O Jehova čerdža vrt ko jekh than kova vičindža pe Eden. Odova vrt hine pherdo razno luludžencar, kaštencar hem životinjencar. Palo odova, o Devel andi phuv čerdža e prvo manuše, e Adame, hem phudindža ljese ko nak. Džaneja li so ulo tegani? O Adam ulo dživdo manuš! O Jehova dindža lje zadatko te brinini pe ando vrt hem te čhivel nava sa e životinjendže.

O Jehova phendža e Adamese diso but važno: „Šaj te ha ando sa o kašta, ama ando jekh kaš na ismineja te ha. Ako haja oljestar, ka mere.“

Palo disavo vreme, o Jehova phendža: „Ka čerav pomoćnica e Adamese.“ Tegani ov čerdža o Adam hor te sovel, ljelja ljestar jekh rebro hem čerdža ljese romnja. Oj vičindža pe Eva. Adžahar, o Adam hem i Eva ulje i prvo porodica. Da li e Adamese sviđindža pe i Eva? Ov hine odobor radosno  so phendža: „Dikh so čerdža o Jehova ando mo rebro! Konačno neko koj tano slično sar mande.“

O Jehova phendža e Adamese hem e Evače te ovel ljen čhave hem te pheren i phuv e manušencar. Ov manglja on te oven bahtalje dži zajedno čerena celo phuv te ovel raj, sar so hine o edensko vrt. Ama, na hine adžahar. So ulo? Odoljestar ka sikljova ki aver priča.