KED tu čitineja o novine, dikheja televizija ja šuneja radio, tu dikheja hem šuneja but lošna buča ando kriminal, maribe hem terorizam. Šaj isitu muke sebepi so hijan nabormo ja sebepi so mulo tutar džiko kas mangljan.

Puč kokri tut:

• Da lji o Devel mangela maje hem me familjijače asavke pharipa?

• Sar šaj te ikljovav ko krajo me problemenca?

• Da lji ka ovel čače rahati?

I Biblija dela odgovorija ko akala pučiba.

• O manuša na te oveljen više dukha, na te phurjon, ni na te meren (Pučaribe 21:4)

• „O sakato ka ripini sar jelen“ (Isaija 35:6)

• „E korenge jačha ka phravdžon“ (Isaija 35:5)

•  O mulje palje ka oven irime ko dživdipe (Jovan 5:28, 29)

• Nijekh na ka ovel nabormo (Isaija 33:24)

• Svako ki Phuv ka ovelje but habe (Psalam 72:16)

Dži čitijan o prva strane kotar akija knjiga, šaj mislijan soj tane akala buča samo suno. Ama, o Devel dija po lafi so pana hari ka čerel akala promene ki Phuv hem i Biblija vačeri sar ka čerel odova.

I Biblija na vačeri samo akava. Oj vačeri amendže so valjani te džana te šaj te ova čače bahtalje hem sar šaj akana te ovelmen šukar dživdipe. Razmislin ando buča kola čhivenače gajlja. Šaj nane tut pare? Šaj isitu problemija ki ti familjija? Šaj isitu disavo nabormipe? Šaj džiko kas but mangeja mulo tutar? I Biblija šaj te pomožinitu te ikljove ko krajo asavke problemenca. Šaj te zorjačeri tut adžahar so ka deltu odgovorija ko akala pučiba:

• Sose isimen muke?

• Sar šaj te ikljova ko krajo e problemenca?

• Šaj lji amari familjija te ovel bahtalji?

• So ovela ked džiko merela?

• Da lji palje ka dikha amare mangljen so mulje amendar?

• Sose šaj te ova sigurna so o Devel ka čerel sa odova so pheja?

 Odova so čitineja akija knjiga mothovi so tu mangeja te džane so sikavi i Biblija. Akija knjiga ka pomožinitu ko odova. Ko svako odlomko isi pučiba, kola ka pomožinentu te haljove i Biblija pošukar. But manuša tane bahtalje dži vačerena andi Biblija e Jehovase svedokonca. Amen verujina so hem tuče ka ovel adžahar. O Devel nek berečetini odova so deja sa tutar te džane so sikavi tut i Biblija!