O maribe ki Ukrajina hem o klimatska promene, ćerena te ovel sa pohari hrana ko celo sveto. Odova tano posebno pharo ko phuvja kuri o manuša nane len dovoljno hrana.

•   Ko 17. jul 2023 berš, o generalno sekretari ando Ujedinjena nacije, o Antonio Guteres, phenđa: „Sebepi o maribe, o klimatska promene hem o bare cene ko sveto, sa pohari proizvodini pe hrana.“

•   „O stručnjakija mislinena so odova so i Rusija cidinđa pe ando sporazum te biknel o điv, ka anel đi odova te ovel pohari hrana hem te ovel poskupo ko ćorore phuvja, posebno ko severno deo andi Afrika hem ko Blisko istok.“ (Atalayar.com, 23. jul 2023)

 Dikh so i Biblija vaćeri ando odova.

•   O Isus prorekninđa: „Ka uštel o narodo upro narodo hem o kraljevstvo upro kraljevstvo, ka oven bokhalipa hem zemljotresija ko razna thana“ (Matej 24:7).

•   I Biblija, ki knjiga Otkrivenje, vaćeri ando štar simbolična jahačija. Jekh ando odola jahačija predstavini o maribe. Palo leste avela aver jahači kova predstavini o bokhalipe, o vreme ked na ka ovel but hrana hem ked ka ovel but skupo te ćinel pe. Ko Otkrivenje 6:5, 6 pisini: „Tegani dikhljum jekhe kale graste hem upro leste e jahače kova hine le vaga ko vas. Hem šunđum diso sar glaso [...] sar vaćeri: ’I mera ando điv aso denar hem trin mere ando ječam aso denar! A o ulje hem o vino trošin pohari!‘“

 Akala e biblijake proročanstvija ispuninena pe već akana, ko vreme aso kova i Biblija phenela „poslednja dive“ (2. Timoteju 3:1). Ako mangeja te đane pobuter ando poslednja dive hem ando štar jahačija kotar Otkrivenje, dikh o video O sveto but menjinđa pe kotar 1914. berš hem čitin o članko „Šta predstavljaju jahači Apokalipse?“

•   Ki Biblija isi praktična savetija kola šaj te pomožinen amenđe te istrajina ked hijam ko disave phare okolnostija, sar soj tano ked barjona o cene andi hrana hem ked isi bokhalipa. Dikh disave primerija ko članko „Kako živeti s manje novca.“

•   Isto ađahar, i Biblija dela amen nada so ka avel pošukar vreme. Oj obečini so „ki phuv ka ovel pherdo điv“ hem so sarine ka ovel len but hajbase (Psalam 72:16). Ako mangeja te đane pobuter andi akija nada hem sose šaj te verujine ko odova, čitin o članko „Prava nada u bolje sutra.“