kova hine ko hram. Samo odova o Jehova muklja e Izrelcendže te čeren e rateja.

18. So šaj te ovelmen sebepi so o Isus dija po dživdipe?

¹⁸ Ked o Isus alo ki Phuv, ov promija o zakon ando životinjska žrtve adžahar so dija po dživdipe, ja po rat, te šaj te oven oprostime amare grehija (Matej 20:28; Jevrejendže 10:1). E Isuseso dživdipe kova dijalje sar žrtva hine odobor but važno, so o Jehova šaj hine te del nada sa e manušendže te oveljen večno dživdipe (Jovan 3:16; Jevrejendže 9:11, 12; 1. Petareso 1:18, 19).

19. So valjani te čera te šaj te ova „čisto kotar sarinengo rat“?

¹⁹ Amen hijam but zahvalna e Jehovase sose dijamen  o dživdipe sar daro. Odoljese manga te vačera e manušendže so ako mothovena vera ko Isus šaj te oveljen večno dživdipe. Amen manga e manušen hem ka da sa amendar te sikavaljen sar te oveljen večno dživdipe (Ezekiel 3:17-21). Tegani šaj te phena odova so pheja hem o apostol Pavle: „Me hijum čisto kotar sarinengo rat, sose na čhinadžum te vačerav tumendže sa so o Devel mangela“ (Čeriba e apostolengo 20:26, 27). Amen čače mothova so cenina o dživdipe hem o rat, adžahar so vačera averendže ando Jehova hem ando odova kobor tano oljese važno o dživdipe.