O Jehova mangela te penđare le pošukar. So pobuter ka sikljove olestar, savo tano premalo manuša hem so mangela te ćerel e manušenđe, pana pobuter ka mange te ove oleso amal. Šaj li ćaće te ove e Devleso amal? (Čitinen Psalam 25:14.) So šaj te ćere te šaj te ove oleso amal? I Biblija dela amen odgovorija ko akala pućiba hem mothovi sose o amalipe e Jehovaja tano o najvažno amalipe kova šaj te ovel amen.

1. So o Jehova phenela tuće te ćere?

„Oven popaše e Devleja, hem ov ka ovel popaše tumencar“ (Jakovljeva 4:8). So značini akava? O Jehova vićini tut te ove oleso amal. Disavenđe tano pharo te verujinen so šaj te oven amala e Devleja, odolese so našti te dikhen le. Ama, ko po Lafi, ki Biblija, o Jehova mothovđa amenđe sa so valjani te đana olestar te šaj te ova olese amala. Ked ki Biblija čitinaja ando Devel, amen ovaja pana popaše oleja iako niked na dikhljam le.

2. Sose tano o Jehova o najšukar amal kova šaj te ovel tut?

Niko na mangela tut pobuter ando Jehova. Ov mangela te ove bahtalo hem te rode lestar pomoć ked god valjani tuće. Tu šaj te forde te brige „koro leste sose ov brinini pe tutar“ (1. Petrova 5:7). O Jehova tano uvek spremno te pomožini, te utešini hem te šunel pe amalen. (Čitinen Psalam 94:18, 19.)

3. So o Jehova ađićeri kotar pe amala?

O Jehova mangela sa e manušen, ama „paše tano okolencar kola isi len iskreno vilo“ (Poslovice 3:32). O Jehova ađićeri kotar pe amala te trudinen pe te ćeren o buća aso kola ov phenela soj tane šukar hem te na ćeren o buća aso kola ov phenela soj tane lošna. Disave mislinena so on našti te ićeren pe ko odova. Ama, o Jehova haljola len. Ov prihvatini svakone kova ćaće mangela le hem dela sa pestar te šunel le (Psalam 147:11; Dela apostolska 10:34, 35).

 SIKLJOV POBUTER

4. O Avraham hine e Jehovaso amal

Odova so ki Biblija pisini ando Avraham (Avram) pomožini amenđe te haljova so značini te ova e Devlese amala. Čitinen Postanak 12:1-4. Palo odova, vaćeren ando akala pućiba:

• So o Jehova phenđa e Avrahamese te ćerel?

• So o Jehova obećinđa lese?

• So o Avraham ćerđa?

5. So o Jehova rodela kotar pe amala?

Amen obično mangaja amare amala te ćeren amenđe diso.

• So bi mangeja te amala te ćeren tuće?

Čitinen 1. Jovanova 5:3, hem palo odova vaćeren ando akava pućibe:

• So o Jehova rodela kotar pe amala?

Ako mangaja te šuna e Jehova, amen šaj valjani te menjina amaro ponašanje hem amari ličnost. Čitinen Isaija 48:17, 18, hem palo odova vaćeren ando akava pućibe:

• Sose o Jehova rodela ando pe amala te menjinen pe?

 6. So o Jehova ćerela pe amalenđe?

 SO SIKLJILJAM

O Jehova mangela te ovel to amal hem ov ka pomožini tuće te ove paše oleja.

Te ponovina

• Sar o Jehova pomožini pe amalenđe?

• Sose o Jehova rodela ando pe amala te menjinen pe?

• Da li mislineja so o Jehova but rodela ando pe amala? Sose mislineja ađahar?