O Isus birindža 12 apostolija hem palo odova huljilo kotar i planina ko jekh than kuri hine but manuša. On alje kotar Galileja, Judeja, Tir, Sidon, Sirija hem andi aver strana kotar i reka Jordan. On andže e manušen kola hine naborme hem koljen mučindže o demonja. O Isus sačardža sarinen hem palo odova bešlja hem počmindža te sikavi ljen. Ov objasnindža so valjani te čera ako mangaja te ova paše e Devljeja. Valjani te haljova so našti bizo Jehova hem so valjani te sikljova te manga lje. Ama, našti te manga e Devlje ako na mangaja e manušen. Mora te ova šukar hem poštena sarinencar, čak hem okoljencar kola na ponašinena pe amencar šukar.

O Isus phendža: „Na valjani te mangen samo tumare amaljen. Valjani te mangen hem tumare dušmanen hem viljestar te oprostinen e manušendže. Ako neko holjani upro tumende, sigate džan koro ljeste hem izvininen tumen. Ponašinen tumen sar so mangena on te ponašinen pe tumencar.“

 Isto adžahar, o Isus dindža šukar savetija e manušendže ando materijalna buča. Ov phendža: „Považno tano te ove amal e Jehovaja, nego te ove but barvalo. O pare šaj te čoren tutar, ama o amaljipe e Jehovaja niko našti te čorel tutar. Ma brininen tumen so ka han, so ka pijen ja so ka uraven. Dikhen e čirikljen. O Devel uvek brinini pe odoljestar te ovel ljen so te han. Ako but brininena tumen, odova na ka pomožini tumen pobuter te živinen. Ma bistren, o Jehova džanela so valjani tumendže.“

O manuša niked na šundže nekas ko vačeri sar o Isus. Oljenge verska vođe na sikavdže ljen adžahar. Sose o Isus hine odobor šukar učitelj? Odoljese so sa so sikavdža ljen alo kotar Jehova.