Ki celo hanansko phuv šundilo so ulo ko Jerihon. O kraljija ando Hanan čedindže pe zajedno te borinen pe protiv o Izraelcija. Ama, o Gavaoncija hine ljen aver plan. Uravdže o purane šeja, dželje ko Isus Navin hem phendže ljese: „Amen avaja dural. Šundžam e Jehovase hem sa so čerdža tumendže ko Egipat hem ko Moav. Obećinen amendže so na ka napadinen amen hem ka ova tumare sluge.“

O Isus Navin verujindža akalje manušendže hem obećindža ljendže so na ka napadinen ljen. Ama, palo trin dive šundža so on na avena dural, nego ando Hanan. O Isus Navin pučlja ljen: „Sose hovavdžen amen?“ On odgovorindže: „Amen darandiljam, sose džanaja so o Jehova tumaro Devel borini pe tumendže. Molinaja tumen, ma mudaren amen.“ O Isus Navin čerdža odova so obećindža hem na mudardža ljen.

Palo disavo vreme, čedindže pe pandž hananska kraljija te napadinen e Gavaoncen. O Isus Navin hem oljesi vojska phirdže  celo rat te džan te spasinen ljen. O maribe počmindža rano sabalje. O Hanancija počmindže te našen ko sa o strane. Ama, ando Jehova naštindže te našen, ov mukhlja ljendže kukudi. Palo odova, o Isus Navin molindža pe e Jehovase te čerel o kham te ačhol ko jekh than. Sose rodindža odova ando Jehova, ked džandža so niked angljeder na desindža pe diso adžahar? Odoljese so o Isus Navin hine lje poverenje ko Jehova! Hem čače o kham ačhilo ko jekh than sa dži o Izraelcija na pobedindže e hanansko kraljen hem oljenge vojnikonen.