O Isus šajindža te sačari e nabormen hem te uskrsnini e muljen, ama isto adžahar šajindža te kontrolišini i bavlal hem o boršim. Ked završindža pi molitva ki planina, o Isus dikhlja so ko Galilejsko more tani oluja. Oljese apostolija hine ko čamco kova borini pe protiv i bavlal. O Isus huljilo telje hem počmindža te phirel upro pani premalo čamco. Ked o apostolija dikhlje so neko phirela upro pani, but darandilje. Ama, o Isus phendža ljendže: „Ma daran, me hijum!“

O Petar phendža ljese: „Gospode, ako čače hijan tu, phen maje te avav koro tute.“ O Isus phendža ljese: „Ava koro mande!“ Adžahar, ki odija oluja, o Petar ikljilo ando čamco hem počmindža te phirel upro pani te džal premalo Isus. Ama, ked alo paše uzo ljeste, dikhlja i bari oluja hem darandilo. Počmindža te tasljol ko pani. Tegani phendža: „Gospode, spasin man!“ O Isus doljindža lje kotar vas hem phendža ljese: „Sose darandiljan? Nane tut li vera?“

O Isus hem o Petar ukljilje ko čamco, hem odmah i oluja terdilji. Šaj li te zamisline sar osetindže pe o apostolija? On phendže e Isusese: „Tu čače hijan e Devljeso Čhavo.“

Akava na hine prvo puti so o Isus utičindža ko vreme. Jekh puti, ked o Isus hem o apostolija dželje e čamcoja ki aver strana ando more, olje ljelja o sojbe ko čamco. Dži ov suča, kotar jekh puti ulji bari oluja. O talasija khuvena hine ko čamco, hem ov pherdilo panjeja. O apostolija vičindoj vazdindže e Isuse ando sojbe hem phendže ljese: „Učitelju, ka mera! Pomožin amendže!“ O Isus uštilo hem phendža e morese: „Smirin tut!“ Ko odova momenti, i bavlal hem o more smirindže pe. O Isus pučlja e apostolen: „Kaj tani tumari vera?“ On tegani phendže jekh jekhese: „Čak i bavlal hem o more šunena lje.“ O apostolija haljilje so ako isi ljen baro poverenje ko Isus, tegani na valjani nisostar te daran.