OFTOTO ŠERO
Soj tano e Devljeso Kraljevstvo?
1. So o Isus Hrist sikadža pe učenikon?
O ISUS HRIST sikadža pe učenikon sar te moljinenpe. So vačerdža ki odija molitva hem sose tani odija molitva važno amendže?
2. Kola trin važna buča o Isus sikadžamen te moljinamen?
2 O Isus pheja: „Moljinen tumen adžahar: ’Amaro Dad kova hijan ko nebo, te svetinipe to nav. Te avel to Kraljevstvo. Te ovel ti volja sar ko nebo, adžahar hem ki Phuv‘“ (Čitinen Matej 6:9-13). Sose o Isus sikadžamen te moljinamen akalje trine bučendže? Moljinatu dikh o 20. dodatko.
3. So ka sikljova ando Devljeso Kraljevstvo?
3 Amen sikljiljam so e Devljeso nav tano Jehova. Isto adžahar, sikljiljam so mangela o Devel te čerel e manušendže ki Phuv. Ama, ko so o Isus mislija ked pheja: „Te avel to Kraljevstvo“? Amen ka sikljova soj tano e Devljeso Kraljevstvo, so ka čerel hem sar prekalo oljeste ka svetinipe e Devljeso nav.
SOJ TANO E DEVLJESO KRALJEVSTVO
4. Soj tano e Devljeso Kraljevstvo hem koj tano oljeso Kralj?
4 O Jehova čerdža jekh vladavina upre ko nebo hem birija e Isuse te ovel Kralj. Ki Biblija odija vladavina vičinipe e Devljeso Kraljevstvo. O Isus tano „o Kralj e kraljengo hem o Gospodari e gospodarengo“ (1. Timotejese 6:15). O Isus šaj te čerel pobaro šukaripe, kova nijekh manušikano vladari niked na čerdža ni na ka čerel. Ov tano but pozoralo kotar sa o manušikane vladarija.
5. Kotar e Devljeso Kraljevstvo ka vladini hem upro kaste?
5 Saranda dive palo odova ked hine irimo ko dživdipe, o Isus dželo ko nebo. Palo disavo vakti, o Jehova čhidža e Isuse te ovel Kralj (Čeriba e apostolengo 2:33). E Devljeso Kraljevstvo ka vladini kotar nebo upri Phuv (Pučaribe 11:15). Odoljese ki Biblija phenelape so e Devljeso Kraljevstvo tano „nebesko kraljevstvo“ (2. Timotejese 4:18).
6, 7. Sose tano o Isus but pošukar kotar sa o manušikane kraljija?
6 Ki Biblija phenelape so o Isus tano najbaro kotar sa o manušikane kraljija sose tano ov „jedino kova našti te merel“ (1. Timotejese 6:16). Sa o manušikane vladarija merena, ama o Isus niked na te merel. Sa o šukaripe kova o Isus ka čerel ka ovel večno.
7 O Isus ka ovel pravedno Kralj hem ka ovelje vilo svakonese, odoljese e biblijako proročanstvo vačeri: „Upro oljeste ka ovel e Jehovaso duho. Odoljese ov ka ovel mudro, but šukar ka haljol o buča, ka del šukar savet, ka ovel zoralo, ka džanel but buča, hem but ka poštujini e Jehova. Ov ka ovel bahtalo te poštujini e Jehova. Na ka sudini premalo odova so dikhela, ni na ka ukorini premalo odova so šunela. Ov ka sudini pravedno e čorendže“ (Isaija 11:2-4). Da lji mangeja te oveltu asavko Kralj?
8. Sar amen džana so o Isus na ka vladini kokri?
8 O Devel birija nekobor manušen te vladinen e Isuseja ko Devljeso Kraljevstvo. Na primer, o apostol Pavle vačerdža e Timotejese: „Ako izdržina, hem amen ka vladina oljeja sar kraljija“ (2. Timotejese 2:12). Kobor džene ka vladinen sar kraljija e Isuseja?
9. (a) Kobor džene ka vladinen e Isuseja? (b) Ked o Devel počmija te birini oljen?
9 Sar so sikljiljam ko 7. šero, o apostol Jovan dikhlja ki vizija e Isuse sar Kralj ko nebo hem oljeja o 144 000 avera kraljija. Koj tane o 144 000? O Jovan vačerdža so on „isiljen oljeso nav hem oljese Dadeso nav pisimo ko peklje čekatija“. Isto adžahar vačerdža: „On džana palo Bakro kuri god ov džala. On tane činde kotar manuša“ (Čitinen Pučaribe 14:1, 4). Odola 144 000 tane verna hrišćanja kas o Devel birija te „vladinen sar kraljija upri Phuv“ e Isuseja. Ked merena, o Devel delaljen dživdipe ko nebo (Pučaribe 5:10). Pana ko vakti ked živije o apostolija, o Jehova počmija te birini e verno hrišćanen te oven ki odija grupa ando 144 000 kraljija.
10. Sar o Jehova mothodža po mangipe odoljeja so birija e Isuse hem e 144 000 dženen te vladinen upro manuša?
10 O Jehova mothodža so mangela amen odoljeja so muklja o manuša te vladinen e Isuseja. O Isus ka ovel šukar vladari sebepi so haljola amen. Ov džanela sar tano te ove manuš hem te oveltu muke. O Pavle vačerdža so o Isus haljola kobor tano amendže pharo ked hijam slaba sose hem ov hine „iskušimo sar amende ko sa“ (Jevrejendže 4:15; 5:8). Isto adžahar, o 144 000 džanena sar tano odova te ove manuš, te ove nesavršeno hem nabormo. Odoljese šaj te ova sigurna so o Isus hem o 144 000 ka haljoven, na samo sar tano amendže nego hem ko save problemija hijam.
SO KA ČEREL E DEVLJESO KRALJEVSTVO?
11. Sose o Isus sikadža pe učenikon te moljinenpe te čerelpe e Devljesi volja ko nebo?
11 O Isus sikadža pe učenikon te moljinenpe te ovel e Devljesi volja ko nebo. Sar so sikljiljam ko 3. šero o Beng bunisalo protiv o Jehova. Palo odova ked o Beng bunisalo, o Jehova muklja olje hem e anđelen kola na hine verna, e demonen, te ačhon ko nebo disavo vakti. Odoljese na čerdže sare ko nebo e Devljesi volja. Ko 10. šero ka sikljova pobuter ando Beng hem ando demonja.
12. Kola duj važna buča tane mothovde ko Pučaribe 12:10?
12 I Biblija mothovi so palo odova ked o Isus ka ovel Kralj ko Devljeso Kraljevstvo, ov ka podžini ko maribe protiv o Beng (Čitinen Pučaribe 12:7-10). O 10. stih mothovi amendže duj važna buča. Jekhto, e Devljeso Kraljevstvo ka počmini te vladini e Isuseja sar Kralj. Dujto, o Beng ka ovel fordimo ando nebo telje ki Phuv. Akana ka sikljova sar akala duj buča već ulje.
13. So ulo ko nebo ked o Beng hine fordimo?
13 I Biblija mothovi amendže kobor hine bahtalje o verna anđelija ked o Beng hem oljese demonja hine fordime kotar nebo. Ki Biblija pisini: „Oven bahtalje, o nebesija hem tumen kola živinena ko nebesija!“ (Pučaribe 12:12). Akana tano ko nebo baro rahati sose sare ki kupa čerena e Devljesi volja.
Ked o Beng hem oljese demonja hine fordime kotar nebo, tegani ki Phuv počmije sa pobare muke. Odola muke pana hari ka oveljen krajo
14. So ovela ki Phuv sebepi so o Beng hine fordimo kotar nebo?
14 Ama, o dživdipe ki Phuv tano but averčhane. But lošna buča ovena e manušendže „sose o Beng huljislo telje“ hem ov tano „but holjamo, sose džanela so isilje hari vakti!“ (Pučaribe 12:12). O Beng tano but holjamo sose hine fordimo kotar nebo hem džanela so pana hari ka ovel uništimo. Ov dela sa pestar te čerel pharipa, dukha hem muke ki celo Phuv.
15. So o Devel mangela te čerel e Phuvja?
15 Ama, odova so o Devel mangela te čerel e Phuvja na promijape. Ov mangela o savršena manuša te živinen večno ko raj ki Phuv (Psalam 37:29). Sar e Devljeso Kraljevstvo ka čerel čače te ovel odova?
16, 17. So vačeri amendže o Danijel 2:44 ando Devljeso Kraljevstvo?
16 O proročanstvo ando Danijel 2:44 phenela: „Ko dive odolje kraljengo, o Devel ko nebo ka vazdel jekh kraljevstvo kova niked na ka ovel uništimo. Akava kraljevstvo niked na ka nakhel ko avere manušenge vasta. Odova kraljevstvo ka phagel hem ka uništini sa avera kraljevstvija, a samo ov ka ačhol večno.“ So sikavi amen akava proročanstvo ando Devljeso Kraljevstvo?
17 Sar jekhto, vačeri amendže so e Devljeso Kraljevstvo ka počmini te vladini „ko dive odolje kraljengo“. Odova značini so avera vladavine pana ka oven ki Phuv ked o Kraljevstvo ka počmini te vladini. Sar dujto, vačeri amendže so e Devljeso Kraljevstvo ka trajini večno hem niked na te avel aver vladavina ko oljeso than. Sar trito, ka ovel maribe maškaro Devljeso Kraljevstvo hem maškaro vladavine akalje svetoso. E Devljeso Kraljevstvo ka pobedini hem ka ovel jedino vladavina koja ka vladini upri Phuv. Tegani o manuša ka oveljen najšukar vladavina.
18. Sar vičinipe o paluno maribe maškaro Devljeso Kraljevstvo hem maškaro vladavine akalje svetoso?
18 Sar e Devljeso Kraljevstvo ka počmini te vladini upri Phuv? Angljeder te ovel o paluno maribe kova vičinipe Armagedon, o demonja ka hovaven e kraljen „ando celo sveto, te čedenljen e maribase kova ka ovel ko baro dive e Devljeso kova tano Svemoćno“. O manušikane vladavine ka marenpe protiv e Devljeso Kraljevstvo (Pučaribe 16:14, 16). Moljinatu dikh o 10. dodatko.
19, 20. Sose valjani amendže e Devljeso Kraljevstvo?
19 Sose valjani amendže e Devljeso Kraljevstvo? Najhari ando trin razlogija. Sar jekhto, amen hijam grešna, odoljese naborsaljova hem mera. Ama, i Biblija vačeri so ko Devljeso Kraljevstvo amen ka živina večno. Ko Jovan 3:16 pisini: „Odoljese so o Devel odoborkha manglja o sveto ov dija pe jedinobijande Čhave, a sa kola mothovena vera koro oljeste te na oven uništime, nego te oveljen večno dživdipe“.
20 Sar dujto, amendže valjani e Devljeso Kraljevstvo sose hijam maškaro lošna manuša. But džene hovavena hem čerena nemoral. Amen našti te čera ništa te cidaljen, ama o Devel ka čerel odova. O manuša kola čerena lošna buča ka oven uništime ko Armagedon (Čitinen Psalam 37:10). Sar trito, amendže valjani e Devljeso Kraljevstvo sose o manušikane vladavine naneljen moć, lošna tane hem ljena talo vas. On na mangena te pomožinen e manušendže te šunen e Devlje. Ki Biblija pisini so „o manuš vladini upro manuš ko oljeso lošnipe“ (Vačerutno 8:9).
21. Sar e Devljeso Kraljevstvo ka čerel te ovel e Devljesi volja ki Phuv?
21 Palo Armagedon, e Devljeso Kraljevstvo ka čerel te ovel e Devljesi volja ki Phuv. Na primer, ov ka cidel e Benge hem oljese demonen (Pučaribe 20:1-3). Nijekh na te ovel nabormo ja te merel. Sebepi so o Isus dija po dživdipe, sa o verna manuša šaj te živinen večno ko raj ki Phuv (Pučaribe 22:1-3). E Devljeso Kraljevstvo ka čerel te svetinipe e Devljeso nav. So odova značini? Odova značini so sa o manuša ka slavinen e Jehovaso nav ked e Devljeso Kraljevstvo ka vladini upri Phuv. Moljinatu dikh o 21. dodatko.
KED O ISUS ULO KRALJ?
22. Sar džana so o Isus na ulo Kralj ked hine ki Phuv ja odma ked hine irimo ko dživdipe?
22 O Isus sikadža pe učenikon te moljinenpe: „Te avel to Kraljevstvo“. Akava mothovi amendže so e Devljeso Kraljevstvo valjani henez te avel. O Jehova prvo valjandža te čerel po Kraljevstvo hem te čhivel e Isuse te ovel Kralj. Da lji o Isus odma ulo Kralj ked irijape ko nebo? Na, ov valjandža te adžičeri. Disavo vakti palo odova so o Isus hine irimo ko dživdipe, o Petar hem o Pavle pheje so o lafija ando Psalam 110:1 ispunijepe upro Isus. Ko odova proročanstvo o Jehova vačerdža: „Beš ki miklji desno strana, dži na čhivava te dušmanen talo te pre“ (Čeriba e apostolengo 2:32-35; Jevrejendže 10:12, 13). Kobor vakti o Isus valjandža te adžičeri te šaj o Jehova te čhivelje te ovel Kralj?
E Devljeso Kraljevstvo ka čerel te ovel e Devljesi volja ki Phuv
23. (a) Ked o Isus počmija te vladini sar Kralj ko Devljeso Kraljevstvo? (b) So ka sikljova ko enjato šero?
23 But vakti angljeder o 1914. berš jekh grupa ando verna manuša haljilje so ko odova berš ka ispuninipe jekh but važno proročanstvo andi Biblija. O buča so ulje ko sveto kotar 1914. berš mothodže so on vačerdže o čačipe. Ko odova berš o Isus počmija te vladini sar Kralj (Psalam 110:2). Palo odova, o Beng hine fordimo ki Phuv hem akana „isilje hari vakti“ (Pučaribe 12:12). Ko enjato šero, pobuter ka sikljova kotar buča kola mothovena so živina ko vakti ando kova vačeri i Biblija. Isto adžahar, ka sikljova so e Devljeso Kraljevstvo pana hari ka čerel te ovel e Devljesi volja ki Phuv. Moljinatu dikh o 22. dodatko.
