O fariseja čerdže sa te šaj te oduševinen e manušen. On čerdže šukar buča te šaj avera te dikhen ljen. Isto adžahar, molindže pe ko thana kuri sa o manuša šajindže te dikhen ljen. O fariseja sikljilje bare molitve ki godi, hem ponovindže ljen ko sinagoge hem ko ulice te šaj avera te šunen ljen. Odoljese o manuša čudindže pe ked o Isus phendža ljendže: „Ma molinen tumen sar o fariseja. On mislinena so e Devljese ka sviđini pe so koristinena but lafija, ama nane adžahar. I molitva tani maškaro tute hem o Jehova. Ma vačeren uvek ista lafija. O Jehova mangela te vačeren ljese sar osetinena tumen.“

„Ače, sar te molinen tumen: ’Dade amaro, kova hijan ko nebo, te svetini pe to nav. Te avel to Kraljevstvo. Te ovel ti volja sar ko  nebo, adžahar hem ki phuv.‘“ Isto adžahar, o Isus phendža ljendže te molinen pe te ovel ljen maro odolje divese hem te oven ljendže oprostime o grehija hem ando avera buča kola valjani ljendže.

O Isus phendža: „Uvek molinen tumen hem ponodri roden kotar tumaro Dad, o Jehova, šukar buča. Svako roditelj mangela te del šukar buča pe čhavendže. Ako to čhavo tutar rodela maro, da li ka de lje bar? Ja ako rodela tutar mačho, da li ka de lje sap?“

Palo odova, o Isus phendža so šaj te sikljon akaljestar: „Ako tumen džanena te den šukar buča tumare čhavendže, kobor poviše tumaro Dad, o Jehova, ka del tumen sveti duh! Samo valjani te roden ljestar odova.“ Da li čereja odova? Aso kola buča molineja tut e Jehovase?