Paše uzo Vavilon hine jekh diz koja vičindža pe Ur. Ki odija diz, o manuša služindže avere devljendže, a na e Jehovase. Ama, ko Ur živindža jekh manuš kova služindža samo e Jehovase. Oljeso nav hine Avraham.

O Jehova phendža e Avrahamese: „Mukh to čher hem ti familija hem dža ki phuv koja ka mothovav tuče.“ Palo odova, o Devel obećindža ljese: „Tutar ka ovel baro narodo, hem prekalo tute ka čerav šukaripe bute manušendže ki celo phuv.“

O Avraham na džandža kaj valjani te džal, ama hine lje poverenje ko Jehova. O Avraham, oljesi romni i Sara, oljeso dad o Tara hem oljese phraljeso čhavo o Lot čedindže pe buča hem poslušno podžindže ko baro drumo.

 O Avraham hine lje 75 berš ked pe porodicaja reslja ki phuv koja o Jehova manglja te del lje. Odija phuv vičindža pe Hanan. Uduri o Devel obećindža e Avrahamese: „Celo akija phuv so dikheja, ka dav la te čhavendže.“ Ama, o Avraham hem i Sara hine phure hem na hine ljen čhave. Sar o Jehova ka ispunini akava obećanje?