14. LEKCIJA
Sar o Devel mangela te služina olese?
Sar so vaćerđam ki dešutrito lekcija, o Devel na prihvatini sa o religije. Ama, amen šaj te ćera e Devle bahtalo, ađahar so ka služina olese ko ispravno način. Sar o Devel mangela te služina lese? (Jakovljeva 1:27, fusnota). Dikh so i Biblija vaćeri odolestar.
1. Sar šaj te đana kova tano ispravno način te služina e Devlese?
Odova šaj te sikljova andi Biblija. Ked molinđa pe, o Isus phenđa e Devlese: „To lafi tano ćaćipe“ (Jovan 17:17). Disave religije na ićerena pe ko odova so pisini ko Devleso Lafi. On ićerena pe ko odova so o manuša sikavena hem ko olenge običaja. Ama, o Jehova na mangela okolen kola na ićerena pe ko olese zapovestija. (Čitinen Marko 7:9.) Ki aver strana, amen ćeraja e Devle bahtalo ked ićeraja amen ko odova so pisini ko oleso Lafi.
2. Sar valjani te služina e Jehovase?
Amen valjani te ova verna samo e Jehovase sose ov tano amaro Stvoritelj (Otkrivenje 4:11). Odova značini so valjani te manga le hem te služina samo olese hem so na valjani te koristina o kipija hem o ikone. (Čitinen Isaija 42:8.)
Amen valjani te služina e Jehovase ađahar sar so ov rodela (Rimljanima 12:1). Odova značini so valjani te ićera amen ko olese zakonija. Na primer, okola kola mangena e Jehova šunena olese savetija aso brak. Isto ađahar, on ceninena po životi hem odolese na maćovena, na koristinena droga ja cigare. a
3. Sose valjani te služina e Jehovase avere manušencar?
Ko amare sastankija isi amen prilika te „hvalina e Jehova. . . maškaro but manuša kola ćedinđe pe“ (Psalam 111:1, 2). Jekh način sar ćeraja odova tano ađahar so đilabaja đilja e Devlese. (Čitinen Psalam 104:33.) O Jehova rodela amendar te ova ko sastankija sose mangela amen. Ov đanela so odova so sikljovaja uduri ka pomožini amen te dobina večno životi. Ked hijam ko sastankija šaj te zorjaćera jekh jekhe.
SIKLJOV POBUTER
Sikljov sose o Jehova na mangela te koristina o kipija hem o ikone. Dikh ko kola važna načinija šaj te hvalina e Devle.
4. Na valjani te koristina o kipija hem o ikone
Sar đanaja so o Devel na mangela odova? Dikhen o VIDEO hem palo odova vaćeren ando akava pućibe:
-
Ko purano vreme, disave ando Devleso narodo manglje te služinen olese ađahar so ćerđe jekh idoli. Sar o Devel dikhlja ko odova?
Disave manuša mislinena so ka oven popaše e Devleja ako koristinena o ikone hem o kipija. Ama, da li odova ćerela len popaše e Devleja ili durjaćeri len olestar? Čitinen Izlazak 20:4-6 hem Psalam 106:35, 36, hem palo odova vaćeren ando akala pućiba:
-
Da li dikhljan kola religiozna predmetija o manuša koristinena?
-
So o Jehova mislini odolestar?
-
So mislineja, da li valjani te koristina odola religiozna predmetija?
5. Oslobodime hijam ando hovavne sikljoviba
Ked služinaja e Jehovase ko ispravno način, tegani hijam oslobodime ando hovavne sikljoviba. Sar? Dikhen o VIDEO.
Čitinen Psalam 91:14, hem palo odova vaćeren ando akava pućibe:
-
So o Jehova ka ćerel okolenđe kola mangena le hem služinena samo olese?
6. Služinaja e Devlese ko amare sastankija
Ked đilabaja hem daja komentarija ko sastankija, tegani hvalinaja e Jehova hem zorjaćeraja jekh jekhe. Čitinen Psalam 22:22, hem palo odova vaćeren ando akala pućiba:
-
Sar upro tute utičini ked šuneja averenge komentarija?
-
Da li mangeja te pripremine tut te de komentari?
7. O Jehova tano bahtalo ked vaćeraja averencar ando odova so sikljiljam
Šaj te ovel amen but prilike te vaćera averencar odolestar so sikljiljam. Čitinen Psalam 9:1 hem 34:1, hem palo odova vaćeren ando akava pućibe:
-
So mangeja te vaćere averenđe ando odova so sikljiljan andi Biblija?
AKO NEKO PHENELA: „Amen hijam grešna manuša hem našti te ćera odova so o Devel rodela amendar.“
-
So tu mislineja odolestar?
SO SIKLJILJAM
O Devel tano bahtalo ked služinaja samo olese, ked hvalinaja le ko sastankija hem ked vaćeraja averencar ando odova so sikljiljam olestar.
Te ponovina
-
Sar šaj te đana kova tano ispravno način te služina e Devlese?
-
Sose valjani te služina samo e Jehovase?
-
Sose valjani te služina e Jehovase avere manušencar?
RODE POBUTER
Čitin o iskustvo „Više na koristinava o idolija“ hem dikh kobor jekh romni hine bahtali ked ćhinavđa te koristini o idolija.
„I Biblija pomožini e manušenđe te menjinen po životi“ (Stražarska kula, 1. jul 2011)
Čitin so šaj te pomožini tuće te de komentarija ko sastankija.
„Hvalin e Jehova ko sastankija“ (Stražarsko kula, januar 2019)
Dikh sar o sastankija pomožinđe jekhe terne manušese iako na hine lese lokho te avel ko sastankija.
But hrišćanija koristinena o krst. Da li hem amen valjani te koristina le?
„Sose e Jehovase svedokija na koristinena o krst?“ (članko ko amaro sajt)
a Ando akala teme ka vaćera ko avera lekcije.
Dikhen hem akava
NAJČEŠĆA PUČIBA
Sar izgledini jekh biblijako kurs ando Jehovase svedokija?
O proučibe tano besplatno, šaj te koristinen o prevod andi Biblija kova tumen mangena hem ko kurs šaj te vićinen celo tumare porodica ja nekas ando tumare amala.
