But Izraelcija paljem počmindže te služinen e idolendže, odoljese o Jehova mukhlja o Filistejcija te vladinen upro ljende. Ama, hine disave Izraelcija kola manglje e Jehova. Jekh oljendar hine o Manoje. Ov hem oljesi romni na hine ljen čhave. Jekh dive, o Jehova bičhaldža jekhe anđele ki e Manojesi romni. O anđeo phendža lače: „Ka ovel tut čhavo. Ov ka spasini e Izraelcen ando Filistejcija hem ka ovel nazirej.“ Da li džaneja ko hine o nazireja? On hine e Jehovase sluge kola hine ljen posebna zadatkija. Isto adžahar, o nazireja na ismindže te čhinen pe bala.

Palo disavo vreme, o Manoje dobindža murše hem čhivdža ljeso nav Samson. Ked o Samson barilo, o Jehova dindža lje bari snaga. Ov šaj hine te mudari e lave peklje vastencar! Jekh puti, o Samson kokri mudardža 30 Filistejcen. O Filistejcija mrzindže lje hem rodindže način sar te mudaren lje. Jekh rat, dži o Samson suča ki Gaza, on dželje anglo e dizjake udara hem adžičerdže lje odothe te šaj te mudaren lje sabalje. Ama, ki ekvaš i rat o Samson uštindža, dželo ko e dizjake udara hem ikaldža o udara ando zido. Ljelja o udara ko pe pike hem akhardža ljen upre ki planina paše uzo Hevron!

Hari palo odova, o Filistejcija dželje ki e Samsonesi džuvlji, i Dalila hem phendže lače: „Svako amendar ka del tut but srebrenikija ako saznajindžan sose tano o Samson odobor zoralo. Mangaja te astara lje hem te čhiva lje ko zatvor.“ I Dalila prihvatindža te čerel odova, sose manglja te ljel o pare. Ki početka, o Samson na manglja te vačeri sose tano odobor zoralo. Ama, oj pučlja lje stalno sa dži na vačerdža lače pi tajna. Ov phendža lače: „Me bala niked na čhindžum, me hijum nazirejco. Ako čhinava me bala ka našalav mi snaga.“ O Samson but grešindža so phendža lače pi tajna, nane li adžahar?

 I Dalila odmah phendža e Filistejcendže: „Džanava oljesi tajna!“ Oj sovljačerdža e Samsone ki pi angalja hem palo odova vičindža nekas te čhinen ljese bala. I Dalila tegani vičindža: „Samson, o Filistejcija tane akate!“ Ked o Samson uštilo, na hine lje više snaga. O Filistejcija astardže lje, korjačerdže lje hem čhivdže lje ko zatvor.

Jekh dive, but Filistejcija čedindže pe ko hram ando po devel, kova vičindža pe Dagon. On počmindže te vičinen: „Amaro devel dindža amen e Samsone! Ikaljen e Samsone te asa amendže oljeja!“ On čhivdže lje te terdžol maškar o duj stubija hem počmindže te asan ljese. O Samson vičindža: „Jehova, molinava tut, samo pana jekh puti de man snaga.“ Dži tegani, e Samsonese bala paljem barilje. Ov gurindža e hramese stubija sa pe snagaja hem celo hram rušindža pe. Sa o manuša kola hine odothe mulje, ama mulo hem o Samson.