O Izraelcija hine robija hem morandilje te čeren phari buti. O Jehova bičhaldža e Mojsije hem e Arone ko faraon te phenen ljese: „Mukh me narodo te džal ki pustinja te del maje žrtva.“ O faraon ponosno phendža: „So interesini man so phendža o Jehova. Na ka mukhav e Izraelcen.“ Tegani, o faraon čhivdža ljen te čeren pana pophari buti. Alo o vreme o Jehova te mothovi e faraonese koj tano o Devel. Džaneja li sar čerdža odova? Ov čerdža ko Egipat te oven deš nevolje. O Jehova phendža e Mojsijese: „O faraon na šunela man. Tajsa, rano sabalje, ov ka ovel ki reka Nil. Dža koro ljeste hem phen ljese so celo pani ki reka Nil ka ovel rat, odoljese so na mukhlja me narodo te ikljol.“ O Mojsije šundža lje hem dželo ko faraon. O faraon dikhlja sar o Aron khuvela e kašteja ko Nil hem i reka ulji rat. Oj počmindža lošno te mirišini, o mačhe koro late mulje hem više naštindža te pijel pe pani olatar. Ama, o faraon pana na mukhlja e Izraelcen te džan.

 Palo efta dive, o Jehova paljem bičhaldža e Mojsije te phenel e faraonese: „Ako na mukheja me narodo te džal, tegani celo Egipat ka ovel pherdo žabencar.“ O Aron vazdindža o kaš hem celo phuv počmindža te pherdžol žabencar. O manuša arakhlje e žaben ko pe čhera, ko krevetija hem ko čare. O žabe hine svugde! O faraon phendža e Mojsijese te molini e Jehova te čhinavi akija nevolja. Ov obećindža so ka mukhel e Izraelcen te džan. Adžahar, o Jehova čhinavdža i nevolja, hem o Egipćanja čedindže sa e žaben so mulje. I phuv počmindža lošno te mirišini. Ama, o faraon paljem na mukhlja e Izraelcen te džan.

Tegani o Jehova phendža e Mojsijese: „O Aron valjani te khuvel e kašteja ki phuv hem andi prašina ka oven komarcija.“ Ando jekh puti svugde hine komarcija. Disave ando e faraonese sluge phendže ljese: „Akija nevolja tani ando Devel.“ Ama, o faraon hem akava puti na manglja te mukhel e Izraelcen te džan.