Koro duj masek sar dželje ando Egipat, o Izraelcija reslje dži i planina Sinaj hem phravdže peklje šatorija. O Mojsije hine ki planina hem o Jehova phendža ljese: „Me spasindžum e Izraelcen. Ako šunena man hem ako ičerena me zakonja, ka oven mo posebno narodo.“ Ked o Mojsije irindža pe telje ko Izraelcija phendža ljendže e Jehovase lafija. Sar reagujindže? Sare phendže: „Ka čera sa so ka phenel amendže o Jehova.“

O Mojsije paljem ukljindža ki planina. Uduri o Jehova phendža ljese: „Palo trin dive, paljem ka vačerav tuvaja. Vačer e narodose te na ukljel upre ki planina Sinaj.“ Palo odova, o Mojsije huljindža telje ko Izraelcija hem vačerdža ljendže te oven spremna sose ka šunen e Jehovaso glaso.

Palo trin dive, o Izraelcija dikhlje jekh tamno oblako upri planina, a isto adžahar dikhlje hem šundže sar grmini hem o zvuk andi šing. Tegani o Jehova alo ki planina sar jag. O Izraelcija tresindže andi dar. Celo planina počmindža te tresini hem hine učhardi čuroja. O zvuko andi šing hine sa pozoralo hem pozoralo. Tegani o Devel phendža: „Me hijum o Jehova. Na ismineja te služine avere devljendže.“

O Mojsije paljem dželo ki planina hem o Jehova dindža lje zakonja kuri hine pisimo sar o narodo valjani te služini ljese hem sar te ponašini pe. O Mojsije pisindža akala zakonja hem čitindža ljen e Izraelcendže. Sarine obećindže: „Ka čera sa so vačeri amendže o Jehova.“ On dindže lafi e Jehovase, ama da li ičerdže pe ko po lafi?