38. LEKCIJA
Mothov so cenineja o životi
O životi tano but šužo. Čak hem ked isi amen problemija, amen šaj te uživina ko disave buća. Sar šaj te mothova so ceninaja o životi? Sose valjani te ćera odova?
1. Sose valjani te cenina o životi?
O Jehova, amaro Dad, dinđa amen o životi sose but mangela amen. Odolese valjani te cenina le. Olestar „avela o životi“ (Psalam 36:9). „Ov kokri sarinenđe dela životi hem dah hem sa aver“ (Dela apostolska 17:25, 28). O Jehova dela amen sa so valjani amenđe aso životi. Ama, ov ćerela hem diso pobuter, dela amen hem te uživina ko životi. (Čitinen Dela apostolska 14:17.)
2. Sar šaj te mothova e Jehovase so ceninaja o životi?
Kotar dive ked ti daj aćhilji khamni, o Jehova brinini pe tutar. O David, e Devleso verno sluga, phenđa e Jehovase: „Te jaćha dikhlje man pana đi hijum le ko me dajako vođi“ (Psalam 139:16). E Jehovase tano to životi but vredno. (Čitinen Matej 10:29-31.) Ole but dukhala ked neko mudari nekas ja kokri pes a (Izlazak 20:13). Isto ađahar, e Jehova but dukhala ked ćeraja disave buća sebepi kola šaj te našala amaro životi ja ked na vodinaja računi ando averengo životi. Ked brininaja amen ando amaro životi hem poštujinaja averengo, tegani mothovaja so ceninaja odova šužo poklon kova dinđa amen o Jehova.
SIKLJOV POBUTER
Dikh sar šaj te mothove so cenineja o životi.
3. Arakh to sastipe
Ked predajinđam amaro životi e Jehovase, tegani phenđam so ka koristina amaro životi te služina olese. Sebepi so valjani te da amaro „telo sar žrtva“ e Devlese, amen valjani te arakha amaro sastipe. Čitinen Rimljanima 12:1, 2, hem palo odova vaćeren ando akala pućiba:
-
Sose valjani te arakhe to sastipe?
-
Sar šaj te ćere odova?
4. Pazin ko toklo hem ko averengo životi
I Biblija phenela amenđe te cida amen ando buća sebepi kola šaj te našala amaro životi. Dikhen o VIDEO kova mothovi sar šaj te arakhe toklo hem averengo životi.
Čitinen Poslovice 22:3, hem palo odova vaćeren sar te arakhe toklo ja averengo životi. . .
-
ked hijan ćhere?
-
ked hijan ki buti?
-
ked ćheleja disavo sport?
-
ked tu ja neko aver vozini vorda?
5. Poštujin o životi ando ćhavo kova pana na bijandilo
Ando Davidese lafija dićhola so o Jehova brinini pe ando ćhavo kova tano pana ko pe dajako vođi hem dikhela sar ov barjola. Čitinen Psalam 139:13-17, hem palo odova vaćeren ando akava pućibe:
-
Ked počmini o životi anglo Jehovase jaćha: ked i daj aćhola khamni ja ked o ćhavoro bijanđola?
O Jehova e Izraelcenđe dinđa zakon kova arakhlja e dajen hem olenge ćhaven kola pana na bijandilje. Čitinen Izlazak 21:22, 23, hem palo odova vaćeren ando akala pućiba:
-
Sar o Jehova dikhlja upro manuš kova na manglja namerno te mudari e ćhavore kova pana na bijandilo?
-
Sar o Jehova dikhlja upro manuš kova namerno mudarđa e ćhavore kova pana na bijandilo? b
-
So tu mislineja odolestar?
Čak iako i romni đanela kobor tano o životi važno, disavo puti šaj te mislini so jedino so šaj te ćerel tano te čistini pe. Čitinen Isaija 41:10, hem palo odova vaćeren ando akala pućiba:
-
Ako neko e romnja ćhivela zorjeja te čistini pe, kastar šaj te rodel pomoć? Sose?
AKO NEKO PHENELA: „Me na mangljum, ama morandiljum te čistinav man.“
-
So uverini tut so o Jehova cenini hem e dajako hem e ćhavoreso životi?
SO SIKLJILJAM
I Biblija sikavi amen so valjani te manga, te poštujina hem te arakha amaro hem averengo životi, sose o Jehova dinđa amen o životi sar poklon.
Te ponovina
-
Sose tano o životi but vredno e Jehovase?
-
Sar tano e Jehovase ked neko mudari nekas ja kokri pes?
-
Sose tu cenineja o životi?
RODE POBUTER
Sar šaj te mothova so hijam zahvalna e Jehovase aso životi kova dinđa amen?
Da li o Devel ka oprostini jekha romnjaće koja čistinđa pe? Dikh so vaćeri odolestar e Devleso Lafi.
„So e Devleso Lafi vaćeri ando odova ked i romni čistini pe?“ (članko ko amaro sajt)
Akana ked đaneja sar o Devel dikhela ko životi, dikh sar odova valjani te utičini ki amari zabava hem rekreacija.
„O ekstremna sportija – da li te rizikujinen?“ (Probudite se!, 8. oktobar 2000)
So ako avela tuće ki godi te mudare tut? Dikh sar šaj e Devleso Lafi te pomožini tut.
„Šaj li i Biblija te pomožini man ked avela maje ki godi te mudarav man?“ (članko ko amaro sajt)
a O Jehova brinini pe ando manuša kola tane phage vilese (Psalam 34:18). Ov haljola kola osećanja šaj jekhe manuše te legaren đi odova te mangel te mudari pe. Ov mangela te pomožini asavke manušese. Ako mangeja te đane sar ov dela snaga nekase te cidel pestar odova andi godi, dikh o članko „Šaj li i Biblija te pomožini man ked avela maje ki godi te mudarav man?“ Odova članko šaj te arakhe ko deo Rode pobuter ki akija lekcija.
b Ako angleder čistinđan tut, ma mukh o osećaj andi krivica te mudari tut. O Jehova šaj te oprostini tuće. Ako mangeja te đane pobuter, dikh o članko „So e Devleso Lafi vaćeri ando odova ked i romni čistini pe?“ Odova članko šaj te arakhe ko deo Rode pobuter ki akija lekcija.
Dikhen hem akava
NAJČEŠĆA PUČIBA
Sar izgledini jekh biblijako kurs ando Jehovase svedokija?
O proučibe tano besplatno, šaj te koristinen o prevod andi Biblija kova tumen mangena hem ko kurs šaj te vićinen celo tumare porodica ja nekas ando tumare amala.
