Nakhlje pobuter ando 400 berš sar hine čerde o zidija ko Jerusalim. Paše uzi akija diz, živindža o sveštenik o Zaharija hem oljesi romni i Jelisaveta. On hine but vreme ko brako, ama na hine ljen čhave. Jekh dive dži o Zaharija thardža tamjan andre ko hram, pojavindža pe ljese o anđeo, o Gavrilo. Ov but darandilo, ama o Gavrilo phenža ljese: „Ma dara. Anava tuče šukar haberi kotar Jehova. Ti romni, i Jelisaveta, ka bijani murše kova ka vičini pe Jovan. O Jehova birindža lje aso jekh važno zadatko.“ O Zaharija pučlja: „Sar šaj te verujinav ko odova? Me hem mi romni hijam but phure te ovel amen čhave.“ O Gavrilo phendža: „O Devel bičhaldža man te vačerav tuče akava haberi. Ama, odoljese so na verujindžan maje, na ka šaj te vačere sa dži na bijandžola o čhavo.“

O Zaharija ačhilo ko hram pobuter nego so obično ačhola hine. Ked konačno ikljilo, o manuša so hine odothe manglje te džanen so ulo. Ama, o Zaharija naštindža te vačeri. Ov šajindža samo te čerel znakija pe vastencar. Tegani o manuša haljilje so o Zaharija dobindža disavi poruka kotar Devel.

Palo disavo vreme, i Jelisaveta ačhilji khamni hem bijandža murše, baš sar so phendža o anđeo. Oljengi familija hem oljenge amala alje te dikhen e beba. On hine but bahtalje sebepi Jelisaveta. Oj phendža ljendže: „Oljeso nav ka ovel Jovan.“ Tegani on phendže lače: „Ama, niko ki amari familija na vičini pe Jovan. Nek vičini pe Zaharija, sar oljeso dad.“ Ama, o Zaharija ljelja jekh tikni ploča hem pisindža: „Oljeso nav tano Jovan.“ Kotar odova trenutko, o Zaharija paljem šajindža te vačeri! O manuša andi celo Judeja šundže aso akava čhavo hem pučlje pe: „So ka ovel oljeja ked ka barjol?“

O Zaharija pherdo sveto duhoja vačerdža jekh proročanstvo: „Nek ovel hvalimo o Jehova. Ov obećindža e Avrahamese so ka bičhalji e Mesija,  kova ka spasini amen. O Jovan ka ovel prorok, hem ka phravel o drumo e Mesijase.“

Nešto posebno ulo hem e Marijače, koja hine e Jelisavetaki rođaka. So hine odova? Te dikha ki aver priča.