Oko panđ milijarde manuša dikhena e sportisten ando 206 phuvja kola učestvujinena ko Olimpijska igre ko 2024. berš. O predsedniko ando Međunarodno olimpijsko komiteti, o Tomas Bah, phenđa: „Amen hijam deo ando jekh događaj kova mothovi so sa o manuša valjani te živinen ko mir hem ko jekhipe iako hijam averćhane jekh jekhestar“.

 Da li šaj o Olimpijska igre te anen o ćaćutno mir hem o jekhipe ki phuv?

 O Olimpijska igre kola ićerena pe akava berš tane diso pobuter ando sport. Odola igre mothovena so o rasizam, i religiozno diskriminacija, i nejednakost hem odova so na poštujinena pe e manušenge pravija, ulavena e manušen.

 Naravno, o Olimpijska igre sigurno zabavinena e manušen. Ama, akava događaj mothovi so o manuša razmislinena hem postupinena ko način kova ulavi len jekh jekhestar hem na ćerela len te oven ko jekhipe.

 I Biblija mothovi sose tano odobor pharo e manušenđe te oven ko jekhipe (2. Timoteju 3:1-5). Ako mangeja pobuter te đane ando akava e biblijako proročanstvo, čitin o članko „Da li je Sveto pismo proreklo kakvi će ljudi danas biti?“

 I Biblija mothovi so ka anel o mir hem o jekhipe ki phuv. Ko Devleso Lafi pisini so ked ka vladini e Devleso Kraljevstvo, sa o manuša ki phuv ka oven ko jekhipe (Luka 4:43; Matej 6:10).

 O kralj ando odova Kraljevstvo, o Isus Hrist, ka anel mir ko celo sveto. Ki Biblija pisini:

•   „Ka niconen o pravednikija, ki celo phuv ka vladini o mir“ (Psalam 72:7).

•   „Ov ka izbavini e ćororen kola rodena lestar pomoć [...] Ka izbavini len ando manuša kola mangena te povredinen len hem kola mučinena len“ (Psalam 72:12, 14).

 Čak hem avdije, e Isusese sikljoviba pomožinđe e manušenđe ando 239 phuvja te oven ko jekhipe. Ko celo sveto, e Jehovase svedokija sikljilje te živinen ko mir. Ako mangeja te đane sar, čitin i Stražarsko kula „Ked i mržnja više na ka ovel.“