Ko Egipat, e Jakovesi porodica ulji pendžardi sar Izraelcija. Palo e Jakoveso hem e Josifeso meribe, počmindža te vladini nevo faraon. Ov darandilo so o Izraelcija ka oven pozoralje ando Egipćanja. Odoljese, akava faraon čerdža o Izraelcija te oven robija. Ov čhivdža ljen te čeren cigle hem te čeren but phari buti ko njive. Ama, iako o Egipćanja mučindže ljen, o Izraelcija hine sa poviše džene. E faraonese na sviđindža pe odova, odoljese naredindža te mudaren pe sa o izraelska murša so ka bijandžon. Šaj li te zamisline kobor darandilje o Izraelcija?

Jekh Izraelka koja vičindža pe Johaveda bijandža but šuže murše. Te šaj te zaštitini lje, čhivdža lje ki jekh korpa hem garavdža lje maškar o trske ki reka Nil. E bebaki phen, i Marija, bešlja ki strana te dikhel so ka ovel oljeja.

E faraonesi čhaj alji te nandžol ki reka hem dikhlja i korpa. Andre arakhlja e beba sar rovela hem but žalindža la. I Marija pučlja la:  „Mangeja li te arakhav tuče romnja koja ka dojini čhave?“ Ked e faraonesi čhaj prihvatindža odova, i Marija dželji hem vičindža pe daja, e Johaveda. E faraonesi čhaj phendža lače: „Lje akalje beba hem arakh la, me ka platinav tuče odoljese.“

Ked o čhavo hari barilo, i Johaveda igardža lje ki e faraonesi čhaj. Oj čhivdža ljeso nav Mojsije hem barjačerdža lje sar pe čhave. O Mojsije barilo ko e faraoneso čher hem šaj hine te ovel lje sa so manglja. Ama, o Mojsije niked na bisterdža e Jehova. Ov džandža soj tano Izraelco, a na Egipćanin. Ov birindža te služini e Jehovase.

Ked hine lje 40 berš, o Mojsije odlučindža te pomožini pe narodose. Jekh dive, ked dikhlja sar jekh Egipćanin marela jekhe Izraelco, o Mojsije khuvdža e Egipćane odobor zoralje so mudardža lje. Palo odova, garavdža e manušeso telo ki pošik. Ama, ked o faraon šundža so čerdža o Mojsije, manglja te mudari lje. Odoljese, o Mojsije našlja ki phuv Madijan. O Jehova brinindža pe oljestar uduri.