Deš dive palo odova so o Isus irindža pe ko nebo, oljese učenikija dobindže o sveti duh. Odova ulo ki Pedesetnica 33. berš ki amari era. O manuša kotar na odova dive, alje ko Jerusalim, ko praznik. Upre ki soba ko jekh čher, čedisalje 120 manuša kola hine e Isusese učenikija. Kotar jekhvar ulo diso so na očekujindže. Upro oljenge šere pojavindža pe diso so izgledindža sar i jag hem on počmindže te vačeren but avera čhibja. Ki soba šundilo zoralo zvuko andi bavlal.

O manuša kola alje kotar avera phuvja ko Jerusalim šundže o zvuko hem odmah prastandilje ko odova čher te dikhen so ulo. But iznenadisalje ked šundže so o učenikija vačerena avere čhibjencar. On phendže: „Akala manuša tane andi Galileja. So ulo odova ked on šaj te vačeren ko amare čhibja?“

Palo odova, o Petar hem avera apostolija ikljilje anglo manuša. O Petar vačerdža e manušendže sar o Isus hine mudardo hem sar o Jehova vazdindža lje kotar mulje. Ov phendža ljendže: „Akana,  o Isus tano ko nebo, ki desno strana e Devljese, hem ov dindža amen o sveti duh kova obećindža amendže. Odoljese tumen dikhljen hem šundžen sa akala čudija.“

O lafija kola o Petar vačerdža e manušendže pogodindže ljen ko vilo hem odoljese on pučlje: „So valjani amen te čera?“ O Petar phendža ljendže: „Pokajinen tumen hem krstinen tumen ko e Isuseso nav. Tegani hem tumen ka dobinen o sveti duh.“ Odova dive, krstindže pe koro 3 000 manuša. Kotar odova dive, ko Jerusalim hine sa pobuter hem pobuter učenikija. O sveti duh pomožindža ljen te organizujinen e učenikonen ko grupe, koljen vičindže skupštine. Adžahar šajindže polokho te sikaven ljen sa odova so o Isus manglja on te džanen.