I Jezavelja but holjandža ked šundža so ulo e Valese prorokonendže. Oj bičhaldža i poruka e Ilijase: „Tajsa, ka ove mudardo sar e Valese prorokija.“ O Ilija but darandilo hem odoljese našlja ki pustinja. Ov molindža pe: „Jehova, našti više te izdržinav. Mangava te merav.“ O Ilija hine umorno hem ljelja lje o sojbe talo jekh kaš.

Jekh anđeo vazdindža lje ando sojbe hem phendža ljese: „Hajde, ušti hem ha.“ Tegani o Ilija dikhlja i pogača koja hine peki upro tate bara hem jekh khoro pani. Ov halja maro, pilja pani hem paljem suča. O anđeo paljem vazdindža lje ando sojbe hem phendža ljese: „Ha, sose valjani tuče snaga aso drumo ko kova ka dža.“ Odoljese, o Ilija halja pana hari maro. Palo odova, ov podžindža ko drumo kova trajindža 40 dive hem 40 rača, sa dži na reslja ki planina Horiv. Odothe o Ilija khuvdža ki jekh pećina te sovel. Ama, o Jehova pučlja lje: „So čereja akate Ilija?“ O Ilija odgovorindža ljese: „O Izraelcija na ičerdže pe ko odova so obećindže tuče. On uništindže te oltarija hem mudardže te prorokonen. A akana hem man mangena te mudaren.“

O Jehova phendža ljese: „Dža hem terdžov ki planina anglo Jehova.“ Tegani počmindža te phudel zoralji bavlal. Palji bavlal, hine zemljotres hem palo odova, hine jag. Ko krajo, o Ilija šundža prijatno hem tiho glaso. Tegani o Ilija učhardža po muj pe ogrtačeja hem ikljilo andi pećina. O Jehova pučlja lje sose našlja. O Ilija phendža: „Samo me ačhiljum dživdo.“ Ama, o Jehova phendža ljese: „Na hijan samo tu. Ko Izrael isi pana 7 000 manuša so služinena maje verno. Dža hem čhiv e Jeliseje te ovel proroko ko toklo than.“ O Ilija odmah dželo te čerel odova so phendža ljese o Jehova. So mislineja, da li o Jehova ka pomožini tut ako čereja odova so ov rodela tutar? Ja, ka pomožini tut. Hajde te dikha so ulo ko Izrael dži na dželo boršim.