Lil ando Vodeće telo
„Valjani te oven učiteljija“ (Jevr. 5:12). Zamislin odova! O Jehova, o najšukar Učitelj ko celo svemir, vićini amen te sikava averen olestar! Odija tani bari čast hem odgovornost, bilo te ćera odova ki porodica, ki skupština ja ki služba. So ka pomožini amen te ova šukar učiteljija?
O odgovor šaj te arakha ko Pavlese lafija kola pisinđa e Timotejese: „De sa tutar te čitine anglo avera, te ohrabrine hem te sikave averen.“ Isto ađahar, o Pavle pisinđa: „Ked ćereja odova ka spasine hem tut hem okolen so šunena tut“ (1. Tim. 4:13, 16). I vest koja vaćereja averenđe šaj te spasini olengo životi. Odolese, but tano važno te sikljove pošukar te čitine hem te sikave. Akija brošura tani ćerdi te pomožini tut ko odova. Aće nekobor buća kola isi koro late.
Ki svako strana isi jekh biblijako stih ko kova isi načelo ja primer kova tano povezimo e lekcijaja
O Jehova tano „Veličanstveno Učitelj“ (Is. 30:20). Iako akija brošura ka pomožini tut pošukar te čitine hem te sikave, niked ma bistri so i vest koja vaćeraja avela ando Jehova hem so ov privucini e manušen koro peste (Jov. 6:44). Odolese, uvek molin tut e Jehovase te del tut po sveti duh. So pobuter koristin e Devleso Lafi. Niked ma privucin i pažnja koro tute, nego uvek de i slava e Jehovase. Pomožin averenđe te barjaćeren po mangipe premalo Jehova.
Isi tut čast te vaćere i najvažno vest koja tani dindi e manušenđe. Uverime hijam so šaj te uspine ko odova ako oslonineja tut „ki snaga koja dela o Devel“ (1. Petr. 4:11).
Te saradnikija,
O Vodeće telo ando Jehovase svedokija
