44. LEKCIJA
Sar o Devel dikhela ko proslave hem ko praznikija?
O Jehova mangela amen te uživina ko životi, čak hem te slavina diso. Ama, da li sa o praznikija hem o proslave sviđinena pe olese? Sar šaj hem ko akava te mothova so mangaja e Jehova?
1. Sose o Jehova na mangela disave proslave?
Šaj ka ove iznenadimo ked ka šune so but manuša slavinena o praznikija ja ićerena o proslave kola nane premalo Devleso Lafi ja kolen slavinđe o manuša kola na služinđe e Devlese. Asavke proslave avena ando religije kola lađaćerena e Devle. Ko disave proslave o manuša ićerena pe ko but običaija. Avera proslave ićerena pe sose o manuša verujinena so i duša niked na merela ja so odola proslave ka anen lenđe bahtalipe (Isaija 65:11). Ama, o Jehova phenela pe slugenđe: „Odvojinen tumen. . . hem ma pipinen ništa soj tano melalo“ (2. Korinćanima 6:17). a
2. Sar o Jehova dikhela ko proslave kolencar vazdela pe dijekh manuš?
O Jehova phenela amenđe so na valjani te „uzdajina amen upro manuša.“ (Čitinen Jeremija 17:5.) Disave praznikija ja proslave o manuša ićerena sose mangena te mothoven čast disave vladarese ja disave manušenđe kola hine ko mariba. A avera praznikija vazdena e država ja olake simbolija, sar soj tani i zastava ja o dive ked odija država ulji nezavisno (1. Jovanova 5:21). Disave praznikija slavinena sose mangena te vazden disavi političko ja društveno organizacija. So mislineja, sar o Jehova osetini pe ked neko vazdela disave manuše ja disavi organizacija, posebno ako ćerena odova so ov na mangela?
3. Sar o manuša ponašinena pe ko disave proslave?
I Biblija osudini o zabave kuri svako ćerela so mangela hem ked neko but pijela (1. Petrova 4:3). Ko disave proslave, o manuša nane len nisavi kontrola hem ćerena razna nemoralna buća. Ako mangaja te aćhova e Jehovase amala, valjani te ova dur kotar asavke buća.
SIKLJOV POBUTER
Ked razmislineja da li te đa ki disavi proslava ja te ićere disavo praznik, dikh so šaj te pomožini tuće te ane odluke kola ka radujinen e Jehova.
4. Ma ićer o proslave kola o Jehova na mangela
Čitinen Efešanima 5:10, hem palo odova vaćeren ando akala pućiba:
-
Sostar valjani te razmislina angleder te odlučina da li ka slavina disavo praznik ja da li ka ićera disavi proslava?
-
So slavinena o manuša odothe kuri tu živineja?
-
So mislineja, da li odola praznikija ja proslave sviđinena pe e Jehovase?
Da li nekad pućljan tut sar o Jehova dikhela ko rođendanija? Ki Biblija na pisini so disavo oleso sluga slavinđa po rođendan. Oj vaćeri ando duj manuša kola na služinđe e Jehovase, a slavinđe po rođendan. Čitinen Postanak 40:20-22 hem Matej 14:6-10. Palo odova vaćeren ando akala pućiba:
-
Kola buća tane zajednička aso akala rođendanija?
-
Premalo akava so čitinđan andi Biblija, sar o Jehova dikhela ko rođendanija?
Ama, šaj pućeja tut: „Da li tano e Jehovase ćaće važno da li ka đav ko disavo rođendan ja ki disavi proslava? Čitinen Izlazak 32:1-8. Palo odova, dikhen o VIDEO hem vaćeren ando akala pućiba:
-
Sose valjani te đana kola praznikija ja proslave o Jehova mangela, a kola na?
-
Sar šaj te đana odova?
Sar te đana da li o Devel mangela disavi proslava?
-
Da li temeljini pe ko disavo sikljovibe kova na avela andi Biblija? Puć tut kotar avela odova praznik ja odija proslava.
-
Da li ko odova praznik vazdela pe disavo manuš, disavi organizacija ja disavo državno simboli? Amen slavinaja samo e Jehova hem verujinaja so ov ka rešini sa o problemija.
-
Da li ko odova praznik ja ki odija proslava isi disavo običaj kova nane premalo biblijake načelija? Valjani te cida amen ando asavke buća.
5. Pomožin averenđe te poštujinen odova ko so verujineja
Ked ti porodica vićini tut te slavine olencar disave praznikija, šaj te ovel but pharo te objasnine lenđe sose tu na ćereja odova. Ama, de sa tutar te ove strpljivo hem mothov so poštujineja len. Dikhen o VIDEO kova mothovi sar šaj te ćere odova.
Čitinen Matej 7:12, hem palo odova vaćeren ando akala pućiba:
-
Premalo akava stih, da li valjani te vaćere te porodicaće so on na valjani te slavinen o praznikija?
-
Sar šaj te mothove teklenđe so mangeja len hem so poštujineja len, iako na slavineja olencar o praznikija?
6. O Jehova mangela te ova bahtale
O Jehova mangela te uživina amare porodicaja hem amare amalencar. Čitinen Propovednik 8:15, hem palo odova vaćeren ando akava pućibe:
-
Sar akava stih mothovi so o Jehova mangela te ova bahtale?
O Jehova mangela te uživina ked hijam averencar. Dikhen o VIDEO kova mothovi sar amare phralja uživinena ko amare međunarodna kongresija.
Čitinen Galatima 6:10, hem palo odova vaćeren ando akala pućiba:
-
Da li valjani te slavina o praznikija te šaj te ćera diso šukar averenđe?
-
Ked hijan pobahtalo: ked mora te de poklon sebepi disavo praznik ja ked deja sebepi so mangeja?
-
E Jehovase svedokija podijekh puti organizujinena disavi zabava pe ćhavenđe hem ćinena lenđe poklonija. Ako isi tut ćhave, so šaj te ćere te šaj on te oven bahtale?
AKO NEKO PHENELA: „Nane važno kotar avela disavo praznik ja disavi proslava. Važno tano te uživine te porodicaja hem te amalencar.“
-
So bi tu pheneja ko odova?
SO SIKLJILJAM
O Jehova mangela te uživina amare porodicaja hem amare amalencar. Ama, ov phenela hem so valjani te cida amen ando praznikija ja proslave kola ov na mangela.
Te ponovina
-
Sar šaj te đana da li o Jehova mangela te slavina disavo praznik?
-
Sar šaj te objasnina amare porodicaće ja amare amalenđe sose na slavinaja o praznikija?
-
Sar đanaja so o Jehova mangela te ova bahtale hem te uživina ko životi?
RODE POBUTER
Čitin kola praznikija o prava hrišćanija na slavinena.
„Sose e Jehovase svedokija na slavinena disave praznikija?“ (članko ko amaro sajt)
Dikh štar razlogija sose o Devel na mangela te slavina o rođendanija.
„Sose e Jehovase svedokija na slavinena o rođendanija?“ (članko ko amaro sajt)
Dikh sar o ćhave šaj te radujinen e Jehovaso vilo.
Milionija hrišćanija na slavinena o Božić. Sose anđe asavki odluka?
„On arakhlje diso pošukar“ (Stražarska kula, 1. decembar 2012)
a Dikh o 5. dodatko te šaj te đane so valjani te ćere ked o manuša slavinena disavo praznik.
Dikhen hem akava
NAJČEŠĆA PUČIBA
Sar izgledini jekh biblijako kurs ando Jehovase svedokija?
O proučibe tano besplatno, šaj te koristinen o prevod andi Biblija kova tumen mangena hem ko kurs šaj te vićinen celo tumare porodica ja nekas ando tumare amala.
