O Jovan, e Zaharijaso hem e Jelisavetako čhavo, ulo prorok ked barilo. O Jehova dindža lje zadatko te vačeri e narodose so pana hari o Mesija ka avel. O Jovan na sikavdža e manušen ko sinagoge ja ko dizja, nego propovedindža ki pustinja. But manuša ando Jerusalim hem andi celo Judeja alje te šunen lje. Ov sikavdža ljen so mora te čhinaven te čeren o lošna buča ako mangena te ugodinen e Jehovase. Odoljese but manuša pokajindže pe aso grehija kola čerdže hem o Jovan krstindža ljen ki reka Jordan.

O Jovan živindža but jednostavno. Akhardža šeja kola hine čerde ando e kamilake bala hem halja skakavcija hem divljo avdžin. Odoljese o manuša pučlje pe savo manuš tano o Jovan. Čak, hem o ponosna fariseja hem o sadukeja alje te dikhen lje. O Jovan phendža ljendže: „Mora te menjinen tumen hem te pokajinen tumen. Ma mislinen so hijen diso posebno samo odoljese so phenena so hijen e Avrahamese čhave. Odova na značini so čače hijen hem e Devljese čhave.“

But džene alje ko Jovan hem pučlje lje: „So valjani te čera te šaj te ugodina e Devljese?“ O Jovan odgovorindža ljendže: „Ako isi tumen duj šeja, den jekh okoljese kova nane lje.“ Džaneja li sose phendža odova? Manglja te sikavi ljen so ako mangena te ugodinen e Devljese, mora te mangen avere manušen.

O Jovan phendža e poreznikonendže: „Oven poštena hem ma čoren ando manuša.“ A e vojnikonendže phendža: „Nikastar ma ljen o pare zorjea hem nikas ma optužinen hovavindoj.“

 Isto adžahar, disave sveštenikija hem Levitija alje ko Jovan te pučen lje: „Ko hijan tu? Sare mangena te džanen odova.“ O Jovan phendža ljendže: „Me hijum o glaso kova avela andi pustinja hem pomožinava e manušendže te oven popaše e Jehovaja sar so prorokujindža o Isaija.“

E manušendže sviđindža pe odova so sikavdža ljen o Jovan. But džene mislindže so o Jovan hine o Mesija. Ama, ov phendža ljendže: „Avela neko koj tano pobaro mandar. Me na hijum dostojno oljese sandale te phravav. Me krstinava panjeja, a ov ka krstini e sveto duhoja.“